Matie 14

Zaa Batisɩ 'a 'kwiea a wɛlɩɩ

(Maakö 6.14-16; Lwiikö 9.7-9)

1‑Lɛ a 'tɛnyɩ 'la 'mö, Eloodɩ ‑ɔ 'kämanɩɛ Galilee‑bhölɩɩ ‑gömöö, ɔ 'nʋä Zezwii a nʋnʋli a 'dɩɩ, 2'n ɔ yiɛ 'ɔ nɩkpaa 'dɩ 'nyɛ, ɔ lɛ naa: «Zaa Batisɩ ‑ɔ 'ku a‑a, mɔɔ. Glu ɔ 'wlʋä, nza ɔ kää 'mötɛɛnɔ 'n ɔ bhɛɛ sa'a a zɩzɛli.»

3-4Nyɩasɛ Zaa Batisɩ 'nɩɛ 'la 'ku, maa wɛlɩɩ ‑wʋa a‑a ‑lɛ. 'Ylɩ ‑bhlʋ 'mö, Eloodɩ mɔɔ sɛ a‑a ɔnyɩ a ‑daayu Filiipö 'nglɔ yɔwʋ. 'Nglɔ 'la, 'mö wa laa Elodiadɩ. Wɛlɩ 'la a za, 'n Zaa Batisɩ nyɛ a‑a 'kwädlɩ Eloodɩ 'dɩ nɩɩ: «‑Na ‑daayu 'a nglɔɔ ‑n kwää da'aa, yɩ'ɩɛ nɛnɩ ‑n 'kɔ ‑kälɩ.» ‑Sɩbhä a za, Eloodɩ 'nyɛ a‑a 'ɔ nɩkpaa 'dɩ 'n wa yiɛ Zaa Batisɩ köbhä, 'n wa yoo gwa, 'n wa yoo ‑jie 'mö 'pä. 5Eloodɩ yɩbhä a ɔ 'kä Zaa Batisɩ 'lɩbhä ɔ 'kä 'ku. ‑Maa ɔ gu'ɛ mä'ä ‑bʋbʋʋ zaa, ɔ 'nɔɔ a 'lɩbhä. Ɛ'ɛ ‑bhö nyɩasɛ, ‑maa Zwiiföwaa a dɔ'wʋ, Zaa Batisɩ, Lagɔ 'a 'möbhïlanɩnyɔɔ ɔ glɩnɩ a‑a. 6'Ylɩ ‑bhlʋ 'mö, 'n Eloodɩ 'a gwälɩzlɩ a 'wʋbhlizlɩ yiɛ ghlɛ, 'n ɔ yiɛ nɩkpa wäzɩ wa 'kä 'bhli. Wa ‑wʋ 'bhli dɔ'wʋ, ‑lɛ nɩkpa 'wuë a 'yila 'klʋ, Elodiadɩ ‑yɛnglɛ 'n ɔ yiɛ ‑lɛ yɩnɩ. 'N 'ɔ yɩyɩbhʋʋ yiɛ Eloodɩ dlɩ 'mlɩ ‑sɛ. 7'N ɔ yiɛ nglʋyuu wäzɩ, ɔ lɛ naa: «'Saa ‑n ‑kä ‑waa, 'yɩbhänɩ'mu. ‑Maa n zligo nɩɩ, n ‑yimu 'nyɛ.» 8Ɔ gbää sa'aa, nglʋyuu 'yɩbhää ɔ ‑da nimïï, 'saa ɔ 'kää Eloodɩ 'yɩbhänɩɩ, 'n ‑daa yonyɩɛ sʋlʋnɩ. 'N nglʋyuu yiɛ Eloodɩ 'dɩ 'nyɛ nɩɩ: «Nyɩaa Zaa Batisɩ 'a 'wukpëlea. 'Zʋa ‑sɩkaa ‑sɩkaa 'bëë 'mö, ‑n ‑ka'ma yowʋ 'nyɛ.» 9Ɔ gbää sa'aa, 'n 'bhlɩlowli yiɛ kɔmanɩ, ‑maa sɛ ɔ zligonɩɛ ‑lɛ ɔ 'bhɩa 'yila 'klʋ a za, 'n ɔ yiɛ 'wʋ nglu. 10'N ɔ yiɛ nɩkpɛ ‑mä ‑jiebuduu 'mö tie ɔ 'kä Zaa Batisɩ 'wlu ‑dɩɛ mö. 11Ɔ ‑doo 'wlu 'wëë, 'n ɔ yiɛ 'ɔ 'wukpëlea 'bëë 'mö 'zʋ, 'n ɔ ‑nyaa yiɛ yi. 'N wa yeaa nglʋyu 'la yowʋ 'nyɛ, 'n ɔ yeaa ‑mä ɔ ‑da kwä. 12Zaa Batisɩ 'a ‑gänɩwaa 'nʋä ɔ 'kukutɩtɩɩ, 'n wa yiɛ ɔ ‑gäzɛɛ kie mö 'n wa yee ziza, 'n wa yia'aa Zezwii 'dɩ 'nyɛɛ mö.

Zezwii yɛ nɩkpa a 'dwi 'sɔ nɩkpa a gwlɩ kʋgbä (5.000) lile 'nyɛ

(Maakö 6.30-44; Lwiikö 9.10-17; Zaa 6.1-15)

13Zezwii 'kɩɛ 'nʋʋ, 'n ɔ yiɛ 'wʋ ‑sɔ, 'n ɔ yiɛ 'gɔlʋ 'wʋ 'libhï, dɛ ‑bhlʋ dɛ ɔ 'kää ɔ 'yize ‑wʋ, ɔ 'kä ‑lɛ mö. Nɩkpa 'nwiɛ, wa 'bhöönɩ ‑mä ‑gwlɩ 'wuë ‑gömö, wa ‑wʋ nyuu tɩtlɩnɩ dɔ'wʋ 'n wa yoo 'bɩwʋ mö. 14Gɔlʋʋ köbhää kïkëa, Zezwii kwliɛ, nɩkpa su ‑lɛ 'kïke 'wlu. Ɔ 'yuëë 'ylɩmöö, 'n wa ngäzɩ yoo tenyii 'lɩbhä. Wa gla'mö a guzuwaa, 'n ɔ yuëë yɛmanɩ. 15Sa'a ‑këë, 'n ‑kidosɛ yiɛ ghlɛ. 'N 'ɔ ‑gänɩwaa yoo yɔwʋ 'dio, wa lɛ naa: «Zlɩ yɛ fäla zaa, 'nyɛ nɩkpaa 'dɩ wa 'kä 'wʋ ‑sɔ. Mä'ä a ‑gwlɩɩ 'mö, wa 'käa ‑mä mö, wa 'käa ‑mä wanyɩ a lile pɩa. ‑Maa 'klokwëjijo'wʋ ‑a ‑wʋä dɛ'ɛ.» 16Zezwii lɛ naa: «A'bhï, a nɩ 'nyʋä lile, ‑maa wa nɩ tɩ mö.» 17Wa lɛ naa: «'Fɔlɔbhï ngbï, 'n zibhïya 'sɔ a 'yize mö ‑a ‑suä cuu.» 18Ɔ lɛ naa: «‑Aa, a nɩ ‑la'mi!» 19Wa ‑nyɩɩ yiɛ, 'n ɔ yiɛ nɩkpa 'wuë 'dɩ 'nyɛ, 'n wa yiɛ ‑mä ‑putukwëa ‑gömö sɛ glɩ. 'Fɔlɔbhï ngbï ‑kpɔ ‑nyɛ zibhïya 'sɔ ‑kpɔ 'sɔ, 'n ɔ yiɛ 'wʋ 'libhï. 'N ɔ yiɛ ghäyɩ yɩlɩ, 'n ɔ yiɛ yɩ za Lagɔ bhälɩ. 'N ɔ yiɛ 'mö ‑dɩdɩnɩ, 'n ɔ yiɛ 'ɔ ‑gänɩwaa yowʋ 'nyɛ. 'N wa yiɛ nɩkpa 'wuë dilanɩ. 20Wa 'wuë 'n wa yiɛ li 'n wa yiɛ lʋ, 'n yɩ yiɛ 'wʋ tʋʋ. 'Fɔlɔkïbhï ‑nyɛ zibhï 'sɔ ‑yɩ tʋʋä 'wʋ, wa 'libhiɛ, yɩ yie ‑käkö kʋgbä'sɔ. 21‑Maa ‑wa liɛ ‑lɛ a lile 'la, ‑bhli nɩkpa a 'dwi 'sɔ nɩkpa a gwlɩ kʋgbä (5.000). Ngwlɩɩ ‑nyɛ yuëa 'sɔ, 'mö wa 'nɩɛ zɛlɩmö.

Zezwii yɛ 'nyu 'klʋ nɛmönɩ

(Maakö 6.45-52; Zaa 6.15-21)

22Wa bhɩɛ zɛmö 'wë cuu, 'n Zezwii yiɛ 'ɔ ‑gänɩwaa 'dɩ 'nyɛ nɩɩ, wa nɩ ‑gbälɛ ‑mä 'gɔlʋ 'mö, wa 'kä ‑bhlɛ ‑mä nyuu a kïkë ‑mä'la ‑gömö 'yuku 'plɩ, ɔ 'kä nɩkpaa bhʋ ‑gömö ‑sɛ. 23Ɔ ‑sɛɛ nɩkpaa bhʋ ‑gömö 'wëë, 'n ɔ yiɛ ‑gäga ‑bhlʋ 'klʋ mö ɔ 'kä Lagɔ bhibhe. Ɔ 'yize, ɔ glɩ ‑mä 'n kätɩkpamlɩ yiɛ ylumanɩ. 24Gɔlʋʋ 'ɔ ‑gänɩwaa mönɩɛ 'mö yɛ 'yuku ghlɛ 'wë 'n 'vuu yiɛ mää gɔlʋʋ mönɩ a‑a 'bhöönɩ, zaa 'nyu kɔdʋʋ a ‑gbɔkwälɩɩ a za, wa yia'a 'lu ‑kë, gɔlʋʋ 'nɩɛ ‑mä mö. 25Zlɩzɩdɔ'wʋ ɔ ‑sɔɔ 'wʋ, 'n ɔ yuëë 'bɩwʋ mö. Ɔ ‑wʋä mö dɔ'wʋʋ, ‑lɛ ɔ nɛmönɩɛ 'nyu 'klʋ. 26‑Maa wa 'yɩɛ ɔ 'nyuklʋnɛmönɔɔ 'ylɩmöö, zuzuu 'bhuëëë ‑gömö. Wa ‑tɔnɔ ‑zele, 'n wa yiɛ tenyii 'mö 'kpa nganɔ a za. 27Wa 'kpaa 'möö, 'n Zezwii yiɛ gbʋ ‑dɩ, ɔ lɛ naa: «A 'zʋ ‑mä dlɩ, nganɔ nɩ tanyɩ 'lɩbhä, ‑maa ‑amöä.» 28Ɔ gbää sa'aa 'n Piɛlɩ yiɛ gbʋ ‑dɩ, ɔ lɛ naa: «‑Alowli ‑n ‑kä ‑tiamö nɩɩ ‑nmöä nʋʋ, gbä n 'kä'ɛ na a ‑lɛ 'nyu 'klʋ nɛmönɩmö, n ‑kamö yinɩ.» 29Zezwii lɛ naa: «Yi!» Ɔ gbää sa'a cuu, 'n ɔ yiɛ ‑mä 'gɔlʋʋ 'mö 'wlʋ, ɔ ‑wʋ ‑lɛ 'nyu 'klʋ nɛmönɩ dɔ'wʋ 'n ɔ yiɛ Zezwii mönɩ. 30‑Maa nyuu a ‑gbɔkwälɩɩ 'vuu pää ghäyɩɩ, ɔ 'yiɛ 'ylɩmöö 'n nganɔ yoo 'lɩbhä. Ɔ ‑wʋ 'wlu 'mla dɔ'wʋ, 'n ɔ yiɛ tenyii 'mö 'kpa, ɔ lɛ: «‑Alowli, yii 'wʋ!» 31'N Zezwii yoo sɔ köbhänɩ 'n ɔ yoo ‑mä ‑sɛ, ɔ lɛ naa: «Sɛ yɩ ‑wʋ ɔ 'mö, n‑n gʋgɔ bhä 'nɩ? ‑Nn‑ä sasɛ Lagɔ dlɩ 'tɛɛnɩ.» 32Wa 'sɔ ‑kpɔ, 'n wa yiɛ ‑mä gɔlʋʋ 'mö ‑gbälɛ. 'N 'vuu yiɛ donɩ. 33‑Mä 'gɔlʋ 'mö, 'ɔ ‑gänɩwaa 'wuë 'n wa yiɛ ‑lɛ ɔ dlɩ 'mö ‑kokomïladigbï glu 'pä. Wa lɛ naa: «Lagɔ 'a yuu mö ‑n glɩnɩɛ ‑tiamö.»

Zezwii yɛ guzuwa a ‑bɛ ‑mä Zenezalɛɛtɩ‑bhölɩɩ 'mö yɛmanɩ

(Maakö 6.53-56)

34Wa 'tʋä nyuu 'wëë, 'n wa yɩɛ ‑mä Zenezalɛɛtɩ‑bhölɩɩ 'mö ghlɛ. 35Mä a ‑nʋa, wa yɩbhlɩnɩɛ Zezwii cuu, ‑mä a ‑kʋkʋyɔwʋ a ‑gwlɩɩ 'wuë 'mö, 'n wa yiɛ ‑mä ɔ yiyitɩtɩ bia. 'N ‑mä a ‑nʋa ‑nyɛ 'wa guzuwaa 'wuë yiɛ yi. 36'N wa bhibhee Zezwii yɔwʋ nɩɩ: «‑Yayaya, nglu 'wʋ, ‑na'a ‑bäna a klɩ a 'yizea, wa 'kɛ kɛ zɩ.» Guzuwaa 'wuë ‑wa zee kɛɛ, yɛmanɩ wa yɛmanɩɛ.

נבחרו כעת:

Matie 14: bet

הדגשה

שתף

העתק

רוצים לשמור את ההדגשות שלכם בכל המכשירים שלכם? הירשמו או היכנסו

מידע נוסף אודות BdG2

Matie 14

פסוקים פופולריים מ-
Matie 14

להקשיב ל Matie 14

כתבי הקודש:

Bété, Guiberoua

גרסה: BdG2 - bet

Matie 14

Matie 14

פסוקים פופולריים מ- Matie 14

להקשיב ל Matie 14

כתבי הקודש:

Bété, Guiberoua

גרסה: BdG2 - bet

Matie 14

פסוקים פופולריים מ-
Matie 14