John 1
1
1Hivulliqpaaq Uqauhiq ittuq, Uqauhirlu Godmiittuq, Uqauhirlu Godiujuq. 2Uqauhiq Godmiitpaktuq hivullirmi. 3Taffumalu hulliqaak tamarmik hanajauhimavaktut, tamarmik ilaa hanajauhimangittut aallakkun. 4Tamarmik Uqauhikkun inunguqtun, taffuma inuuhiata inuit qaumapkaqtain. 5Qaumaniq tamna qaumainnaqtuq taaqtumun, taaqtupli qamitilimaittaraluanga tamna. 6Inuglu tilijaujuq atiqaqtuq Johnmik. 7Tamna tikitpaktuq ilihimajitun unipkautigiquplugu qaumaniq taffumuuna inuit ukpiqpiaquplugit. 8Tilijaujuq tamna qaumaniunngittuq inmi, qaivaktuugaluaq unipkautigiquplugu qaumaniq kihimi. 9Tamna qaumaniq ilumuuqtuq, qaumapkaqtain inuit, nunamun tikitpaktuq. 10Tamna nunamiittuq, taffumuuna nuna hanajauhimavaktuq, nunaum inungita ilihimanngitaraluangat. 11Aahiin, taffuma inuuqatini tikitpagain, inuuqatiminilu pijumanngitaraluangat. 12Kialiqaa pijumakpatjuk, atinganun ukpiqpiarlutik, pipkaqtain qitungauliquplugit Godmun. 13Tapkua qitun'ngaunngittun inuugamik angajuqqamingnin, naupkaqtitaulutigluuniin, Godim kihimi nutararingmatik. 14Uqauhirlu inunguqpaktuq timiqaqhunilu najuqtaatigut, aahiin taffuma qaumaninga tautuktaqut Godim irnituangata qaumaningatun ilipluni, ilumiqtauplunilu ikajuutikhamik ilumuuqtumiglu. 19John ilaa apiqhuqtaugami tilijaujunin angatjjuvikpagjuatkunit, Levitenillu, Jerusalemiitunin, uqaqhutik, “Kinauvin?” 20naunaittumik kiujain itqumajumik uqaqhuni, “Christiunngittunga.” 21Tapkua apiringmijaat, “Kinauvilluuniin? Elijahnguviit?” Kiujugaluaq, “Tamnaungitpiaqtunga.” Uqarmijun, “Nalauttaijiujutilli?” Kiujuq, “Imannaq.” 22Tapkua aahiin uqallautijaat talva, “Kinauvin, kiujakharijaptigut tilijivut ilipkun; qanuq uqaqqin ilipkun?” 23John uqaqtuq, “Nipainnaujunga uvanga tuqhulaurama inuilrumi imaatun, ‘Atan'ngum apqutaa nalruqtihiuk,’ nalauttaiji Isaiah uqaqhimangmat.” 24Phariseekkullu ilait tilijauhimagamik. 25Apiqhuqtaat uqaqhutik, “Ilvit Christiungitkuvin Elijahaungitkuvilluunniin, nalauttaijiungitkuvilluuniin huuq baptaiqhivin?” 26John kiujain, “Ilaa uvanga baptaiqhivaktunga imarmi; inuk akuniffingni ilitarinngittaraluaqhi. 27Tamnaujuq kingunipkun qaijaujugaluaq, taffumangalu kamiiqhijukhaungittungaluuniin nakuunginama.” 28Taimailivaktun Bethanymi kuukkam Jordanmik atiqaqtum avataani, John baptaiqhiviani. 29Aqarungurman Johnim Jesus takugamiuk upagahualirmani, tuqhulajuq, “Tamatja Godim imnainga, nunaum inungit huinniqqutaiqhungujait taaffuma.”
35Aqarungurman aahiin John malirutinilu malruuk nangiqatigiliqhugik 36tautuktaa Jesus qaangiutipluni uqaqtuq, “Tamatja Godim imnainga.” 37Maligittiglu tapkuak tamna tuhaagamitku maligahualiqtuk Jesusmun. 38Jesusim qiviaqhuni tautuktaik maligahuaqtuk uqallautiplugik, “Humik qiniliqpitik?” Tapkuak kiujuk, “Rabbi (Ilihautji) nani najuliqqin ilvin?” 39Uqautijaik, “Qailutik taffuminga tautugiaqturittik.” Talvungaugamik najugaa tautuktaak Jesus ilagiplugulu taffumani upluq nungulirman. 40Tapkuak tuhaahimajaak John maligumaplugu Jesus, aippaa Andrew, Simon Peterm nukaa. 41Hivullirmik taffuma angajuni Simon paqitaa uqautiplugu, “Messiah (Christ) paqqitaqqut.” 42Talva qaritijaa Jesusmun. Jesusim iigigamiuk uqallaktuq, “Simonmik atiqaqtutin ai; John irninga. Taijaujumaaqtutin Cephasmik” (imaatun tukilingmik: Petermik/Ujarangmik). 43Aqagungurman Jesus Galileemingaugami Phillip paqittaa. Jesusim uqautijaa, “Malinga.” 44Phillip Bethsaidamiutaujuq, Andrewm Petermlu igluqarvianin. 45Phillipium Nathaniel paqitkamiuk uqallautijaa, “Paqqitaqqut tamna Mosesim pitqujainni nalauttaijilu titirautigihimajaat, Jesus, Joseph irninga Nazarethmit.”
