Zään 17

Zozii bhibhie nynä Laagɔ 'ŋʋɔ bʋkʋ ɔɔ' 'klʋagbaa 'mnö

(Eblëë 7.24‑28; 4.14‑16)

1Zozii cii‑ lä sɔɔ nä, kɔ ‑wloo ‑laagɔɔ' 'nɩ ɔ yi bhibhie, ɔ lä 'Bä, 'gliyee yä ŋëë! Nä, ‑n fään yɩ ‑n ‑Yowli 'ŋnu ɩyä ɔ kä‑ä 'ŋnu fään! 2Kä ‑n nyɩɔ‑ 'päwä 'ylʋzɔkʋnyʋa 'fɩɩn 'kʋ, ɩyä ‑lʋa ‑n ‑tüo lä yëku nä, ɔ 'kwa 'pʋpʋɛ 'nyɛ 'kɔɔkɔɔ ‑za. 3'Pʋpʋɛɛ ‑ɛɛ ‑wʋ lä bhɩädä ‑kä nä, ɛmɛɛ‑ plöö‑ lä nynä ‑mä, ‑mɔɔ ‑bhlo, ‑mɔɔ‑ plöö‑ lä nyaasäsä Laagɔɔ nä, wa yä‑ä yibhë. 'Nɩ ‑n ‑Yowli Zozi Klisö, ‑n ‑lobho lä nä, wa yɔ 'sɩɩ yibhë. 4'Nɩ ‑amʋ, n ‑gbä 'nɩ ‑naa 'klʋagbaa kwlii‑ ‑mää ‑dʋdʋkʋ. 'Nɩ lebhee ‑n nyɛɛ'ɛ bhlä nä, n ‑bhɩɛ ‑zɔɔ. 5‑Pɛpɛɛ nä, 'Bä, ‑n ŋʋ'ʋ yɩ 'naa 'klʋagbaa 'mnö bʋkʋ! 'Kɔɔnʋʋ' ‑lä bhä tee wlʋʋ‑#17.5 Zɛɛ 'sɩɩ 1.1‑2. nä, ɩɩ' 'klʋagbaa n ‑kʋ bhlä 'mnö ‑mɔɔ yëku nä, ‑n ŋʋ'ʋ 'maa yɩ 'mnö bʋkʋ!

Zozii bhibhie ɔɔ' 'kʋgënyʋa 'kʋgbä 'sɔɔ 'wlu

6Nyɩkpaa ‑n ‑sä lä ‑mää zëkpë 'kʋ, 'nɩ ‑n nyɛɛ'ɛ lä nä, n ‑gbä 'nɩ wa ‑yibhë ‑naa 'ŋnöö. ‑Naa lʋä bhä 'nɩ ‑n nyɛɛ'ɛ 'mʋwa bhlä. 'Nɩ wa ŋʋʋ‑ ‑naa ciciwälɩɩ 'klʋkpää'. 7‑Lɩɩ 'fɩɩn ‑n nyɛɛ'ɛ lä nä, wa yä yɩ ‑pɛɛ sɔɔ yibhë nynä ‑mɔɔ yëku ɩ bha. 8Wälɩɩ ‑lɩɩ ‑n ‑sonö'ö bhlä nä, n ‑sonʋwanyɩ 'nɩ wa nui‑. Wa ‑yibhë 'zaazɩ sɔɔ nynä ‑mɔɔ yëku‑ n bha. 'Nɩ wa ‑kä 'sɩɩ pɔlötɛtɛ nynä ‑mɔɔ ‑lobho'o. 9Nä, waa' 'wlu n bhibhie lä. Nyɩkpaa 'fɩɩn 'wlu nn' bhibhie ‑wʋ. ‑Mä ‑lʋa ‑n nyɛɛ'ɛ lä nä, 'nɩ ‑wa plöö‑ lä 'sɩɩ ‑naa lʋä nä, waa' 'wlu n bhibhie lä. 10‑Lɩɩ 'fɩɩn n ‑kä lä nä, ɩ ‑glö ‑naa lɩɩ. 'Nɩ ‑lɩɩ 'fɩɩn ‑n ‑kä lä nä, ɩ ‑glö 'sɩɩ 'naa lɩɩ. 'Nɩ wa ‑gbä 'nɩ 'naa 'klʋagbaa nio 'yi. 11‑Amʋ nä, nn' yɩɔ ‑mää 'ylʋzɔɔ ‑kʋ, ‑mä wamä nä, wa ‑kʋ ‑lätee 'ylʋzɔɔ. Kä n yi‑i ylä yëku. 'Oo! 'Bä, Kplɔɔkplɔɔ Laagɔ‑! Bheeje, ‑naa 'tɛtɩɩ ‑n nyɛɛ'ɛ lä nä, ɩmɩ 'mnö, ‑n wluwa 'kʋ! Ɩyä sä ‑anyɩ 'sɔ plöö‑ lä ‑bhlo nä, wamä ‑mä 'sɩɩ, wa 'kä sɔɔ ‑bhlo 'plö. 12'Tänyɩɛ 'mnö n ‑yʋwa 'sɔ ‑kʋʋ bhlä ‑lätee 'kʋ nä, ‑naa 'tɛtɩɩ ‑n nyɛɛ'ɛ lä nä, ɩ ‑gbä 'nɩ n ‑wluwa 'kʋ, 'nɩ waa' nëëdëë' nyɩkpɔɔ' ‑wʋ ‑too. ‑Lɔɔ ‑tɛɛ ‑ɔ 'gä bhlä too nä, ɔmɔɔ‑ ‑too lä, ɩyä sɩ ‑jɩjlɔ lä Laagɔ‑bɔɔgʋʋ 'mnö nä, sɔɔ 'kä glää.#17.12 Zɛɛ 'sɩɩ Lɔlɔ 41.10; Zään 13.18. 13‑Pɛpɛɛ nä, kä n yi‑i ylä yëku. ‑Mä n ‑kʋ ‑lätee 'ylʋzɔɔ nä, 'ɩzä n sonʋwa lä ‑yä 'naa ‑jäkaa n ‑kä lä nä, wa 'ka kää, ɩyä a 'kä 'kʋ 'mɩä.

14N ‑sonʋwa wälɩ 'fɩɩn ‑n ‑sonö'ö bhlä nä. ‑Mä sä nn' ‑wʋ lä ‑mää 'ylʋzɔɔ' nyɩkpɔ plöö‑ nä, sɔɔ wamä ‑mä 'sɩɩ waa' ‑wʋ lä ‑mää 'ylʋzɔɔ' nyɩkpa plöö‑. Nä, ɩɩ' ‑zä 'ylʋzɔkʋnyʋä ‑zʋwa lä. 15Nn' bhibhie ‑wʋ nynä ‑n ‑sʋwa 'ylʋzɔɔ, ‑mä ‑n wluwa 'kʋ ɩyä ‑n gbä ‑yä 'Dëvlo ‑sʋwa gwë.#17.15 Zɛɛ 'sɩɩ Matie 6.13. 16Sä ‑amʋ, nn' ‑wʋ lä 'ylʋzɔɔ' lɔɔ plöö‑ nä, wamä ‑mä 'sɩɩ, waa' ‑wʋ 'ylʋzɔɔ' lʋä plöö‑. 17'Bä, ‑n gbä ‑yä ‑naa ‑nʋawlɛɛ 'mnö, wa 'plö ‑naa lʋä 'bhë 'kʋ. ‑Naa ciciwälɩɩ, ɩmɩɩ‑ plöö‑ lä ‑nʋawlɛɛ. 18Sä ‑n ‑lobho'o bhlä 'ylʋzɔɔ nä, sɔɔ ‑amʋ ‑mä n lobhuwa lä 'sɩɩ ‑mää 'ylʋzɔɔ. 19Kä n nyɛɛ‑ɛ lä n yëku 'bhë 'kʋ waa' ‑za. Ɩyä ‑naa ‑nʋawlɛɛ 'mnö, wamä ‑mä 'sɩɩ, wa 'kä ‑naa lʋä 'plö.

Zozii bhibhie ɔɔ' 'kʋgënyʋa 'fɩɩn 'wlu

20Wamä ‑bhloo' 'wlu nn' bhibhie ‑wʋ. ‑Mä ‑dläfʋɛɛ 'naa 'kʋgënyʋä lü lä nä, nyɩkpaa' ‑lʋa ‑wa 'gä lä ɛɛ' ‑za 'naa pɔlötɛtɛ kää nä, waa' 'wlu n bhibhie lä 'sɩɩ. 21N bhibhie waa' 'wlu ‑yä waa' ‑lefɩɩn 'kä ‑bhlo 'plö. Sä ‑mɔɔ ‑yä ‑amʋ 'sɔ 'jɛnyɩ‑ lä nä, wa ‑yä ‑anyɩ 'sɔ 'kä 'sɩɩ sɔɔ 'jɛnyɩ, ɩyä 'ylʋzɔkʋnyʋä 'kä pɔlötɛtɛ kää nynä ‑mɔɔ ‑lobho'o. 22'Klʋagbaa ‑n nyɛɛ'ɛ lä nä, n nyɩwa 'nya ‑yä wa 'kä ‑bhlo 'plö. Sä n ‑yä ‑mɔɔ 'sɔ plöö‑ lä ‑bhlo nä, wa 'kä 'sɩɩ sɔɔ ‑bhlo 'plö. 23‑Amʋ nä, n ‑yʋwa 'sɔ 'jɛnyɩ‑ lä nä, 'nɩ ‑mɔɔ, ‑n ‑yä ‑amʋ 'sɔ 'jɛnyɩ‑ lä nä, ɩmɩɩ‑ 'gä lä gbä ‑yä wa 'kä 'titiclö ‑bhlo 'plö. Ɩmɩɩ‑ 'gä lä gbä ‑yä 'ylʋzɔkʋnyʋä 'kä lä sɔɔ yibhë nynä ‑mɔɔ ‑lobho'o. Ɩyä wa 'kä lä 'sɩɩ sɔɔ yibhë nynä sä ‑n ‑wää'ä lä nä, kä ‑n ‑wamänʋwa 'sɩɩ sɔɔ. 24'Kɔɔnʋ ‑lä bhä tee wlʋʋ‑, 'nɩ ‑n ‑wää'ä bhlä. Ɩɩ' ‑zä ‑n nyɛɛ'ɛ lä 'klʋagbaa. Nä, 'Bä, ‑n nyɛɛ'ɛ 'mʋwa lä nä, n ‑waa nynä dä n ‑kʋ lä nä, wa kʋmʋ 'sɩɩ ‑lɔɔ. Ɩyä 'klʋagbaa ‑n nyɛɛ'ɛ lä nä, wa 'ka 'yi 'ni. 25'Bä, ‑mɔɔ ‑ɔnö gbɩɩ‑ gëë‑ lä 'yii nä, 'ylʋzɔkʋnyʋä 'nö‑ö ‑wʋ ‑yibhë. ‑Mä ‑amʋ, ‑n yi‑i. 'Nɩ ‑lʋa ‑n nyɛɛ'ɛ lä nä, wa ‑yibhë sɔɔ nynä ‑mä, ‑mɔɔ ‑lobho'o. 26N ‑gbä 'nɩ wa ‑yibhënö‑ö, 'nɩ n yi ‑lätee gbä 'nɩ wa yi‑i yibhë. 'Nɩ ‑wawʋʋ ‑n ‑kä lä 'naa ‑za nä, ʋ yiwa pleyi kʋ, 'nɩ ‑amʋ ‑mä 'sɩɩ, n yiwa 'pleyi kʋ.

נבחרו כעת:

Zään 17: god

הדגשה

שתף

העתק