Ore i mexü̃ ga Luca ümatüxü̃ 21
21
Yutecüarü ãmare i Tupanana naxãxü̃
(Mr. 12.41-44)
1Rü yexguma Tupanapatawa nayexmagu ga Ngechuchu, rü yéma nüxü̃ nadau ga duü̃xü̃gü ga idiẽruã́xü̃ ga Tupanapataarü diẽruchixü̃gu ngĩxü̃ naxǘgüxü̃ ga norü ãmare ga diẽru.
2Rü ngĩxü̃ nadau ta ga wüxi ga ngecü ga yutecü ga ngearü diẽruã̱xcü ga Tupanapataarü diẽruchixü̃gu taxretachinü ga íraxüchicü ga diẽru ngĩxü̃ ixücuchicü.
3Rü ñanagürü ga Ngechuchu: —Aixcüma pemaxã nüxü̃ chixu rü ñaa ngecü i yutecü i ngearü diẽruã̱xcü rü guxü̃ i togü i diẽru ngĩxü̃ ixãgüxü̃arü yexera ngĩxü̃ ixã.
4Erü guxü̃ma i togü rü ngĩxü̃ inaxã i ngẽma nüxü̃́ íyaxügücü. Natürü ngĩma ngĩxü̃́ natauxyane ngĩxü̃ ixã i guxcüma i ngĩxü̃́ ngẽxmacü i ngĩrü õnatanü —ñanagürü.
Ngechuchu nüxü̃ nixu nax Tupanapata ga taxü̃negu tá napogüexü̃
(Mt. 24.1-2; Mr. 13.1-2)
5Rü ñuxre ga norü ngúexü̃gü rü nidexagü nachiga ga Tupanapata rü ñuxãcü nax namexẽchixü̃ ga naxtapü̱x ga nutanaxca̱xgü, rü nax namexẽchixü̃ ga guxü̃ma ga gumá Tupanapata ga taxü̃nearü nga̱xãẽruü̃gü ga duü̃xü̃gü nüxna ãmarexü̃. Rü yexguma ga Ngechuchu rü ñanagürü:
6—Rü nawa tá nangu i ngunexü̃gü i guxü̃netama ya daa Tupanapata ya nüxü̃ pedauxü̃ne, rü tá nagu napogüe. Rü naxtapü̱xarü nutagü rü taxucütama nügüétü naxüxüra, rü bai ya wüxi —ñanagürü.
Cua̱xruü̃gü i tá nüxü̃ idauxü̃ naxü̃pa nax nagúxü̃ i naane
(Mt. 24.3-28; Mr. 13.3-23)
7Rü yexguma ga norü ngúexü̃gü rü Ngechuchuna nacagü, rü ñanagürügü: —Pa Ngúexẽẽruxü̃x, ¿ñuxgu tá nixĩ i nangupetüxü̃ i ngẽma nüxü̃ quixuxü̃? ¿Rü ta̱xacüwa tá nüxü̃ tacua̱x nax paxa tá nangupetüxü̃ i ngẽma? —ñanagürügü.
8Rü Ngechuchu rü ñanagürü: —¡Pexũãxẽgü nax taxuxü̃táma pexü̃ womüxẽẽxü̃ca̱x! Erü muxũchixü̃ tá chauégagu ínangugü rü ñanagürügü tá: “Choma nixĩ i Cristu, rü paxa tá nagu̱x i naane”, ñanagürügü tá. ¡Natürü taxũtáma nüxü̃́ peyaxõgü!
9Rü ngẽxguma tá nüxü̃ pexĩnüegu nax nügü nada̱i̱xü̃ i wüxi i nachixü̃ane to i nachixü̃anemaxã, rüe̱xna nüxü̃ pexĩnüegu nax wüxi i nachixü̃anewatama rü duü̃xü̃gü rü norü ãẽ̱xgacümaxã nügü nada̱i̱xü̃, ¡rü taxũtáma peba̱i̱xãchie! Erü ngẽmaãcü tá nangupetü i noxrix. Natürü taxũta naanearü gu̱x nixĩ i ngẽma.
10Erü wüxi i ãẽ̱xgacüarü churaragü rü to i ãẽ̱xgacüarü churaragümaxã tá nügü nadai. Rü wüxi i nachixü̃ane rü to i nachixü̃anemaxã tá nügü nadai.
11Rü nümaxü̃ i nachixü̃anegüwa rü poraãcü tá naxĩã̱xãchiane, rü poraãcü tá nangu̱x i taiya, rü tá nataxüchi i da̱xaweane. Rü duü̃xü̃gü rü daxũwa tá nüxü̃ nadaugü i ta̱xacü i namaxã naba̱i̱xãchiexü̃ rü taxü̃ i cua̱xruü̃gü.
12Natürü naxü̃pa i guxü̃ma i ngẽma rü duü̃xü̃gü tá pexü̃ ínayauxü̃, rü tá pewe ningẽxü̃tanü. Rü ngutaque̱xepataü̃güwa tá pexü̃ nagagü nax ngéma pexna nacagüxü̃ca̱x, rü tá pexü̃ napoxcue. Rü nachixü̃anegüarü ãẽ̱xgacügüpe̱xewa tá pexü̃ nagagü, nagagu nax chorü duü̃xü̃gü pixĩgüxü̃.
13Rü ngẽmaãcü tá pexü̃́ natauxcha nax ãẽ̱xgacügümaxã nüxü̃ pixuxü̃ i chauchiga.
14Rü ngẽxguma tá ngéma pexü̃ nagagügu, ¡rü taxṹ i pexoegaãẽgüxü̃ naxca̱x nax ta̱xacümaxã tá penangãxü̃xü̃ nax pegüétüwa pechogüxü̃ca̱x!
15Erü choma tá pexü̃ charüngü̃xẽxẽxü̃ nax nüxü̃ pecuáxü̃ca̱x nax ta̱xacümaxã penangãxü̃xü̃ i perü uanügü. Rü nümagü rü taxũtáma nüxü̃ nacua̱xgü nax ta̱xacümaxã pexü̃ nangãxü̃güxü̃ i ngẽxguma.
16Natürü i pema rü woo penatügü, rü peégü, rü peenexẽgü, rü peeya̱xgü, rü petanüxü̃, rü pemücügü rü tá napeechitaegü nax ãẽ̱xgacügüxü̃tawa pexü̃ íyaxuaxü̃güxü̃. Rü ñuxre i pemax rü tá pexü̃ nadai.
17Rü guxü̃ i naanewa rü duü̃xü̃gü tá pexchi naxaie nagagu nax chorü duü̃xü̃gü pixĩgüxü̃.
18Natürü woo ta̱xacü pexü̃ üpetügu rü Tupaname̱xẽwa tá pengẽxmagü, rü nüma tá pexü̃ ínapoxü̃ rü bai i wüxi i peyae tá inayarütaxu.
19Rü ngẽxguma aixcüma peyaxõgüamagu rü tama choxü̃ ípeta̱xgu, rü tá penayauxgü i maxü̃ i taguma gúxü̃.
20Rü ngẽxguma nüxü̃ peda̱u̱xgu nax perü uanügüarü churaragü Yerucharéü̃xü̃ íchomaeguãchixü̃, rü ngẽmawa tá nüxü̃ pecua̱x nax paxa tá nagu napogüexü̃ ya yima ĩane.
21Rü yíxema Yudéaanewa ngẽxmagüxe rü name nixĩ i ma̱xpǘneanewa tabuxmü. Rü yíxema Yerucharéü̃wa ngẽxmagüxe rü tanaxwa̱xe nax paxa ítachoxü̃xü̃. Rü yíxema tümaanewa ngẽxmagüxe rü tama name nax ĩaneca̱x tawoeguxü̃.
22Erü ngẽma ngunexü̃gügu tá ínangu i Tupanaarü poxcu. Rü ngẽmaãcü tá nayanguxẽxẽ i guxü̃ma i ngẽma norü ore i ümatüxü̃wa nüxü̃ yaxuxü̃.
23Rü ngẽma ngunexü̃gügu rü tá poraãcü tüxü̃́ naguxcha ya yíxema ngexegü ya itacharaü̃güxe rü yíxema imaixacügüxe. Erü tá nangẽxma i taxü̃ i ngúxü̃, rü Tupana rü poraãcü tá nanapoxcue i ngẽma duü̃xü̃gü.
24Rü norü uanügü rü taramaxã tá nanadai i ñuxre. Rü togü, rü tá ínanayauxü̃ nax to i nachixü̃anewa nagagüãxü̃ca̱x. Rü ñu̱xũchi i ngẽma norü uanügü rü tá nagu napogüe ya yima ĩane ya Yerucharéü̃. Rü ngẽmaãcü tá nangupetü ñu̱xmatáta nawa nangu i ngẽma ngunexü̃ i nagu Tupana ínawoxü̃xü̃ i ngẽma uanügü.
Tupana Nanearü taeguchiga
(Mt. 24.29-35, 42-44; Mr. 13.24-37)
25Rü ngẽxguma rü tá nango̱x i cua̱xruxü̃gü. Rü üa̱xcü rü tauemacü rü woramacurigü rü tá nixĩgachitanü i nachicawa. Rü guxü̃ i nachixü̃anegüwa rü duü̃xü̃gü rü tá nanaxĩ̱xãchiãẽtanü rü tá naba̱i̱xãchie i ngẽxguma poraãcü naxãũgaãchigu i már arü yuapegü.
26Rü duü̃xü̃gü rü norü muü̃maxã tá niyuãchitanü i ngẽxguma nüxü̃ nadaugügu i ngẽma tá üpetüxü̃ i ñoma i naanewa. Erü woo guxü̃ma i ta̱xacü i daxũwa nüxü̃ idauxü̃ rü tá naxĩã̱xãchitanü rü tá nu ne nanaxĩmare.
27Rü ngẽxguma rü guxü̃ i duü̃xü̃gü i ñoma i naanecüã̱x rü tá nüxü̃ nadaugü ya Tupana Nane ya duü̃xü̃xü̃ ixĩcü i ngẽxguma norü poramaxã rü ngóonexü̃maxã caixanexü̃gügu ínanguxgu.
28Rü ngẽxguma inaxügügu nax naxüpetüxü̃ i ngẽma pemaxã nüxü̃ chixuxü̃, rü name nixĩ nax petaãẽgüxü̃ rü mea pedaunagüxü̃, erü paxa tá íchangu nax pexü̃ íchanguxü̃ẽxẽxü̃ca̱x —ñanagürü.
29Rü yemawena rü wüxi ga ore ga cua̱xruxü̃xü̃ namaxã nixu ga Ngechuchu, rü ñanagürü: —¡Dücax penangugü i igunecü rüe̱xna ngexü̃rüüxü̃mare i to i naigü!
30Rü ngẽxguma nüxü̃ peda̱u̱xgu nax ngexwaca naxüátüxü̃, rü ngẽmawa nüxü̃ pecua̱x nax paxa tá taunecüwa nanguxü̃.
31Rü ngẽxgumarüxü̃ ta i ngẽxguma nüxü̃ peda̱u̱xgu nax nangupetüxü̃ i ngẽma pemaxã nüxü̃ chixuxü̃, rü ngẽmawa tá nüxü̃ pecua̱x nax paxa tá ínanguxü̃ ya Tupana nax ãẽ̱xgacü yixĩxü̃ca̱x.
32Aixcüma pemaxã nüxü̃ chixu rü guxü̃ma i ngẽma nüxü̃ chixuxü̃ rü tá ningu naxü̃pa nax nayuexü̃ i ngẽma duü̃xü̃gü i ngẽxguma maxẽxü̃.
33Dauxü̃guxü̃ i naane rü ñoma i naane rü tá nagu̱x. Natürü chorü ore rü tagutáma inayarüxo.
34¡Pexũãxẽgü nax tama ta̱xacürü chixexü̃gagu düxwa nüxü̃ perüxoexü̃ nax peyaxõgüxü̃! Rü ngẽmaca̱x penaxwa̱xe nax pegüna pedaugüxü̃ nax tama pengãxẽxü̃ rüẽ̱xna ñoma i naanearü ngúchaü̃gu perüxĩnüexü̃. Erü ngürüãchi ngẽmagu íperüxĩnüeyane tá íchangu.
35Rü ñoma wüxi ya yüta ya ngürüãchi ta̱xacü iyaxúnerüxü̃ tá nixĩ naxca̱x i guxü̃ma i duü̃xü̃gü i ñoma i naanecüã̱x i ngẽxguma wenaxarü núma chaxũxgu.
36Rü ngẽmaca̱x name nixĩ i pegü ípemexẽẽgü. ¡Rü guxü̃guma peyumüxẽgü nax ngẽmaãcü tama pexü̃ naxüpetüxü̃ca̱x i guxü̃ma i ngẽma ãũcümaxü̃gü i tá íngugüxü̃, rü aixcüma pimexü̃ca̱x i ngẽxguma nape̱xewa pengugügu ya Tupana Nane ya duü̃xü̃xü̃ ixĩcü! —ñanagürü ga Ngechuchu.
37Rü nüma ga Ngechuchu rü guxü̃ ga ngunexü̃gügu Tupanapata ga taxü̃newa duü̃xü̃güxü̃ nangúexẽxẽ. Rü chütacü rü guma Ma̱xpǘne ga Oribunecügu ãéganegu nayapeexü̃.
38Rü guxü̃ma ga duü̃xü̃gü rü pa̱xmamaxü̃chi Tupanapata ga taxü̃newa nangugüxü̃ nax Ngechuchuxü̃ naxĩnüexü̃ca̱x.
נבחרו כעת:
Ore i mexü̃ ga Luca ümatüxü̃ 21: tcaP
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
© 2022, Wycliffe Bible Translators, Inc. All rights reserved.