Matew 4
4
Ñi kintukaduamngen ta Jesus
(Marku 1.12-13; Luka 4.1-13)
1Feymew müten tati Lif Küme Püllü ñi pepiluwün mew, Jesus puwi ti uwe mapu mew, tañi kintukaduamaetew tati weküfü. 2Fey meli mari antü ka meli mari pun ilay chem no rume, feymew wüla ngüñüy.
3Fey tati weküfü fülkontufi ta Jesus ñi kintukaduamafiel, ka feypifi:
—Rüf dungu mew Ngünechen ñi Fotümngelmi, werkünge tañi kofkewtuael ta tüfachi pu kura.
4Welu Jesus ta llowdungueyew:
—Tati Wirin Chillka ta feypiley:
‘Re kofke mew müten mongeluwkelay ta che, welu may mongeleay Ngünechen ñi dungu mew.’#4.4 Deuteronomio 8.3.
5Feymew tati weküfü ka yefi ta Jesus tati fütra küme waria Jerusalen mew, fey pürampufi ta doy alü pürachi wechuñ ngillatuwe ruka mew. 6Ka feypifi:
—Rüf dungu mew Ngünechen tañi Fotümngelmi, ütrüfnagümuwnge tüfa mew, tati Wirin Chillka am feypilelu:
‘Ngünechen ta werküay tañi pu werken püllü tami llüwatunieaetew.
Fey pürüm witrañpüramaeymew engün tañi kuwü mew,
femngechi tami allfüpunoael ti pu kura mew.’#4.6 Salmo 91.11-12.
7Fey Jesus llowdungueyew:
—Ka femngechi feypiley tati Wirin Chillka: ‘Kintukaduamkefilnge tami Ñidol Ngünechen.’#4.7 Deuteronomio 6.16.
8Fey ti weküfü ka puwülfi ta Jesus kiñe alü pürachi fütra wingkul mew. Pengelelpufi kom fütrake trokiñke mapu ka itrofill kümeke felen ñi nieel, 9fey feypifi:
—Püramyeeli ngillatun mew, iñche eluaeyu kom tami peel.
10Fey Jesus ta llowdungueyew:
—Kiñe püle tripange, weküfü. Tati Wirin Chillka feypiley:
‘Püramyeafimi ngillatun mew ka poyeafimi tami Ñidol Ngünechen müten.’#4.10 Deuteronomio 6.13.
11Feymew ta weküfü elkünutufi ta Jesus, fey kiñeke werken püllü akuy tañi poyeafiel ta Jesus.
Jesus llituy tañi küdaw Galilea mew
(Marku 1.14-15; Luka 4.14-15)
12Feymew Jesus allkülu ñi püresuntukungen ta Juan karsel mew, fey amuy ta Galilea mapu mew ñi puwael Nasaret waria mew. 13Welu mülenaglay ta Nasaret mew, fey amuy ta Kapernaum waria mew tañi mülepuael, inaltu Galilea lafken, Sabulon ka Neftali tañi trokiñche ñi mapu mew. 14Fey ta famngechi femi tañi mupiael tati pelon wentru Isaia ñi wirintukuelchi dungu:
15“Sabulon ka Neftali tañi mapu,
fül Jordan lewfü, ka lafken ad püle,
Galilea mapu chew tañi mülemum tati pu judiu tuwünngenochi che.
16Tati dumiñ mew reke mülechi pu che pefi kiñe fütra pelon.
Tüfeychi pu che dumiñmalelu reke ñi wesake dungu mew
alofmaeyew reke kiñe fütra küme dungu” pi.#4.15-16 Isaia 9.1-2.
17Feychi mew Jesus eluwi tañi wewpiael fey ta famngechi: “Wiñorakiduammün tamün yafkan mew. Dew fülkülepay ta Ngünechen tañi longko ülmenngen” pi.
Jesus dullifi ta meli challwafe ñi disipulungeael
(Marku 1.16-20; Luka 5.1-11)
18Fey kiñe antü Jesus miyawlu inaltu ti Galilea pingechi lafken püle, pefi ti epu peñiwen, Simon ürke, tati Pedro pingekelu, ka Andre. Mür challwafe ürke engu, fey petu ütrüftukurkey ñi challwawe pu lafken. 19Fey Jesus feypifi ti epu wentru:
—Inamuchi, tamu challwafengefel, welu tüfa kintuafimu ta che tamu küpalafiel iñche mew.
20Feymew müten elkünuy engu ñi challwawe, fey inaeyew engu. 21Ka pichi doy üyewpüle, Jesus pefi kangelu epu peñiwen: Santiaw ka Juan, Sefedew ñi epu fotüm, kiñentrür mülelu ñi chaw engün kiñe farku mew petu raletulu ñi challwawe. Fey Jesus mütrümfi ti epu wentru, 22feymew ka müten kisu engu elkünuy tañi farku ka tañi chaw, fey inaeyew.
Jesus kimeltufi ta fentren che
(Luka 6.17-19)
23Jesus miyawürkey kom püle Galilea trokiñ mapu mew ñi kimeltuyawael fill püle mülechi sinagoga#4.23 sinagoga: kake kiñeke lofche judiu tuwünngelu niekefuy ñi sinagoga pingechi ruka ñi trawüluam engün ka ñi kimeltungeam engün. mew. Kimeltukey tati küme dungu ñi fülkülepan Ngünechen ñi longko ülmenngeael ka mongelyekefi tati pu kutrankülelu epe fill kutran mew. 24Nütramyengey ta Jesus Siria trokiñ mapu mew, ka küpalelngeyey epe fill kutran ka fill wesake felen nielu, ka ti pu konweküfülelu, ka tati pu lalatukelu, ka tati pu lañmalelu ñi kuerpu. Fey Jesus kom mongeltufi ti pu kutran. 25Fey inaeyew fentren che tuwlu ta Galilea mapu mew, ka Dekapolis trokiñ mapu#4.25 Dekapolis trokiñ mapu: kiñe fütra trokiñ mapu nielu mari pichike waria. mew tuwlu, Jerusalen waria tuwlu, Judea trokiñ mapu tuwlu, ka fentren che tuwlu Jordan lewfü ñi tripawe antü püle mülechi trokiñ mapu.
El Nuevo Testamento en Mapudungun © Sociedades Bíblicas Unidas 1996.