MAWUTO HA WASU 3
3
1Mkonu fumu Petro wakadosana na kulya hekalunyi na Yohane saa kenda mandi kochihenda iterewo. 2Naho kudi kukeri-ho msoṟo umu ai mhuli madende ho kui yendo wusunyi wo mae echihenda iwiko oo kichuminyi kya hekalu kechilaho nyi kilya kicha orio mafiri hose kechieṟeṟya walya weida kulya hekalunyi shindo shemsaṟya. 3Mndu chu kekiwona Petro na Yohane wechiida na ipfo hekalunyi kawaterewa kindo kyemsaṟya. 4Petro wakamtumya meso na Yohane kahamba, “Luambuye so.” 5Nao kawaambuya mkangamya akusihye ke echienengo kindo nyiwo. 6Petro kahamba, “Njiwode ma fesa ma sahabupfo. Kya indi kilya njiwode nyikyo sa njechikuinenga, Kui rina lya Yesu Kristo Mnasareti hoṟoka nochumie!” 7Kambada owoko lo kulyo kamiṟumtsa, nalyo liyenyi njayo tsake na shilunga sha maungo ho shikawada pfinya. 8Kaamka chiwu kahoṟoka kachumia, kaida na kulya hekalunyi kimu nawo kahenda ketoolatoola kaidapfuma Ruwa. 9Wandu wose wakambona kechumia echiidapfuma Ruwa. 10Wakammanya ke nyi ulya awedamya na iterewa shindo shemsaṟya alya kichuminyi kilya kicha kya hekalu wakawa mkahai na iṟihyo kya kindo kilya kilembutikya.
Muongoye fo Petro fo kawi
11Kyasia arianyi na Petro na Yohane wandu wose wakaangusha na alyando wai kulya kidangashenyi kyelaho nyi kadangasha kya Solomon wai mkahai. 12Petro kekiwona ado kahalwo wandu walya, “A lanye wasoṟo wa Israeli, nyiki ili muiṟihio mudi kya iki, ang'u nyi kili muilufunya meso so cha ili nyi so lutanye ichu nachumie kui pfinya tsadu so luwenyi ang'u na wuele wodu so? 13 Nyi Ruwa chu o Abrahamu akeri na o Isaki na o Yakobo, Ruwa chu o waku wadu nyi alewika mana ulya oke Yesu wuitoṟinyi, ulya mulemdambika mukawemkana alya oshangunyi lo Pilato lyandi kedumbwo ke nalekyo. 14 Nyo mlekana ichu Mwele ai na o Wusumhanyi mkakunda mwinengo mbahi ulya. 15Kyasia nyo mlewaaha mangi iya ya moo na Ruwa nyi alemṟutsa opfunyi, naso nyi waringishi wa mbonyi tso. 16Na mwidikye foidikya rina lya Yesu, ili akusirye nalyo, rina lyake nalyo lyaṟamtsa mndu chu mumbonyi na immanya. Mwidikye fomwidikya o mfo fowonesya mndu chu oru loke iya oshangunyi lonu mose. 17Kyasiang'u lanyewo wanawawama, na ngamekumanya nyi mlewuta ishi mlaichi na waitoṟi wanu naawo. 18Nyiyo njia Ruwa aleinutsya nayo shilya awesongoye ihamba kui dumbu lya waikimbi walya kya mawawyo ha Kristo. 19Dumbuyenyi muilachike mrima yanu kundu njonyamaṟo tsanu tsiwuto-ho. 20Nalyo lienenge shiheri shembihiṟya moo shiche shiwukye ko Mndumii, nao nahende imdumya ichu awemteṟye onu wokia kacha, Kristo nyio Yesu. 21Nao nyi awewaṟi naamnbyo ruwehu itane shiheri shacha shilya shewihiṟa wuhya shindo shose, shilya Ruwa awededye kui dumbu lya waikimbi wake waweiho wokia mawokyony ha wuyana. 22 Mose nyi ahambye ke, Mndumii-Ruwa odu echimwamtsya mwikimbi echiwuka kiidi kya wanawamanu cha inyi. Nyio ichu muwe mochimwadanya kya shindo shose echimwongoya. 23 Nakyo nyi kyechiwa ke orio mndu alaadanya mwikimbi cho nyi echirumatso mkambonyi. 24Ee nyi wudo na waikimbi wokia Samueli na walya waleituma numa yake wose wadedye wechiongwo mbonyi tsa mafiri ha. 25 Nyo mukeri wana wa waikimbi wo na wa mkundana fulya, fulya Ruwa awewikyanyi na waku wanu kechiwia Abrahamu ke, Na oshari lopfo iyo kiidi kyalo mbaṟi tsa wandu tsii kunu masangenyi mpfondo tsecha iwikyo one tsose. 26Ruwa kekimaa iṟutsa Mana chu oke alesongwo imduma konu nyo kundu namwonyishe kemletsana orio umu onu ipfo mawichonyi hake.”
Petro na Yohane wadao mengenyi
נבחרו כעת:
MAWUTO HA WASU 3: KIM2
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Kimochi Bible © Bible Society of Tanzania, 2016.