कुलवानकु.कामि 16
16
तीमुथियुस ता पाउलुस अरो सिलास लोः एनाय
1पाउलुस दिरबे चट्टी अरो लुसतरा दिसुम तेबाःएनाय। ओन्डो तिमुथियुस लुतूम मिहोर चेला तहिकेनाय, जे उनी रिई एंगातेः जहुदी जाइत अरो मसी बिसवासी तहिकेनाय अरो आपु तेः जूनानी तहिकेनाय। 2लुसतरा दिसुम अरो इकोनियुम चट्टी रेन बिसवासी बोयहा-मिसी ता गाम्मेताकु चि उनी बेचोट नामी होर हेकेय। 3पाउलुस चहाः केनाय चि तीमुथियुस के आच लोः इदियाय। इनाते उनी ता तीमुथियुस रआ खतना इरीवेःकुवाय चिलिमेनचि उना पोरदेस रे तहीःवन सुबिन जहुदिकु सारी केनाकु चि उनी रिई आपु तेः जूनानी तहिकेनाय। 4उनकु चट्टी-चट्टी सेन केते ओन्डो रेन बिसवासिकु के जरुसलेम रे कुलवानकु अरो एगवाकु दोवासते ठहराव वनाः नियम ता मनाव रआ हुकूम एमाकुकन केनाकु। 5इना लेका कलीसिया रेन बिसवासिकु बिसवास रे मजगुत इदी एनाकु अरो गिनती रे रोज बड़हाव इदिएनाकु।
तोरोआस रे पाउलुस रआ दरसन
6उनकु फुरगिया दिसुम गलातिया दिसुम रे एते होयकेते तोराकुवा, चिलिमेनचि पबितर रावा ता उनकु के एसिया दिसुम रे बचन उदुः कथिर रोकाव वेःकुवाय। 7उनकु ता मूसिया पोरदेस रआ हेनात तेबाः केते, बिथुनिया रे सिनुः कथिर चहावेनाकु, मुदा ईसु रआ रावा ता उनकु के काय सेन इरीवाःकुवाय। 8इनाते उनकु मूसिया पारोम केते तोरोआस हेच्चेनाकु। 9ओन्डो पाउलुस ता निदा मियाः दरसन नेल्लेताय चि मिहोर मकिदुनिया रिई होर उनी रआ लहा केते नुवां गोहराव एयकेनाय, “आम समुदर पारोम केते मकिदुनिया हिजुःमी अरो आले के देंगा लेम।” 10नुवां दरसन तयनोम आले नुवां सोमझाव केते एनेन गी मकिदुनिया सिनुः रआ चहाव एनाले चि परमेसर ता ओन्डो बुगिन खभेर ओनाव इरी कथिर अबुनके होहो एकाःबुनाय।
फिलिप्पी रे लुदिया रआ हिरदय बदलाव वोः
11तोरोआस एते सेन केते आले दाः जहाज रे सोझे सुमातरा रआ टापू, अरो एटाः हिलोः नेआपोलिस रे हेच्चेनाले 12ओन्डो एते आले फिलिपी तेबाः एनाले, जे मकिदुनिया राइज रआ इलाका रआ मुध चट्टी अरो रोमिकु रआ हातु हेके, अरो आले उना चट्टी रे आधा हिलोः तक तहिकेनाले। 13जिराः हिलोः आले चट्टी रआ दुवेर बहरी, गाड़ा रआ आतोम तोरालेया चिलिमेनचि नुवां सोमझाव एनाले चि ओन्डो पराथना ठांव हेनाःआं। ओन्डो दुरुप केते उनकु एराकु जे जमा केनाकु, नधनी हेलावेनाकु, 14ओनाव वन एराकु रे मिहोर रआ लुतूम लुदिया तहिकेना अरो उनी थुवातीरा चट्टी रिई तहीःवनीः तहिकेनाय। उनी कुदा रंग रआ किचरीः अखरीञ वनीः अरो परमेसर रिई भक्त तहिकेनाय। परभु ता उनी रआ हिरदय राड़ा तय अरो उनी पाउलुस रआ सिख गरहन एताय। 15उनी अरो उनी रेन घराना बतिसमा अगुवेताकु दो उनी ता आले के गोहराव वेःलेयाय चि, जदि अपे इञ के परभु रिई बिसवासी सोमझाः कन रेदोपे, सेन केते इञ रआ ओड़ाः रे तहीःपे अरो उनी आले के मनाव केते इदी वेःलेयाय।
पाउलुस अरो सिलास जेहेल ओड़ाः रे
16जोब आले पराथना ठांव सिनुः केनाले चि मिहोर कोम उमेर वनीः धंगरीन आले लोः नपाम्मेनाय। उनी रे डेलया नेनेल वनीः मुवां रावा तहिकेनाय, अरो हिजुः आनाः गानाम उदुः-उदुः केते आचरेन मुवार कथिर बेचोट कामि अगुइ केनाय। 17उनी पाउलुस अरो आले लोः तयनोम-तयनोम सेन केते हकवा चित तहीः केनाय, “नोंकु सुबिन एते परमपरधान परमेसर रेन बन्धुवा हेकेकु अरो अपे के उद्धार रआ होरा उदुः कनाकु।” 18उनी बेचोट हिलोः तक नुंका गी कराव चित तहिकेनाय मुदा पाउलुस कदरावेनाय, अरो नेल रुवाड़ केते उनी रावा के मेताःदेयाय, “इञ आम के ईसु मसी रआ लुतूम एते हुकूम एमम कनिञ चि उनी एते उडुङ जोनमी।” अरो उनी इमिताः गी उडुङ एनाय। 19जोब उनी रेन मुवार ता नेल्लेताकु चि आले रआ कामि अगुइ केनाय उना रआ आसरा तोराःआ, दो उनकु पाउलुस अरो सिलास के साप केते चबुतारा रे अधिकारिकु ठिनुः इदी वेःकिनाकु। 20उनकु ता पाउलुस अरो सिलास के नेयाय एएमकु रआ लहा रे तिंगु वेःकिनाकु अरो गाम्मेताकु, “नुकिन होर आले रआ चट्टी रे हलचल मचाव कनाकिन। नुकिन जहुदी हेकेकिन 21अरो नुंकन रिति उदुःकानाकिन, जे गरहन कराव चाहे उना रे सेसेन, अबुन रोमन रेन कथिर उचित बनुःआं।” 22उनकिन रआ बिरोध रे बेचोट होर जमा एनाकु। तोब नेयाय एएमकु ता किचरीः अरगु इरिकेते उनकिन के कोड़रा एते सोड़ेच कथिर हुकूम एमाःकुवाकु 23उनकु ता पाउलुस अरो सिलास के बेचोट रु इरीवेःकुवाकु अरो जेहेल ओड़ाः रे पहरा एएम वनकु के बेचोट चेम्पोर एते उनकिन के नेल-अतेन कथिर हुकूम एम केते उनकिन के जेहेल ओड़ाः रे सन्जो इरी वेःकिनाकु। 24जेहेल ओड़ाः रेन नेल-अतेन वनकु ता नुंकन हुकूम नाम केते उनकिन के भीतरी जेहेल ओड़ाः रे दोहो वेःकिनाकु अरो उनकिन रआ बका खुन्टा रे सकत एते तोल काःकिनाकु।
पाउलुस अरो सिलास के जेहेल ओड़ाः एते छोड़ाः
25आधा निदा रआ लगेभगे पाउलुस अरो सिलास पराथनाय केनाकिन अरो परमेसर रआ भोजोन सिरिञ एकेनाकिन, अरो जेहेल ओड़ाः रेन पहरा एएम वनीः ता उनकिन रआ ओनाव वेकेनाय। 26इमिताः गी अचाका मरंग भुइडोल हेच्चेना, नोन्डो तक चि जेहेल ओड़ाः रआ नेव हिलावेना, अरो एनेन गी अरो सुबिन दुवेर निच्चेना, अरो सुबिन होर के तोल लेःकुवाकु उना रड़ाना। 27पहरा एएम वनीः ता चेहाव बिरीतेनाय अरो जेहेल ओड़ाः रआ दुवेर निच नेल केते पहरा एएम वनीः ता सोमझाव एनाय चि जेहेल रे बोंध वनकु ता निर एनाकु, मेनताय “आर उनी तलवाइर ओर केते आच-आच तिगी गेत गोजुः कथिर ओःकेनाय।” 28मुदा पाउलुस ता जोर राव एते होहो केते गामवादेयाय, “अपन एते ओलोम गेत गोजुःआ, चिलिमेनचि आले सुबिन नोन्डो गियाले।” 29तोब जेहेल ओड़ाः रे पहरा वनीः डीबरी अगु इरीवेःकुवाय अरो भीतरी निर इदिकेते थड़थड़ाः वते पाउलुस अरो सिलास रआ बका ठिनुः उकरुम एनाय। 30उनी ता उनकिन के टांड़ी इदिकेते मेताःकिनाय, “हुजूर उद्धार ननाम कथिर इञ चिलियिञ?” 31उनकिन ता जबाब एमाःदेयाकिन, “आम परभु ईसु रे बिसवास एम, दो आम रआ अरो आमरेन ओड़ाः रेन उद्धार नाम्माकु।” 32इना तयनोम उनकिन, जेहेल ओड़ाः नेल-अतेन वनीः अरो उनी रेन सुबिन मुवार रेन के परमेसर रआ बचन उदुःवाःकुवाकिन। 33उनी ता निदा इमिताः गी उनकिन के इदिकेते उनकिन रआ घाव चपिएताय। अरो उनी अरो आचरेन सुबिन होर इमिताः गी बतिसमा अगुएताकु। 34तोब उनी ता पाउलुस अरो सिलास के अकु ठिनुः इदिकेते जोजोम वनाः खियाव वेःकिनाकु अरो आचरेन ओड़ाः रेन लोः आनाद मनावेताकु, चिलिमेनचि उनकु ता परमेसर रे बिसवास एताकु। 35जोब अंगाना रे नेयाय एएमकु ता सिपाहिकु के गाम कुल एताकु चि उनकिन होर के आड़ाः ककिनपे। 36दरोगा ता नुवां गानाम पाउलुस के गामवादेयाय, “नेयाय एएमकु ता अबेन के आड़ाः कथिर हुकूम कुल एकाःआकु। इनाते निमीः बहरी उडुङ केते सांति ते सेन जोनबेन।” 37मुदा पाउलुस ता सिपाही के गाम वाःकुवाय, “अपे ता अलिञ के जे रोमन रेन होर हेकेलिञ बिना दोसी ठहराव होर रआ लहा रे रुवेः लिञापे अरो जेहेल ओड़ाः रे सन्जो वेःलिञापे। निमीः चिलिमेन अलिञ के हपे-हपे एते उडुङलिञ कनापे? नुंका बङा, अपे नेयाय एएम वन गी खुद हेच केते उडुङ लिञकाकु।” 38सिपाहिकु ता नुवां गानाम नेयाय एएमकु के गामवाःकुवाकु, अरो उनकु नुवां अयुम केते पाउलुस अरो सिलास रोमन रेन हेकेकिन, मेन एते बोरोताकु, 39उनकु ता हेचकेते माफि कोय्येताकु अरो उनकिन के जेहेल ओड़ाः एते टांड़ी इदिकेते गोहराव वेःकिनाकु चि उनकिन नुवां चट्टी बागी केते सेन जोन ककिन। 40पाउलुस अरो सिलास जेहेल ओड़ाः एते उडुङ केते लुदिया रआ ओड़ाः तोराकिना। उनकिन बिसवासी बोयहा-मिसी लोः नपाम एनाकिन अरो उनकु के डिढ़ एम केते तोराकिना।
נבחרו כעת:
कुलवानकु.कामि 16: BIY
הדגשה
העתק
השווה
שתפו
רוצים לשמור את ההדגשות שלכם בכל המכשירים שלכם? הירשמו או היכנסו
© 2023 NLCI CC BY-NC-ND 4.0