Matius 8
8
Ap amu hunik sek okbagagi wene
(Markus 1:40-45; Lukas 5:12-16)
1At Yesus ndom vaga en wambu wagya lagagimu, it avakwa wisane At amusek wagu dugwit, 2ap ambi amu hunik Yesus adema lagya lagagirik, avema seve yiluk “Ai, Nasin. Haren an sek okbanup imbita heyalok sek okbanin o.”
3Yugugu lagagimu, At Yesus inggis ap eyave vagatya dugwit, “Sek okbagaup imbitirikmu, hat heyave sek aru!” yiluk, ao yugugu hegek, at agap vaga amu hunik ako sek agagi. 4Sek agya lagagimu, Yesus en ap ako yugugu dugwit, “Avakwa mondok yugerabuk. At imam en il heyapwak yiluk, adema elak. At Musa en iri dugwit, ‘Avakwa eneyave sek aguselok, Ala ake anderogo baup o,’ yiluk, yagagi wane-wane hat sek okbagagirikmu, avakwa en bagya heyapwak yiluk, Ala ake anderogo belak,” yiluk, yugogogi.
Ap ayegen werek ayeloman sek okbagagi wene
(Lukas 7:1-10)
5Andi okbaluk, At Yesus o Kapernaum nunggu wagya lagagirik werekma, it ap enayegen werek enasin ambi Yesus adema wagya lagagirik, nggino yugugu dugwit, 6“Ai, Nasin. An nayeloman inggis-isok nggedok-kobok erek umwa nggilik dugwit, idup iya erogo yagan wasiga o.”
7Yugugu lagagimu, At Yesus en iri dugwit, “Anen sek ogari warisogon.”
8Yugugu lagagimu, at ap enayegen werek enasin akoen, “Ai, Nasin. An ap maduk atma, Haren an namwa nunggup meyan. Ata, Hat hane vaga ‘Sek aru,’ yisogon halok, nayeloman ako sek arisogon. 9An ogo, nasini enavema dugwit, enane hunggu, eke, an naori enayegen werek an navema dugwit, an nane hunggwis, ogasagwi atma, anen naori ambi, ‘Elak,’ yugugu neyalok andi, lagya, ambi, ‘Oma,’ yugugu neyalok andi, wagya, eke, an nayeloman, ‘Andi ogaru,’ yugugu neyalok andi, ogagya, ogasagwi o.”
10Yugogogi ako At Yesus aruk hunggu lagagirik, “Wi!” yiluk, vok yagagi. Vok iri lagagirik, At inim nelagwi ako yugirigya dugwit, “It Iserali menda enanggelekma en ap weram Yakuri dek menda yi, endawi mondok avyarat nombasiga yerogo An ambi hinisaligadek, yiluk, avyarat yukheraliga. 11Avakwa wisane liris-ambut en wagu dogomundik, nenombawi Averakam ogo, Isak ogo, Yakup ogo, inim At mbogot vaga menda avema bisaligama isogo isago naguluk, homari warusogom ovara, 12it avakwa Israeli menda ako o andoma irat andok arup hegek, eneyave o hwiserekma weram andenam wibisamindikmu dugwit, yup yagwi, idup en wakhidugwi, ogagu dogosogom, yiluk, yukheraliga o,” yugeragagi.
13Yugirigya lagagirik, Yesus en ap enayegen werek enasin ako yugugu dugwit, “Haren, ‘Yerogo ogarisogon,’ yiluk, avyarat nembeten ako wane-wane okbagasogon atma, hamwa elak,” yugugu lagagimu, ayeloman ako iri hegek andenam-at sek agagi.
Avakwa wisane sek okbogogi wene
(Markus 1:29-34; Lukas 4:38-41)
14At Yesus ako Peterus amwa nunggwigya lagagirik, Peterus ogwa isa aup agap idup hali vago hak nggilik werekma il hagagi. 15Il higya lagagirik, inggis vagatya lagagimu, aup idup ako dek agagi. Dek agya lagagirik, hwa ako mendek iri dugwit, At ake ogagya lagagi.
16O howam agya hegek, it madis enendawima werek menda wisane avakwa en woginiviluk Yesus adema bisa wagu lagagwama, At ane vaga madis avakwa enendawima en nggigilogo wibugu, it aup idup menda ovok erogo sek oginipu, ogagagi. 17Andi ogagagi ako, o endak erogo At Ala en navi Yesaya yugugu hegek iri dugwit:
“Aren idup-mbidup okninipu ako wigya,
eke, aup idup adigat okninivisiga ako degerogo bininggu,
ogagagi o,”
yiluk, yugeragagi ako, atma des yupwak yiluk, At Yesus en avakwa sek okbugu lagagi.
Yesus inim nagu dogop wene
(Lukas 9:57-62)
18At Yesus en it avakwa wisane adema wonggalek welagagwa ako il inigu lagagirik, it At ane welagwi menda ako yugirigya dugwit, “Inamut yanggadek elavikit lasogom o,” yiluk, yugeragagi. 19Yugirigya lagagimu, ap Ala wene vagago welagagi menda ambi wagya lagagirik, yugugu dugwit, “Nasin Ngguru wai. Hat nggoma laup imbita heyalok, an niperenat nagu dogosogom o.”
20Yugugu lagagimu, Yesus en, “Yangge do andi, enawi yo masalekma homoma agarwik, eke, swa mbogot vaga nelagwi ako, enawi yo vaga valek agarwik, ovara, An Ap-At Endaklagagis yi andi, nogo yiligama ogo mondok dek,” yiluk, yugogogi.
21Yugugu lagagimu, ap At ane waliga menda adik ambien Yesus yugugu dugwit, “Ai, Nasin. An nasin endak wen sabaluk, hinim nagu dogogwen, ‘Sek,’ yukniru.”
22Yugugu lagagimu, Yesus en, “It avakwa Ala wene enendawima dek halok andi, nggorak ndatak-at agarwik akoen enowa-enasin hambuguselok, wen sabugu dogopwak yiluk, hekbisiluk, an niperen nagu dogosogom o,” yiluk, yugogogi.
Havut ako Yesus ane hunggigi wene
(Markus 4:35-41; Lukas 8:22-25)
23Yugugu lagagirik, Yesus mburis vaga nunggwigya lagagimu, At ane welagwi menda ako inim nunggugu lagagwarik, wunggusim, 24it anderogo ogarisogon embetetekma o havut endengga inamut yanggadek vaga lavuliluk wagya dugwit, is mogoliluk iligik-vunak wirigik-vunak ogagya dugwit mburis ako sovalup ogagya hegek, At Yesus ako, nogo yugu lagagi. 25Nogo yuguma, At ane welagwi menda ako, lagu lagagwarik, iluk ogagu dugwit, “Nenasin! Nit is ndokalninivisiga atma, hodorogo nenagap wendaru!”
26Yugugu lagagwama, Yesus en, “Hit ap henendawi Ala des erogo avyarat ombasagwidek menda yi nggarogo yiluk henalon helagwi?” yugirigya lagagirik, mendek yiluk, o havut endengga inim, is mogoliluk navunak-kavunak iris ako inim, mberugu lagagimu, wadokdek mbuvat yagagi.
27Mbup iri lagagimu, it At ane welagwi menda akoen, “Wi!” yiluk, vok yugu dugwit, “Eya! O havut inim, is mogoliluk navunak-kavunak iris inim, At ane hulisiga yi, ap nggarogo menda helagwi?” yiluk, yagagwa.
Ap mberen madis enendawima werekma wibogogi wene
(Markus 5:1-20; Lukas 8:26-39)
28Andoma en, At Yesus inamut yanggadek elavikit o avakwa Nggandara menda enadema lagagi. Lagya lagagimu, ap mberen madis enendawima nonggagagi wimu avakwa hambuguselok, biselagwima akoma en Yesus adema wagagwa. Ap mberen madis enendawima nonggagagi ako, enaninis wuwa erek iniselok, avakwa enalon en sup andi vaga laup meyan welagagwa. 29Ap mberen ako Yesus wagya hugu lagagwarik, enane ombok vaga At yugugu dugwit, “Ala Abut wai. Hat nggayok bininagiluk nenadoma wandiga? Nit nenarup andi ao hegek, Hat nit nenendak nenarigiluk wandiga ai?” yugogogwa.
30O horok akilisim wam wisane buris yilin nagusim, 31it madis akoen Yesus yugugu dugwit, “Haren nggigilogo wibininaup imbita heyalok, wam wisane enendawima andoma nungguguluk, lakbininin o,” yiluk, yugogogwa.
32Yugugu lagagwama, Yesus en, “Elales!” yugirigya lagagimu, madis ako ap enendawima en wunggu lagagwarik, wam enendawima nunggugu lagagwama, wam ovok erogo lapikmu andoma en yulup yagan inamut yanggadekma nunggugu lagagwama, is akoen ndokalinipigi.
33Is ndokalinipu lagagimu, it wam woginiviluk nagu lagagwa ako, hoda wunggugwa o kota andoma nunggugu lagagwarik, it ap madis enendawima nonggagagi menda sek okbogogi inil hagagwa ako, ovogat mbilinogo yugeragagwa. 34Yugurugu lagagwama, it ap o kota andoma welagagwa menda ako ovok erogo Yesus adema lagu lagagwarik, At Yesus o andenam en wulupwak yiluk, enane nggengges erogo yugogogwa.
נבחרו כעת:
Matius 8: nbq2013
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו