Mateo 9
9
Jesúsba bꞌebidꞌa kꞌakua pira ẽã kꞌaya bꞌʉta
(Marcos 2:1-12; Lucas 5:17-26)
1Mawũãnaĩ Jesús jãbadꞌe bꞌaripe kĩrãrã chãpe zesia Capernaúm izhi pʉwʉrʉedꞌa. 2Maʉ̃ne kꞌakua pira ẽã kꞌaya bꞌʉta izhima wesidꞌa jirabꞌadꞌe. Ãzhi soidꞌu kꞌobꞌeta Jesúsba ũdui kꞌakua pira ẽã kꞌaya bꞌʉa mawũãsia: Wãniguarua, bʉra kꞌazhiruata biodꞌebara mʉãrã bedꞌea ne ẽã bꞌidꞌapʉa.
3Maʉ̃nerã ũrãgꞌa Moisédꞌe jarabadabara ʉ̃kʉrʉba ãzhi bitabaiba mawũãsidꞌa: Naʉ̃ mawũãrã Daizezema mitia bedꞌeabʉrʉa. 4Jesúsbara ãzhi krĩchara kꞌawuape mawũãsia: ¿Kꞌãrẽã bĩ ẽã krĩcha kꞌobꞌe marã sodꞌera? 5¿Kꞌãrẽta audre borekea jaraidꞌe bꞌʉ: Kꞌazhiruata biodꞌebara bedꞌea ne ẽã bꞌidꞌapʉa aita, o piradrʉpe nimibarua aita? 6Kꞌawuaudua, mʉ Beubari Bape bꞌʉbara naʉ̃ druadꞌera zareata erubꞌʉa kꞌazhiruata biodꞌebara zhãrã bedꞌea ne ẽã bꞌʉita. Mawũãpe kꞌakua pira ẽã kꞌaya bꞌʉa mawũãsia: Piradrʉrua, bʉzhi jirabꞌa jiraedarua, mobe dedꞌaa wãrũã.
7Mawũãĩ izhira piradrʉpe dedꞌaa wãsia.
8Zhãrãba maʉ̃ta ũdubʉdadꞌera bia akʉdrua Daizeze ibia jarasidꞌa maʉ̃ zareata diasi baera beubari bꞌea.
Jesúsba jʉrʉdꞌa Mateo
(Marcos 2:13-17; Lucas 5:27-32)
9Jesús mamaʉ̃ba wãbʉrʉdꞌera ũdusia Mateo abadata, impuesto widꞌi jewedꞌa bꞌʉta rey Romanebemaĩta impuesto diabada maẽ bꞌasia, maʉ̃ne mawũãsia: Mʉ kꞌaidꞌu bꞌadua.
Mawũãĩ izhira piradrʉpe kꞌaidꞌu bꞌesia.
10Mateo dedꞌa Jesús jewedꞌa nekꞌobʉrʉdꞌera, impuesto widꞌibadata bio dewaraurã kꞌazhirua omiãrã bawara zedꞌapeadꞌata, Jesús bawara ãba nekꞌo jewedꞌasidꞌa izha jʉrʉkuadꞌa bawara. 11Maʉ̃ta fariseorãba ũdubʉdadꞌera izha jʉrʉkuadꞌaa mawũãsidꞌa: ¿Marãne Miã Ũrãgꞌabarira kꞌãrẽã kꞌãwũã nekꞌo bꞌʉ impuesto widꞌibada bawara, dewaraurã kꞌazhirua omiãrã bawara?
12Maʉ̃ta ũrĩpe Jesúsbara mawũãsia: Bika bꞌebara nesidꞌa duanu ẽã zhãrã bꞌebi bꞌʉra, awuarabʉrʉ nesidꞌa bꞌea kꞌayarãbʉrʉ. 13Mawũẽ wãũdua, mobe sãwũãta kꞌawaudua Daizezeba mawũãnata: Mʉãrã krĩña bꞌʉa zhãrã sozuburia bꞌeaita mʉĩta nendʉwʉrʉta babue bꞌeai kꞌãñabara. Daizezeba mawũãnaneba mʉãrã jʉrʉdꞌe ze ẽbasia ãzhikusa biata bꞌeta, awuarabʉrʉ ẽdrʉbigaita jʉrʉdꞌe zesia kꞌazhirua omiãrãta, kꞌazhiruara ãmape Daizezeta pẽwãnamarẽã.
Widꞌidꞌapeadꞌa nekꞌo ẽã zhiwidꞌi bꞌedꞌebemata
(Marcos 2:18-22; Lucas 5:33-39)
14Juanba jʉrʉkuadꞌata Jesúsma zedꞌape mawũãsidꞌa: ¿Daita dewara fariseorãta daira kꞌãrẽneba baridua nekꞌo ẽã zhiwidꞌi bꞌedꞌe, bʉa jʉrʉkuadꞌara nekꞌo ẽã zhiwidꞌi duanu ẽpe?
15Mawũãnaĩ Jesúsbara mawũãsia: ¿Zhãrã juwua jida nʉmʉne kꞌobꞌera sopuadꞌaidꞌe bꞌʉka zhũmakĩrãta wadꞌi kꞌobꞌʉdꞌera ãzhi bawara? Mawũãmina ewarita zeya zhũmakĩrã ãzhi maẽbara ededꞌaita, maʉ̃nebʉrʉ nekꞌo ẽã zhiwidꞌi bꞌeaya. (Aramaʉ̃ kĩrãkꞌa mʉta edebʉdadꞌebʉrʉ mʉã jʉrʉkuadꞌara nekꞌo ẽã zhiwidꞌi bꞌeaya.) 16Miõba wuata zhiwidꞌibara remenda ẽã wua soreta. Mawũã ora wua zhiwidꞌira bagubʉrʉba wuaabʉrʉ kꞌõãbiya. 17Miã vino zhiwidꞌi oma tʉdꞌa ẽã ne e omata zhi sorerãnerã. Mawũã ora ne e sorera kꞌõgꞌozoabʉrʉba vino wea wãña, aramaʉ̃ne ne e sorera ãrĩkuaya. Mawũãmina vino zhiwidꞌi oma tʉ panʉã ne e omata zhiwidꞌirãnerã, mawũãtrʉ abꞌarika bia nʉmaña. (Maʉ̃bara Jesúsbara jara krĩñasia izhi ũrãgꞌara zõrãrãwedꞌabema krĩcha ũme ãba jara ẽãta ãrĩ ẽbaita.)
Jairo kꞌaudꞌebema
(Marcos 5:21-43; Lucas 8:40-56)
18Jesúsba maʉ̃ta jara nʉmʉne zesia judío zhi zromata, mobe izhi kĩrãbita sãkꞌokꞌodꞌe kꞌobꞌepe mawũãsia: Mʉ kꞌaura beudogꞌoa. Mawũãmina wãda, mobe bʉ juwuata izhi ʉ̃rʉ̃ bꞌʉdua, mawũãrã bꞌaya.
19Mawũãĩ Jesús piradrʉpe kꞌaidꞌu wãsia izha jʉrʉkuadꞌa bawara. 20Maʉ̃ne wũẽrã abꞌa waba kꞌaya bꞌʉta doce año bata bꞌasia, maʉ̃bara ãbʉdeba orrape tõbꞌarisia Jesús wua ita. 21Maʉ̃nerã izhikusa mawũãsia: Bari izhi wuata tõbꞌaribʉrʉba mʉrã bꞌeya.
22Maʉ̃ne Jesúsbara pʉrʉwa akʉpe mawũãsia: Wũẽrã bʉra wãniguarua, bʉra soidꞌu kꞌobꞌʉba ẽdrʉbʉrʉa.
Maʉ̃ wũẽrã bꞌesia aramaʉ̃ta.
23Judío zhi zroma dedꞌa Jesús edꞌa wãbʉrʉdꞌera ũdusia beuwãrã joubʉdadꞌe flauta zabadata aubꞌari jẽgabada bawara. 24Maʉ̃nerã mawũãsia: Ãĩ wãũdua, wũẽrã zakera beu ẽã, awuarabʉrʉ kꞌãĩ bꞌʉa.
Mawũãĩ sewakꞌau bꞌʉa asidꞌa. 25Mawũãmina zhãrã ãĩ wãbigape edꞌa wãpe wũẽrã zakera juwuadꞌe jidabʉrʉba beudꞌata piradrʉsia.
26Maʉ̃ta trʉ̃poasia maʉ̃ drua jõma.
Daʉbꞌerrea panʉta ũme ne ũdubidꞌa
27Mamaʉ̃ba Jesús wãbʉrʉdꞌera, ũme daʉbꞌerrea panʉta kꞌaidꞌu taidꞌaba nemi jĩgua mawũãsidꞌa: Daira sozuburiarua bʉra rey Davidꞌeba uruta bꞌʉba.
28Deidꞌu jũẽbʉrʉdꞌera daʉbꞌerrea panʉrã izhima zesidꞌa, mawũẽ Jesúsbara mawũãsia: ¿Marã daʉbꞌerrea panʉta mʉã ne ũdubigaira marãbara ĩjãnaĩka?
Mawũãĩ ãzhara mawũãsidꞌa: Ããjã Nokꞌó.
29Mobebʉrʉ ãzhira dabʉ tõbꞌari mawũãsia: Mazhi soidꞌu kꞌopanʉba aribꞌae nʉmaẽdaya.
30Aramaʉ̃ne ãzhira ne ũdu panesia. Jesúsbara zarea jarabʉrʉta mawũãsia: Kꞌãʉ̃ta miõã kꞌawuabirãũdua.
31Mawũãmina ãzhi wãbʉdadꞌera Jesúsba mawũã odꞌata nebʉrʉsidꞌa maʉ̃ drua jõma.
Bedꞌea bꞌe ẽãta bedꞌeadꞌa
32Daʉbꞌerrea pananata wãbʉda daucha Jesúsma wesidꞌa jaiba bedꞌea bꞌe ẽã bꞌʉta. 33Jesúsba jaita ãĩ jʉretabʉrʉdꞌera bedꞌea bꞌe ẽã bꞌadꞌara bedꞌeasia. Mawũẽ zhãrãbara bia akʉdrua mawũãsidꞌa: Kꞌãwũãrã ũdudꞌakꞌa Israeldꞌera.
34Waya fariseorãbara mawũãsidꞌa: Jai nokꞌo zareadꞌeba ãĩ jʉrekua bꞌʉa jaira.
Daizezedꞌebema ĩjãnaĩrã bioa
35Jesús pʉrrʉasia pʉwʉrʉ zroma jõma, pʉwʉrʉ zake jõma. Miã ũrãgꞌasia de zhi jʉrebadata nʉme maẽ, bedꞌea biata jarakꞌasia Daizezeta Nokꞌodꞌebemata, maʉ̃nerã jõma bꞌebisia ne bariduba kꞌaya bꞌeta, ne bariduba pua bꞌeta pʉwʉrʉza. 36Kꞌabanata ũdubʉrʉdꞌera sozuburiasia, Daizezedꞌebema kꞌaiba jarakꞌai ne ẽã dobꞌa bꞌeba ovejarã zhi akʉbari ne ẽkĩrãkꞌa. 37Mawũẽ izha jʉrʉkuadꞌaa mawũãsia: Wãrãnebai mʉ ũrãgꞌa ĩjãnaĩrã bioa, mawũãmina miã ũrãgꞌadꞌaira bio ẽã. 38Maʉ̃ba widꞌiudua Daizeze zhãrã Zhibaria, miã ũrãgꞌabadata zokꞌamarẽã izhidꞌebema ĩjãĩta bꞌema.
© 2012, Wycliffe Bible Translators, Inc. All rights reserved.