जोहन 6
6
पांच हजार हेरेल के खियाव
(मती 14:13–21; मरकुस 6:30–44; लूका 9:10–17)
1इना तयोम ईसु गलील रआ समुदर मनेकि तिबरियास समुदर रआ उना परोम तोराया। 2मियाः बेचोट भीड़ ईसु रआ तयोम एनाकु, चिलिमेनचि होर उना चिनहा-चकरीत कामि नेल लाःआकु, जे ईसु हासु इकु कथिर करावेकेनाय। 3ईसु टोंगरी रआ अखा रे रकाप्पेनाय अरो ओन्डो चेलाकु लोः दुरुप एनाय। 4जहुदिकु रआ पसका पोरोब हेनात गी तहिकेना। 5ईसु अपन बोहोः रिम केते नेलेःकुवाय, चि मरंग भीड़ आच ठिनुः हिजुः कनाकु, फिलिपुस के मेताःदेयाय, “नोकु के खियाव कथिर कारे एते पिठा किरीञियाबुन?” 6ईसु फिलिपुस के परीछा कथिर नुवां गानाम मेताःदेयाय, ईसु दो सारीइ केनगियाय चि इञ चिलियिञ। 7फिलिपुस ता ईसु के जबाब एमाःदेयाय, बार साव चांदी रआ टका#6:7 चांदी रआ टका मियाः चांदी रआ टका, मीः हिलोः रआ बेनहियार बराबोइर हेनाःआं। रआ पिठा हों नोकु कथिर का पुराव वोःओ, चि उनकु रे एते सुबिन होर कथिर मिमीःजङ होयुःआ। 8उनी रेन चेलाकु रे एते सिमोन पतरस रिई बोयहा अन्धरियास ता मेताःदेयाय, 9“नोन्डो मिहोर धिंगाला ठिनुः जाव रआ पांच गो पिठा अरो बरीया हाकु मेनाकिना, मुदा इमिनुः होर कथिर कारे होयुःआ।” 10ईसु ता मेताःकुवाय, “होर के दुरुपकुपे।” उना ठांव रे बेचोट घांस तहिकेना। होर के दुरुप काःकुवाकु। हेरेल रआ गिनती लगेभगे पांच हजार तहिकेनाकु। 11ईसु ता पिठा साप केते धेनयाबाद एताय अरो दुरुप वनकु के हटिञ वाःकुवाकु अरो जेतना उनकु चहाः केनाकु इमिनुः हटिञ वाःकुवाकु अरो उनी ता हाकु केहों इनका गी हटिञ इरीवेःकुवाय। 12जोब होर जोम केते बी एनाकु, दो ईसु ता अपन चेलाकु के मेताःकुवाय, “बनचाव वनाः खेचाः जमायपे, जेकर एते मीः खेचाः हों ओलो बरबादोःका।” 13इनाते चेलाकु ता हविर केते जामा एताकु अरो उना पिठा खेचाः ता बारो खन्ची होय्येना, जे होर जोम तयोम जाव रआ पांच गो पिठा एते बनचाव केना। 14होर ईसु रआ नुवां चिनहा-चकरीत कामि नेल केते गाम्मेताकु, “निचित गी नोय उनी परमेसर सोझ एते नधनी वनीः हेकेय, जे दुनिया रे हिजुः वनीः हेनाया।”
15ईसु सोमझावेनाय चि उनकु हेच केते इञ के राजा बबाय कथिर सापएदेञाकु, इनाते उनी अरो एकला गी टोंगरी रे तोराया।
ईसु दाः रे सेन कनाय
(मती 14:22–33; मरकुस 6:45–52)
16अयुप वोः बेरा चेलाकु ता समुदर रआ अतोम हेच्चेनाकु। 17उनकु डोंगा रे देच केते कफरनहूम चट्टी सोझ समुदर परोम वोः केनाकु। अरो लुबाः एना अरो ईसु निमीः तक एते हों उनकु ठिनुः काय हेच केनाय। 18अरो आंधी रआ चलते समुदर रे बेचोट जोड़ एते हेलको बिरीत वोःहेलावेना। 19जोब उनकु डोंगा चलाव-चलाव बार कोस लगेभगे तोराकुवा, दो चेलाकु ता ईसु के समुदर रे सेसेन वते, डोंगा रआ हेनात हिजुः वते नेलेःदेयाकु, अरो बोरो वनाकु। 20मुदा ईसु ता चेलाकु के मेताःकुवय, “इञ हेकेञ, ओलोपे बोरोया।” 21चेलाकु ता ईसु के खुसी एते डोंगा रे देजेःदेयाकु, एनेन गी डोंगा उना ठांव रे सेन तेबाःएना, जे ठिनुः चेलाकु के सिनुः तहिकेना।
ईसु के दंड़ा
22एटाः हिलोः जे होर समुदर रआ उना परोम तहिकेनाकु, उनकु ता नेल लाःआकु चि ओन्डो सिरीफ मियाः गी डोंगा तहिकेना अरो ईसु अपन चेलाकु लोः डोंगा रे काय देच केनाय, ईसु रेन चेलाकु एकला गी सेन केनाकु। 23एटाः हिलोः तिबरियास एते थोड़गन डोंगा उना ठांव ठिनुः हेच्चेना, जे ठिनुः परभु रआ धेनयाबाद एम तयोम होर पिठा जोम लाःआकु। 24जोब भीड़कु ता नेलेःकुवाकु चि ओन्डो ना दो ईसु हेनाया अरो ना उनी रेन चेला गी, दो उनकु डोंगा रे देच एनाकु अरो ईसु के दंड़ा कथिर कफरनहूम तोराकुवा।
जीवन रिई पिठा ईसु
25उनकु समुदर परोम एताकु अरो ईसु के एंडेगी नमेःदेयाकु, अरो मेताःदेयाकु, “गुरु! आम नोन्डो चिमिताः हेच्चेनाम?” 26ईसु ता जबाब एमाकुवाय, इञ अपे के सच मेतापे कनिञ, “अपे चिनहा-चकरीत कामि नेनेल रआ चलते इञ के कपे दंड़ाञ काना, बलकी इनाते चि अपे पिठा जोम केते बी केनापे। 27नास्सोः जोजोम अनाः कथिर बङा, मुदा उना जोजोम अनाः कथिर मेहनेत एपे, जे का मुडूः जीवन तक बाय तहीःकाना, जे मनवा रिई होपोन हेरेल अपे के एमापेयय, चिलिमेनचि आपु-परमेसर ता अपन मरका मनवा रिई होपोन हेरेल रे लगाव एकाःआय।” 28होर ता उनी के मेताःदेयाकु, “परमेसर रआ कामि कराव कथिर आले चिलियाले?” 29ईसु ता जबाब एमाकुवाय, “परमेसर रआ कामि नुवां हेके, चि जेके कुल एकाःदेयाय, उनी रे बिसवास एपे।” 30होरकु ता ईसु के मेताःदेयाकु, “आम आले के करा लेकन चिनहा-चकरीत कामि देखाव दड़िवालेयाम, जे नेल केते आले आम रे बिसवास इयाले, आम चिलि कामि देखावियाम?” 31#उठ 16:4,15; सिरिञ 78:24आले रेन पुरखाकु ता टोंगरी रे मन्ना जोम लाःआकु, जे लेका चि ओल एकाना, उनी ता जोजोम कथिर उनकु के सोवाराग एते पिठा एमाःकुवाय। 32ईसु ता जबाब एमाःकुवाय, “उनी मूसा काय तहिकेनाय, जे अपे के जोजोम कथिर सोवाराग एते पिठा एमाःपेकेनाय, मुदा नोय इञ रिई आपु हेकेय जे अपे के सोवाराग एते असली पिठा एमापेकानाय। 33परमेसर रआ पिठा दो उना हेके, जे सोवाराग एते अरगु केते दुनिया रेन होर के का मुडूः जीवन एमा कुकानाय।” 34होरकु ता ईसु के मेताःदेयाकु, “परभु! आम आले के सोबदिन इना पिठा गी एमालेम।” 35ईसु जबाब एमाःकुवाय, “जीवन रिई पिठा इञ गी हेकेञ, जे इञ ठिनुः हिजुःआकु, उनकु केहयो काकु रेगेंच ओःओ अरो जे इञ रे बिसवास कनाकु, उनकु केहयो काकु तेतांङ वोःओ। 36रेहों गी, जेलेका चि इञ अपे के मेताःपिञ, अपे इञ के नेल केते हों कपे बिसवास काना। 37आपुञ, जेके इञ कथिर सोंपव वाइञ कनाय, उनकु सुबिन इञ ठिनुः हिजुःआकु अरो जे इञ ठिनुः हिजुः कनाकु, इञ उनकु के केहयो काइञ ठोकराव कुवा, 38चिलिमेनचि इञ अपन हिछा एते बङा, बलकी जे इञ के कुल एकाःदेञाय, उनी रआ हिछा पुराव कथिर सोवाराग एते अरगु वेकानिञ। 39जे इञ के कुल एकाःदेञाय, उनी रआ हिछा नुवां हेके चि जेके उनी ता इञ कथिर सोंपव एकावादेञाय, इञ उनकु रे एते मिहोर केहों काइञ नठाव इरी वकुवा, बलकी उनकु सुबिन के मुडूः रआ हिलोः रे जुवेत बिरीत कुविञ। 40इञ रिई आपुञ रआ हिछा नुवां हेके चि जे होपोन हेरेल के चिनहाव केते उनी रे बिसवास कनाकु, उनकु का मुडूः जीवन नाम्माकु। इञ उनकु के मुडूः रआ हिलोः रे जुवेत बिरीत कुविञ।”
41ईसु ता गाम लाःआय, “सोवाराग एते अरगु वनाः पिठा इञ हेकेञ।” नियां रे जहुदी नुवां गाम केते कुड़कुड़ाः केनाकु, 42“चिलि नोय जुसूफ रिई होपोन हेरेल ईसु बङ कनीः? अबु नोय रेन एंगा-आपु के सारी कुकानाबु। दो नोय चिलका एते गाम दड़िवाःआय, इञ सोवाराग एते अरगु एकानिञ?” 43ईसु उनकु के जबाब एमाःकुवाय, “अपे-अपे रे ओलोपे कुड़कुड़ाव वोःओ। 44जहय इञ ठिनुः तोब तक काय हेच दड़िवाःआय, जोब तक चि आपुञ जे इञ के कुल एकाःदेञाय, उनकु के काय ओर लेकुवाय, इञ उनकु के मुडूः रआ हिलोः जुवेत बिरीत कुविञ। 45#जसा 54:13परमेसर सोझ एते नधनी वन ता ओल एकाःआकु, उनकु सुबिन के परमेसर सिखाव कुवाय। जे परमेसर रआ सिख ओनाव अरो उनी एते सिखाः कनाकु, उनकु इञ ठिनुः हिजुः कनाकु। 46नुवां ओलोपे सोमझाःआ चि जहय ता आपु के नेल एकाःदेयाय, जे परमेसर रआ सोझ एते हेच एकानाय, इनिगी आपु के नेल एकाःदेयाय। 47इञ अपे के सच मेतापे कनिञ, चि जे बिसवास कनाकु, उनकु का मुडूः जीवन नाम कनाकु। 48जीवन रिई पिठा इञ हेकेञ। 49अपे रेन आपु-आजाकु टोंगरी रे मन्ना जोम एताकु, रेहों गी उनकु गोच एनाकु। 50सोवाराग एते हेचवानाः पिठा नुंका हेनाःआं चि जदि जहय जोम्माकु दो काकु गोजुःआ। 51सोवाराग एते अरगु वनाः जीवन रआ पिठा इञ हेकेञ। जदि नियां पिठा जहय जोम्माकु, रेदो जुग-जुग जुवेत तही नोःओकु। अरो जे पिठा, इञ दुनिया रेन होर रआ जीवन कथिर एमाकुञ, उना इञ रआ जीलु हेके।”
52जहुदिकु अकु-अकु रे नुवां गाम वते रेनाटेटाः हेलावेनाकु, “अबु के जोजोम कथिर अपन जीलु चिलका एते एम दड़िवाबुनाय?” 53इनाते ईसु ता उनकु के गाम वाःकुवाय, “इञ अपे के सच मेतापे कनिञ, जदि अपे मनवा रिई होपोन हेरेल रआ जीलु कपे जोम्मा अरो उनी रआ मयम कपे नुयां, रेदो अपे रे जीवन बनुःआं। 54जे इञ रआ जीलु जोम कनाकु अरो इञ रआ मयम नुंय कनाकु, उनकु रआ गी का मुडूः जीवन हेके अरो इञ उनकु के मुडू हिलोः जुवेत बिरीत कुविञ, 55चिलिमेनचि इञ रआ जीलु सचा जोजोम अनाः जिनिस हेके अरो इञ रआ मयम असली गी नुनू वनाः जिनिस हेके। 56जे इञ रआ जीलु जोम कनाकु अरो इञ रआ मयम नुंय कनाकु, उनकु इञ रे बोसाव तहीः कनाकु, अरो इञ उनकु रे बोसाव वोःओञ। 57जे लेका जुवेत आपुञ ता इञ के कुल एकाःदेञाय अरो इञ आपुञ रआ चलते जुवेत हेनाञा, इना लेका गी जे इञ के जोमेञ कनाकु, उनकु इञ रआ चलते जुवेतोःओकु। 58नेयगी उना पिठा हेकेय, जे सोवाराग एते अरगु एकानाय। नुवां उना पिठा रआ बराबोइर बनुःआं, जे अपे रेन आपु-आजाकु ता जोम एताकु अरो गोच एनाकु, मुदा जे नुवां पिठा जोजोम चित तहिनाकु, उनकु जुग-जुग जुवेत तहिएनाकु।” 59ईसु ता कफरनहूम रआ बिनती ओड़ाः रे सिखाव कुकनकेनाय उना घरीक नुवां सुबिन गानाम गाम एताय।
का मुडूः जीवन रआ सिख
60ईसु रेन बेचोट एते चेलाकु ता नुवां गानाम ओनाव केते गामवादेयाकु, “नुवां सिख बेचोट मसकिल हेनाःआं, उना ओकोय मनाव दड़िवाःआय?” 61नुवां सारी केते चि इञ रेन चेलाकु नियां रे कुड़कुड़ाः कनाकु, ईसु ता उनकु के मेताःकुवय, “चिलि अपे के नुवां गानाम एते ठोकोरा नाम कनापे? 62जोब अपे मनवा रिई होपोन हेरेल के चेतान सोवारागदूत सिनुः नेलेयापे, जे ठिनुः उनी पहिल तहिकेनय, दो चिलिकाः होयुःआ? 63रावा गी जीवन एमुः कनाय, होड़मो एते जहन फयदा का होयुः काना, इञ अपे के जे बचन एम एकावाःपिञ, उना रावा अरो जीवन हेके। 64रेहों गी अपे रे एते बेचोट होर काकु बिसवास काना, चिलिमेनचि ईसु दो पहिल एते गी नुवां सरिइ केनाय चि ओकोय काकु बिसवास काना अरो इञ के ओकोय साप इरीञाय। 65ईसु ता मेताःकुवाय, इनाते इञ अपे के मेताःपिञ चि जहय इञ ठिनुः तोब तक काकु हेच दड़िवाःआ, जोब तक आपु एते उनी के बरदान का नाम एकाना।”
पतरस रआ बिसवास
66इना तयोम बेचोट एते चेलाकु जुदा एनाकु अरो केहयो उनकु ईसु लोः काकु सेन्नेता। 67इनाते ईसु ता बरहों चेलाकु के मेताःकुवय, “चिलि अपे हों सेन जोन चहाः कनापे?” 68#मती 16:16; मर 8:29; लूका 9:20सिमोन पतरस ता ईसु के जबाब एमाःदेयाय, “परभु! आले ओकोय ठिनुः सिनुःआले? का मुडूः जीवन रआ गानाम दो आम ठिनुः गी हेनाःआं। 69अरो आले बिसवास एताले अरो सारी एताले, चि परमेसर रिई पबितर होर आम गी हेकेम।” 70ईसु ता उनकु के जबाब एमाःकुवाय, “चिलि इञ अपे बारहों के कइञ सला एकाःपेया? रेहों गी अपे रे एते मिहोर सयतान हेनाया।” 71नुवां ईसु ता सिमोन इसकोरोती रिई होपोन हेरेल जहुदा रआ बबेत रे गाम्मेताय, चिलिमेनचि इनिगी बारहोंकु रे एते मिहोर तहिकेनाय।
נבחרו כעת:
जोहन 6: BIY
הדגשה
העתק
השווה
שתפו
רוצים לשמור את ההדגשות שלכם בכל המכשירים שלכם? הירשמו או היכנסו
© 2023 NLCI CC BY-NC-ND 4.0