Luka 23
23
1Ni lipuga lyoha lya awa likayimiti, ni likabiti nako kwa Pilato. 2Leka wakatumbwili kundungamakila yombe, kujowa, Tikambweni uyu wa kung’anamusa nsafi witu, ni kukanisa kumpela Kaisar nsongo, na kujowa kukita mwene Kristo mutwa ayii. 3Leka Pilato akankotiti yombe, kujowa, Wila wenga uyii mutwa wa waYehudi? Leka akahigiti kwa yombe, nakatawili, Wenga ujowa. 4Na Pilato akajowiti kwa makasisi makulungu na mapuga, Nikolela lepa nyimu pa mundu uyu. 5Leka wakayili mu kukangamala, kujowa, Awuwusa nsafi, kuyigalisa pa Yudaya poha, ni kuhumila pa Galilaya mpaka apa. 6Leka Pilato pakayufwini, akakotiti ngati mundu uyu ayii mGalilaya. 7Na pa akawalalili kukita ayii wa chengo kyake Herode, akampeliki kwa Herode, pakuya akayili mwene kawili pa Yerusalem magono aga.
8Leka Herode pakambweni Yesu, akahekalili nyamhope: pakuya magono mingi akayili wa kulonda kumbona, pakukita akayufwini sya yombe; ni akahuwalili kuwona kinyantiti kukitika nuyombe. 9Ni akankotiti pa malowe mingi; leka yombe akamhigiti lepa kindu. 10Ni wayimiti makasisi makulungu ni wakulembela, kundungamakila ni mbafu. 11Leka Herode na askari wake wakamhepiti, na wakankitili mihenje, kumfwatika ni nguo ya malidadi akankilawusili kawili kwa Pilato. 12Ni Herode ni Pilato wakakiti ukosi kawili pa ligono lililalila: ndawa wakayili palongolo wa mitumba yungi nu njini.
13Leka Pilato akakemili pamonga makasisi makulungu ni wakuluwakulu ni nsafi, 14nakajowiti kwa wombe, Mukanitolili mundu uyu, ngati yula wakung’anamusa nsafi: na lola, nenga nikankotiti pa miho pinu, ni nikakolili lepa nyimu pa mundu uyu pa findu fila mundungamakila: 15koma haka Herode: pakukita akankilawisi yombe kwa tenga; na lola, haka kandu ka kulinganila kufwa kiyii kikitiki nuyombe. 16Mumu yaninjambulise yombe, ni kumbopola. 17(Pakuya akakisiki kuwawopolela yumonga pa ligono likulungu.) 18Leka wakakuwiti woha pamonga, kujowa, Umbuse mundu uyu, na utiwopolele Barabbas: 19yula yombe akayili wakutagika pa kukungika ndawa ya njwawila kitinu yila yikakitiki pa likaya, na ndawa ya kukoma mundu. 20Leka Pilato akawajowili kawili, pa kulonda kumbopola Yesu; 21koma wakakwesili malowe, kujowa, Umbambe, umbambe uyu pa msalaba. 22Leka akajowiti kwa wombe pa kadatu, Wuli, pakuya kiki kiwifu akikiti mundu uyu? nikolili lepa nyimu ya kufwa pa yombe: mumu yaninjambulise ni kumbopola. 23Leka wakayili mu kutafukila ni malowe makulungu, kwiluwila yombe nausi awambike pa msalaba. Ni malowe gawe gakayili ni makakala. 24Na Pilato akapawili kikitike kila kiluwiki na wombe. 25Leka akambopwili yula atagiki pa kukungika kwa nyimu ya njwawila ni ya kukoma mundu, yula wakiluwili wene; leka Yesu akanfumbukisi umu wakalondili.
26Na baha na baha wakabiti nako, wakankamwili nunuyu Simon mKurene, wakuyicha kuhumila pa ngunda, na wakantwikiti msalaba, nausi kuupinda panyuma pa Yesu.
27Leka likakisiti lipuga likulungu lya wandu, na wadala wala wakayili mu kwipumunda pa kifimba ni kundilila. 28Koma Yesu apa akawang’anamukili, akajowiti, Wana wadala wa Yerusalem, mukotoke kunililila nenga, koma mwililile mwawene, na wana winu. 29Ndawa lola, magono gayii mu kuyicha, pa gala yawatawile, Wa kusengwa wala wagida, ni neme sya ngahogola, ni mawele ga ngayongesa. 30Bahalapala yawatumbule kugajowela madunda, Mugwe panani pa tenga; ni fikweso, Mutifunakile tenga. 31Pakuya wona wakita findu ifi pa nkongo uwisi, kiki yakitike pa nkongo uyumu?
32Na wangi wawili, wakukita fiwifu, wakatoliki kukomeka pamonga nuyombe.
33Na pala wakachiti pandu pakukemeleka Kitunga, bahalapala wakambambiti pa msalaba, na wakukita fiwifu wala, yungi kiwoko kya ndilo na yungi kiwoko kya mangigi. 34Leka Yesu akajowiti, Dadi, uwalekelekese; pakuya wamanya lepa iki wakita. Na pa kugawana fifwato fyake, wakalondalile. 35Nu wandu wakayimiti kilolalile. Leka wakuluwakulu kawili wakandogiti, kujowa, Awayokwili wangi; iyokole mwene, wona uyu ayii Kristo wa Mulungu, wakuhagulika wake. 36Ni askari kawili wakankitili likomo, kunchila ni kuntolela mvinyo wa kuwawa, 37ni kujowa, Wona uyii mutwa wa waYehudi, wiyokole wa mwene. 38Leka likayili kawili lilembo panani pa yombe, uyu ayii mutwa wa wayehudi.
39Leka yumonga wa wakukita fiwifu wala wakapagikiwi akankitili mihenje, kujowa, Si wenga uyii Kristo? wiyokole wa mwene na tenga. 40Koma njini akahigiti, ni kundakalila akatawili, Wila wenga unjogopa lepa Mulungu, pakukita uyii nako kupawula kukulakula? 41Na tenga mwa malinga; pakuya tiyupa fyakulinganila fila tifikiteye: leka uyu akiteye lepa kindu kiwifu. 42Na akajowiti, Yesu, unikumbukile pala yauyiche pa utwa wako. 43Na akajowiti kwa yombe, Chakaka nikujowela, Lilino yauye pamonga nu nenga pa Paradiso.
44Ni ikayili papipi saa ya ntanda, ni lukayili lwisi pa ndima woha mpaka saa ya mhano na ncheche, 45lulangalila lwa lijuwa kupelewela: ni nguo ya kindemula kya hekalu yikakachwiki pagati. 46Nu Yesu apa akakwesiti lilowe likulungu, akajowiti, Dadi, mu mawoko gako niwika roho wangu; na pakajowiti ili, akakungwiki. 47Leka kenturion pakaweni fila fikakitiki, akankwisisye Mulungu, kujowa, Ena, mundu uyu akayili ngolofu. 48Ni mapuga goha gala gakokaniki pa kya kuwoneka kila, apa wakalolakisi fila fikakitiki, wakakilawiki kwipumunda pa fifimba. 49Leka woha wala wakumanyangana nako, na wadala wa kulongosana nako kuhumila pa Galilaya, wakayimiti patali, kufiwona ifi.
50Na lola, ngosi wa kukemaleka Yosefu, nkamba mwene chengo, 51mundu nnofu ni ngolofu (yombe akayitangini lepa na wombe pa luhala lwawe ni iki wakitaga), waArimathaya, likaya wa waYehudi, yula akayili mu kulindalila utwa wa Mulungu: 52mundu uyu akanchilili Pilato, akiluwili mbili wa Yesu. 53Na akauselisi, ni akauniembiti ni nguo ya ngunja, ni akauwikiti pa linyinja lya kuhongoleka pa liganga, umu mukayili mwakona na kuwika mundu. 54Ni likayili ligono lya kuwikila ngani, ni kiwumbu kya sabato kikatumbwili. 55Na wadala nawombe wala wakachiti nako kuhumila pa Galilaya wakakisiti, na wakalolisi linyinja, na umu ukawikiki mbili wake. 56Na wakakilawiki, na wakawikili ngani fya kunungalila ni muro.
Ni pa ligono lya sabato wakapumulile kwa ndingo wa luwimbi.
נבחרו כעת:
Luka 23: MGS1937
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
First published by the British and Foreign Bible Society in 1937.