Yôhan 2
2
Nau Brah Yêsu pah kan ta Galilê jêh ri ta Yuđa
(2:1 – 12:50)
Nau nhêt sông tâm nkol ur sai ta ƀon Kana
1Tâm nar tal pe, geh nau nhêt sông tâm nkol ur sai ta ƀon Kana tâm n'gor Galilê; mê̆ Brah Yêsu geh măt ta nây. 2Brah Yêsu jêh ri phung oh mon Păng bu jă râng nhêt sông. 3Tơlah ndrănh hŏ suăt, mê̆ Brah Yêsu lah ma Păng: “Khân păng mâu hôm geh ndrănh ôh.” 4Brah Yêsu plơ̆ lah: “Hơi mê̆, moh nau aơ tât ma ay jêh ri gâp? Mông gâp ê hŏ tât ôh.” 5Mê̆ Păng lah ma phung bunuyh pah kan pô aơ: “Moh nau Păng đă khân may ƀư hom tâm ban kơt nây.” 6Ta nây geh prao mlâm yăng ƀư ma lŭ, dŏng tâm nau ƀư kloh tĭng nau vay phung Yuđa, ăp yăng dơi prăp bar, pe thŭng dak.#2:6 Ăp thŭng klăp lah 38 lit. 7Brah Yêsu đă khân păng: “Nkhŭt hom dak ăn bêng ăp yăng nây.” Khân păng nkhŭt bêng tât ta nko. 8Jêh nây Brah Yêsu đă đŏng: “Aƀaơ aơ chuah hom, njŭn ma nơm mât uănh nau sông sa.” Pôri khân păng njŭn ma bunuyh nây. 9Lah nơm mât uănh nau sông sa chiăm dak nây plăch jêng ndrănh jêh (ƀiălah mâu gĭt mbah tă geh ndrănh aơ, bi phung pah kan hŏ chuah dak gĭt yơh), păng kuăl klay 10jêh ri lah: “Lĕ rngôch bunuyh vay sŏk ndrănh kah lor, jêh ri lah bu hŏ nhêt âk jêh, jêh nây rĭ mơ sŏk ndrănh mâu kah pakơi, ƀiălah may prăp ndrănh kah ma tât aƀaơ aơ.” 11Aơ jêng nau mbên khlay tal nguay Brah Yêsu ƀư jêh ta ƀon Kana, tâm n'gor Galilê, jêh ri tâm mpơl nau chrêk rmah Păng nơm, rĭ dĭng phung oh mon chroh ma Păng. 12Jêh nau nây, Brah Yêsu ndrel ma mê̆ Păng, phung oh, jêh ri phung oh mon hăn jŭr ta ƀon Kapernum gŭ ta nây djê̆ nar.#Mat 4:13.
Brah Yêsu lăp ta ngih brah
(Mathiơ 21:12,13; Markôs 11:15-17; Luka 19:45,46)
13Rƀŭn Nau Găn phung Yuđa dăch tât, Brah Yêsu hăn hao ta ƀon Yêrusalem.#Ngluh 12:1-27. 14Păng saơ tâm ngih brah geh phung bunuyh tăch ndrôk, biăp, plŭk, jêh ri geh phung bunuyh rgâl prăk gŭ tâm nây. 15Brah Yêsu buănh du rse jan mâng rpăt, mprơh lĕ phung nây luh bơh ngih brah, nđâp ma biăp, ndrôk; nkhŭt mƀăr lơi prăk phung rgâl prăk jêh ri nklơ̆ lơi sưng khân păng. 16Brah Yêsu lah ma phung bunuyh tăch plŭk pô aơ: “Mƀăr lơi hom lĕ ndơ aơ bơh aơ, lơi ƀư ngih Mbơ̆ Gâp jêng ngih tăch drăp.” 17Phung oh mon Păng kah gĭt tay nau hŏ nchih jêh: “Nuih n'hâm duh nđơr ma ngih Kôranh Brah su gâp.”#Mprơ Ơm 69:9. 18Phung Yuđa ôp ma Brah Yêsu: “Moh nau mbên khlay Kôranh mpơl ăn hên saơ Kôranh geh nau dơi ƀư nau nây?” 19Brah Yêsu lah: “Ƀư rai hom ngih brah aơ, tâm pe nar Gâp mra ndâk đŏng.”#Mat 26:61; 27:40; Mark 14:58; 15:29. 20Phung Yuđa lah: “Bu ndâk njêng ngih brah aơ roh puăn jât ma prao năm, ƀiălah Nơm Nti mra rdâk tay tâm pe nar dơm?” 21Ƀiălah Brah Yêsu ngơi ma ngih brah săk jăn Păng nơm. 22Pôri, nôk Păng dâk rêh tay tă bơh nau khĭt, phung oh mon kah gĭt Păng lah jêh nau aơ, khân păng chroh Nau Brah Ndu Ngơi jêh ri nau Brah Yêsu hŏ lah jêh.
23Dôl Brah Yêsu gŭ ta ƀon Yêrusalem tâm nar rƀŭn Nau Găn, âk bunuyh saơ nau mbên khlay Brah Yêsu ƀư, khân păng chroh ma amoh Brah Yêsu. 24Ƀiălah Brah Yêsu mâu jao Păng nơm ma khân păng ôh, yorlah Brah Yêsu gĭt rah vah lĕ rngôch bunuyh. 25Păng mâu hôm ŭch bu mbơh nkoch ôh ma Păng, yorlah Păng hŏ gĭt rah vah lĕ nau tâm nuih n'hâm bunuyh.
נבחרו כעת:
Yôhan 2: CMO2023
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
© 2023 United Bible Societies. All rights reserved.