Matiyu 14
14
Abu bè gu Yohana ya Batisǝma ángá
(Marku 6:14-29; Luka 9:7-9)
1Atan a Tì Hiridu è dwatì no Galili ángá, gè fo etkyen a chu be mò a Yeso è bwe anga, 2gè jan be ya mochi mbwe jan, “Ena a Yohana ya Batisǝma, ge nyi ara etkyen a dì. Ena a mò e bwe ge no ngge echakpo, ti no bwe be moeditanm ena anga.”
3Hiridu hon, è du bè fu Yohana hon ti twano a àtá ehwyatu a chu Hiridiya, gwa nwenjin ye, Filibu a gè ti fǝ́ ángá. 4Gè bwe enò adia Yohana è no jan bwi ye anga jan, “Ge se ye a we ti gwa nwenjin o, ti e fǝ́, a ge chà no angǝ ángá ra.” 5Hiridu è nda anga ge e gu Yohana, tea gè tsen be nobǝ anga adia be nobǝ è tsǝ́ ara ekǝ̀n jan Yohana è no efojan mo Ehwya ángá.
6Nò etú mo ekabenm ngge nò a bè mbwa Tì Hiridu hon ángá, nwen Hiridiya ndegwa è ge ge chafya mo be nobǝ a tì è bo bwa adi esǝ hon ángá. Tì hon è fo etkwa àywá a chu ge, a nwen gwa ye hon è ge ángá. 7Enona, gè senvǝ ngge nwen ndegwa hon ngge efan efanm jan ne, ga no nó mò e ma no engǝ ra, a ge bgó ara. 8Adia ayi ye è tú ara ye fwa ángá, gè jan, “No m chu mo Yohana ya Batisǝma adi kpere asuswana.” 9Atan a Hiridu è fo enò ángá, nya mbwe è bgen àywá, tea adi efan a gè fan ara ngge nwen ndegwa hon a chafya mo be ya echan mbwe ángá, gè du jan be e no nwen ndegwa hon mò a gè nda ángá. 10Gè tson, be bè ken kpecho chu mo Yohana ya Batisǝma éè no a àtá ehwyatu ángá. 11Bè ti chu hon bwa adi kpere, nè ti no nwen ndegwa hon, gè ti nó ken no ayi ye. 12Be etsonchi mo Yohana è bwa tso ekǝnjuju mbwe ti ken di. Kǝnggwa bè ken jan Yeso.
Yeso è fi be nobǝ echo chwen
(Marku 6:30-44; Luka 9:10-17; Yohana 6:1-14)
13Atan a Yeso è fo mò è bwe ángá, gè nyagwa zǝn hon nè kwa ngga ken adi zǝn a be nobǝ è fwa be ra. Atan a be nobǝ è fo fwa a chu zǝn a gè nyaken ángá, embo embo mo be, è vǝ́ a je mo be eten mo be nè ba ye ken a kpwafu. 14Atan a gè gwa a je mo ngga hon nè tonvǝ́ etù ángá, gè ben be nobǝ embo a zǝn. Gè di ashi mo be nè matswa binbin mo be ya éè dwa ngge be modwa a engga mo be ángá.
15Nò è kpo anga, be etsonchi mbwe è bwa a zǝn ye nè jan, “Zǝn ena a tswavǝ́n, be nobǝ fwa be ana ra, nò tén ara a ga kpo, du be nobǝ ena be e kwa e ken a tswa be eten nwofyan, abu be e jwa mode mo chu be.”
16Yeso è janfwe be, “Ano bwe a ge ba nya chá efki? A nye, nye no be mò be e de.”
17Bè jan Yeso jan, “A bi borodi chwen ngge gwejo fà tete, a je no ngge be ana.”
18Gè jan be, “Nye kpu be bwa m ana.” 19Gè jan be nobǝ embo hon jan be e chu a sen a chu be vǝmo. Gè kpu bi borodi chwen ngge gwejo fà hon, nè takpa vǝ́ chà kpe nè chwano Ehwya. Kǝnggwa gè bwikwa be nwofyan nwofyan nè kpu no be etsonchi mbwe, bè kpu no be nobǝ hon. 20Binbin mo be nobǝ è de mbo tén abu bè dgyan ángá. Be etsonchi è tefǝn be ebwibwi, ya è dan ángá mbo esha gwi chu fà. 21Efim mo be ndedon ya éè de mode hon ángá, è no echo chwen. Bè ká be be ndegwa ngge mbǝgya ra.
Yeso è kenkèn a chu mbǝ
(Marku 6:45-52; Yohana 6:15-21)
22Kè akan, Yeso è du be etsonchi mbwe be e kwa ngga, nè kwafya mbwe e vǝ́ jengǝ̀ mo edan hon, abu ge e du be nobǝ ya è fǝnno a zǝn ángá efǝ. 23Atan a gè du be nobǝ hon nya ara ángá, gè tonvǝ́ a hwì jujuye evǝa ge e bgó ebgo. Gè no a zǝn hon jujuye ti kengga etsǝ bonbon. 24Atan enò, ngga hon è ken dgyen ara zǝn a tswa edan, fyo echakpokpo è no kpo bwa anga chafya mo be, nè tsǝ mbǝ éè fǝ́ anga bwa no bu anga a ju ngga hon.
25Akǝndon, Yeso è no kenkèn nya a bwa a zǝn be a chu mbǝ. 26Atan a be etsonchi è di ye, gè no kenkèn nya a bwa a zǝn be a chu mbǝ ángá, ndadin è kan be, bè tandwa a tswa etsentsen jan, “A kpǝ!”
27Kè akan, Yeso è jan fwa ngge be jan, “Nye bonshi ekǝ̀n. A a me. Nye e tsen nye etsentsen ra.”
28Kǝnggwa Bitru è jan, “Etsodwe, ano a a bo, jan m me e kenkèn a chu mbǝ e bwa a zǝn o.”
29Yeso è jan, “Bwa.”
Kǝnggwa Bitru, è gwa a je mo ngga hon nè kwa ara ekenm chá Yeso a chu mbǝ hon. 30Tea atan a gè di fyo hon éè no kpo bwa ngge echakpo ángá, gè tsen etsentsen, nè kwa ara edashim chá tswa mo mbǝ. Gè tandwa jan, “Etsodwe, tivǝ́ m!”
31Kè akan Yeso è ywa bu fu ye, nè jan, “A bo ya chaebi nwofyan, ano bwe a ge o tsen tsuruku anga?”
32Abu Yeso ngge Bitru è kwashi anga a tswa ngga hon enó, fyo hon è kpo tén nya. 33Be ya è no a tswa ngga hon è fen ye, nè jan, “Adi ebi, wa Nwen mo Ehwya hon.”
Yeso matswa be ya modwa a Jenisarati
(Marku 6:53-56)
34Atan a bè vǝ́ ara jengǝ̀ ángá, bè kwa tswa sǝnsen mo Jenisarati. 35Atan a be ya eten hon è diyi ara jan a Yeso ángá, bè tson chí ken gu a tswa eten nwofyan mo sǝnsen hon. Be nobǝ è kpu gu be ya modwa mo be bwa a zǝn ye, 36nè bgó ye jan ge e gwa be ya modwa, be e yi ti a tón mokàn mbwe. Binbin mo be ya è yi a tón mokàn hon ángá, è ben ematswam.
© 2024 Luke Initiative for Scripture Translation