जोहन 4
4
ईसु अरो सामरी एरा
1फरीसिकु ता नुवां खभेर ओनाव एताकु चि ईसु जोहन एते ढेर चेला बाय कुकानाय अरो उनकु के बतिसमा एमाकुकानाय। 2(मुदा ईसु खुद बङा, बलकी उनी रेन चेला बतिसमा एमाकुकन केनाकु।) 3जोब ईसु के नियां पाता होय्येना। दो उनी जहुदिया पोरदेस बागी केते अरो मिसा गलील तोराया। 4ईसु के समरिया होय केते सिनुः तहिकेना, 5#एटे 33:19; जहुसू 24:32उनी सुखर लुतूम समरिया पोरदेस रआ मियाः चट्टी तेबाःएनाय, जे उना ओते रआ हेनात हेनाःआं, जे जाकूब ता अपन होपोन हेरेल जुसूफ के एमाःदेय केनाय। 6अरो ओन्डो जाकूब रआ डाड़ी हों तहिकेना, ईसु सेसेन-सेसेन थकाव एनाय, इनाते उनी डाड़ी ठिनुः दुरुप एनाय, इमिन रे दुपहरा होयुः केना। 7इमिताः गी मिहोर समरिया रिई एरा दाः इदी हेच्चेनाय, ईसु ता उनी के मेताःदेयाय, “इञ के नुनू कथिर दाः दान।” 8चिलिमेनचि ईसु रेन चेला दो चट्टी रे जोजोम अनाः किरीञ सेन केनाकु। 9#एज 4:1–5; नहे 4:1,2“जहुदी समरिया रेनकु लोः जहन रकम रआ बेवहार काकु दोहोय काना।” इनाते समरिया रिई एरा ता गामवादेयाय, “आम जहुदी होय केते इञ समरिया रिई एरा एते दाः चिलिमेन कोवेञ कनाम?” 10ईसु जबाब एमाःदेयय, “जदि आम परमेसर रआ बरदान ता सारीइ रेदोम होनङ अरो नुवां हों सरीयाम होनङ चि इञ के दाः नुनू कथिर दाः एमाञमी, गाम कनाय उनी ओकोय हेकेय, दो आम उनी के कोय केयाम होनङ, अरो उनी आम के जीवन रआ दाः एमामाय होनांङ।” 11एरा ता ईसु के मेताःदेयाय, “ए परभु डाड़ी एते दाः लुलू कथिर आम ठिनुः जहन्नाः हों बनुःआं, अरो डाड़ी गहिड़ा, दो आम के जीवन रआ दाः कारे एते नमुःआ? 12चिलि आम आले रिई आपु जाकूब एते हों महान हेनामा? उनी ता आले के नुवां डाड़ी एम एकावाःलेयाय। उनी खुद हों, उनी रेन होपोन हेरेल अरो उनी रेन भेड़ी अरो मेरोम हों उना डाड़ी एते दाः नुय केनाकु।” 13ईसु ता मेताःदेयाय, “जे नुवां दाः नुयाय, उनी के तेतांङ इया, 14मुदा जे इञ एम अनाः दाः नुयाय, उनी अरो केहयो काय तेतांङ वोःओय। जे दाः इञ उनी के एमायिञ, उना, उनी रे उना पझरा बयुःआ, जे का मुडूः जीवन तक अतुः चित तहिनोःओ।” 15नियां रे एरा ता मेताःदेयाय, “परभु! उना दाः इञ के एमाञमि, जेकर एते इञ अरो ओलोञ तेतांङ वोःका अरो इञ के नोन्डो दाः पेड़ेच कथिर ओलो हिजुः होयुःका।” 16ईसु ता उनी के मेताःदेयाय, “सेन केते अपन हेरेल के नोन्डो होहो अगुइमी।” 17एरा ता जबाब एमाःदेयय, “इञ रेन जहय हेरेल बनुः कुवा” ईसु ता उनी के मेताःदेयाय, “आम ठीक गी गाम कनाम चि इञ रेन जहय हेरेल बनुः कुवा। 18चिलिमेनचि आम पांच गो हेरेल बाय चुकाव एकाःकुवाम अरो जेकर लोः निमीः हेनामा, उनी हों आम रिई हेरेल बंङ हेकेय। नुवां आम सच गी गाम्मेताम।” 19एरा ता ईसु के मेताःदेयाय, “परभु! इञ सोमझाव निञ, आम परमेसर सोझ एते नधनी वनीः होर हेकेम। 20आले रेन पुरखा नियां टोंगरी रिगी आराधनाय केनाकु अरो अपे गाम कनापे चि जरुसलेम रे आराधना कराव चही।” 21ईसु ता उनी के मेताःदेयाय, “एरा! इञ आम के बिसवास एमाम कनिञ चि उना समेय हिजुःकाना, होर ना दो नियां टोंगरी रे परमेसर आबा रआ आराधनायपे अरो ना जरुसलेम रिगी। 22अपे जेकर आराधनाय कनापे, उनी के कपे सारीइकाना। आले जेकर आराधनाय कनाले, उनी के सारीइ कनाले, चिलिमेनचि उद्धार जहुदिकु एते गी हेनाःआं। 23मुदा उना समेय हिजुः काना, हेच एकन गिया, जोब सचा आराधना कराव वनकु, रावा अरो सचाय एते आपु रआ आराधना करावियाकु, आपु निंकन गी आराधना वनकु के चहाः कनाय। 24परमेसर रावा हेकेय, अरो आराधना कराव वनकु के रावा अरो सचाय एते गी आराधना कराव चही।” 25एरा ता मेताःदेयाय, “इञ सरिइकानिञ चि मसी, जे ईसु गमुः कनाय, हिजुः वनीः हेनाया। जोब उनी हिजुःआय, दो अबु के सुबिन्नाः उदुः वबुनाय।” 26ईसु ता उनी के मेताःदेयाय, “इञ, जे आम एते नधनिइ कनिञ, इनिगी हेकेञ।”
चेलाकु रआ रुवाड़ोः
27इमिन रिगी ईसु रेन चेला हेच्चेनाकु, अरो उनी के मिहोर एरा लोः नधनी वते नेल केते भक एनाकु, रेहों गी जहय जहन्नाः उनी के काकु गामवादेया, चि “आम चिलिकाः चहाः कनाम चाहे चिलिमेन उनी एते नधनिइ कनाम?” 28उनी एरा ता घेयला बागी केते चट्टी रे तोराया, अरो होरकु के उदुः हेलावेनाय, 29“हिजुःपे, मिहोर मनवां के नेलेयपे, जे ता सुबिन्नाः, जे इञ करावितिञ, उदुःएताय, चिलि नोय गी मसी दो बङ हेकेय?” 30इनाते उनकु चट्टी एते उडुङ केते ईसु लोः नपामवोः हेच्चेनाकु। 31इमिन रे उनी रेन चेला ईसु एते गोहराव हेलावेनाकु, चि “ए गुरु, जहन्नाः जोम कोःमि।” 32मुदा ईसु ता उनकु के मेताःकुवय, “इञ ठिनुः जोजोम कथिर नुंकन जोजोम अनाः हेनाःआं, उना अपे कपे सरिइ काना।” 33तोब चेला ता अकु-अकु रे गापाम हेलावेनाकु, “जहय उनी कथिर जहन्नाः जोजोम कथिर एम एकावादेयापे?” 34नियां रे ईसु ता उनकु के मेताःकुवय, “जे इञ के कुल एकाःदेञाय, उनी रआ हिछा एते सेसेन अरो उनी रआ कामि पुरा कराव गी इञ रआ जोजोम अनाः हेके। 35चिलि अपे नुवां कपे गाम काना चि, ‘निमीः हों इइर रआ चाइर मेहना गी समेय बनचाव एकाना?’ मुदा इञ अपे के मेतापेकानिञ, ‘बोहोः रिम केते नेलपे, उना इइर कथिर खेती जरोम चुकाव एकाना। 36इइर वनीः के गोनोंङ नमुः काना अरो का मुडूः जीवन कथिर फोल जमाय कनाय चि हेहेर वनीः अरो इइर वनीः बनार मीः केते आनाद मनाव दड़िवाःआकिन। 37चिलिमेनचि नोन्डो नुवां कहावत सचा ठहराः काना, चि मिहोर हेर कनाय अरो एटाः इनीः इर कनाय।’ 38इञ अपे के उना खेत इइर कथिर कुलेःपिञ, जेकर रे अपे कपे मेहनेत एकाःआ, एटाःइकु ता मेहनेत एकाःआकु अरो अपे उनकु रआ मेहनेत रआ फोल नाम कनापे।”
सामरी रेन होर रआ बिसवास कराव
39उनी एरा ता गोवाही एमाःकुकेनाय। ईसु ता उना सुबिन, जे इञ करावितिञ, उदुःएताय। इना चलते उना चट्टी रेन बेचोट एते समरिया रेनकु ता ईसु रे बिसवास एताकु। 40इनाते जोब उनकु समरिया रेन उनी ठिनुः हेच्चेनाकु, दो उनकु ता गोहराव एदेयाकु चि आम आले ठिनुः तहीःमी, तोब उनी बार हिलोः एंडेगी तहिएनाय। 41अरो ईसु रआ बचन अयुम केते बेचोट होर हों बिसवास एताकु। 42अरो उनकु ता उनी एरा के गामवादेयाकु, “निमीः आले आम रआ गागाम रआ चलते काले बिसवास काना। आले अपन तिगी ओनाव एकाःआले अरो आले सरिएताले चि उनी सरिगी दुनिया रिई उद्धार कराव वनीः हेकेय।”
राज पदाधिकारी रिई होपोन हेरेल के बुगी कराव
43उना बार हिलोः तयोम उनी ओन्डो एते उडुङ केते गलील पोरदेस रे तोराया। 44#मती 13:57; मर 6:4; लूका 4:24ईसु ता आच गी नुवां गोवाही एम लाःआय चि अपन दिसुम रे परमेसर सोझ एते नधनी वनीः इजात काय नाम कनाय। 45#जोह 2:23जोब उनी गलील तेबाःएनाय, दो होरकु उनी के सोवागत एदेयाकु, चिलिमेनचि जेतना कामि उनी जरुसलेम रे, पोरोब रआ समेय रे कराव लाःआय, उनकु ता उना सुबिन नेल लाःआकु, चिलिमेनचि उनकु हों पोरोब रे सेन केनाकु।
46 #
जोह 2:1–11
अरो उनी गलील रआ काना चट्टी रे तेबाःएनाय, जे ठिनुः उनी दाः ता अंगुर रास बाय लाःआय, इमिन रे कफरनहूम चट्टी रे मिहोर राजा रिई अधिकारी तहिकेनय, उनी रिई होपोन हेरेल हासु केनाय। 47जोब उनी अधिकारी ता ओनाव एताय चि ईसु जहुदिया पोरदेस एते गलील हेच एकानाय, दो उनी ईसु ठिनुः हेच्चेनाय, अरो उनी के गोहराव एदेयाय चि उनी सेन केते उनी रिई होपोन हेरेल के बुगियय चिलिमेनचि उनी गोजुः-गोजुः लेका केनाय। 48ईसु ता उनकु के मेताःकुवय, “अपे चिनहा अरो चकरीत कामि बिन नेलते कपे बिसवास इया।” 49नियां रे अधिकारी ता ईसु के मेताःदेयाय, “हुजूर! इञ रिई होपोन गोजुः एते पहिल देलांङ।” 50ईसु ता जबाब एमाःदेयय, “सिनुःमी, आम रिई होपोन हेरेल जुवेत गियाय।” उनी मनवां ईसु रआ गानाम ओनाव केते बिसवास एताय अरो तोराया। 51उनी होरा रिगी तहिकेनय चि उनी रेन बन्धुवाकु नपाम एनाकु अरो उनी के मेताःदेयाकु, “आम रिई धिंगाला जुवेत गियाय।” 52उनी ता बन्धुवाकु के कुलिवेःकुवाय चि उनी करा घरीक बुगिन ओः हेलावेनाय, धंगोरकु ता मेताःदेयाकु, चि “होला सिंगी रआ एक बजे उनी रआ रुवा अरगुवेना।” 53आपु तेः सरिएताय चि नुवां इना घरीक गी होय्येना। जे घरीक ईसु ता गाम लाःआय, आम रिई होपोन हेरेल जुवेत गियाय, उनी अरो उनी रेन सुबिन घराना बिसवास एताकु। 54नुवां ईसु रआ दुसरा चिनहा-चकरीत कामि तहिकेना जे ईसु ता जहुदिया पोरदेस एते गलील रे हेच केते देखाव लाःआय।
נבחרו כעת:
जोहन 4: BIY
הדגשה
העתק
השווה
שתפו
רוצים לשמור את ההדגשות שלכם בכל המכשירים שלכם? הירשמו או היכנסו
© 2023 NLCI CC BY-NC-ND 4.0