Matiyu 10
10
Yeso è tson be etsonchi mbwe gwi chu fà, chí, vǝ́ a je
(Marku 3:13-19; Luka 6:12-16)
1Yeso è fǝ́ fǝn be etsonchi mbwe gwi chu fà hon dwa bwa fǝn a zǝn ye, nè no be emwentì be e ti e nyo e vǝ́ be engǝ́ esera a ju be nobǝ, ngge be e ma e tswa egwa egwa mo modwa ngge atkigwa.
2Ena a be ti mo be etsonchi gwi chu fà mbwe hon:
Ekwafya a Sima (bè fǝ́ anga Bitru) ngge nwenjin ye Andoro;
Yakubo ngge nwenjin ye Yohana (be mbǝgya ndedon mo Zabadi);
3Filibu ngge Batolomi;
Toma ngge Matiyu, ya tse-eten echam;
Yakubo (nwen mo Alfiyu) ngge Tadiyu;
4Sima (a chifǝ eten) ngge Yahuda Eskariyoti (nwene è tsǝ du ye ángá).
Mò a Yeso è jan be gwi chu fà hon a gè tson be chí ángá
(Marku 6:7-13; Luka 9:1-6)
5Gè tson be vǝ́ a je ngge echa etwam ena jan, “Nye e ken nye chá sǝnsen mo be ya e fwa be ya a Esǝrela ra ra, efki ra, eten akan mo be ya a Samariya. 6Tea nye ken kpwà a zǝn be ya a Esǝrela, be no abu be son ya è tku da ara ángá. 7Abu nye no ken anga, nye e du edgon a zǝn be nobǝ jan, ‘Zǝnotì mo zǝn a kpe hon bwa tén ara.’ 8Nye matswa be ya modwa, nye fǝ́zǝ be engǝfǝ, nye matswa be ya modwa-ehwyá, nye nyonvǝ́ be engǝ́ esera a ju be nobǝ. Be no nye echakpo hon edwe, no enona, ge no kenm nye e no be nobǝ nó edwe gaten. 9Nye e fa nye zinariya, azufa eno e ra kobo, adi kanda mo nye ra. 10Nye e kpwá nye echo kèn, mokàn efki, kpumo a kpwafu, efki ra tuetsǝ́n kèn. Adia ge defǝ be e no be ya mochi mò a be nda anga.
11“Egwa egwa mo eten efifi ngge eten nwofyan a nye kwa ángá, nye nda mbwe ende a be digǝ̀n ye anga, nye e no a mu ye e ken e ngga nò a nye nya a gwa zǝn hon a ken chá efki ángá. 12Abu nye kwa nya shi a mu hon ángá, nye bi be nobǝ a tswa akanmu hon fwa a tswa adgye. 13Ano be nobǝ a tswa mu hon cha nye bu fà, adgye mo nye a no ngge be, ano be cha be nye bu fà ra, adgye mo nye twabǝ a bwa a zǝn nye. 14Ano be nobǝ a tswa eten hon cha be nye, eno e ra buton a fo be nye ra, nye bukǝ́n abubwi e no a kpwafu mo nye atan a nye nyagwa be anga. Mò ena a tú jan fù èé bu mo nye dwa a je, a chu mò a ben be ángá. 15Ebi m jan nye anga, nò a Ehwya a kpèn be nobǝ kǝ́n ángá, ga shànfo a chu be ya a Sodoma ngge Gomora a tkyan a chu be nobǝ a eten eni.
Ekan e nyabwa ángá
(Marku 13:9-13; Luka 21:12-17)
16“Di, m tson nye chí nyavǝ́ a je abu be son a engga mo be kwàkpan. No enona, nye e no ngge enggaton abu mokan, nye e no be nobǝ esese abu be eba ya e dì be be nobǝ ju anga ra.
17“Nye e bgeshi fǝzǝn, be nobǝ a fu nye a ken a chafya mo be ekpenkǝ́n, zǝn a ba bu nye akpan a tswa àtá chuefǝnm mo be. 18A chu m, ba vǝ nye a ken chafya mo be gomna ngge be chutì. A zǝn, nya jan be ngge be ya e fwa be ya a Esǝrela ra gaten, Fwa Esese hon. 19Tea atan a be fu nye anga, nye e ka nye mò a nya jan ngge abu nya jan ye ángá ra. Atan enò, Ehwya a no nye mò a nya jan ángá. 20Adia a fwa ye, a nye ya e no a jan fwa hon anga ra, tea Engǝ́ mo Ate nye a jan nó a ge chá kpevǝ mo nye.
21“Nwenjwa a tsǝ nwenjwa, a du a bu mo be ya a gu ye ángá. Àtà a tsǝ a du nwen ye. Mbǝgya a cha chu ngge be ya e mbwa be, na du ba gu be. 22Binbin mo be nobǝ a ze nye a chu m, tea nwene e bon-ekǝ̀n kengga ara ekǝn-etkyen, a ben ega. 23Atan a be tswa nye fí adi zǝn akan, nye e tse e ken chá efki. Ebi m jan nye anga, nye chà tkukwa a gu nye a tswa binbin mo be eten mo be ya a Esǝrela ra, Nwen Nobǝ twabǝ a bwa ara.
24“Ya ekǝnkǝ́n twafǝ̀ ye etumo mbwe anga ra, ngge ya mochi twafǝ̀ ye yagwamo mu mbwe anga ra. 25Ge defǝ a ya ekǝnkǝ́n e no abu etumo mbwe, ngge ya mochi e no abu yagwamo mu mbwe. Ano be fǝ́ ara yagwamo mu hon Bayezebu, tì mo engǝ́ esera, ba fǝ́ be ya kpenmu mbwe engǝ?
Ende a wa tsen ángá
(Luka 12:2-7)
26“Enona, nye e tsen nye be ra, adia mò a be ti nyino etwapepe, a be fki a gwa be nó ra ángá, fwa ye ra; mò nwone a bè jan engǝ̀tonton nwone a ba jan be, be nobǝ nó ra ángá, fwa ye ra. 27Mò a m jan nye engǝ̀tonton anga na, nye e ken e jan nó a engga mo be nobǝ; ngge mò a be twa nye eshwa mo nó a tón, nye e tón e vǝ́ a chu be ba, nye e du edgon mo nó. 28Nye e tsen nye be ya a gu ekǝnjuju tea n gu a ti be nya ra, ra. Nye e tsen e kpwà Ehwya, nwene e tkò a ti ekǝnjuju tangge nya a tswa sen-ehwa ángá. 29Be jwa de be atakpachu fà adi kobo akan anga ra? Bi adi enò, akan mo be a fǝ ye ra, kpwà tén adi edgyan mo Ate nye. 30Nye e yi jan egwa egwa mo be zan-a-chu mo nye no ekam. 31Enona, nye e tsen nye etsentsen ra, nye twafǝ̀ be atakpachu embo chafya mo Ehwya.
32“Ba anona, ende e tú jan ge yi m a chafya mo be nobǝ, a me gaten ma jan, m yi ye a chafya mo Àtà m e no a kpe ángá. 33Tea ende e tson etson mam a zǝnchaje ena, ma tson etson mbwe chafya mo Àtà m e no a kpe ángá.
34“Nye e ka nye jan m bwa evǝa me e bwe be nobǝ mo zǝnchaje, be e no a tswa adgye e sojube ra. M bwa m evǝa me e ti adgye e bwa ra, tea me e du enggakwam a engga mo be nobǝ. 35Adia m bwa evǝa me e du,
“ ‘ndedon ge e no a tswa
ebwedwavǝ ngge ate ye,
nwen ndegwa ge e butsǝ
ngge ayi ye,
gwa nwen ge e butsǝ
ngge ayi mo don ye.
36Be nobǝ a tswa akanmu
mo ende akan,
a no be ya eze mbwe.’
37“Egwa egwa e dgyan ate ye eno e ra ayi ye, tkyan abu ge dgyan m anga, chà kǝn ye be e fǝ́ ye jan ga ḿ mam ra. Egwa egwa e dgyan nwen ye ndedon eno e ra nwen ye ndegwa, tkyan abu ge dgyan m anga, chà kǝn ye be e fǝ́ ye jan ga ḿ mam ra. 38Egwa egwa e dgyan ye ge e engǝ ekan a chu m ra, chà kǝn ye ge e no ende e ba m anga ra. 39Egwa egwa e dgon chu ye anga, ti a vǝ́ a ti ye nya mbwe ra, ngge egwa egwa e dgon ye chu ye ra, a chu m, a ben nya mbwe.
40“Egwa egwa e cha nye, cha anga a me, ngge egwa egwa e cha m, cha anga ende e tson m bwa ángá. 41Ano o cha efojan abu ende e jan fwa mo Ehwya ángá, wa ben buhwen e no ḿ mo efojan ángá, ende e cha nobǝ ebitete adi fwa a ge no ya ebitete ángá a ben buhwen e no ḿ mo nobǝ ebitete. 42Ano ende akan ti mbǝ etswa adi kǝnggwe no ende akan, e no ti ara nwofyan a engga mo be ya e ba m anga na, ebi, m jan nye anga, Ehwya no a tén ye buhwen a ge ti nyi yishwa be nobǝ ena no ángá.”
© 2024 Luke Initiative for Scripture Translation