Rut 1
1
Elimeleke si mudak nai aldeia Belem nusa Israel kla'a nia nusa Moabe
1-2Mamuna li nia nusa Israel ara taik hnauk, li opu sia mak uku likmori Israel.
Nia tempu aro'o, nia likmori hea ngai Elimeleke. Ni nai Efrata, nai aldeia Belem nia rejiaun Juda. Ni sa hahata ngai Noemi.#1:1-2 Nia ahak Ebreu, Elimeleke du'a de, "Opuna'i mak Ara", Noemi du'a de, "rala hakmatik". Si ana parani haruak, ngai Malon norok Kilion.
Nia tempu aro'o, nusa plele nia rejiaun Juda. Erek mak Elimeleke si surik hnauk si aldeia, si kla'a kmia te ose da nia nusa Moabe, nia metak Jordaun ni parte lea nahnotu. 3Masik nia aro'o Elimeleke nati, nati tati ni sa norok ni ana sia tatoek. 4Kuandu anana ai para'ik, si sa roro likmori nai nusa Moabe. Malon sa hahata hea ngai Rut. Kilion sa hahata hea ngai Orpa. Masik kuandu si kmia aro'o pa rengak raik too sangulu li, 5Noemi ni ana parani haruak erek moso kmati. Si kmati tati si ina tatoek - parani hea taik, ana taik, pau-hree moso taik.
Noemi norok Rut hrali alik la'a Belem
6Kuandu Noemi nia hnauk nusa Moabe, ni tilu du'a, "Opuna'i nahnunuk Ni likmori nia rejiaun Juda, nia aro'o rara'a pa nia alik." Oierek apu hahata norok ni apu heru haruak souk sanga lalaak hira-hirak atu surik hnauk nusa Moabe rodi hrali alik la'a Noemi ni ruma nia ni nusa doi. 7Siteluk pa kla'a surik hnauk apu hahata ni ruma nia nusa Moabe, si sole do'i rala rahrali alik la'a rejiaun Juda.
8Masik kuandu si sole pana hnauk, Noemi du'a la'a ni apu heru haruak du'a, "Oihleu ari'a! Ia li miruak hrali alik hleu la'a mi ina sia. Tanba mi pa tinak mi rala aia la'a a'u ana manei pa kakmati, norok ma a'u. Erek mak a'u setik la'a Opuna'i para tinak Ni rala aia la'a miruak. 9Surik Ni neek la'a miruak parani seuk manei mak rala aia, oierek mi bele kmori roro hakmatik." Noemi kamuk soruk pisu siruak, sia moso kua hahuuk.
10Masik siruak tara, "Taik, inakai! Ami karak do'i hleu inakai, ti kmori rahmutu roro inakai ni likmori."
11Masik Noemi tara, "A'u ana manei mak a'u hahadomi! Aia li mi hrali hleu! Te nia heli hea, se mi do'i a'u. A'u pa ho'ik, a'u sei te sehu tera ana parani para nahrau-hngirua sa roro mi. 12Mezmu miruak pa nahngesa a'u ana doi, masik ia li miruak pa hrali alik hleu. Tanba a'u pa ho'ik, erek mak mi te rahnunuk kai du'a a'u sei sa alik. A'u doi te mahnunuk tera nene erek. Se matahengi ri'a, a'u sa i sehu ana parani hei tera, mi rahnunuk oilalaak? 13Mi rahnunuk atu knari raik anana ai ra'ik soruk mi sa roro sia? Taik! Te roi mak mi te knari tera, soruk mi pa sa roro munak likmori seuk. Erek susar, mouk iak taik? Masik a'u rala susar i peuk li mi. Tanba a'u sinti Opuna'i doi mak kastigu a'u. Oierek ia li mi te sanga do'i tera a'u.
14Soruk siteluk kua hahuuk tera. Orpa pisu ni apu hahata soruk ni pa hnali. Masik Rut kamuk nama ni apu hahata.
15Noemi du'a la'a ni, "Matak la'a! O proe pa hnali alik la'a ni likmori norok ni lalaak hira-hirak laluli. Noilalaak mak o te hmali mahmutu moro ni?"
16Masik Rut tara,
"Te naree kai, masik inakai te titik hmali kai a'u.
Inakai te obriga kai a'u la'a surik hnauk inakai tatoek.
Tanba a'u karak mori do'i mahmutu nahatik moro inakai.
Inakai la'a manei, a'u moso ti.
Inakai mia manei, a'u moso mia aro'o.
Inakai ni likmori sei sai mos a'u likmori.
Inakai ni Opuna'i sei sai mos a'u Opuna'i.
17Nahrau-hngirua inakai mati nia manei, a'u moso sei mati nia aro'o.
Likmori tana inakai nia manei, likmori moso sei tana a'u nia aro'o.
Opuna'i sei kastigu a'u,
se a'u haketak nai inakai.
Sok mati hleu mak haketak ita kuak."
18Kuandu Noemi natak Rut karak nunu do'i ni, ni te naklungu tera.
19Siruak sole nahatik, kraik nia aldeia Belem.
Kuandu hahata haruak erek kraik nia aro'o, likmori nahula-nahula admira roro sia. Hahata-hata kakmia aldeia aro'o rasetik rook du'a, "Erek inakai Noemi, iak?"
20Masik ni tara la'a sia du'a,
"Mi te sanga ngauk tera kai a'u Noemi,
tan ngai hea Noemi erek du'a de 'rala hakmatik'.
Ia li mi ngauk a'u Mara,
tan ngai hea Mara erek du'a de, 'rala peuk'.
Tanba Opuna'i manei Huk Isi Nunu pa noi a'u mamori sai peuk lo.
21Mamuna, a'u sai nai ari'a,
norok lima manei papenu, a'u nia sa norok ana haruak.
Masik agora Opuna'i si'a hnali alik a'u,
norok lima tarala.
Oierek, noilalaak mak mi ngauk a'u 'Noemi',
se Opuna'i kastigu a'u?
Tanba Ni mak Huk Isi Nunu.
Ni mak titik paperak ma a'u."
22Hea ri'a mak istori kuandu Noemi hnali alik nai nusa Moabe norok ni apu Rut, likmori Moabe. Siruak kraik nia Belem, natook nia tempu kakreuk trigu.
Wycliffe Timor-Leste © 2025 Wycliffe Bible Translators Inc