Mattayo 9
9
1Na akayingili mu liboti, nakayombwiki, nakachiti ku likaya lyake mwene. 2Na lola, wakantolili mundu wa kindengu‐ndengu, wakugona pa ndangati: nu Yesu pakaweni kiyitakiso kyawe akajowiti kwa wa kindengu‐ndengu, Tama nu mwoyo, mwana; sambi syako silekalesiki. 3Na lola, wangi wa wakulembela wakajowiti mugati mwawe, Mundu uyu ajowa blasfemia. 4Nu Yesu, pakumanya maholo gawe, akajowiti, Ndawa kiki muhola fiwifu pa mioyo mwinu? 5Pakuya kiliku kya manyata, kujowa Sambi syako silekalesiki; pangi kujowa Yimuka, ugende‐gende? 6Leka nausi mumanye kukita Mwana wa adam ayii ni chengo pa ndima kulekelekesa sambi (bahalapala anjowela wa kindengu‐ndengu), Yima, pinda ndangati wako, na bita ku nyumba yako. 7Na akayimiti nakabiti ku nyumba yake. 8Koma pakakiweni mapuga wakayogwipi, ni wakankwisiti Mulungu, uyu awapili wandu chengo ngati iki.
9Nu Yesu pakalutiti kuhuma bahalapala, akambweni mundu lihina lyake Mattayo, wakutama pa kuyupila nso ngo: nanjowela, Unikise nenga. Na akayimiti, akankisiti.
10Ni ikayili kukita pakatemi pasi Yesu pa kyakulya mu nyumba, lola, wingi wakuyupa nsongo na wene sambi wakachiti kutama pasi pamonga nu Yesu na wanafunsi wake. 11Leka apa wakaweni waFarisayo, wakajowiti kwa wanafunsi wake, Ndawa kiki Bambo winu alya na wakuyupa nsongo na wene sambi? 12Leka pakayufwini yombe, akajowiti, Wakusangaluka walonda lepa ng’anga koma wakulwala. 13Koma mubite ni kwiyigalisa iki kiyii kiki, kujowa, Nilonda lipyana, nakuya nyambiko: pakuya nichiti lepa kukemela wagolofu, koma wene sambi.
14Bahalapala wanchila wanafunsi wa Yohana, kujowa, Ndawa kiki tenga na waFarisayo tiyinota kyakulya kawili kawili, leka wanafunsi wako wayinota lepa? 15Nu Yesu akajowiti kwa wombe, Ati, wana wa nyumba ya nduwusi wahotola kulila malilo pala ntuwusi ayii pamonga nawo? koma magono yagahiche pala ntuwusi yayupike kwawe, na bahalapala yawayinote kyakulya. 16Leka haka mundu awamba lepa kiwamba kya nguo yikakatafu pa mwingila ulala; pakuya iki yakimemaye kinyaka kya mwingila, na palutakisa kukachuka. 17Haka wandu walekela lepa mvinyo wa hino pa mahaku malala: pangi mahaku gakachuke, ni mvinyo uyitika, na mahaku gayanangika: koma walekela mvinyo wa hino pa mahaku mapya, na fyoha fiwili figoheka.
18Pakulongela nawo malowe aga, lola, nkulungu akanchilili, na akangwilikimbo kujowa, Mwanangu ndala hino apa afwili: koma uhiche, uwike kiwoko kyako pa yombe, na yalame. 19Nu Yesu pakayimi akankisiti yombe, pamonga na wanafunsi wake. 20Na lola, ndala, yula akayili nu kuhulula mwasi miaka kumi ni yiwili, akachiti panyuma, na akankwafiti lupeto lwa malaya gake: 21pakuya akajowiti mugati mwake, Wona nikwafya haka malaya gake, yaniyokoleke. 22Leka Yesu akang’anamwiki ni kumbona nakajowiti, Uye nu mwoyo, mwana ndala; kiyitakiso kyako kikakuyokwili. Ni ndala yula akayokoliki kitumbulile saa yiyilayila. 23Nu Yesu pakayingili pa nyumba ya nkulungu yula, nakaweni wakukuwa fibilu, ni lipuga lyakuywawa, 24akajowiti, Muwuke: pakuya kahinja kafwili lepa, koma kagona. Na wakamhekiti mihenje. 25Leka pala lipuga likatagiki kunja akayingili, nakankamwili kiwoko kyake; na kahinja kala kakayimwiki. 26Ni ndumi syake sikalutiti pa ndima wula woha.
27Na pakalutakisi Yesu kuhumila bahalapala, wawili wakukoyoka miho wakankisiti kukuwa ni kujowa, Utipwelekele lipyana, wenga mwana wa Daudi. 28Leka pakayingili yombe mu nyumba, wakanchilili wakukoyoka miho wala: nu Yesu awajowela, Wila mukela kukita nihotola kukita iki? Wanjowela, Ena, Bambo. 29Bahalapala akakwafiti miho gawe, kujowa, Kwa ndingo wa kiyitakiso kinu kipate kuya kwinu. 30Na miho gawe gakadinduliki. Nu Yesu akawalakalili, kujowa, Lolaye kukita mundu asiwalalila. 31Leka wombe pawakapititi wakawandisi mbili yake pa ndima wula woha.
32Ni pakupita wombe, lola, wakantolili mundu mbuwuta, wakukamulika ni daimon. 33Leka daimon pakatagiki kunja, mbuwuta yula akalongili: na mapuga gakakangichi nyahope, kujowa, Miaka nakuwoneka lepa iki pa Israel. 34Leka waFarisayo wakajowiti, Kwa nkulungu wa madaimon ataga kunja madaimon.
35Nu Yesu akasyungutili pa makaya goha na pa mihali, kuyigalisa pa masunagoge gawe, ni kuwandisa evangel ya utwa, ni kulwasa utamu ni ulegelefu uyi woha. 36Koma pakaweni mapuga, akatoliki lipyana ndawa ya wombe, pakukita wayili mu kuhumbusika ni kuyambanika, ngati mambelele gangali wakudima. 37Bahalapala awajowela wanafunsi wake, Kubena kuyii kukulungu, leka wakuhenga lihengo wakuwalangika. 38Mumu muluwaye Bambo wa kubena, kukita apeleke wa lihengo ku mabeno gake.
נבחרו כעת:
Mattayo 9: MGS1937
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
First published by the British and Foreign Bible Society in 1937.