Matie 15

Nɩkpaa a 'päpägböö

(Maakö 7.1-13; Lwiikö 11.37-41)

1'Ylɩ ‑bhlʋ 'mö, Falizɩɛwa ‑mumuë ‑nyɛ Moyizɩ 'a Gböö a 'cɩawa ‑mumuë 'sɔ, wa 'bhöönɩ Zeluzalɛɛmö, 'n wa yiɛ ‑mä Zezwii ghlɩ, wa 'kɔ nimï 'yɩbhä, wa lɛ naa: 2«Sɛ yɩ ‑wʋ ɔ 'mö 'n ‑na'a ‑gänɩwaa 'nɩ 'zʋ bhä ‑aa dɩbawa a dɩbawaa a gböö 'klʋkpamö? Ɛ'ɛ ‑bhö nyɩasɛ, ‑maa wa ‑kä wa 'kä lii, sɛɛ gböö gbää wa nɩ wɔlʋ kɛɛ, wa'a wɔlʋ ‑sɩbhä kɛ.» 3Zezwii lɛ naa: «Abhʋa a 'naa, sɛ yɩ ‑wʋ ɔ 'mö 'n a zʋ bhä anyɩ 'a 'päpägböö 'klʋkpamö, 'n a sɛ bhä Lagɔ 'a Gböö 'klʋkpamö nɩ? 4Ɛ'ɛ ‑bhö nyɩasɛ, ‑maa Lagɔ lɛ naa: 'Zʋ ‑na dɩba ‑nyɛ ‑na ‑da 'sɔ 'klʋkpamö.#15.4 Ɛzoodɩ 20.12; Detlenɔɔmö 5.16. Sɛ'ɛ ɔ gbä'ɛ nɩɩ: ‑Ɔ ‑kä ɔ dɩba ‑nyɛ ɔ ‑da 'sɔ a gla'mö a ‑nɔ ‑bhlʋ a dɛ wɛlɩzoku bhïlaa, wa kä wa 'kɔ 'lɩbhä ɔ 'kä 'ku.#15.4 Ɛzoodɩ 21.17; Levitiikö 20.9.

5‑Maa abhʋa abhlɩ, sɛ'ɛ a 'cɩaa nɩkpa nɩɩ, ‑na dɩba ‑nyɛ ‑na ‑da 'sɔ, n‑n ‑kä wa gla'mö a ‑nɔ ‑bhlʋ 'dɩ 'nyɛ nɩɩ, 'saa n ‑kamö a‑a 'nyɛ n ‑kamö 'wʋ yii, Lagɔ 'mö n 'kʋa'aa 'nyɛ, 6zaa n‑n 'nɔa'a ‑lu 'nyɛɛ, yɩ nɛnɩ. Sa'a ‑sɩbhä a sɛɛ Lagɔ 'a wɛlɩɩ sɛ 'n a zʋä anyɩgäsɛ 'a 'päpägböö 'klʋkpamö. 7'Kwlɩsɔkäwanyɩ, Lagɔ a 'möbhïlanɩnyɔ Ezayii, a dɛ ɔ bhïla a‑a nɩɩ: 8Lagɔ lɛ naa:

Nɩkpa nɩ,

gla 'klʋ wa 'ghlimanɩɛ na 'nglɩ,

‑maa wa dila ‑nɩɩɛ 'wʋ ‑wʋ.

9 Zaa, wa ‑yii bʋbɔ ‑kë,

yɩ'ɩɛ dɛsɛ ‑kä.

Wa ‑kä 'cɩaa,

nɩkpa a 'päpägböö 'mö wa 'cɩaa. # 15.9 Ezayii 29.13. »

‑Lii ‑yɩ plaa nɩkpɛ fɩ Lagɔ a 'yila 'klʋ a dɔ'wʋʋ

(Maakö 7.14-23)

10Zezwii 'nyɛɛ ‑sɩbhä Falizɩɛwaa 'dɩ 'wëë, 'n ɔ yiɛ nɩkpabhë wäzɩ, ɔ 'kʋä 'dɩ 'nyɛmö. Ɔ lɛ naa: «A ‑pʋnɩ 'yukwli a 'kä sasɛ 'nʋ. N nɛ naa: 11'Saa nɩkpɛ liɛ, mɩɩ 'nɔɔ fɩ päla Lagɔ a 'yila 'klʋ a dɔ'wʋ. ‑Maa ‑lii ‑yɩ ghlɛnɔɔ nglii, mɩɩ plɔɔ fɩ.» 12Zezwii gbää sa'aa, 'n 'ɔ ‑gänɩwaa yoo yɔwʋ 'dio, wa lɛ naa: «Wɛlɩɩ ‑n bhïlaa da'a Falizɩɛwaa a dɛɛ, ‑n ‑yi bhä sɛ yɩ këluë yɔwʋ ‑a?» 13Ɔ lɛ naa: «Na dɩba Lagɔ ‑ɔ ‑wʋ ‑mä ghäyɩ 'wʋ, 'saa ɔ'ɔɔ glʋʋ, glu wʋ 'kää 'bhöö. 14Zaa, nɩkpa 'la a nɩ 'tatinuë 'yi. ‑Maa wa 'kä bhɩɛ 'kukwlekäwa a ‑muë yɩbhä'ɛ wa 'kä wa 'bhɩakukwlekäwa ‑su. A ‑yi sɛ nɩɩ, 'kukwlekänyɔ ‑kä ɔ 'likukwlekänyɔ ‑suu, wa 'sɔ ‑kpɔ, 'bhʋkwa 'mö wa 'kää bhlinɩ.» 15'N Piɛlɩ yiɛ gbʋ ‑dɩ, ɔ lɛ naa: «Ninea ‑n 'pää ‑sɩkaa, ‑sɛnɩnya zɛmö.» 16Ɔ lɛ naa: «Abhʋa'ɛ abhlɩ, a'a bhä 'nɛɛnɔ ‑kä zaa a 'naa bhä 'mö 'nʋ ‑a? 17A'a bhä sɛ ‑yi nɩɩ, lilea 'wuë nɩkpɛ liɛ, a'a mɔ dlɩ zɛmö, ‑maa 'mlɩ a gïloo sɛ 'wë 'n ɔ kwaa bhäla 'kwlɛ yɔwʋ. 18‑Maa 'saa ghlɛnɩɛ nɩkpɛ nglii, ‑mä ɔ dlɩ zɛmö, ‑mä yɩ 'bhöönɩɛ. Zaa, mɩɩ bhɛnɩɛ yɩ 'kɔ fɩ päla. 19Ɛ'ɛ ‑bhö nyɩasɛ, ‑maa ‑mä nɩkpɛ a dlɩ zɛmö ‑mä dlɩpäsɛzokwëa 'bhöönɩɛ, ma‑a kää 'nglɩ 'n ɔ nʋä 'nyinyloli a kii 'wuë. Ma‑a kää 'nglɩ, 'n ɔ lɩbhää 'ku, 'n nyɩbhɛlʋ tɛlɩɛ 'ngwlɩ sɛ, 'n 'nglɔ tɛlɩɛ nyɩbhɛlɩ sɛ. Ma‑a kää 'nglɩ 'n nɩkpɛ ghliɛ ɔ 'bhɩa a ‑li 'wi. 'N ɔ 'libhïnɩɛ ɔ 'bhɩa widɩ 'wʋ, 'n ɔ nyimaa ɔ 'bhɩa a 'nglɩ. 20‑Lizoku 'la 'wuë, mɩɩ plaa nɩkpɛ fɩ Lagɔ a 'yila 'klʋ a dɔ'wʋ. ‑Maa wa ‑kä wa 'kä li, sɛɛ gböö gbää wa nɩ wɔlʋ kɛ, n‑n nɩ ‑sɩbhä kɛ wɔlʋʋ, mɩɩ naa ‑kamö fɩ päla.»

Lɛganglɔɔ ‑ɔ 'tɛɛnɩɛ Zezwii dlɩɩ

(Maakö 7.24-30)

21Zezwii 'nyʋää sa'a 'dɩ 'wëë, 'n ɔ yiɛ 'wʋ ‑sɔ. ‑Gwlɩɩ wa laa Tiilɩ 'n Sidɔɔ, yɩ yɔwʋ a bhlɩɩ 'mö 'n ɔ yiɛ ‑mä mö. 22Ɔ ghlɛɛ ‑mä, ‑mä a 'nglɔ ‑bhlʋ, mɔɔ yiɛ 'n ɔ yoo 'mö 'winɩ, ɔ lɛ naa: «‑Atʋ, Daviidɩ a 'yu a 'yu, na nglʋyuu, ɔ'ɔɔ tenyii ‑yɛ. Zuzukwëzokwë ɔ 'kää ‑gömö ma‑a zio tenyii 'zwɩ. Zaa, n bhiamö, 'pä na ngäzɩdlɩ ‑n 'kɔ puë.» 23Nglɔɔ gbää sa'aa, Zezwii 'nɔɔ ngli pälɩ 'lɩlɩlɩ. Sa'a ‑këë, 'n 'ɔ ‑gänɩwaa yoo 'dɩ 'nyɛ, wa lɛ naa: «‑Atʋ, 'nyɛ nglɔɔ 'dɩ ɔ 'käa yɩ mö ‑maa zaa, yɩɛ sɛ ɔ 'kpanɩnyɩɛ sa'a nimï 'möö.» 24‑Maa Zezwii lɛ naa: «Yizlaɛlɩ 'a ngëyii Lagɔ ‑sɛɛ ‑lɛ 'mö a ‑nʋa ‑wa ‑bhɩɛɛ wïlaa yɛ tʋʋ, wa 'yize 'mö Lagɔ tieaaa 'wʋ.» 25Ɔ gbää sa'aa, 'n nglɔɔ yiɛ ‑lɛ ɔ dlɩ 'mö ‑kokomïladigbï glu 'pä, ɔ lɛ naa: «‑Atʋ yiii 'wʋ!» 26Zezwii lɛ naa: «Wa ‑kä yuëa a lilea 'wʋ 'libhï wa ‑kaa gʋʋ 'nyɛɛ, yɩ'ɩɛ nɛnɩ.» 27Nglɔɔ lɛ naa: «‑Atʋ, ‑na wɛlɩ nɛnɩ, ‑maa ‑sɩbhä yɩ ‑wʋ 'mö, gʋʋ ‑yɩ ‑wʋä ‑mä 'tebhlea zɛmöö, yɩ ‑lowluwa ‑kä li a lilea ‑a bhliɛ, 'mö yɩ liɛ.» 28Zezwii lɛ naa: «'Ɔ! 'Nglɔ, 'nyɩɛ ‑n 'tɛɛnɩ Lagɔ dlɩ. ‑Sɩbhä a za, 'saa ‑n 'yɩbhää, Lagɔ ‑yimu 'nyɛ.» ‑Lɛ a 'tɛnyɩ 'la ‑bhʋlʋ ‑kpɔ 'mö, 'n nglɔɔ a yuu yiɛ yɛmanɩ.

Zezwii yɛ guzuwa a ‑bɛ yɛmanɩ

29Zezwii 'bhööä da'aa, Galilee‑bhölɩɩ 'mö a 'nyu 'kɔdʋʋ yɔwʋ, 'n ɔ yiɛ ‑mä mö. ‑Mä a ‑gäga ‑bhlʋ 'wlu, 'n ɔ yiɛ ‑mä sɛ glɩɛ mö. 30'N nɩkpa 'kɔkɔmlɛ yoo yinɩ. Wa ‑su guzuwa a ‑bɛ: 'Wʋbhlinɩwa plɛ, 'kukwlekäwa plɛ, nɩmɛnɛkäwa plɛ, ‑ɔɔwɛlɩkäwa plɛ, 'n guzuwa ‑mumuë a ‑bɛ kökä. Wa 'wuë 'n wa yuëë ‑lɛ Zezwii a dlɩ 'mö ‑lɛ, 'n ɔ yuëë ‑sɩbhä yɛmanɩ. 31‑Waa a‑a wɛlɩ ‑kä, 'n 'wa wɛlɩɩ yiɛ do, nɩmänɛkäwaa 'n wa yiɛ yɛmanɩ. ‑Wa bhlinɩ a‑a 'wʋʋ, 'n wa yiɛ nɛmö, 'kukwlekäwaa 'n wa yilaa yiɛ do. Nɩkpaa 'wuë 'yɩɛ ‑sɩbhä 'ylɩmöö, 'n zuzu yuëë ‑gömö 'bhöö 'n wa yiɛ Yizlaɛlɩ a Lagɔ a 'nglɩ 'ghlimanɩ.

Zezwii yɛ nɩkpa a 'dwi 'sɔ (4.000) lile 'nyɛ

(Maakö 8.1-10)

32'N Zezwii yiɛ 'ɔ ‑gänɩwaa wäzɩ, ɔ lɛ naa: «Nɩkpa nɩ, ngäzɩ 'wʋ wa ‑bhööä, sɛ wa ‑kaa dɛ'ɛ 'ylɩ ta yɔwʋ ‑sɛ, 'n wa'aa lililu ‑kä a za. Wa 'nɩ ‑lu li, 'n wa ‑kä wa 'bhili möö, 'yio 'wʋ wa yiɛ 'kplɛnɩɛ ngɔmʋ a za. Zaa, a‑a 'nuë lile 'nyɛ 'wëë, 'naa 'kʋä 'yi 'tatinɩ wa 'kä mö.» 33Wa lɛ naa: «Miɛ abhlɩ, ‑maa 'klokwëjijo'wʋ ‑a ‑wʋä dɛ'ɛ, dɛ ‑a 'kä bhä nɩkpa a ‑bʋbʋ nɩ a lile ghlɩ?» 34Ɔ lɛ naa: «Yɩ ‑gä kɛ, ‑maa a'bhï, 'fɔlɔbhï ‑zɩmö a ‑su bhä?» Wa lɛ naa: «‑A ‑su 'fɔlɔbhï ngbi'sɔ 'n zibhïyie 'yɛ.» 35Wa gbää sa'aa, 'n ɔ yiɛ nɩkpaa 'wuë 'dɩ 'nyɛ nɩɩ: «A nɩ glɩ dʋdʋ 'wʋ sɛ.» 36Wa glɩɛ sɛ 'wëë, 'fɔlɔbhï ngbi'sɔ ‑kpɔ ‑nyɛ zibhïï 'sɔ, 'n ɔ yiɛ 'wʋ 'libhï, 'n ɔ yiɛ yɩ za Lagɔ bhälɩ, 'wë, 'n ɔ yiɛ 'mö ‑dɩdɩnɩ, 'n ɔ yiɛ 'ɔ ‑gänɩwaa yowʋ 'nyɛ 'n wa yiɛ nɩkpaa 'wuë dilanɩ. 37Nɩkpaa 'wuë, 'n wa yiɛ li 'n wa yiɛ lʋ, 'n yɩ yiɛ 'wʋ tʋʋ. 'Fɔlɔkïbhï ‑nyɛ zibhï 'sɔ ‑yɩ tʋʋä 'wʋʋ, 'ɔ ‑gänɩwaa 'libhiɛ, yɩ yie ‑käkö ngbi'sɔ 'wʋ. 38‑Maa ‑wa liɛ ‑lɛ a lile 'laa, wa ‑bhli nɩkpa a 'dwi kʋgbä (4.000). Ngwlɩɩ ‑nyɛ yuëa 'sɔ, 'mö wa 'nɩɛ zɛlɩmö. 39Zezwii 'nyʋää lile 'wëë, 'n ɔ yuëa'aa wa 'wuë 'yi 'tatinɩ 'n wa yiɛ mö. Wa möä 'wëë, 'n ɔ yiɛ 'gɔlʋ 'wʋ 'libhï, bhlɩɩ wa laa Magadaa 'n ɔ yiɛ ‑mä mö.

נבחרו כעת:

Matie 15: bet

הדגשה

שתף

העתק

רוצים לשמור את ההדגשות שלכם בכל המכשירים שלכם? הירשמו או היכנסו

מידע נוסף אודות BdG2

Matie 15

פסוקים פופולריים מ-
Matie 15

להקשיב ל Matie 15

כתבי הקודש:

Bété, Guiberoua

גרסה: BdG2 - bet

Matie 15

Matie 15

פסוקים פופולריים מ- Matie 15

להקשיב ל Matie 15

כתבי הקודש:

Bété, Guiberoua

גרסה: BdG2 - bet

Matie 15

פסוקים פופולריים מ-
Matie 15