Juan 5
5
Pinagpiyya ni Jesus u Essa a Lállake ti Betesda
1Nadid, káttapos ni itod ay immangay ti Jesus ti Jerusalem, para umangay tu kasayaan nu Judio hide. 2Ti Jerusalem ay te dakál hod a diposito ni dinom. U páppágyanan na ay adene tu pintuwan nu banuwan a sássáddáppan ni tupa. U págngahan nu Judio hide ti dinumay a itod ay Betesda. Tu digdig nu dinom ay te limma a bilay. 3Mágkatdug hod u tuna't kakpal a te saket, u buhák hide, u pilay hide, sakay u lumpo hide. 4Áuhayán de a magahikad u dinom, dipo ni minsan ay umogsad u essa a anghel nu Diyos sakay labugán na u dinom. U dipalongo a makatabsung tu dinom ay maghusay maski ni ánya u saket na. 5Tehhod hod a essa a lállake a tállo a pulo ay ti walo dán a taon a te saket. 6Nikuna ketan ni Jesus u lállake a mágkatdug hod, tukoy na a nalay dán u lállake a te saket. Tinanung siya ni Jesus, “Gusto mu beman a magpiyya?” 7Timmábbeg u te saket a lállake, “Gusto ko nakwa, Maisto, pero awan ti mangtulung nikán a tumabsung ti dinume ni labugán dán. Patamuwák palla ay te nakadipalongo dán nikán.” 8Kinagi ni Jesus nikuna, “Tumaknág ka, ágkatán mo i kákkatdugan muwe sakay maglakad ka dán!” 9Ti itod bila ay pagdaka a nagpiyya u lállake sakay inágkat na u kákkatdugen na sakay naglakad.
I itod a pangyayare ay netaun be a Aldew nu Káimang. 10Kanya kinagi nu Judio hide tu lállake a nagpiyya, “Awan beman aldew nadid nu Káimang? Labag tu Kautusan u págtawed mo tu kákkatdugen mo!” 11Pero timmábbeg siya, “U tolay a nagpapiyya nikán u nagutus a tawidán ko u kákkatdugen ko sakay maglakadák.” 12Tinanung de siya, “Ti deya i nagutusay niko a tawidán mo i kákkatdugen muwe sakay maglakad ka?” 13Pero awan nakilala nu lállake ni ti deya u nangpapiyya nikuna, dipo nawan dán ti Jesus tu káppalan nu tolay.
14Káttapos ay netan ni Jesus u lállake tu disalad nu templo sakay kinagiyan na, “Nadid dipo nagpiyya ka dán, dyan ka dán nakwan magkasala, ta bakay te mangyare pa niko a mas lalo a madukás.” 15Limmakad u lállake sakay kinagi na tu Judio hide a ti Jesus u nangpapiyya nikuna. 16Kanya sapul hod ay dináddusta dán nu Judio hide ti Jesus dipo tu págpapiyya na tu Aldew nu Káimang.
17Pero kinagi ni Jesus nide, “Tulos-tulos u trabaho nama ko hanggan nadid, konnaák la bi hod.” 18Kanya ngahe-ngahe a bunuwán nu Judio hide ti Jesus tu iyamut de, pero bakán la a dipo tu páglabag tu batas tungkul tu Aldew nu Káimang nan dipo kákkagiyán na pa a u Diyos u Ama na, sakay iyaheg na u sadile na tu Diyos.
U Kapangyariyan nu Anak
19Kinagi nide ni Jesus, “Dapat moy a matukuyan a awan ti gimitán u Anak tu sadile na la nan u gimitán na la ay u ketan na a gimitán nu Ama. U gággimitán nu Ama ay siya la be u gággimitán nu Anak. 20Dipo mahal nu Ama u Anak, kaya ipeta na tu Anak u atanan a gimitán na. Mas pa ti iye u ipeta nikuna nu Ama a gimitan na, a pagtakaan moy ti husto. 21Ni kodya a biyagán nu Ama u patay hide ay konna bi hod a biyagán nu Anak u deyaman a gusto na a biyagán. 22Awan humatul u Ama tu maskin deyaman. Inyatád na tu Anak u atanan a kapangyariyan a maghatul 23para parangalan nu atanan u Anak a konna tu pángparangal de tu Ama. U awan mangparangal tu Anak ay awan mangparangal tu Ama a nángpaangay he nikuna.”
24“Tatahoden u kagiyán ko nikam,” kinagi pa ni Jesus, “U mágsaneg tu upos ko sakay manalig tu nangpaangay he nikán ay tehhod a biyag a awan ti kahád. Awan dán siya mahatulan nan neagton dán siya gabwat tu kamatayan patamo tu biyag a awan ti kahád. 25Pakatandaan moy iye, dumemát u odas, nadid dán ngane, a masaneg nu patay hide u boses nu Anak nu Diyos, sakay u mágsaneg nikuna ay mabiyag.#5:25 U patay hide a kinagi na he ay u tolay hide a awan nakakilala tu Diyos sakay ni maniwala hide tu kákkagiyan nu Panginoon Jesus ay atádden na hide ti biyag a awan ti kahád. 26U Ama mismo u pinaggabwatan nu biyag. Sakay u Anak ay inatádden na be ti kapangyariyan a paggabwatan nu biyag. 27Inatádden be siya ti kapangyariyan a maghatul, dipo siya u Anak nu Tolay. 28Diyan moy iye pagtakaan, dipo dumemát u odas a masaneg nu patay hide u boses na. 29Mabiyag hide a huway sakay lumuwas hide tu nelábbángngan de. Atanan a naggimet ti maganda ay magkahod ti biyag a awan ti kahád. Pero atanan a naggimet ti madukás ay mahatulan sakay maparusaan.”
U Mangpatunay hide ni Jesus
30Kinagi pa ni Jesus, “Awanák ti gimitán a ayun la tu sadile ko a kagustuwan. Maghatulák a ayun tu kinagi nikán nu Ama, kanya tama u hatul ko, bakán a u sadile ko a kaluuben u sunudán ko nan u kaluuben nu nangpaangay he nikán.
31Ni hikán la u mángpatunay tu sadile ko ay awan tatahoden u kinagi ko, 32pero te agum a mángpatunay tungkul nikán, sakay tatahoden u kinagi na. 33Awan beman te inutusan kam a nagtanung ni Juan? Tu pángsiyasat moy nikuna ay ingkagi na nikam u tatahoden tungkul nikán. 34Pero awan ko kailangan u patunay a gabwat tu tolay. Kinagi ko la iye para maniwala sakay maligtas kam. 35Ti Juan ay kumán a demlag nu simbuwan a magdemlag tu itod, minasaya kam tu badit la a panahun tu demlag na. 36Pero tehhod a mángpatunay tungkul nikán a mas higit tu patunay ni Juan, u gimet hide a ipagimet nikán nu Ama, sakay siya be u gággimitán ko. Ina u mangpatunay a pinaangayák na he. 37Sakay u Ama a nangpaangay he nikán ay nagpatunay be tungkul nikán. Maski nikan ay awan moy palla nasaneg u boses na, sakay netan u hupa na, 38sakay awan moy tinanggap u upos na dipo awan kam maniwala nikán a pinaangay na he. 39Mággaadalán kam tu Kasulatan, ta akala moy a tu pamamag-itan ni iye ay magkahod kam ti biyag a awan ti kahád. U Kasulatan a mismo u mangpatunay tungkul nikán, 40pero umád moy a umadene nikán para maalap moy nakwa u biyag a awan ti kahád.”
41Sakay kinagi pa ni Jesus, “Awan ko hangadán u papure nu tolay hide. 42Tukoy takam sakay tukoy ko a awan ti puso-puso moye u págmahal tu Diyos. 43Immangayák he tu pamamag-itan nu Ama ko, pero umáddák moy a tanggapán. Pero ni te iba a angay he magtoldu nikam ayun tu sadile na la a kagustuwan ay tanggapán moy siya. 44Kodya kam a maniwala nikán, ni u papure la nu bawat essa u gusto moy, sakay bakán a u papure a gábwat tu eessa a Diyos? 45Dyan moy isipán a hikán u mángkaso nikam tu Ama. Ti Moises a áasaan moy u mismo a mángkaso nikam. 46Dipo ni tatahoden a naniwala kam ni Moises, nakwan ay maniwala kam be nikán, dipo mismo ti Moises ay nagsulat tungkul nikán. 47Pero ni awan kam maniwala tu insulat na, kodya kam a maniwala tu kinákkagi ko?”
Pahanan Agta New Testament © Philippine Bible Society and Wycliffe Bible Translators, Inc., 2017.