युहान्ना 21
21
येसु न्हिमि चात्यागेलाइको आगाता तिङचालाहि
1इङको न्हुसो येसु आरोङ चात्यागेलाइकोता तिबेरियास समुन्द्रको काम्भेता लोहि जाइको भेनेङ मिङ गालिल समुन्द्र बुङ हि। कालाउ इदोइ घाटाना एसापा जेङहि: 2सिमोन पतरुस, कालाउ दिदुमस दोअ्का थोमा गालिल जिल्लाको कान्हा नगरको नाथानेल, जब्दियाको न्हेनोङ चानगेलाइ कालाउ वाको चात्यागेलाइ मध्येसो आरोङ न्हेमि ए दोफाङ हिघाहि। 3सिमोन पतरुस इम्बालाइहेङ दोअ्हि, का हाया माङलि हानाङका कालाउ आरुगेलाइ दोअ्हि, केलाइ बुङ नाअ् दोफा ल्वाङ। ओदोङ भाअ्सिङ इम्बालाइ हानितेङ नाउता धोल्हि। कालाउ इङको न्हिसिन इम्बालाइ हिदोइ बुङ हाया मारिमहि।
4कालाउ न्हु दिना ह्रिमाको माचाल-मुचुमलाउ येसु समुन्द्रको काम्भेता जाअ्तेङ हिघाहि। कालाउ बुङ चात्यागेलाइ वासेहेङ येसु दोङ दोअ्तेङ मानाल्हि। 5कालाउ येसु इम्बालाइहेङ दोअ्हि, ओइ काङको आनाउगेलाइ, नेलाइ दोफा हाइ दोङ आतुइसा चाका आनेमाने हि? इम्बालाइ येसुहेङ दोअ्हि केलाइ दोफा हाइ दोङ चाका आनेमाने मान्थु।
6येसु इम्बालाइहेङ दोअ्हि, जाले नाउको दाम पाहा आअ् कालाउ हाया निङस्वाना कालाउ इम्बालाइ जाले आअ्हि, हायागेलाइ हेन्जा देनाङ इम्बालाइ गुतिजाले बुङ तानेलि मादोहि।
7कालाउ येसु मायारु पाका उङको चात्या पतरुसहेङ दोअ्हि, वा प्रभु दोङ हि, दोअ्का हिङतेङ सिमोन ताइको गुका धाबा, केङखेनेता लुन्धाइहि जेदोङ वा काम पालाउ होतेङ ताअ्का हिघाहि कालाउ वा समुन्द्रता धाअ्सिहि। 8कालाउ आरु चात्यागेलाइ चाहि नाउता योम्तेङ हायाहोइ पोङघाका जाले तानिकाताङ काम्भेता लोहि। हाइपालिपानु इम्बालाइ काम्भेसो दुरे माको। कालाउ लगभग एसाइ मिटर झोको दुरे हिघाहि। 9जेलाउ इम्बालाइ काम्भेता खुहि, कालाउ इम्बालाइ मेको आङगोराता हाया कालाउ सेले खिनिङ ताअ्का हिघाहि।
10येसु इम्बालाइहेङ दोअ्हि, नेलाइ एलाङ माङका हायासो आधे हाया चुमासु।
11कालाउ सिमोन, पतरुस नाउता धोल्तेङ एसाइ न्हे कुरि ते सुम बा-बार्का हायाहोइ पोङघाका गुतिजाले काम्भेता तानितेङ चुमाहि, कालाउ इदोइ झोको हेन्जा हाया देतेङ बुङ गुतिजाले माअ्थेहि। 12येसु इम्बालाइहेङ दोअ्हि, “लोसु कालाउ चाअ्सु।” कालाउ चात्यागेलाइ मध्येसो हासु बुङ नाअ् हासुको? “दोअ्तेङ हिअ्लि आट मापाहि, हाइपालिपानु इम्बालाइ वा दोङ प्रभु दोअ्तेङ गिका हिघाहि। 13येसु तोले चुमातेङ इम्बालाइहेङ पिहि, कालाउ एन्सा पातेङ हाया बुङ पिहि। 14सिकासो सिन्चालतेङ ल्होका न्हुसो येसु चात्यागेलाइकोता तिङचालाहि। इदोइ चाहि सुमतेङ जेङका हिघाहि।
येसु कालाउ पतरुस
15जेलाउ इम्बालाइ चालि दोअ्तेङ, कालाउ येसु सिमोन, पतरुसहेङ दोअ्हि, ओइ युहान्नाको चान सिमोन, हाइ नाअ् सत्ये कासेहेङ इम्बालाइ खान्तेङ हेन्जा प्रेम पाखेना? पतरुस येसुहेङ दोअ्हि, एइ प्रभु, नाअ् गिखेना, का नासेहेङ चाहिखा, येसु उङकोहेङ दोअ्हि, एन्सा पानु काङको चात्यागेलाहेङ सामाराइ जाइ पान्ठागेलाइ भाइपाङ हि।” 16येसु आरोङ न्हेखे पतरुसहेङ दोअ्हि, ओइ युहान्नाको चान सिमोन हाइ नाअ् कासेहेङ प्रेम पाखेना? वा उत्तारा पिहि, एइ प्रभु नाअ् गिखेना, का नासेहेङ चाहिखा। येसु पतरुसहेङ दोअ्हि, काङको चात्यागेलाहेङ सामाराइ जेसाङ लाखुरिया भेडागेलाइहेङ सामाराइखे। 17येसु पतरुसहेङ सुम्खे दोअ्हि, ओइ युहान्नाको चान सिमोन, हाइ नाअ् कासेहेङ प्रेम पाखेना? कालाउ पतरुस दुखि जेङहि, हाइपालिपानु येसु सुम्खे, पतरुसहेङ दोअ्हि हाइ नाअ् कासेहेङ प्रेम पाखेना? पतरुस येसुहेङ दोअ्हि, प्रभु नाअ् गोताङ काथा गिखेना, का नासेहेङ प्रेम पाखा दोअ्का काथा थाहा दोङ हि। येसु उङकोहेङ दोअ्हि, काङको चात्यागेलाहेङ सामाराइ जेसाङ लाखुरिया भेडागेलाइहेङ सामाराइखे। 18जातिङ भारि का नासेहेङ दोअ्खा, जेलाउ नाअ् धाना हिघाखेना नाअ् ताइमि दोङ ताइको तेपाना तेघाना, कालाउ जेता हानिलि भोघाखेना कालाउ हानिघाखेना, कालाउ जेलाउ नाअ् वाराङ जेनाना, कालाउ नाङको ताइको खुर माचोलियावा, कालाउ भेनेङ द्याङ नाङको तेपाना तेपाप्यावा कालाउ जेता नाअ् हानिलि माकिताना इन्ताङ चुम्पावा। 19येसु इदोइ काथा ओदोङ भाअ्सिङ दोअ्हि कि पतरुस हेसा सिलि गोयाङ कालाउ परमेस्वरको महिमा पाङ। इदोइ दोअ्लि दोअ्तेङ येसु पतरुसहेङ दोअ्हि, का दोफा लोसु कालाउ काङको चात्या जेङसु।
येसुको मायारु चात्या
20पतरुस घुरितेङ खाङलाउ येसु दोङ मायारु पाका चात्याहेङ न्हु-न्हु लोकाताङ पाका तिङहि। वा दोङ दिलिमाको उम चाका बेलाता येसुको भेरपा योम्तेङ हिघाहि। कालाउ तुघुरतेङ दोअ्हि, “प्रभु, हासु नासेहेङ धोका पितेङ रिम्पावा?” 21वासेहेङ तिङतेङ पतरुस येसुहेङ दोअ्हि, प्रभु, यासेहेङ चाहि हाइ जेनाङ?
22येसु पतरुसहेङ दोअ्हि, का धुरितेङ मालोपा भरि उङको बान्चितेङ हि दोअ्का काङको इच्छा पालाउ बुङ नासेहेङ हाइ सोरोकार? नाअ् काङको चात्या जेङतेङ हि। 23ओदोङ भाअ्सिङ उङको भेनेङ चात्या मास्याङ दोअ्का काथा येसुको आरु चात्यागेलाइको माझाता चार-चाराइहि। बास्तबता येसु उङको भेनेङ चात्या मास्याङ दोअ्का मान्थुघाहि, कालाउ का धुरितेङ मालापा भरि वा बान्चितेङ ह्याको दोअ्का काङको इच्छा पालाउ बुङ नासेहेङ हाइ सोरोकार?
दोहोइ
24इदोइ काथाको बिसोइता साक्सि पिका कालाउ इदोइ काथा लेखेका चात्या वा दोङ हि, कालाउ केलाइ गिनाखे कि उङकोको साक्सि सत्ये हि।
25येसु आरु बुङ हेन्जाङ कामगेलाइ पाहि। जेसापा इङको गोताङ लेखेका हिघाहि पानु, सारा सुमिङता बुङ इङको लेखेका कितापगेलाइ माआतिधाङ।
נבחרו כעת:
युहान्ना 21: DHINT
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Dhimal New Testament, by The Love Fellowship is licensed under Creative Commons Attribution-ShareAlike 4.0 License.