Zään 18

Wa yä Zozii 'kʋ bhlü

(Matie 26.47‑56; Makö 14.43‑50; Lukö 22.47‑53)

1Zozii ‑bhɩä ylä bhibhielɩ nä, kɔ ‑yä ɔɔ' 'kʋgënyʋa 'sɔ ‑bha 'kʋ 'nɩ wa yi mʋ. 'Nyidɔlʋpɩɔ wa laa lä Sɛdlɔɔ nä, wa tɔɔ‑ ɔɔ' ‑gbazlʋʋ, 'nɩ wa 'plöö‑ ɔɔ' klëë' ‑kpʋkpʋʋ 'kʋ. ‑Gboo ‑kʋ bhä ‑lɔɔ. 'Nɩ wa yiu 'mnö plä. 2‑Mä Zudaa, Zozii' 'kʋgënyɔɔ ‑ɔ 'gɔ bhlä pëë nä, ɔ ‑yi bhä ‑lɔɔ dä. Kä Zozii ‑yʋwa 'sɔ yi bhä ‑mɔɔ doo doo. 3'Nɩ Zudaa yi ‑gboo 'mnö yi. Ɔ bhɛɛ‑ bhä 'sʋjää' 'kpä. 'Nɩ 'Cibhisänyʋaa' 'cifinyʋa ‑yä Falizɩɛnyʋaa' ‑jɛnyɩɛ, wa nyɩɔ‑ 'sɩɩ waa' 'sʋjaa nynä ɔ ‑yasɔ yi. Wa bhɛɛ‑ bhä 'näpö ‑yä ylɩ. 'Nɩ wa bhɛɛ‑ bhä 'sɩɩ 'päpälɩɩ. 4Maa, Zozii ‑yi bhlä wälɩɩ ‑ɩ 'gɔ lä ŋëë nä, kɔ 'jluwa yëku, 'nɩ ɔ yiwa 'ylä, ɔ lä lɔɔ ‑sä a tään bhä? 5Wlä Nazalɛtöö' Zozii 'mɔɔ ‑a tää. Zozii lä ‑amʋ lä! ‑Mä nyɩkpaa ‑wa ‑yi bhlä nä, Zudaa ‑kʋmʋwa bhä nëëdë.

6Zozii cii‑ lä nynä ‑mä, ‑amʋ lä nä, kä waa' ‑lefɩɩn ‑mʋʋ gwëë', 'nɩ wa yi ‑zɔɔ bhlü. 7'Nɩ ɔ yiwa bʋkʋ 'ylä, ɔ lä n nä, lɔɔ ‑sä a tää bhää? Wlä Nazalɛtöö' Zozii 'mɔ ‑a tää. 8Zozii lä 'nɩ n ya'anyɩ wɛzä soo nynä ‑amʋ lä. Nä, ‑amʋ a kä 'zaazɩ tään nä, a ‑taa ‑nänʋä 'yi ‑yä wa mʋ! 9Sä Zozii cii‑ bhlä nä, sɔɔ 'kä bhɛ lää glää nä, 'ɩzä ɩ plöö‑ bhlä sɔɔ 'kʋ. Kɔ cii‑ bhlä nynä ‑mä 'Bä, ‑lʋa 'fɩɩn ‑n nyɛɛ'ɛ lä nä, nn' ‑wʋ waa' 'kʋʋ nyɩkpɔ ‑të.#18.9 Zɛɛ 'sɩɩ 6.39; 17.12.

10‑Maa, Simɔɔ Pɩɛlö bhɛɛ‑ bhä ‑jlɛ nä, kɔ ‑kplɛɛ tʋkpää' 'nɩ 'Cibhisänyɔ 'kädɔɔ' ‑gänʋnyɔɔ, ɔ yio lüüklä‑nyuklu 'kʋ ‑döö. ‑Gänʋnyɔɔ 'mɔ wa laa bhä Masusö. 11‑Mä Pɩɛlö ‑nʋ lä sɔɔ nä, kä Zozii ‑sonöɔ, ɔ lä Pɩɛlö‑, ‑n tlʋʋ ‑naa ‑jlɛɛ' tʋkpää'! Nyäkälɩɩ' pliie ‑a 'Bä cii‑ lä nynä n 'mnää 'mʋ nä, n 'nɩɛ ‑lä bhɛ 'mʋ 'mnää ‑a?

Wa ‑fä Zozii 'cibhisänyɔ Anöö' ‑gbäsɩɩ

(Matie 26.57‑58; Makö 14.53‑54; Lukö 22.54)

12'Nɩ, 'sʋjaa wa ‑lobho bhlä nä, a ‑yä aa 'kämänyɔɔ, ɩyä 'Zufʋnyʋaa' 'sʋjaa, wa yi Zozii klä 'nɩ wa yio gʋä. 13Wa bhɛnöɔ‑, 'nɩ wa yio 'Cibhisänyɔ Anöö' ‑gbäsɩɩ#18.13 'Cibhisänyɔ Anö: Zɛɛ 'sɩɩ Lukö 3.2. fä. Anö nä, ɔ ‑glö bhä Kayifʋ ɔ 'wʋtɔ. 'Nɩ, Kayifʋ 'mɔɔ‑ plöö‑ bhlä ‑lɔɔ' lioyɩ 'mnö 'cibhisänyɔ 'kädɔ. 14Kayifʋnɔ 'mɔɔ‑ 'paa‑ bhlä 'sɩɩ ‑dɔɔ. Ɔ ‑soo bhä 'Zufʋnyʋa nynä ɩ ‑ŋwa 'kʋ nynä ‑mä nyɩkpɔ 'ku. Ɔmɔ ‑bhlo 'ku nyɩkpa 'fɩɩn 'wlu.#18.14 Zɛɛ 'sɩɩ 11.49‑50.

Pɩɛlö cɛɛ‑ Zozii tɛɛtɛɛdä

(Matie 26.69‑70; Makö 14.66‑68; Lukö 22.55‑57)

15‑Mä Simɔɔ Pɩɛlö ‑yä 'kʋgënyʋaa' 'yigädalɔɔ ‑bhlo, wa gëë‑ bhä Zozii 'kʋ. ‑Lɔɔ' 'kʋgënyɔyɩ nä, 'cibhisänyɔ 'kädɔ Anö ‑yio bhä nä, kɔ ‑yä Zozii 'sɔ ‑ŋëë ‑mɔɔ ɔɔ' jluu 'kʋ 'titi. 16‑Mä Pɩɛlö nä, kɔ ‑too ‑lɔɔ ‑glënë 'kʋ. Nä, 'kʋgënyɔɔ 'Cibhisänyɔ 'kädɔɔ ‑yi bhlä nä, kɔ ‑yi 'nɩ, 'ŋnɔɔ ‑ɔ ‑bɛɛ bhlä ‑glënëa 'klʋ nä, ɔ yio soo, 'nɩ ɔ yi gbä, 'nɩ Pɩɛlö yi plä. 17‑Mä 'ŋnɔɔ ylää‑ Pɩɛlö, ɔ lä ‑mä, ‑mɔɔ, nyɩkpɔɔ wa ‑klä lä nä, ‑nn ‑wʋ 'sɩɩ ɔɔ' 'kʋgënyɔ plöö‑ ‑a? Pɩɛlö lä ‑ɔ! N ‑yɔsɔ ‑läzä 'kʋ nämnö.

18'Cibhisänyɔ 'kädɔɔ' ‑gänʋnyʋa ‑yä 'Zufʋnyʋaa' 'sʋjaa, wa ‑zla bhä ‑kosugbʋ. Nä, wätlɩ yi bhɛ lä nä, wa ‑glänʋ 'klʋ, 'nɩ wa wlɔ bhä. Pɩɛlö ‑kʋwa bhä yëku, 'nɩ ɔ wlɔmʋ bhä 'sɩɩ.

Anö ylä Zozii wälɩ 'kʋ

(Matie 26.59‑66; Makö 14.55‑64; Lukö 22.66‑71)

19‑Lɔɔ' 'tänyɩɛ 'mnö, 'Cibhisänyɔ 'kädɔɔ Anö ‑yi 'nɩ ɔ yi Zozii 'ylä ɔɔ' 'kʋgënyʋa ‑yä ɔɔ' cɩalɩɩ' ‑za. 20Zozii lä dä n cɩa bhlä nä, nyɩkpaa 'fɩɩn 'klʋ n cii bhä. N cɩa bhä 'sɩɩ 'kɔɔkɔ Laagɔ‑bhitii 'mnö. 'Nɩ Laagɔ‑bhutu 'kädʋʋ 'mnö, ‑gbäsɩɩ 'Zufʋnyʋa 'fɩɩn 'wlää lä 'wlu nä, n cɩa‑ 'sɩɩ ‑mɔɔ. Nn' ‑wʋ wälɩklë ziziodä cii‑. 21Nä, sɩ ‑kʋ bhä 'nɩ ‑n ylä'ä bhä? Nyɩkpaa ‑wa ‑poo'o bhlä 'nyukwli nä, ‑n 'ylʋwa. ‑Mä sä n cii‑ lä nä, wa ‑yi sɔɔ wɩa.

22Ɔ cii‑ lä sɔɔ nä, kä 'Zufʋnyʋaa' 'sʋjaa' nëëdëë' ‑bhlo pɔɔ‑ 'kpeye. 'Nɩ ɔ cii‑, ɔ lä sɔɔ ‑n sää 'Cibhisänyɔ 'kädɔɔ yëku 'mʋ ‑a? 23Zozii lä ‑mä, ‑n ‑nä, kä n ‑sää nyenyisä 'mʋ nä, 'klëa 'titi n cii‑ lä 'nɩ ‑aa ‑wʋ lä 'yi gëë‑ nä, ‑n 'ŋʋa sä ‑ya 'ga 'nu. 'Ɩzä, sä n cii‑ lä nä, sɔɔ kä ‑nʋawlɛ plöö‑ nä, ‑ɔnözä 'titi ‑n bhlä'ä bhää? 24Ɩ ‑kʋ bhɛ lä sɔɔ nä, Zozii gʋägʋälɔɔ, kä Anö ‑gbä 'nɩ wa ‑fɔɔ 'cibhisänyɔ 'kädɔ Kayifʋʋ' ‑gbäsɩɩ.

Pɩɛlö cɛɛ‑ Zozii bʋkʋ

(Matie 26.71‑75; Makö 14.69‑72; Lukö 22.58‑62)

25‑Mä Simɔɔ Pɩɛlö ‑kʋ bhä ‑lätee ‑lɔɔ ‑kosuu yëku 'nɩ ɔ wlɔ bhä. 'Nɩ wa yio 'ylä, wlä ‑weyia! ‑Mɔɔ, nyɩkpɔɔ wa ‑klä lä nä, ‑nn ‑wʋ ɔɔ' 'kʋgënyɔ plöö‑ ‑a? ‑Mä Pɩɛlö cɛɛ‑ bʋkʋ, ɔ lä ‑amʋ! N ‑yɔsɔ ‑läzä 'kʋ nämnö. 26Nä, 'Cibhisänyɔ 'kädɔɔ' ‑gänʋnyɔ ‑bhlo, ɔ ‑glö bhä nyɩkpɔɔ Pɩɛlö döö‑ bhlä 'nyukluu 'kʋ nä, ɔ bheli. 'Nɩ ɔ yi Pɩɛlö 'ylä, ɔ lä ‑mɔɔ, ‑n ‑yɔsɔ nn' ‑wʋ ‑mɔɔ ‑gboo 'mnö nii‑ ‑a? 27'Nɩ Pɩɛlö yi bʋkʋ cɛɛ. ‑Lɔɔ' 'tänyɩɛ ‑bhlobhlo 'mnö, 'nɩ ‑zözädö‑kɔkwɛɛ yi wälɩ 'pä.

Wa ‑fä Zozii Pilatö dëlü

(Matie 27.1‑2,11‑30; Makö 15.1‑9; Lukö 23.1‑25)

28Zözädö‑tänyɩɛ 'mnö, wa ‑sä Zozii Kayifʋʋ' ‑gbäsɩɩ, 'nɩ wa ‑fɔɔ Wlomɛɛ ‑gɔmnɔɔ' ‑gbäsɩɩ. ‑Mä 'Zufʋnyʋaa' 'cifinyʋaa' ‑wʋ ɔɔ' 'gbëa 'mnö ‑plä. Wlä waa' kä ‑kä wa yëku pee plaa, ɩyä wa 'kä Pakö‑glɩsɩɩsɩɛ 'nimʋ. 29Ɩ ‑kä 'ŋnö nä, Wlomɛɛ ‑gɔmnɔɔ, wa laa bhlä Pilatö nä, kɔ wlʋʋ‑ zɔɔ, 'nɩ ɔ yiwa yëku yi. Ɔ lä wälɩklë ‑sä nyɩkpɔnɔ ‑nʋ bhä, 'nɩ ‑anö gbʋʋ a 'nyɛnöɔ bhää? 30Wlä ɔ 'nö bhä nyɩkpa ‑nyonyo plöö‑ nä, ‑a 'nö‑ö mɔ ‑lä bhɔɔ ‑lä. 31Pilatö lä anyɩ 'titi, a 'bhlüo 'kʋ ‑yä a plä ɔɔ' yëkuu' 'titee sä anyɩa ‑jlämaa ylä lä nä! 'Zufʋnyʋa lä Wlomɛɛ‑jlämaa' 'nyɩ‑anyɩ ‑wʋ ‑lɔɔ nynä ‑a 'bhlä nyɩkpɔ ‑yä ɔ 'ku.

32‑Mä, ‑nɩnɩ 'fɩɩn nä, kɩ nʋɔ bhlä ‑yä, sä Zozii cii‑ bhlä nynä ɔɔ' 'kwiee wälɩɩ yi 'kʋ 'plö nä, ɩ 'kä bhä sɔɔ 'kʋ 'plö.#18.32 Zɛɛ 'sɩɩ 3.14; 12.32.

33'Nɩ Pilatö yi bʋkʋ ‑bhutuu' plä, 'nɩ ɔ yi Zozii laa, 'nɩ ɔ yio 'ylä, ɔ lä ‑mä, ‑mɔɔ plöö‑ lä 'Zufʋnyʋaa' 'loyoo ‑a? 34Zozii lä ‑mä, ‑mɔɔ 'titi, ‑naa 'wluu wälɩ‑ ‑n ci ‑a? ‑Mä, kwa ‑sonö‑ö 'naa yëkuu' wälɩ ‑a? 35Pilatö lä ‑amʋ ‑a? 'Zufʋyu n plöö‑ ‑a? ‑N 'bhunyʋä ‑yä waa' 'Cibhisänyʋaa' 'cifinyʋa, wamää‑ ‑kunö‑ö lä tʋ, ‑amʋ dëlü. Nä, wälɩklë ‑sä ‑n ‑nʋ bhää? 36Zozii lä 'naa 'leyiduu' ‑wʋ ‑mää zëkpë 'kʋʋ lʋʋ plöö‑. Ʋ kä bhä ‑mää zëkpë 'kʋʋ lʋʋ plöö‑ nä, 'naa ‑gänʋnyʋa yi bhä 'naa 'wlu vë, 'nɩ nn' ‑lä bhɔɔ 'Zufʋnyʋä wlɩɩ' pënöɔ‑. Nä, 'naa 'leyiduu' ‑wʋ ‑mää zëkpë 'kʋʋ lʋʋ plöö‑. 37Pilatö lä 'aaa! Nä 'loyo‑ ‑n plöö‑ lä 'zaazɩ ‑a? Zozii lä ‑mɔɔ ci lä nynä n ‑glö 'loyo. Kä wa ‑gänö'ö 'nɩ n ‑yi lä 'ylʋzɔɔ ‑yä n 'kä ‑nʋawlɛɛ' ‑dläfʋɛ lü. Nä, nyɩkpɔɔ' lɔɔ ‑ɔ ‑kʋ lä ‑nʋawlɛɛ' 'pɛlʋʋ nä, ɔmɔɔ‑ nu lä 'naa ciciwälɩ. 38Pilatö lä 'nɩ wa laa bhä ‑nʋawlɛɛ?

Ɔ cii‑ lä sɔɔ nä, kɔ wlʋʋ‑ ‑zɔɔ, 'nɩ ɔ yi bʋkʋ 'Zufʋnyʋa yëku mʋ. 'Nɩ ɔ yiwa soo, ɔ lä nyɩkpɔɔ a ‑lä lä nä, gbëgëdëë' laa ‑a yio lä gbʋ klaa nä, ‑amʋ, nn' 'nionya ‑wʋ yëku.

Wa yä Zozii' wälɩɩ' döö nynä wa yio 'bhlä

(Matie 27.15‑31; Makö 15.6‑20; Lukö 23.13‑25)

39‑Mä, anyɩa 'bhlɛ ‑kɛ nä, 'nɩ Pakö‑glɩsɩɩsɩɛ 'kʋ, a ‑waa nynä ‑mä n ‑taa ‑jɩnyɔ ‑bhlo 'yi nä, aa ‑waa bhä nynä n ‑taa 'Zufʋnyʋaa' 'loyoo 'yi ‑a? 40'Nɩ wa yi 'kɛsɛ klu, wlä ‑aa 'ylä ‑wʋ ‑nɔnɔ, ‑mä Balabasö 'mɔ ‑a ylä!

Sɩ ‑kʋ bhlä naa, nyɩkpɔɔ wa laa bhlä Balabasö nä, ɔ ‑glö bhä nyɩkpa‑bhlänyɔ.#18.40 Zɛɛ 'sɩɩ Nʋnʋ 3.14.

נבחרו כעת:

Zään 18: god

הדגשה

שתף

העתק

רוצים לשמור את ההדגשות שלכם בכל המכשירים שלכם? הירשמו או היכנסו

מידע נוסף אודות GOD - u2