LUKAS 18
18
Pakkalebarang ripassala hakking jekkong
18:1-8
1A'bisarai pole Isa se're pakkalebarang mange ri iyai laappa'toje' rima'nassana parallu ngase'i tulusu ngera dowaang na tide' lanrena. 2PauNa, ”Lalang rise're kota rie' hakking gele malla' ri Allataala na gele rie' tau lakangaliki. 3Ri kota injo rie' se're balu-balu tulusu mange ri hakking injo na lakua: Rialleanganga ri a'rakannna balingku. 4Sallomu hattunna sanging palatolla'i hakking injo. Mingka maeng injo lanaha-nahai lalang ri atina: Mannamamo gelea malla' ri Allataala na gele todo' rie' tau kukangaliki, 5mingka kanara balu-balu inni lapakasusaa, baji'mo kualleangangi pangerana, solanna andai samae-maena na kamaenganna labalianga.” 6Lakua Karaeng Isa, ”Pina'na'i pauna hakking gele intu adele! 7Gelejua Allataala laalleangangi sikuana tau ripile ri Allataala ampa allo bangngi akeo' mange ri Ia? Apa Ia appasoho'i hattu rigelenapa latulungi? 8Nakke appau mange ri kaui: Ia lalassiri laalleangangi. Mingka, ampa Ana' Rupatau injo rie', makalanguppajuapai tau tappa' ri lino inni?”
Pakkalebarang ripassala tau Farisi surang palele sima
18:9-14
9Mange ri tau lohe larapang injo kalenna naba na lajanjang tuna sikuanna tau maraeng, lapaui Isa pakkalebarang inni, 10”Rie' rua tau a'lampa mange ri Sapo Allataala langera dowaang; sitau Farisi na sitauang injo palele sima. 11Ammentengi tau Farisi injo na ngera dowaangi, appakonni: O Allataala, nakke sukkuru mange ri Kau, saba' gelea assimpole sikuanna tau maraeng, gelea tau palukka', gelei daa geo'ku', gelea pasangkili, na gele todo'a assimpole palele sima inni; 12pinruanga appuasa sijumaa, sanging assarea sidahu sampulona battu risikonjo uppa-uppaku. 13Mingka palele sima injo ammenteng dere juai, na gele todo'i barani ammonga nai' ri langi', mingka ia tulusu lapurusu barambanna na lakua: O Allataala, rikamaseangi tau doraka inni. 14#Mat. 23:12; Luk. 14:11Nakke appau mange ri kaui: Rimuliannamo tau inni ri saponna assimpole turipa'naba ri Allataala na tau maraeng injo gele. Saba' inai lapakala'biri kalenna, ia laripakatuna intu na inai lapakatuna kalenna ia laripakala'biri intu.”
Isa ambarakkaki ana'-ana'
18:15-17
(Mat. 19:13-15; Mark. 10:13-16)
15Maeng injo lohemo tau battu laurang ana' ki'di'na mange ri Isa, solanna ri barakkaki ri Isa. Ri lajanjanna injo, ana'-ana' gurunna Isa kuku'i mange ri tau lohe injo. 16Mingka lakeo' ngase'i Isa na lakua, ”Lappasangi ana'-ana' ki'di' intu mae ri Nakke, na ako pisangkai, saba' tau assimpole injomo intu opuna Pakkaraengang Allataala. 17Sitoje'na Nakke appau mange ri kau: Inai jua gele anruppai Pakkaraengang Allataala assimpole ta'ranna ana' ki'di' inni, ia gele akkulle antama' ri injo.”
Tau kalumannyang inni sukkarai antama' ri Pakkaraengang Allataala
18:18-27
(Mat. 19:16-26; Mark. 10:17-27)
18Rie' se're ponggaha mange akkuta'nang ri Isa, ”Guru baji' nyaha, apa nuparallu kugeokang lakuuppai tallasa mannannungang?” 19Pappihalinna Isa, ”Ngura muare'a tau baji' nyaha? Tide' manna se're tau baji' nyahana maraenganna Allataala. 20#Kel. 20:12-16; Ul. 5:16-20Tantu muisse' ngase'na parenta inni: Ako assangkili, ako muno, ako a'lukka', ako assare sa'bi bura, ngali'ko ri ammammu surang ri idommu.” 21Lakua tau injo, ”Iangase'na injo kugeokangi minang rikidi-kidiku juapa.” 22Rilalangngere'na injo appaui Isa mange ri ia, ”Rie' juapa pole se're passala nuparallu mugeokang: balukang ngase'i apa nurie' ri kau na pa'dahu-dahuangi injo mange ri tau kaasi-asi, languppako pa'barang-barangang ri Suruga, maeng injo maeko konni na minahangko ri Nakke.” 23Sungka'i lalangngere tau injo pauna Isa, sarro pammassana nyahana, saba' sanna' kalumannyanna. 24Sungka'i lajanjang ma'nassana sarro pammassana nyahana, appaumu Isa, ”Sanna' toje' sukkara'na tau kalumannyang inni lantama' ri Pakkaraengang Allataala. 25Saba' la'bi lo'morangi sikaju unta ngusu' antama' ri balo jarung na tau kalumannyang antama' ri Pakkaraengang Allataala.” 26Appau ngase'mu tau allangngeri injo, ”Ampa appakonjo, inaimo akkulle ripakasalama'?” 27Lakuamo Isa, ”Nugele injo ma'ring ri rupatau inni, ma'ringi ri Allataala.”
Passahalang minahang ri Isa
18:28-30
(Mat. 19:27-30; Mark. 10:28-31)
28Appaui Petrus, ”Janjangi, kambe inni tabokoi ngase'mu sikonjo nurie' ri kambe na minahangkang ri Kau.” 29Lakuamo Isa mange ri iyai, ”Sitoje'na Nakke appau mange ri kaui, sikuanna tau nurikanarana Pakkaraengang Allataala nalabokoi saponna, iyareka bahinenna, iyareka uranna siana', iyareka tau toana iyareka ana'-ana'na, 30lalatarima muliang a'lappi rua rihattu inni jua, na ri allo riboko ia lanarimai tallasa mannannungang.”
Makapintallummu Isa lapappiissekang passala kasissaanna
18:31-34
(Mat. 20:17-19; Mark. 10:32-34)
31Isa lakeo'i sampulo injo rua suro-suroNa, ampai appau mange ri iyai, ”Konni-konnina laa'lampaki mange ri Yerusalem na iangase'na numaeng laukiri sikonjo nabbi risesena Ana' Rupatau laripa'rupa. 32Saba' Ia laripassareangi mange ri tau maraeng, laritua-tuai, larisallai na laripe'rui. 33Lalarabungi ampai lahunoi na ri allo makatalluna Ia laattallasai muliang.” 34Mingka, iyai gele sikali lapahang iangase'na injo; battuanna pau injo tassa'bui ri iyai na gele laisseki nulakuangang injo Isa.
Isa appakaanjanjang tau buta riampi'na Yerikho
18:35-43
(Mat. 20:29-34; Mark. 10:46-52)
35Rihattunna Isa seppa'mo laambattu ri Yerikho, rie' tau buta attolong ri biring lalang na ngera-ngerai. 36Rilalangngere'na lohe tau lumalo, akkuta'nangi, ”Apa injo?” 37Lakuamo tau lohe injo mange ri ia, ”Isa tau Nasaret injo lumalo.” 38Jari a'nga'ngaramu, ”Isa ana' Daud, rikamaseanga!” 39Tau lohe a'lingka injo ri a'rakang lapisangkai solanna sannang. Mingka pela' bakka'i sa'ranna a'nga'ngara, ”Oe ana' Daud, rikamaseanga!” 40Jari attaangi Isa na lasuro renrengi tau injo mange ri Ia. Sungka'i ambattumo mange riampi'Na, akkuta'nangi Isa mange ri ia, 41”Apa mukaa'raki solanna Kugeokangang ri kau?” Pappihalinna tau injo, ”Karaeng, solangku akkulle anjanjang!” 42Jari lakuamo Isa mange ri ia, ”Konni-konnina anjanjammoko, tappa'mu lapakaanjanjangko!” 43Rihattu injo toje'jua akkullemu anjanjang, maeng injo minahangi ri Isa ampai lapakala'biri Allataala. Rilajanjanginna passala injo, jari sikuanna tau rie' ri injo lapakala'birii Allataala.
נבחרו כעת:
LUKAS 18: LAI_SLY
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
@LAI 2012 Indonesian Bible Society (Lembaga Alkitab Indonesia)