मति 14
14
बप्तिस्ता पिका युहान्ना सिका
(मर्कु 6:14-29; लुक 9:7-9)
1इङको बेला राजा हेरोद येसुको पाका रेम्का कामगेलाइको नावाइ चार-चाराइका हिङहि। 2राजा हेरोद ताइको भारदारगेलाइहेङ दोअ्हि! वा बप्तिस्ता पिका युहान्ना। वा सिकासो सिन्हुका हि, ओदोङ भाअ्सिङ सरबुङता इदोइ कामगेलाइ वाकोसो जेङतेङ हिका हि।
3हाइपालिपानु राजा हेरोद ताइको ओने, फिलिपको बे हेरोदियासको भाअ्सिङ युहान्नाहेङ रिम्तेङ कालाउ धेउतेङ झ्यालखानाता ह्वाका हिघाहि। 4हाइपालिपानु युहान्ना राजा हेरोदहेङ एसा दोअ्का हिघाखे। नाअ् ताइको ओनेको बे हेङ ताअ्लि रेम्का माको, जेसापा कि ओने बान्चिकाङ हि! या उचित माको मोसाको व्यवस्था आन्सार सोम्झाइका हिघाहि। 5ओदोङ भाअ्सिङ राजा हेरोद वासेहेङ सेअ्लि इच्छा पाका हिघाहि। कालाउ बुङ वा द्याङगेलाइसो थिघाखे। हाइपालिपानु इम्बालाइ वासेहेङ परमेस्वरको बक्ता गिघाखे।
6जेलाउ राजा हेरोदको जोलोम दिना लोहि, कालाउ रानि हेरोदियासको चामिन्दि ओबालाइको आगाता न्हातेङ राजा हेरोदहेङ लेङचापाहि। 7ओदोङ भाअ्सिङ राजा हेरोद वासेहेङ जेदोङ र्हेका का प्याङका दोअ्तेङ केरा चातेङ प्रतिग्या पाहि। 8कालाउ उङको बेजान ताइको आमाइ धिरपाका भाइपाङ वा एन्साङ दोअ्हि, कासेहेङ एलाङ दोङ बप्तिस्ता पिका युहान्नाको पुरिङ इता थालिता चुमापि। 9कालाउ राजा हेरोदहेङ मारफाङ चिन्ता जेङहि। कालाउ बुङ ताइको केरा चाका कालाउ बान्सालाइको आगाता राजा हेरोद इन्सिकाङ पालि हुकुम पिहि, 10कालाउ राजा हेरोद झ्यालखानाता युहान्नाको पुरिङ पाल्लि लागाइहि। 11कालाउ युहान्नाको पुरिङ थालिता चुमातेङ उङको बेजानहेङ पिहि। कालाउ उङको बेजान वाको आमाइकोता चुम्पुहि। 12कालाउ उङको न्हुसो युहान्नाको चात्यागेलाइ लोतेङ वाको सिका जिउ चुम्पुतेङ लिइहि। कालाउ ओबालाइ हानितेङ येसुहेङ बानाल पिहि।
येसु नाअ् हाजारहेङ चापाहि
(मर्कु 6:30-44; लुक 9:10-17; युहा 6:1-14)
13जेलाउ येसु युहान्ना दोफा जेङका घाटानागेलाइ हिङहि, कालाउ वा एनोङ नाउता धोल्तेङ एकोन्हा थामेता हानेहि। जेलाउ द्याङगेलाइ येसु इन्तासो हानिलि दोहोइ दोअ्का काथा थाहा गिहि। ओबालाइ ताइको सहर लाअ्तेङ मिलिङको कैरेपाहा तेतेङ येसुहेङ लेसारा पिताइहि। 14जेलाउ येसु नाउसो काम्भेता लेता खुअ्हि, इन्ता वा द्याङगेलाइको एनोङ बारका जेर तिङहि। कालाउ ओबालाइ ह्रुता दाया तिङपाहि, कालाउ वा इन्ता हिका मासाधेका कालाउ मिसा लोकालाइहेङ एल्पाहि।
15जेलाउ बेल्हाका पहर वाको चात्यागेलाइ येसुकोता हानितेङ दोअ्हि, या थामे एकोन्हा हि, कालाउ एला हेन्जा पहर हानिलि दोहोइ द्याङगेलाइहेङ बिदा पि, कालाउ इम्बालाइ वरि-परिको थामेगेलाइ कालाउ चेम्ताङको देरा भारि हानितेङ ताइको भाअ्सिङ चाका-आम्का आनेमाने चोल्तेङ चाको।
16येसु चात्यागेलाइहेङ दोअ्हि, “इम्बालाइ इतासो हानिलि मागोयाङ, भरु नेलाइ दोङ इम्बालाइहेङ चाअ्लि पिसु।”
17चात्यागेलाइ दोअ्हि, केलाइ दोफा नालोङ तोले कालाउ न्हेनोङ हाया खिनिङ हि।
18कालाउ येसु दोअ्हि, इङको तोले कालाउ हायागेलाइ इता चुमासु। 19कालाउ न्हुसो येसु गोताङ द्याङगेलाइहेङ सिङजालजालका घासिता तोम्बा-तोम्बा बानाइहि कालाउ योम्लि आग्या पिहि। येसु इङको नालोङ तोले कालाउ न्हेनोङ हाया चुम्तेङ स्वर्ग भारि म्हाल्तेङ परमेस्वरहेङ धन्यबाद पिहि, कालाउ इङको तोलेगेलाइ पोङहि कालाउ द्याङगेलाइको आगाता ताअ्पि दोअ्तेङ चात्यागेलाइहेङ पिहि, कालाउ इङको न्हेनोङ हाया बुङ वा झाराङहेङ बाख्राइपिहि। 20कालाउ झाराङ द्याङ चाअ्तेङ घाइहि। जेलाउ झाराङ चाअ्लि दोहि कालाउ चात्यागेलाइ तोले कालाउ हायाको दाइका पोङन्हका टुक्रागेलाइ ल्होपालाउ तेन्हे दाल्हो भरि ल्होपाहि। 21इन्ता बेबालाइ कालाउ जामाललाइ बाहेक ना हाजार द्याङगेलाइ हिघाहि।
येसु चि ह्रुता तेगिल्हि
(मर्कु 6:45-56; युहा 6:15-21)
22येसु ओदोङ घुरि ताइको चात्यागेलाइहेङ दोअ्हि नाउता धोल्सु कालाउ का खान्तेङ लाम्फा गालिल समुन्द्रको ओदोइ पार हानिसु। 23येसु द्याङगेलाइहेङ बिदा पिलि दोअ्तेङ वा एक्लाङ तिकारता प्रार्थाना पालि ताङलाहि। कालाउ वा बेल्लालि तोम्लाउ बेलोम्पा थेकापा एक्लाङ इन्ताङ हि। 24एन्सालाउ थेकापा नाउ हेन्जा दुरे थेकापा हानिलि दोअ्का हिघाहि। भेरमा ओबालाइ जेसोङ हानिघाहि, इङकोङ पाहासो लोहि, कालाउ नाउहेङ आगा साराइलि मादोघाखे।
25ह्रिमाङ झेङ फुरु-फुरुलाउको पहर येसु समुन्द्र ह्रुता तेअ्काताङ ओबालाइको हिका भारि हानिहि। 26चात्यागेलाइ जेलाउ येसुहेङ समुन्द्र ह्रुता तेअ्गिल्तेङ हिका तिङहि इम्बालाइ ह्रिकाइलि तेङहि। हाइपालिपानु इम्बालाइ सोचिहि कि इङकोते भुत हि। पाइपालिपानु वासेहेङ तिङतेङ झाराङ थिका हिघाहि।
27कालाउ येसु ओदोङ घुरि इम्बालाइहेङ दोअ्हि, धारस पासु, इङको का येसु दोङ हिघा! थिलि मागोइस्वाना।
28पतरुस दोअ्हि, प्रभु, एदि जातिङको इङको नाअ् दोङ नु, कासेहेङ चि ह्रुता तेतेङ नाङकोता लोलि दोअ्पि।
29येसु दोअ्हि, “लौउ कुनु!” कालाउ पतरुस नाउसो खुअ्तेङ चि ह्रुता तेअ्काताङ येसु हिकाता हानेहि। 30कालाउ बारका भेर्मा लोका नाङ पतरुस थिहि, कालाउ जेलाउ दुबिलि तोम्हि कालाउ ह्रिकाइतेङ दोअ्हि हे प्रभु कासेहेङ बान्चेपा।
31येसु पतरुसको खुरचाहि कालाउ दोअ्हि, खोइ नाङको खाङधुरि हाइ पालि साङखा पाखेना? 32जेलाउ पतरुस कालाउ येसु न्हेमि दोङ नाउता धोल्हि भेरमा बुङ गाङहि। 33नाउता हिका येसुको चात्यागेलाइ तुघुरतेङ आराधाना पाकाताङ दोअ्लि तेङहि, जातिङको नाअ् परमेस्वरको चान हिना।
34कालाउ ओबालाइ काम्भेता पारालि दोअ्तेङ गनेसरेतको मुलुकता थुकाहि। 35इङको थामेको द्याङगेलाइ येसुहेङ तिङहि। वा जातिङको हासु वाला दोअ्तेङ इम्बालाइ गिहि। कालाउ ओबालाइ इङको थामेभारिको दामापाहाङ गोताङ द्याङगेलाइहेङ येसु इन्ता लोका हि, दोअ्तेङ बानाल चार-चाराइ पापिहि। इस्तुङ मासाधेकागेलाइहेङ येसुकोता तापुहि। 36ओबालाइ वाको धाबाको आलि खिनिङ साइलिको भाअ्सिङ बिन्ति पाहि, जाइ साइहि इम्बालाइ झाराङ एल्हि।
Dhimal New Testament, by The Love Fellowship is licensed under Creative Commons Attribution-ShareAlike 4.0 License.