ลก 7
7
ลอง ดูอี อาโมยว เฮา หณึม เฌาพรา
1เฌา เยซู แฮะ ฮอต กาลาง ปาย ตี ดอน โมยว, แตห เฆ ดูอี บอกาเฆลียด โทม, อัน วี ฮาว ลึบ แคง มืง กาเปนารึม.
2แคง มืง ตี, อึณ มึห ดา โบว อี อึบ ดา ซึก อู มาย็อห วี. อัน ตู มูห อาโมยว อีซาเรลัะ. อัน มึห หมาย ปี ร็อก กาเซา อัน อู วี. หมาย อัน ตี แฮะ เซา กาเซา, แฮะ รีน ดี ยัม. 3ดา อี อึบ ดา ซึก อู มาย็อห ตึอน, อัน บอ นับ ลอง เฌา เยซู ตัห ฌัม แคง มืง เฆ, อัน วี แดะ เฆ ดา ตาง ยูดา มัง อี, แตห เฆ ฮาว โดง กอย เฌา เยซู, แดะ เฌา เยซู ตัห โดง กอย อัน, ปีหราย เซา หมาย อัน ตึอน. 4เฆ ดา ตาง ตัห หมาณ กาเซา ดี เฌา เยซู ลอง อัน ตี. เฆ ต็อห, “ดา อี อึบ ดา ซึก อู มาย็อห ตี, แฮะ กาอาบ แม จอย แดเจณ อัน. 5อัน แฮะ ร็อก ดูอี อาโมยว เอ. อัน มืร แฮะ ซัม ดัว โฌง กรึบ เอ ดูอี อายูดา เฌาพรา.” 6เฆ แฮะ ฮอต ต็อห ปาย ตี ดี เฌา เยซู, อัน บอ ฮาว รึม โดบ เฆ.
ดอ แฮะ ตัห กาตัด เฆ กาง อัน, ดา อี อึบ ดา ซึก อู มาย็อห ตึอน แฮะ แตห ฆึก อัน ฮาว กาลาง ดี เฌา เยซู ต็อห, “อึย แม เฌา, แกวะ ฮู แตห อึณ แบน ดูก แบน หณาบ ดี แม โกบ โอว ปอ อึณ ปัว. โอว ตู กาอาบ แตห แม เฌา ตัห ลึบ แคง กาง โอว. 7-8โดง กอย แม, โอว มืร ตู กาอาบ ฮาว ฌัม. โอว กอย ครึม ดูอี อี มึห ปวน ตาง หลึอม โอว. โอว บอ มึห ดา ซึก อี กอย ครึม โอว, อี โบง โดบ โฆรห โอว. เซ โอว ต็อห ดี อู วี ‘แม ฮาว,’ อัน บอ ฮาว. เซ โอว ต็อห ดี ปอ อู วี, ‘แม ตัห,’ อัน ดี บอ ตัห. เซ โอว จัร หมาย โอว, ‘แม โบง อาตี,’ อัน ดี บอ โบง ปี จัร โอว. ปาย ตี, บอ แม, เซ แม กาลาง โฆรห อู โมยว, หมาย โอว ดี แกน.”
9เฌา เยซู แฮะ ฮอต โทม โฆรห ตี, อัน อาม ดูอี ตี. อัน วี ต็อห ดี ดูอี กืน อี โดบ อัน, “โอว ต็อห ดี เบ, แคง มืง อีซาเรลัะ บอ มืง โอว ตู ดึอม ยึร ดูอี คอ อู วี อี หณึม ซีคยา ปี ดูอี วี นี.” 10วาย อัน ตี เฆ ดูอี ปี จัร ดา โบว แตห เฆ ฮาว โดง กอย เฌา เยซู ตึอน, เฆ บอ วี เวณ ฌัม กาง, เฆ บอ ยึร เซา หมาย อัน ตึอน แฮะ หราย, แฮะ แกน.
ลอง เฌา เยซู แตห ดูอี ยัม วี ยีต วี อีม
11วาย อัน ตี อาว บอ เหลณ, เฌา เยซู บอ ฮาว ฌัม แคง มืง นาอีน. บอ เฆ ดีแบ อัน, บอ เฆ ดูอี เฮา เฆ กืน แฮะ ฮาว รึม โดบ อัน. 12ดอ ตัห ฌัม อัน กาตัด มาโลห มืง, อัน กาตูณ เฆ ดูอี อี ฮาว ดีบ ดูอี ยัม. ดูอี ยัม ตี มูห ฆอน อีมาย. มา อัน มูห ยา ซีปรัห อี มึห มี ฆอน อู วี ตี. ดูอี กอย แคง มืง ตึอน, เฆ กืน ฮาว รึม โดบ มา อัน, ฮาว ตึย ฆอน อัน. 13ดอ ยึร เฌา เยซู อีบึณ ตึอน, อัน กาเว ยา ตี. อัน บอ ต็อห, “แกวะ ยาม.”
14ปัน ตี เฌา เยซู วี ปา กาลาต ดูอี ยัม ตึอน. เฆ ดูอี อี กาฆอด อัน มืร จ็อง อู เฌณ. อัน ต็อห, “อึย กาโณม, โอว ต็อห ดี แม, แม ยีต ดอ ตี นี,” 15แฮะ ฮอต ต็อห ปาย ตี, ดูอี ยัม ยีต อู เฌณ, กาลาง โฆรห ดี ดูอี เฮา. เฌา เยซู วี อาบ กาโณม ตึอน ดี มา อัน.
16ดูอี บอกาเฆลียด บอ โยว ลอง อัน ตี. เฆ บอ จูห ดี อืบ เฌาพรา. เฆ ต็อห, “ดูอี บยาน โฆรห เฌาพรา วี นี แฮะ บอด กาเซา.” เฆ มืร ต็อห, “เฌาพรา แฮะ ตัห ฌัม โดง กอย เอ, จอย เอ ดูอี ปี ร็อห อัน.” 17ลอง ปี โบง เฌา เยซู ตี, อึณ บอ แบร ฮาว ดอน โปละ แคง อืง ยูดา บอ แคง มืง อี กอย กาตัด อืง ยูดา.
ลอง ดา ซารา อายอฮาน ดีหมอด เฌา เยซู
18เฆ ดีแบ อายอฮาน ตึอน วี ฮาว กาลาง ลอง ปี โบง เฌา เยซู ดอน โมยว ดี อายอฮาน. อายอฮาน วี แดะ ดีแบ อัน อา วี. 19อัน จัร ฆาย ฮาว โดง กอย เฌา เยซู, แตห ฆาย ดีหมอด ต็อห, “แฮะ หมาน, มูห แม ดูอี อี ดี ตัห คยอด เย? เซ อาว ปาย ตี, เย โลว หน็อะ ปอ อู วี?”
20ฆาย แฮะ ตัห ฌัม โดง กอย เฌา เยซู, ฆาย วี ต็อห ดี อัน, “ดา ซารา อายอฮาน อี จึบ ดูอี แคง อึม ตึอน, อัน แฮะ ตึย ยาย ตัห โดง กอย แม. อัน ซี นับ ซีคยา, โยว อึณ มูห แม, วี ปี หน็อะ เย ดูอี อี ดี ตัห? โยว เย โลว หน็อะ ปอ อู วี?” 21ดอ ตัห ฆาย, ฆาย ยึร เฌา เยซู โบง แตห เซา ดูอี หราย แบน โมยว แบน โมยว. บอ กานัม ฮาย อัน ซูต เลห แคง โดว ดูอี. บอ ดูอี งาย อับ, อัน แตห งาย เฆ วี บลาง. 22เฌา เยซู วี กาลาง ดี ดีแบ อายอฮาน ตึอน ต็อห, “แตห บาย เวณ, กาลาง ดี ดา ซารา บาย ลอง แปะ แฮะ ยึร แปะ แฮะ โทม บาย. เฆ ดูอี งาย อับ แฮะ ปึอน วี ยึร. เฆ ดูอี เปลา ยัม แฮะ ปึอน วี ฮาว. เฆ ดูอี อี มึห เซา ดูะ#7:22 ยอด อามาแท 8:2 แฮะ วี แกน. เฆ ดูอี โหยะ กาอาว วี ปึอน โทม. เฆ ดูอี แฮะ ฮอต ยัม, เฆ วี ยีต วี อีม. บอ เฆ ดูอี ฌัม ดูก, เฆ ดูอี ฆีน, เฆ แฮะ ปึอน ดี โทม ลอง เฌาพรา คยอด ดูอี. 23แตห บาย บอ ต็อห ดี อัน, อาเซ ตู มึห น็อห กาลีง กาแล โกบ โอว, อัน มึห น็อห ดาคึย. แตห บาย วี กาลาง ปาย ตี, ดี ดา ซารา บาย.”
24ดีแบ อายอฮาน ฆาย ตึอน แฮะ ฮอต วี เวณ, เฌา เยซู วี จูห ดี กาลาง ลอง ดา ซารา อายอฮาน ดี เฆ ดูอี อี กอย กาฌูะ โดง กอย อัน. อัน ต็อห ดี เฆ, “ดอ ฮาว ยอด เบ อายอฮาน แคง แปร กาฮ็อห, มาเซ ปี ซี ยึร เบ? เบ ทาง อัน มูห ดูอี อี ปี กาบาง โฆ็ลง อี ดียูห เซ คูน ตัห บูด? อัน ตู ปี ดูอี ฌึร ตี. 25เซ อาว ปาย ตี, มาเซ ปี ซี ยึร เบ? เบ ทาง อัน มูห ดูอี อี ชึบ ครึง ชีด? อาว มูห ปาย ตี. เบ บอ นับ ซีคยา, เฆ ดูอี อี ชึบ ครึง ชีด บอ กอย โดง ชีด, กอย แคง โฮว คูนดีคัม. 26เซ อาว ปาย ตี, มาเซ อึณ มูห, ปี ซี ยึร เบ? เบ ทาง อัน มูห ดูอี อี บยาน โฆรห เฌาพรา? อาตี แฮะ มูห, แฮะ หมาน. โอว ต็อห ดี เบ, อัน มูห ดูอี อี ตาง หลึอม ดูอี อี บยาน โฆรห เฌาพรา. 27ลอง ดา ซารา อายอฮาน แฮะ แดม อูน แคง บับ เฌาพรา. อึณ ต็อห,
‘แตห แม ยอด, โอว ดี ตึย แดเจณ โอว อู วี, แตห อัน แยต ดี อาต แม. ฮี ฌัม ปัน ดี ตัห แม, ดูอี ตี, อัน ดี อึณปราย อึณเตณ แม.’
28โอว ยี ต็อห อาคัร ดี เบ, อู ซีณ ดอ โฆว อัน กอ ฌัม อาตึร นี, อึณ ตู ดึอม มึห ดูอี อู วี อี ตาง หลึอม ดา ซารา อายอฮาน อี จึบ ดูอี แคง อึม. เซ อึณ ยี มูห แคง มืง ปี อึบ เฌาพรา, ดูอี อี ตู มึห ดีโคว มาเซ, อัน ดี ตาง หลึอม อายอฮาน ตี.”
29เฌา เยซู แฮะ ฮอต กาลาง ปาย ตี, เฆ ดูอี กืน บอ เฆ ดูอี แฆบ รึอน จึง, เฆ แฮะ ฮอต โทม โฆรห อัน, เฆ บอ อืบ เฌาพรา ลอง อัน ตี อู เฌณ. เฆ ต็อห, เฌาพรา แฮะ มูห, แฮะ หมาน อาคาคัร. ดูอี เฆ ตี แฮะ ฮอต แตห ดา ซารา อายอฮาน จึบ เฆ แคง อึม. 30อึณ ยี มึห เฆ ดูอี พึง พารีแซ บอ เฆ ดา ซารา อี มาโนว ดารา เฌาพรา, เฆ ตู คัม ดี จึบ แคง อึม. เฆ ตู หณึม แคง น็อห, ตู แตห เฌาพรา โบง ปี อึง อัน แคง น็อห เฆ.
31เฌา เยซู วี ต็อห, “เฆ ดูอี อี กอย ฌาด นี, โอว ดี โลว กาเฆา เฆ ดี อาเซ? เฆ บอ ปี อาเซ? 32เฆ ปี ฆอน, อี กอย ดี ฆลัะ ลาย ดีลาว, บอ ต็อห ดี ฆึก เฆ, ‘ดอ แฮะ กัร เย ฆรึง ดี เบ, เบ ตู ฆา, ตู โบง ปี อึง เย. ดอ แฮะ ยาม เย, เบ ตู วี กาโพรม ดี ยาม รึม โดบ เย.’ อึณ ปี, ฆึก เฆ บอ โบง มาเซ, เฆ ตู อึง.
33ปี โบง ฆอน เฆ ตี, อึณ ปี ปี โบง เฆ อี เฮา ดี ดา ซารา อายอฮาน อี จึบ ดูอี แคง อึม ตึอน. วาย แฮะ ตัห อัน, อัน ตู โฮม ตู เดียง ปี เฆ ดูอี เฮา. เบ ยี ตู อึง อัน โบง ปาย ตี. แฮะ ฮอต, เบ ต็อห, อัน มึห กานัม ลึบ แคง โดว โบ็ง อัน. 34ปาย ตี อึณ บอ มูห วี อี แฮะ แบน ฆอน ดูอี. บอ อัน แฮะ ตัห, บอ โฮม บอ เดียง ปี ดูอี เฮา. เบ ยี กาลาง ลอง อัน, ‘แตห เบ ยอด ดูอี นี. อัน บอ โฮม ตาง โฮม แพ, อัน มืร เดียง ป็อห. อัน แบน ฆึก เฆ ดูอี อี แฆบ รึอน จึง บอ เฆ ดูอี อี มึห หมาบ.’ อัน บอ โบง มาเซ, เบ ตู อึง. 35เซ ดูอี ยี มึห อางยาน ปี ดัว เฌาพรา, อึณ ดี ลึห ซีคยา ลอง แฮะ มูห แฮะ หมาน ปี โบง เฌาพรา.”
ลอง เฌา เยซู กอย แคง กาง ดูอี พึง พารีแซ
36อึณ มืร มึห ดูอี พึง พารีแซ อู วี, อัน บาง เฌา เยซู ตัห โฮม โบม แคง กาง อัน. เฌา เยซู มืร ฮาว ลึบ แคง กาง อัน, ต็อห ดี โฮม รึม โดบ ดูอี ตี. 37แคง มืง ตึอน ยี มึห อีบึณ อู วี. เฆ อี เฮา ต็อห, อัน มึห หมาบ กืน. อัน บอ ยึร ลอง เฌา เยซู ตัห โฮม โบม แคง กาง ดูอี พึง พารีแซ ตึอน, อัน บอ ฮาว โฆ็ง กาเปา นามัน อูห หงูน, ตัห ฌัม โดง กอย เฌา เยซู. 38อัน ฮาว กอย นา ปัน เฌา เยซู, วี ฆึบ กรึบ ดี เปลา เฌา เยซู บอ ยาม. อึม งาย อัน โจห ดี เปลา เฌา เยซู. อัน บอ คูด เปลา เฌา เยซู, ตา ฮึก ฆีณ อัน บอ วี อูห เปลา เฌา เยซู. แฮะ ฮอต ปัน ตี อัน วี ดึห นามัน อูห หงูน ปี โฆ็ง อัน, พ็อห ดี เปลา เฌา เยซู.
39ดูอี พึง พารีแซ อี แฮะ บาง เฌา เยซู ตัห โฮม โบม แคง กาง อัน ตึอน, อัน บอ ยึร ปี โบง อีบึณ ตี, อัน วี ทาง แคง น็อห อัน, “เซ แฮะ หมาน, ดูอี นี มูห ดูอี อี บยาน โฆรห เฌาพรา, อัน ดี บอ นับ ลอง อีบึณ อี ตัห ปา อัน ตี. อัน ดี บอ นับ, อีบึณ ตี อาว หมึอม, อาว อัห.”
40ดอ เฌณฌา อัน แคง น็อห อัน ปาย ตี, เฌา เยซู ต็อห ดี อัน, “อึย อาซีโมน, โอว ซี กาลาง โฆรห ดี แม.” อาซีโมน วี ต็อห, “แม ดา ซารา, แตห แม กาลาง, โอว แฮะ โทม.”
41ปัน ตี เฌา เยซู ต็อห ดี อัน, “อึณ แฮะ ดึอม มึห อีมาย อา วี, ฆาย แฮะ การ็อห รึอน ดี ดูอี อู วี. อู วี แฮะ การ็อห รึอน พัน มาย็อห โบ็ง. ปอ อู วี แฮะ การ็อห รึอน พัน ฆึร โบ็ง.#7:41 อาเซ โบง ฆาน อาดา อู ซีแง แฮะ ปึอน รึอน อู โบ็ง. 42ฆาย อา วี ตึอน ยี ตู มึห ดี ดัว วีว รึอน ปี การ็อห ฆาย. ดา กาณา รึอน ตึอน บอ ทาย ดี ฆาย แคะ ปี การ็อห ฆาย ดี อัน. แม ทาง มาเซ? ดูอี อา วี ตี, อาเซ อี ดี ร็อก ดา กาณา รึอน หลึอม ปอ อู วี?”
43อาซีโมน วี ต็อห ดี อัน, “อึณ ดี มูห ดูอี อี การ็อห รึอน กืน.”
แฮะ ฮอต, เฌา เยซู วี ต็อห, “แฮะ หมาน ปี ต็อห แม ตี.”
44ดอ อัน ตี เฌา เยซู ยอด อีบึณ ตึอน, บอ วี ต็อห ดี อาซีโมน, “แม ยึร อีบึณ นี? ดอ ตัห ลึบ โอว แคง กาง แม, แม ตู มึห ดี ดึห อึม, บาย เปลา โอว. อีบึณ นี ยี แฮะ บาย เปลา โอว ตา อึม งาย อัน, บอ วี คูด ตา ฮึก ฆีณ อัน. 45แม ตู วี อูห โอว. อีบึณ นี ยี แฮะ อูห เปลา โอว อู ซีณ ดอ ตัห ลึบ อัน แคง กาง นี.#7:45 ดอ มึอน ดูอี อีซาเรลัะ, เซ เฆ รวห แคต เฆ อูห แคต ตี 46แม ตู พ็อห นามัน ดี ฆีณ โอว. อีบึณ นี ยี แฮะ พ็อห นามัน อูห หงูน ดี เปลา โอว. 47โอว ต็อห ดี แม, แคะ กืน หมาบ อัน, แฮะ ฮอต ฆ็อห แวน โตต. โคว, อัน แฮะ ร็อก กาเซา โอว. อาเซ ยี ทาง, อัน มึห มี หมาบ อี แจก, อัน มืร นับ ดี ร็อก อี แจก.” ปาย ตี เฌา เยซู มาโนว อาซีโมน.
48วาย อัน ตี เฌา เยซู วี ต็อห ดี อีบึณ ตึอน, “หมาบ ปี โบง แม ดอน โมยว แฮะ ฮอต ฆ็อห แวน.”
49เฆ ดูอี เฮา, เฆ อี โฮม รึม โดบ เฌา เยซู, เฆ ทาง แคง น็อห เฆ, “ดูอี นี, อัน มูห อาเซ, อี ต็อห, อัน แป ดี ฆ็อห แวน หมาบ ดูอี?”
50เฌา เยซู ยี วี ต็อห ดี อีบึณ ตึอน, “โกบ หณึม แม ดี โอว, อึณ แฮะ คยอด แม. แตห แม เวณ, แตห แม ดาคึย.”
© 2021, Wycliffe Bible Translator, Inc. All rights reserved.