यूहन्ना 15
15
दछि बुटा त तसे डा।
1तोउं यीशु यक बोक लाई “अउं यक सच्चा दछि बुटे ईं असा; त में बोउ जिमदारे ईं असा। 2में से सोब डा जे फल ना देन्ते, तस से काट छता त जे फल देन्ते, तेन्हि से छांटता ताकि तठि हउ बि सुआ फल लगियेल। 3मेईं जे शिक्षा दुतो असी, तस मान कइ तुस साफ भोई गो असे। 4त तुस मोउं जुए जुड़ कइ बिशे त अउं बि तुसी जुए जुड़ कइ बिश्ता। जीं कोई बि डा बुटे केआं अलग भोई कइ फल ना दी सकतु, तीं तुस बि मोउं केआं अलग भोई कइ कोई फल#15:4 मतलब, से खरे कम जे परमेश्वर औजते। दी ना सकते।”
5“अउं यक दछि बुटे ईं असा त तुस डाए ईं असे। जे मोउं जुए जुड़ कइ बिश्ते त जेन्हि जुए अउं जुड़ता, से सुआ फल देन्ता, किस कि मोउं केआं अलग भोई कइ तुस कुछ बि कइ ना सकते। 6अगर कोई मोउं जुए ना जुड़ते त जिमदार तस काट कइ फटान्ता, त से शुख घेन्ते। पता मेह्णु तेन्हि नी कइ आग अन्तर फुकी छते। 7अगर तुस में बोक मानते रेहन्ते त में शिक्षा अन्तर चलते। तोउं, जे बि तुस मगेल, से तुन्धे दीइन्तु। 8तुस जपल सुआ फल फलते, तोउं में बोउए शान बधती त तुस ई हरालते कि सच्चे तुस में चेले भीन्थ।”
9“जीं बोउए मोउं जुए परेम किओ असा, तीं अउं बि तुसी जुए परेम कता। त मोउं केआं कदी दूर ना भो। 10जीं अउं बोउए निआंग मान कइ तस जुए परेम जुए बिश्ता, तीं अगर तुस में निआंग मानते त मोउं जुए परेम जुए बिश्ते। 11मेईं ई सोब बोक तोउं बोली कि जीं मोउं अन्तर सुआ खुशी भुन्ति तीं तुसी अन्तर बि भो त तुं खुशी पूरी भुओल। 12में निआंग ई असी कि जीं अउं तुसी जुए परेम कता, तीं तुस बि यकी होरी जुए परेम करे।#यूहन्ना 13:34; 15:17; 2 यूहन्ना 1:5 13अपु मितरे लिए अपु जीवन देण केआं बोडा परेम होर कोई नेईं 14अगर तुस में निआंग मान कइ तस कराल त तुस में मितर असे। 15अभेईं केआं खड़ अउं तुसी जे ‘गुलाम’ ना बोता, पर ‘मितर’ बोता। किस कि मालिक गुलाम जे अपु बोक ना बोता, पर मेईं त अपु सम्हाई बोक जे बि मेईं अपु बोउ केआं शुणो थी से तुसी जे बोल छओ असी। 16तुसी अउं नेईं चुणो, पर मेईं तुस चुणो असे त तुं धे कम दुतो असु कि तुस घेई कइ फल#15:16 “फल” मतलब “खरे कम” अण्हे त तुं फल हमेशा रिहे। त तुस में नओं पुठ बोउ केआं कुछ मगेल त से तुं धे दी छता। 17अउं दुबारी तुसी जे तस निआंग देन्ता कि यक होरी जुए परेम करे।”
यीशु अपु चेली जे सलाह देण
18तोउं यीशु तेन्हि जे बोलु, “जपल धरती मेह्णु तुसी भुंजान्ते त तुस याद करे कि तुसी केआं पेहले तेन्हि अउं भुंजो असा। 19अगर तुस धरती मेह्णु ईं भुन्तेथ, त धरती मेह्णु तुसी जुए परेम कतेथ। पर किस कि मेईं तुस तेन्हि बिचा चुणो असे, तोउं त से तुसी भुंजान्ते। 20#मत्ती 10:24; लूका 6:40; यूहन्ना 13:16पेहले मेईं जे बोके तुसी जे बोलो थी कि गुलाम अपु मालिक केआं बोडा ना भुन्ता, तस याद रखे: अगर तेन्हि अउं भुंजा, त से तुसी बि भुंजान्ते। अगर तेन्हि में बोक मनो भुन्तीथ त से तुं बोक बि मानतेथ। 21पर ए सोब से तुसी जुओई में चेले भुणे बझई जुए कते, किस कि तेन्हि मोउं लंघाणे बाड़े पता नेईं। 22अगर अउं ना एन्ताथ त तेन्हि जे तेन्के पाप बारे ना बोताथ त से पापी ना बोलिन्तेथ; पर अब त मेईं एई कइ तेन्हि बोताउ, त तेन्के पाप लिए अब कोई बाहान नेईं। 23जे मोउं ना मानता, से में बोउ बि ना मानता। 24अगर अउं तेन्हि बुच से कम ना कताथ जे केनि कदी नेईं किओ त से पापी ना बोलिन्तेथ। पर अब तेन्हि में सम्हाई कम हेर कइ बि मोउं त में बोउ दुहि जेईं ना मानते। 25ए तोउं भु ताकि धरमे कताब अन्तर जे लिखो असु
‘वेबझह तेन्हि मोउं जुए दुश्माणी की’” #छुआंरी 35:19; 69:4
“पूरु भुओ। 26पर जपल से मदत करणे बाड़ा एईयाल जेन अउं तुसी केईं लंघान्ता, मतलब, सच्चा परमेश्वरे आत्मा#यूहन्ना 14:17 जे बोउ केआं एन्ती, से में बारे उगाही देन्त। 27त तुस बि में उगाह देन्ते किस कि तुस में कमे शुरु केआं मोउं जुए साते असे।”
נבחרו כעת:
यूहन्ना 15: pgg
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
© 2023 (Active) Wycliffe Bible Translators, Inc. All rights reserved.