जोहन 10
10
गोरखीइकु अरो भेड़िकु रआ कहनी
1“इञ अपे के सच गामवापे कनिञ जे दुवेर एते भेड़ी गोहार ओड़ाः रे काकु बोलोः काना मुदा एटाः सोझ एते देच केते बोलोः कनाकु उनकु डाकुत अरो कुमरु हेकेकु। 2जे दुवेर एते बोलोः कनाय, इनिगी भेड़िकु के गोरखीवानीः हेकेय। 3दुवेर रे पहरावानीः उनकु कथिर दुवेर निचवाकुकानाय अरो भेड़ी उनी रआ राव पछनाव कनाकु, अरो उनी अपन भेड़ी के लुतूम अगु केते होहो कुकानाय अरो उनकु के टांड़ी इदी कुकानाय। 4अपन भेड़ी के टांड़ी उडुङ तयोम उनी उनकु रआ लहा-लहा सेन काय अरो भेड़ी उनी रआ तयोम-तयोम सेन कनाकु, चिलिमेनचि भेड़ी उनी रआ राव पछनाव कनाकु। 5भेड़ी अनचिनहार रआ तयोम-तयोम काकु सेसेन्ना बलकी उनी ठिनुः एते निर जोन्नाकु, चिलिमेनचि भेड़ी अनचिनहार रआ राव काकु पछनाव काना।” 6ईसु ता नुवां कहनी ओनाव वाःकुवय, मुदा उनकु काकु सोमझावकेना चि उनकु एते चिलिकाः गाम कनाय।
ईसु बुगिन गोरखीवानीः
7ईसु ता उनकु के अरो मेताःकुवय, इञ अपे के सच गामवापे कनिञ, चि भेड़ी गोहार ओड़ाः रिई दुवेर इञ हेकेञ। 8जे इञ एते पहिल हेच एकानाकु, उनकु सुबिन कुमरु अरो डाकुत हेकेकु, मुदा भेड़ी ता उनकु रआ काकु ओनाव, 9इञ गी दुवेर हेकेञ, जदि जहय इञ एते होय केते बोलोःआय दो, उद्धार नम्माय उनी बहरी-भीतरी हिजुः सिनुःआय अरो उनी चारा नमाय। 10कुमरु सिरीफ कुमरु अरो गोगोच कथिर हिजुः कनाकु, इञ इनाते हेच एकानिञ चि उनकु जीवन नाम्माकु बलकी भोरपुर जीवन नाम्माकु, 11“भला गोरखीवानीः इञ हेकेञ। भला गोरखीवानीः भेड़िकु कथिर अपन जीव एम कनाय। 12बेनहियार ना गोरखिवनकु हेकेकु अरो ना भेड़िकु रेन मुवार हेकेकु जोब हुंडरा के हिजुः नेल कुकानाकु, अरो भेड़िकु के बागी केते निर जोन कनाकु, हुंडरा, भेड़ी के रेच इदी जोन कनाकु अरो छितीर-बितीर कुकानाकु। 13बेनहियार निर जोन कनाकु, चिलिमेनचि उनकु दो बेनहींयार हेकेकु अरो उनकु के भेड़ी रआ जहन फिकिर बनुःआं। 14#मती 11:27; लूका 10:22बुगिन गोरखीवानीः इञ गी हेकेञ, जे लेका आपुञ इञ के सरिञ कनाय, अरो इञ आपुञ के सारीइ कनिञ, इञ अपन भेड़ी के सरिकुकानिञ, अरो इञ रेन भेड़ी इञ के सरिञ कनाकु। 15अरो इञ भेड़िकु कथिर अपन जीव एम कनिञ। 16इञ रेन अरो भेड़ी हेनाकुवा, जे नुवां गोहार ओड़ाः रेन बङ कनकु। इञ के उनकु केहों अगु जरुरेत हेनाःआं उनकु हों इञ रआ राव ओनावियाकु, तोब मियाः गी गोहड़ा होयुःआकु अरो मिहोर गी गोरखीवनीः होयुःआय। 17आपुञ इञ के इनाते दुलार एञकनाय चि इञ अपन जीव एम कनिञ, ताकि तयोम एते इञ उना अरो गरहानिञ। 18जहय इञ एते, इञ रआ जीव काकु रेच काना, इञ अपन तिगी सोंपाव कनिञ। इञ के अपन जीव सोंपाव कथिर अरो उना अरो अगु कथिर हक हेनाःआं। इञ के अपन आपुञ रआ सोझ एते नुवां हुकूम एम एकावादेञाय।”
19ईसु रआ नुवां बचन रआ चलते जहुदिकु रे फूट होय्येना। 20बेचोट एते होर गाम एकेनाकु, “ईसु रे मुवां रावा लगाव एकानाय, अरो उनी बालुः इचाय। अपे उनी रआ चिलिमेन ओनाव कनापे?” 21थोड़गन होर गाम एकेनाकु, “नुवां बचन मुवां रावा रआ बङ हेके। चिलि मुवां रावा अंधरा रआ मेत रड़ा दड़िवाःआय?”
ईसु रआ इनकार
22अरो जरुसलेम रे असथापना पोरोब मनाव एकेनाकु। जे रबंङ रआ समेय तहिकेना। 23ईसु मरंग बिनती ओड़ाः, सुलेमान लुतूम ढाबा रआ रे टहलाः केनाय, 24जहुदिकु ता ईसु के तुंदरा कदेयाकु अरो मेताःदेयाकु, “आम आले के मोन रे चिमीस तक दुबिधा रे दोहोलेयाम? जदि आम मसी हेकेम रेदो आले के सफा-सफा उदुःवालेम।” 25ईसु उनकु के जबाब एमाःकुवाय, “इञ अपे के उदुःवाःपिञ अरो कपे बिसवास काना, जे कामि इञ अपन आपुञ रआ लुतूम एते कराव कनिञ इनागी इञ रआ बबेत रे गोवाही एम कनाकु। 26मुदा अपे कपे बिसवास काना चिलिमेनचि अपे इञ रेन भेड़ी रे एते बङ कनपे। 27इञ रेन भेड़ी इञ रआ राव ओनाव कनाकु। इञ उनकु के सारी कुकानिञ अरो उनकु इञ रआ तयोम कोः कनाकु, 28इञ उनकु के का मुडूः जीवन एमा कुकानिञ, उनकु केहयो काकु नठाव ओःओ अरो उनकु के इञ ठिनुः एते जहय काकु रेजेञा। 29उनकु के, इञ रिई आपुञ, इञ कथिर एम एकावादेञाय, उनी सुबिन एते महान हेनाकुवा। उनकु के आपुञ एते जहय काय रेच दड़िवाकुवाय। 30इञ अरो आपुञ मीः अलिञ।” 31जहुदिकु ता ईसु के चपात कथिर दिड़ी सापएताकु। 32ईसु उनकु के मेताःकुवय, “इञ आपुञ रआ सोझ एते बेचोट भलाय कामि देखाव एकाःइञ। उना रे एते करा कामि रआ चलते अपे इञ के चपात कथिर वोः कनापे?” 33#लेवी 24:16जहुदिकु ता जबाब एमाःदेयाकु, “जहन बुगिन कामि कथिर बङा, बलकी परमेसर रआ निन्दा सिकेत कनाम इनाते आले आम के दिड़ी एते चपात कथिर वोः कनाले, चिलिमेनचि आम मनवां हेकेम अरो अपन के परमेसर बयुः कनाम।” 34#सिरिञ 82:6ईसु ता मेताःकुवय, “चिलि अपे रआ नियम रे नुवां का ओल एकाना, इञ मेताःकुञ अपे सुबिन ईसवर हेकेपे? 35नोन्डो परमेसर उनकु कथिर गाम एकाःआय, जेके परमेसर रआ संदेस एम एकाना। अरो परमेसर रआ बचन खंडुत का होय सकाःका। 36जेके परमेसर ता पबितर ठहराव केते दुनिया रे कुल एकाःदेयाय, अपे उनी के गामवाय कनापे चि परमेसर रआ निन्दाय कनाय, इनाते चि इञ गाम्मीतिञ, चि इञ परमेसर रिई होपोन हेरेल हेकेञ? 37जदि इञ अपन आपुञ रआ काइञ कामि कन रेदो इञ रे ओलोपे बिसवास इया। 38जदि इञ उना कराव कनिञ, दो इञ रे ओलोपे बिसवासिया, कोम से कोम उना कामि रिगी बिसवास एपे, ताकि अपे नुवां सारी केपे अरो सोमझाव कोःपे चि आपुञ इञ रेयाय अरो इञ आपुञ रे हेनाञा।” 39नियां रे उनकु ता ईसु के अरो सासप रआ उपाय एताकु, मुदा उनकु ठिनुः एते घसकाव एनाय।
40 #
जोह 1:28
ईसु जरदन गाड़ा रआ उना परोम उना ठांव तोराया, जे ठिनुः पहिल जोहन बतिसमा एमाकुकन केनाय, अरो एंडेगी तहीःहेलावेनाय 41बेचोट होर उनी ठिनुः हेच्चेनाकु, उनकु गाम एकेनाकु, “जोहन दो जहन चिनहा-चकरीत कामि काय देखाव लाःआय, मुदा ईसु रआ बबेत रे जहन्नाः गी गाम लाःआय, उना सुबिन सच उडुङएना।” 42अरो ओन्डो बेचोट एते होर ईसु रे बिसवास एताकु।
נבחרו כעת:
जोहन 10: BIY
הדגשה
העתק
השווה
שתפו
רוצים לשמור את ההדגשות שלכם בכל המכשירים שלכם? הירשמו או היכנסו
© 2023 NLCI CC BY-NC-ND 4.0