TOBITƐ 2
2
Tobitɛ hɔa wi tandu
1Na mɛ ni, nɛ do 'da fala Asaradoni zi a nwa ni, nɛ mi kpula wá tɛ mi dɛ nu tɔa 'da mi tɛ Ninivɛ nga, nɛ mi kpa ngba mi do wuke 'da mi Ana, do be 'da mi Tobi. Ma hɔa 'da fala ɛngga 'da lɛ kɛ li nɛ a: “Pɔsɔ Sambo” ni, nɛ lɛ dɛa mɔ dɔ. Mi dungu nù we nyɔngɔ mɛ, 2nɛ wa tɛa do odia nyɔngɔmɔ hã mi wena, nɛ ma dunu ngɔ mɛsa. Kɔ mi nɛ zɔ ni, nɛ mi tɔ̃ hã bulu be 'da mi na: “Be 'daa, mɔ nɛ́ 'da onya lɛ Oisraɛlɛ, kɛ lɛ tɛa kɔlɔ 'duli do wa tɛ Ninivɛ gɛ ni, hã mɔ fa wele kɛ kɔ wa, a a wi sã, nɛ a gbini zã a do NWA ni, nɛ mɔ sa mɔ hã a na, a tɛ we nyɔngɔ mɛ do mi. Mi 'bɔ sɛ 'da mɔ na mɔ hɔ, sɛ nɛ mi nyɔngɔ mɛ de.”
3Tobi nɛa we fa wi sã kɔ onya lɛ ni, nɛ nde 'do a nyɛlɛ gɔ, nɛ a kpolo tɛ̃ a, nɛ a he mɔ na: “Aa baa!” Nɛ mi aka a na: “Be 'da mi, ma dɛa nɛ nde?” Nɛ a gese na: “Aa baa, mi zɔa nɛ nde wa gbɛa mbe kpo kɔ winɔ 'da lɛ. Wa ua nzɔlɔ gɛlɛ a, nɛ wa da a dɛ ngɔ zandoe, nɛ a 'bana dɛ di ni.”
4Nɛ mi kulu ngɔ do gbɛngɛ tɛ, nɛ mi la nyɔngɔmɛ dɛ di ni, nɛ mi yu, nɛ mi ba wɔlɛ, nɛ mi e ti da, we 'bɔ na wese gɛ̃, sɛ nɛ mi mi de. 5Mi yula i mɔ, kɔ mi kpula tɛ mi, nɛ mi fɔlɔ tɛ mi we hɔ sa wi li Gale. 'Do nɛ, nɛ mi nyɔngɔ mɛ do 'bako li mi. 6Mba gɔ, ta zu mi gba ngɔ we kɛ wi gba olo nu Gale Amɔsi tɔ̃a zi hã winɔ tɛ kɔ le Betɛlɛ na: “Mɔ dɔnɔ 'da nɛ ma kifi sɛ gɛla, nɛ ozuma yangganɔ 'da nɛ ma kifi sɛ zuma ala nu” ni. Nɛ mi ma ngɔ he nɛ. 7Wese gɛ̃a do'do, nɛ mi nɛa, nɛ mi zã kɔ̃ zuni, nɛ mi mi wɔlɛ ni. 8Nɛ ongba mi wi tɔanɔ wa mɔmɔ mi, nɛ wa na: “A lengge na, a wè we dɛ kili mɔ kpo gɔ nde? Wa fa zi 'bɔ dɛ we gbɛ a, we tɛlɛ tɛ dɛa mɛnɔ nɛ́ gɛ, kɔ a ma 'bɔ ngɔ mi wɔlɔnɔ nde!”
9Do tũi ni, nɛ mi fɔlɔ tɛ mi we hɔ sa wi li Gale, nɛ mi nɛa, nɛ mi ɔ nù dɛ tɛ li fanda kɛ zã ngboe. Nɛ mi kèlè li mi do tulu gɔ, we duzu gi tɛ wi. 10Mi ĩ̀ zi na, osɔlɛa wa ɔ tɛ kɔ ngboe ngɔ mi ni gɔ. Nɛ 'dɔlɔ go'do wa tia li mi, nɛ nde ma 'bana do bawe nɛ. Nɛ fɛ̃a mɔ hɔ li mi. Nɛ mi ba ina nɛ 'da omonganganɔ, nɛ nde inanɔ ni, ma gã 'da fɛ̃a mɛ ni gã iko, nɛ ma ma ngɔ lɔ li mi ba gbaa, ndɔti nɛ a kɛ mi hɔa wi tandu. Nɛ mi ɔa do tandui ni sabɛlɛ nalɛ. Owi nu fɛlɛ mi wa he zi 'bako tɛ mi, nɛ Ahikarɛ gala zi mi gbaa 'do sabɛlɛ bɔa we hɔ tɛ ngba soe kɛ a la nɛ dɛ Elimaisi i ni.
11Do 'da fala ni, nɛ wuke 'da mi Ana ma zi ngɔ ngbɔ tulu ɔ nɛ ogele wukonɔ vɛ̃, takɔ lɛ kpasa do ma. 12A nɛ zi do ma hã owinɔ kɛ wa aka a na, a ngbɔ hã lo ni, nɛ wa oso kɔ̃ a. Mbe tũ kpo, do zɛkɛ 'da talɛ, kɔ̃ nɛ sambo, nɛ a nɛa do mbe gbau tulu kpo hã owanɔ kɛ a ngbɔ hã wa fai ni. Nɛ wa usa tuli ni do'do, nɛ wa hã 'bɔ dia be wili dua hã a. 13Nɛ a si, kɔ a nɛ ma ngɔ le dɛ 'da mi nga ni, nɛ be dua ni he mɔ. Nɛ mi sa mɔ hã a, nɛ mi aka a na: “Be dua ni yula do nde? Wa zṹ a zũ gɔ nde? Mɔ gésé a hã Owele a. Lɛ wè we nyɔngɔ mɔ zũ gɔ.” 14Nɛ a gese na: “Wa hã a hã mi hã dɛ ngɔ mbili kɛ wa usa do tuli kɔ̃ mi ni!”
Nɛ nde, mi kɔ̃̀ zi gɛnɛ we nu a ni gɔ. Nɛ mi dala nu mi hã a na, a gese be dua ni hã wele a, nɛ zã mi nɔ̃lɔ̃ dɛ tɛ̃ a. Nɛ a gese hã mi na: “Mɔ olo mɛnɔ mɔ hã zi hã Owi sãnɔ, do dia dɛa mɛnɔ mɔ dɛ zi ni kɔ̃ mɔ gɛ a ge nde? Lɛ ĩ ti gulu mɛnɔ ma kpa mɔ ni ia!”
Ngbaka DC Bible (We Nu Gale) Version © Bible Society of the Democratic Republic of Congo, 1995.