Luka 24
24
Ebuhuna ono Yesu
Mt 28:1-10; Mk 16:1-8; Yn 20:1-10
1Iholoŋ etteri ono nesabit ta ataŋatye motye, iyarai isi arya on oŋwo’to gir gir ette fwatan ilume. 2Ette isi nyurana amorwo ibolohuni addi te lume. 3Ojiŋani isi ette nyurana ahwan ono Hobu Yesu abeŋ teyya. 4Tania illillihai isi, attati omuk laati arrihai wotya iger hosi hul iyyafatye aboŋojin hun opipyahi’to. 5Abaŋi aŋorwo ette ruboho ifau. Ojori laati jihosi jo, ?Nyo ittifyati tai lya al isu’to ihiji hayak? 6Abeŋ tene nyo ibuhu dwo inyi. Ogiluna ekyanita hunya ikyana inyi jihatai howon inyi Galilea, 7ojo, Oŋida Lonyi tulo itinyyaŋani ihas wati hul iyyauni’to isihoniere, ette inyi buhuna ihalu oŋitek hunihoi. 8Ette isi giluna ekyanita honyi. 9Acaharai isi te lume ette iramana erre huna daŋ jyo leyiyanak hulo ’tomon habotye iko hul omuk daŋ. 10Arai nya isi Maria Madalena, Joane, Maria honye Yakobo iko omuk aŋorwo hun iramani’to erre huna jyo lefahat. 11Ette lefahat hulo igigilo jo ikyanai isi asai bwo obeŋi isi iruhi. 12Teyya odyoto Petro ette ŋyoron ilume, irafa inyi ette luŋur atwa lume. Ette inyi igonyuna aboŋojin hama, ette caharo ihaŋ honyi bwo illilliha inyi te erre hun idwoŋi’to huna.
Afwatan Wati Imiji Emayo
Mk 16:12-13
13To oloŋ nya ofwoi omuk laati imiji Emayo an ara alamaji honyi to Yerusalem amail hattarik. 14Hadahai isi ikikyanai isi ta ahwattek hosi te erre hun idwoŋi’to huna. 15Teyya hekikyanai isi bwo fe ifiye awoyo hiram ottu Yesu ette daha ikosi. 16Igonyuni isi inyi ati obeŋ oleyo jihosi ihwa Yesu dwo lya. 17Ette inyi ifiyo isi, ?Anyo ikikyanati tai ta ahwattek hatai al idahati tai? Ette isi wotya bwo ijiriŋai. 18Bwo obo olosi afure honyi Kiliopa itarraŋ jihonyi ojo, ?Iye alya atulo abotye to Yerusalem al itimo’to erre hun idwoŋi’to huna to oŋitek huna? 19Ojo inyi jihosi, ?Anyo hirre hwa? Ojori isi jihonyi ojo, Erre huno Yesu olo Nasaret, inya ara’to aheyani sayyo ol owon iko adwaran te ehanita bwo fe ekyanita ihosyere Hollum iko laati daŋ. 20Bwo fe iyarai ehumak eleittaha iko hobwok hohoi inyi ette ŋot jihonyi aye, bwo isihoni inyi. 21Eyihi nya hohoi jo inyi adi alya al italahu’to Israele. Ati ihwania allaŋi oŋitek hunihoi ihalu erre hunia. 22Bwo fe ellilliha hohoi to omuk aŋorwo hohoi hun ofwoi dwo motye hanyik ilume. 23Attati isi nyurana ahwan honyi abeŋ teyya, ette isi fwanna bwo ojori, Egonyu dwo hohoi anjelohyen hul ojori’to jihohoi, isu inyi. 24Ofwoi dwo omuk hulohoi ilume bwo fe onyurani erre ihwa ikyanai dwo aŋorwo ati obeŋi isi igonyuni Yesu. 25Attati Yesu jaran jihosi, Itai hul ibuyaŋati’to bwo fe hul obeŋi’to iruhi kokwak ekyanita daŋ hunya ikyanarik eyak sayyo. 26Osiru jyo Kristo idihuniere erre hunia ette jiŋana ikwatan honyi. 27Ette inyi iramana jihosi erre daŋ hunya igyoroni igyerita tenyi, many te egyerita huno Mose many jyo eyak sayyo daŋ.
28Ette isi fanyan jyo amiji ninya ofwarrik isi bwo fe ojo Yesu allaŋ inyi amaji ania. 29Ati itihi isi inyi ette jaran, Hetoŋoi ikohoi nyo amuta oloŋ bwo ilyaha attari. Attati inyi leten itoŋori ikosi. 30Teyya itoŋoi isi iŋiyere, ette Yesu iduhuna emune ette jaran humo jyo Hollum ette ibibeny ette isyarana jihosi. 31Attati inyi leyo jihosi ette isi mijana inyi attati inyi litohina to hoŋite hosi. 32Bwo ikikyanai isi ta ahwattek hosi ojori, ?Obeŋi dwo atajya hohoi owulori odwo ikyanari inyi jihohoi te egyerita? 33Ette isi dyoto ta asaa ania ette caharu Yerusalem. Attati isi nyurana hulo ’tomon habotye ottubanie arabotye, bwo fe hul owoni’to ikosi hul ojori, 34Ibuhu dwo Hobu ahode ette leyo jyo Simone. 35Ette isi iramana isi erre hun ihanie dwo te ekoi, bwo fe aŋai omijani isi inyi al obeny inyi emune.
Aleyo Yesu jyo Leyiyanak Honyi
Mt 28:16-20; Mk 16:14-18; Yn 20:19-23
36Hekyanai isi ihwania ette Yesu wotya ihiji hosi ta ahwan honyi bwo ojo jihosi, Ijara nelik tajya hatawana jihatai. 37Ati abaŋi isi bebe bwo fe ikikiroi nyo igigiloi isi ara inyi aŋarri jok. 38Ati ojo inyi jihosi, ?Nyo ibaŋata tai bwo ilafuhoti? 39Imijyete ahas hoŋ iko ejek hoŋ. Ara ani ahode. Ikottiroto ahwan hoŋ bwo fe imijyete, nyo obeŋ aŋarri jok owon iko ahwan ihwa ani. 40Attati inyi itahutana jihosi ahas honyi iko ejek. 41Ati arasai isi ikuyya ati omunoi isi bwo fe illillihai. Ette inyi ifiyo isi, ?Owon obo aŋiyo jihatai? 42Obenyani isi jihonyi obo eriŋo hami. 43Ette inyi mojuna ette honya ihosyere hosi.
44Attati inyi jaran jihosi, Ekyanita hoŋ huna hunya ekyana ni jihatai ninya hawon ni ikatai, jo oŋida itasiruni erre daŋ hunya igyoroni toni igyerita huno Mose, iko huno eyak sayyo bwo fe afureta. 45Tania aŋa inyi egigilita hosi jo oŋida isi itaniŋuni egyerita. 46Bwo fe ojo inyi jihosi, Igyoroni jo odihu adi Kristo ettigemita bwo ihalu oŋitek hunihoi ibuhu adi inyi to ye. 47Oŋida bwo fe itisarrahini ettiyenio ifauhyen daŋ hettyarahi to miji Yerusalem, jo oŋida laati iloiti atajya hosi t’eyyata ette ifwotuna ahohina ono eyyata ta afure honyi. 48Irata tai ahetamijanak hulo erre huna. 49Ati imijyete, efak ni ecorit ono Monyoŋ jihatai. Ati itilati imiji Yerusalem many ifwotuniete tai adwaran t’edou.
Acaharu Yesu Idou
Mk 16:19-20
50Ette inyi itadihoro isi many iger miji Betania ette inyi kaf ahas honyi ahide ette mojo tesi. 51Teyya homojo inyi ette inyi dahan ahide t’ehiji hosi idou. 52Attati isi itahabuyo inyi ette caharo Yerusalem ta namuno on obolo. 53Ette isi duloro itahabuyo Hollum ihaji imojit eneittok.
נבחרו כעת:
Luka 24: LOT1969
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
This text was originally published by the British and Foreign Bible Society in 1969.