Mberaand 2
2
1Neene asamaan fo lanq fo ke refna teen fop a njegtu. 2Roog a paanga calel um soo a ñootnoox no ñaal ɓetuu ƭikandeer ne.#Sut 20:11; Heb 4:4, 10 3Roog a barke’a ñaal ɓetuu ƭikandeer ne, soo a kesin ta ref bes fa tedu, yaam no ñaal neene a ñootnoox’u no calel ke na sak ale.
A ƭing ale Edeen
4Keeke doonoox’u ye lanq ke fa asamaan fee a sakeena. Ye o Yaal oxe Roog a sakna asamaan fo lanq boo a ƴut, 5o mbafid onqe moƴna o neew sax reeƭee took lanq ke, daaƭ leng sax’afulee teen, yaam o Yaal oxe Roog deɓ’afulee too o kiin o leng jeg’afulee ndax ta xoox lanq ke. 6Kaa koy, a buy kaa yoɗoortoogu no lanq ke, boo yaa fop a xuƥna sap.
7Naaga, o Yaal oxe Roog a xota no fo ut ole no lanq ke, a muul o kiin#2:7 o kiin kaa tekit no ɗelem hebre «adam», soo «lanq» a tekit no ɗelem hebre «aadama». Neene, a waaga o ga’el ee o kiin no lanq a hatu. Aadama kaa refat itam gon no koor o eetaand oxe. Ɗeeti 1:27 fo na tekit ale ten. soo a wuuɗ o ñoow na xa ñis um. O kiin oxe a dalfooxa o jeg o laaw olaa na fiɗaa.#1Kor 15:45 8Cinj kaaga, o Yaal oxe Roog a jimba a ƭing kam Edeen, farna fo batand, soo a ɓek taaga o koor oxe ta muul’ina. 9O Yaal oxe Roog a saxna maaga xa qos taxar fop, da njeg a safaan, a mbel o ñaamel, ndaxar ne no ñoow ole fo ndaxar ne na andnooraa paax fo paaxeer#2:9 na andnooraa paax fo paaxeer kaa tekit ee, refee soom o and paax fo paaxeer, ndaa itam o jegit baneex fo naqad kam o ñoow ole. a ndef a ndeer ale.#Mbñ 2:7; 22:2, 14
10O xuluɓ a sutoora Edeen, a sooraa a ƭing ale. Maaga, a xaajooxa a fi a kal a nahak. 11A kal a eetaand ale ne’e Pison, Ten widu saax le Hawila fop me wurus fee a jegna, 12too ta ref wurus fa nqoolu qac fa cuuraay fa mbaax faa ne’eena bedelyum fo a ƥil a cafeñu kaa ne’eena onik. 13A kal a ƭikandeer ale ne’e Giihon. Ten wid’u saax laa Kuus fop. 14A kal a tadkandeer ale ne’e Tigere, ten sagu no batand naa Asuur. A kal a nahkandeer ale koy refu Ofrat.
15O Yaal oxe Roog a janga o koor oxe, a ɓekin kam a ƭing alaa Edeen, ndax ta xooxan, a yetan. 16O Yaal oxe Roog a hebla o koor oxe yee: «Waagaa o moɗ xa tim axe no taxar ke na ƭing ale fop, 17bo ta yoqaa ndaxar ne na andnooraa paax fo paaxeer, yaam a mbanuu moɗoona xa tim axe ten, xan o xon.»
18Cinj kaaga, o Yaal oxe Roog a laya yee: «O koor oxene a yoq koƭong-a-koƭongin faaxee. Kaam jaɓin o fi’an oxaa nandna fo ten, a dimle’an.» 19O Yaal oxe Roog a muulit’a muumeen-a-koƥ ke fo tiiƭ ke na asamaan fop no lanq ke. Cinj kaaga, a ɓakandiida a den me no koor oxe, ndax ta and ne o koor oxe a ne’kaa a den. Oxuu refna teen, gon le o koor oxe a ferankan a ne’keel. 20Neene, o koor oxe a ferana muumeen ke fop a kon fo tiiƭ ke na asamaan fo ƥaaɓaan ke na koƥ ale fop. Kaa koy, no keene fop ga’ee teen oxaa nandna fo ten, a waagin o dimle. 21Maaga, o Yaal oxe Roog a rokaan ƭaanar tee hanq a ɗaan. Ye ta ɗaanna, a watna o laf o leng na xa laf axe no koor oxe, soo a muɓrand o saax ole bo ta nomtoox ne ta reeƭna. 22A janga o laf oleene ta xotit’ina no koor oxe, a muultin o tew. Cinj kaaga, ta ɓisiidin farna fo koor oxe. 23Maaga, o koor oxe a laya yee:
«No jaf leeke de, ga’aam oxe hatna na xa kiiƈ es,
a saq njer leng kut ne saquuma.
O tew a ne’keel,
yaam no koor#2:23 o koor kaa tekit no ɗelem hebre «iis», soo o tew a tekit «isaa». a hatu.»
24Ten taxu o koor a xaƴaa a faap um fa ya um,
a hiɓoor fo o teem,
soo da ndefat njer leng kut#2:24 njer leng kut Yaaga Roog a sakna adna fee, kaa bug’u o koor o leng fo o tew o leng a ndolniraa, ndax da ndefat njer leng kut. #Mace 19:5-6; Mark 10:7-8; 1Kor 6:16; Ef 5:31
25O koor oxe fo o teem o ƥor a yoq’u, too sed’eeyo teen dara.
נבחרו כעת:
Mberaand 2: SRR23
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Copyright © 2015-2023 by Eglise luthérienne du Sénégal