IIMU/UUNGW 2
2
1Ala Mungú doori nee yaamu nee muruuwós sleémeero gay adoorír hhe'eés tleehhamooro. 2Ay bál baalár faanqw Mungú gadiyeérós sleémeero gaa hhe'eés, tidá' sleémeero ar aa tleéhh. Mungú iri hungu/uús bál baalár faanqwe, gadiyeeduwós kudá' sleémeero ngiwa hhe'eés. 3Mungú baalaadár faanqw gana tsuúq, gari hhoohhoeés. Asma ina hungu/uús gadiyeeduwós kudá' sleémeero ngiwa hhe'eés awa tleehhamór doori nee yaamu. 4Kaangwí an alki/ituú adoodá' doori nee yaamu kira tleéhh.
Asalmoó Edeni
Qoomaadá' AAKOÓ Mungú yaamu nee doori ngiwa tleéhh, 5gár naa ti'it i káhh baraá xatsoowo. Tam gitso naa ti'iitiká, asma AAKOÓ Mungú tluwaay gwa haniisiiká, laqaá tam heé yaamu gaa doosl i kaahh. 6Kutli niri baraá yaamuú wa ti'ít, nee yaamu sleémeero giri naa/ás.
7AAKOÓ Mungú hee guri tleéhh ar hhape, guri hiinsluú slafíngw i ufaáhh, hee tari heé slaáf.
8AAKOÓ Mungú asalmo guri dahaás bihhaá da/aáw baraá yaamaá Edeni. Heewós kudá' aa tleéhh guri baraadádí qaás. 9AAKOÓ Mungú xaa'aá daa'aweemaá dimbadimbé giri baraá hhapér wa titi'iís, xaa'aá hhohho' nee awa /aymár ya/aamá'. Nee baraá tla/ángw asalmoowo Mungú xa'anoó mamuuwós slafíngw hanmiisá' guri qaás. Nee xa'anoó mamuuwós xu'utír muruú hhó' nee oo tlákw laqaaqamá' guri malé qaás.
10Yaae i deer ar baraá asalmoó Edenír wa wa/amiim, i asalmoó naa/amaamís. Aluuwo tiri qasmís tari yau tsiyáhh. 11Umuú yaaér geera a Pishoni, an tidá' yaamaá Hawila gaa harwet. Baraadae sahaábu i deer. 12Nee sahaábuú yaamuudá' ku ló'wa hhohhó'. Slám baraadae tlaa/aá hhohho' awa ta bay bedoóla i dayá', nee tlaa/aá tlaxo gawden awa ta bay shohamu. 13Nee umuú yaaér tsár a Gihoni, an yaaér yaamaá Kushi sleémeero gaa harwet. 14Nee umuú yaaér tám a Tigri. An yaaeedá' aa waarahh ar bihhaá da/aáw awa yaamaá Ashuru. Nee umuú yaaér tsiyáhh a Eufrate.
15AAKOÓ Mungú heedaádá' guri huúw nee guri qaás baraá asalmoodá' ta bay Edeni, as nguwa doosli nee nguwa amohhe'eemisi. 16AAKOÓ Mungú heedaádá' guri hara'ayín guri báy, «Mamaá xaai sleémeero awa baraá asalmoowí i asleér /aymaaro, 17ala mamaá xa'anoó xu'utír muruú hhó' nee oo tlákw, mi /ayaar, asma bál mamaá xa'anoowí bira /ák xueek, a gwá'.»
18AAKOÓ Mungú iri oó', «Hee iwa kilós hooti a gár hhooeeká. Heé nee inós slaqmís un tleéhh, oo alee/iisaywós wa hariím.» 19AAKOÓ Mungú umuúqo makiito'ór sla/to gana titi'iís baraá yaamuú wa alé, nee tsir/ór gáwtí tlatlaaw, giri dír heedaádií huúw as ngiwa umeérí tlaaqi. Muruú slaáf sleémeero guri umeérí tlaáq, umeedá' tari umer'ín. 20Hee giri umeérí tlaáq umuúqo makiito'ór ta de'ena nee tsir/ór gáwtí tlatlaawa, nee umuúqo makaá baraá darmú hoota'a. Ala alee/isusmoó inós wa hariím gwaa slayká baraá tla/angw'ine.
21AAKOÓ Mungú hee guri gu'tér iló' i haniís. Hee iwa baraá gu'teérií dirii'i, AAKOÓ Mungú guri gweehhamoó wák tuú/, didaádá' gari fu'unár tuuntuúk. 22Nee gwehhamodá' aa tuú/ baraá heé wa alé, AAKOÓ Mungú guri /ameenírár tleéhh, gari huúw dír heedaádá'. 23Heedá' iri oó',
«Daxta tí an tidá' aníng wa hariim,
tí a fartá baraá faduueé' daahh,
nee fu'unaá baraá fu'unaay'eé' dahhá'.
Tí kan bay /ameeni#2:23 /Ameeni: Baraá tsifrír Ebraniaro /aymi'iiká' hhawaata nee /ameeni a slaqmís.
asma dír kawa sláy a baraá hhawaata.
24Adoorí an gár hhawaata baabuúwós nee ayírós ngis geexay, tiri haragwaaiyá' nee hareerós, inooín tari slaqwtá wák tleehhiit. 25Heedá' nee hareerose tsaraawo a /aankwets, ala taa murumitiiká.»
נבחרו כעת:
IIMU/UUNGW 2: IRQW
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
The Bible in Iraqw © Bible Society of Tanzania, 2004.