कुलवानकु.कामि 2
2
पिन्तीकुस्त रआ हिलोः पबितर रावा अरगुः
1 #
लेवी 23:15–21; नियम 16:9–11 जोब पिन्तीकुस्त#2:1 पिन्तीकुस्त पसका पोरोब रआ तयनोम (पचासवां हिलोः)। , हिलोः हेच्चेना, दो सुबिन बिसवासी मीः ठिनुः हुन्डी एनाकु, 2दो अचाका आंधी लेका सड़साड़ाव साड़ी सिरमा एते ओनावेना अरो गोटा ओड़ाः जे ठिनुः उनकु दुरुप केनाकु गुंजगुंजावेना। 3अरो उनकु ता सेंगेल लेका हटिंञ वते अलांङ नेल एताकु अरो उनकु हरेक होर रे हेच समावेना। 4अरो उनकु सुबिन पबितर रावा एते पेड़ेच्चेनाकु, अरो जे लेका रावा ता उनकु के गापाम रआ सोमोर्थ एमाःकुवाय, उनकु एटाः-एटाः भाखा एते गापाम हेलावेनाकु। 5अरो इमिन रे दुनिया रेन सुबिन जाइत एते हेच वन अरो धरमी जहुदी होर जरुसलेम रे तहीः केनाकु। 6बेचोट एते होर नुवां साड़ी ओनाव केते जमा एनाकु। चेलाकु उनकु रआ रकमे-रकम रआ भाखा रे नधनिइ केनाकु उना ओनाव केते उनकु चकित एनाकु। 7उनकु बेचोट भोय एनाकु आर चकरीत केते गापाम हेलावेनाकु, “चिलका नोकु गापामवान सुबिन गलील रेन तहीःवन बङ कानकु 8दो अरो अबु रे एते सुबिन होर अपन-अपन जनम ठांव रआ भाखा चिलका गापाम कनाकु? 9ओन्डो पारथी, मेदी अरो एलामिती, मेसोपोतामिया, जहुदिया पोरदेस अरो कपदुकिया, पुन्तुस अरो एसिया। 10फुरगिया अरो पमफुलिया, मिसर अरो लीबिया दिसुम जे कुरेने रआ आसे-पासे गिया, नियां सुबिन दिसुम रेन तहीःवन अरो रोमन रेन हेचवान, 11चिलि जहुदी चिलि जहुदी धरम मनाव वान, केरेते टापू रेन अरो अरबी रेन हों मेनाकुवा। मुदा सुबिन अपन-अपन भाखा रे उनकु एते परमेसर रआ महान कामि रआ चरचा अयुम कनाकु” 12अरो उनकु सुबिन चकरीत एनाकु, अरो कोकाव केते अकु-अकु गापाम हेलावेनाकु चि नुवां चिलका होयुः काना? 13मुदा अरो ता लेचेड़-लेचेड़ गापाम हेलावेनाकु, चि उनकु दो नवां आरखी रआ बुल रे मेनाःकुवा।
पतरस रआ भासान
14उनकु बारहों रे एते पतरस ता तिंगु केते होरकु के जोड़ राव एते उदुः हेलावेनाय चि ए जहुदिया अरो ए जरुसलेम रेन सुबिन तहीः इकु, अपे इञ रआ गानाम धेयान एते ओनावेपे, अरो नुवां सारी केपे चि 15जे लेका अपे सोमझाः कनापे, नोकु मतवारी रे बनुः कुवा चिलिमेनचि निमीः दो सिंगी रआ नौ गी बजाव एकाना 16लिकिन नुवां उना गानाम कानाः, जेकर बबेत रे परमेसर सोझ एते नधनी वनीः जोवेल ता मेनएकाःआय,
17 #
जोवे 2:28–32
परमेसर गाम कनाय चि मुडूः रआ हिलोः रे नुंका होयुःआ चि इञ अपन रावा सुबिन मनवाकु रे अरगुयिञ
अरो अपे रेन होपोन हेरेल
अरो अपे रेन होपोन एरा आगमजानियाकु
अरो अपे रेन धिंगाला दरसन नेल्लाकु
अरो अपे रेन मुधकु कुकमु याकु
18इञ उना हिलोः अपन बन्धुवा
अरो धंगरीन रे अपन रावा अरगुयिञ
अरो उनकु आगमजानी याकु
19अरो इञ चेतान सिरमा रे चकरीत कामि
अरो लतार ओते रे चिनहा बङ रेदो मयम,
अरो सेंगेल अरो सुकूल रआ रिम्बील नेल इरीपिञ।
20परभु रआ महान,
अरो मसकल हिलोः हिजुः एते पहिल सिंगी बोंगा लुबाः
अरो निदा बोंगा मयम लेका नोःओय।
21अरो जे परभु रआ लुतूम अगुयाय उनी उद्धार नमाय।
22ए इसराइलिकु इञ रआ गानाम ओनावेपे, अपे खुद सारी कनापे चि परमेसर नासरत लुतूम चट्टी रिई ईसु रआ दोवासते सोमोर्थ कामि अरो चकरीत कामि अरो चिनहा-चकरीत कामि कराव लाःआय। नुवां कामि रआ दोवासते परमेसर नुवां सबिद एताय चि परमेसर खुद ईसु मसी के कुल एकाःदेयाय। 23#मती 27:35; मर 15:24; लूका 23:33; जोह 19:18इनी ईसु के जे परमेसर रआ ठहराव वनाः जोजना अरो पहिल रआ गेयान रआ मोताबिक साप इरीएदेयाकु, दो अपे ता अधरमिकु रआ ती एते उनी के कुरुस रे रकाप केते, गोजेः देयापे। 24#मती 28:5,6; मर 16:6; लूका 24:5मुदा इनी किगी परमेसर ता गोनोच रआ तोनोल एते छोड़ाव केते जुवेतेदेयाय, चिलिमेनचि गोनोच ईसु के अपन कबजा रे काय दोहो दड़िवादेयाय। 25#सिरिञ 16:8–11चिलिमेनचि उनी रआ बबेत रे दाऊद नुवां गाम कनाय,
परभु सोबदिन इञ ठिनुः तहीः कनाय।
उनी इञ रआ जोम ती सोझ रे हेनाया, इनाते इञ डिढ़गर बाय तहीः कनिञ।
26इञ रआ हिरदय अनादित हेनाःआं,
इञ रआ गानाम खुसी एते पेड़ेच एकाना,
इञ रआ होड़मो आसरा रे बाय तहिनोःओ।
27चिलिमेनचि आम इञ रआ जीव ता अधोलोक रे कम बगिया
अरो ना आम रिई पबितर होर के सेया इरीवायाम।
28आम इञ के जीवन रआ होरा उदुः एकावादेञाम,
अरो आम रआ तहीः एते इञ के आनाद एते पेड़ेच कञाम।
29ए बिसवासी बोयहा-मिसी इञ कुलपति दाऊद रआ बबेत रे अपे एते डिढ़ केते नुवां गाम दड़िवाःइञ चि उनी गोच्चेनाय अरो मरघाटी रे तोपा एदेयाकु। उनी रआ मरघाटी निमीः तक अबु रआ ताला रे हेनाःआं, 30#सिरिञ 132:11; 2 समु 7:12,13दाऊद मिहोर परमेसर सोझ एते नधनी वनीः तहिकेनाय, अरो उनी सारीकेनाय चि परमेसर उनी एते चिलि किरया जोम लाःआय, चि इञ अपे रआ बोंस रे एते मिहोर के राइज गदी रे दुरुपिञ। 31इनाते उनी ता आगमजानी होयुः रआ नाते, हिजुः हिलोः रे होयुः वनीः, मसी रआ जुवेत बिरीत ता नेल्लेताय
अरो दाऊद रआ बबेत रे मेन्नेताय चि उनी अधोलोक रे काय बागी केनाय
अरो उनी रआ होड़मो काय सेया इरीवाताय।
32नेय ईसु के परमेसर ता गोच रे एते जुवेत बिरीत लेदेयाय, अबु नुवां गानाम रआ गोवाही हेकेबुन। 33इना लेका परमेसर रआ जोम ती एते सुबिन एते मरंग पद नाम केते अरो आपु एते वादा वनाः पबितर रावा नाम केते, अबुन के एम एकावाःबुनाय, जे अपे नेल कनापे अरो ओनाव कनापे। 34-35#सिरिञ 110:1दाऊद आच एते सोवाराग काय सेन एकानाय,
मुदा उनकु गाम कनाकु परभु ता इञ रिई परभु एते गाम्मेताय,
आम तोब तक इञ रआ जोम ती दुरुप एकानोःमी,
जोब तक इञ आमरेन बइरिकु के आम रआ कबजा रे कइञ कुवा।
36इनाते इसराइल रेन सुबिन घराना नुवां निचित सारी केपे चि ईसु जे के अपे ता कुरुस रे रकाप एदेयापे, उनी किगी परमेसर ता परभु अरो मसी बयेःदेयाय। 37तोब अयुम वनकु रआ हिरदय पेघलावेना, अरो उनकु, पतरस अरो एटाः कुलवानकु के कुली हेलावेनाकु, “दो ए बिसवासी बोयहा-मिसी अबु चिलियाबु?” 38पतरस उनकु के गामवाःकुवाय, अपे रे एते सुबिन मोन रुवाड़ेपे, अरो अपे सुबिन होर अपन-अपन पाप रआ छमा कथिर ईसु मसी रआ लुतूम एते बतिसमा अगुइपे, दो अपे पबितर रावा रआ दान नम्मापे। 39चिलिमेनचि नुवां वादा, अपे अरो अपे रेन बोंस, अरो उनकु सुबिन संगिञ-संगिञ रेन होरकु कथिर हों हेनाःआं जे के परभु अबु रिई परमेसर आच ठिनुः होहोकुवाय। 40उनी ता बेचोट अरो गानाम एते हों गोवाही एम-एम केते सोमझाव वेःकुवाय चि अपे के अपन तिगी नोकु पापी पीड़ही एते बनचाव वोःपे। 41जे पतरस रआ गानाम रे बिसवास एताकु, उनकु बतिसमा अगुवेताकु। उना हिलोः तीन हजार गन होर चेलाकु लोः मेसा एनाकु। 42अरो उनकु कुलवानकु एते सिख ननाम, अरो संगाति दोहो रे अरो परभु भोज रे अरो पराथना कथिर लवलीन तहीःपे।
बिसवासिकु रआ संगाति
43कुलवानकु रआ दोवासते बेचोट एते चिनहा अरो चकरीत कामि होयुः केना, इनाते सुबिन होर के भोय पेड़ेच्चेना, 44#कु.कामि 4:32–35अरो उनकु सुबिन बिसवास कराव वनकु मीः जुट तहीः केनाकु, अरो उनकु रआ सुबिन्नाः भागीदार तहिकेना। 45अरो उनकु अपन-अपन सम्पति अरो सामान अखरीञ अगु केते जेके, दरकार होयुः केना हटिञ एकेनाकु। 46अरो उनकु रोज हिलोः मीः मोन केते मरंग बिनती ओड़ाः रे जमाः केनाकु, अरो ओड़ाः-ओड़ाः रे परभु भोज एकेनाकु। अरो आनाद अरो मोन रआ इमान एते जोजोम वनाः हटिञ जोम एकेनाकु। 47अरो परमेसर रआ इसतुतिइ केनाकु, अरो सुबिन होर उनी एते खुस तहीः केनाकु, अरो जे उद्धार नाम एकेनाकु, उनकु के परभु रोज हिलोः उनकु रे मेसा कुकनकेनाय।
נבחרו כעת:
कुलवानकु.कामि 2: BIY
הדגשה
העתק
השווה
שתפו
רוצים לשמור את ההדגשות שלכם בכל המכשירים שלכם? הירשמו או היכנסו
© 2023 NLCI CC BY-NC-ND 4.0