जोहन 8
8
साप-जोटेत एरा के छमा
[ 1अरो ईसु जायतून टोंगरी रे तोराया 2ईसु बेचोट सेताः मरंग बिनती ओड़ाः रआ राचा रे हेच्चेनाय। सुबिन होर ईसु ठिनुः हेच्चेनाकु। अरो ईसु दुरुप केते होर के सिख एएम हेलावेनाय। 3उना घरीक धरम पोथी सिखाविकु अरो फरीसी, साप-जोटेत रे साप इनीः मिहोर एरा के अगुएदेयाकु अरो उनी के ताला रे तिंगु कदेयाकु। 4अरो उनकु ईसु के मेताःदेयाकु, “ए गुरु! नोय एरा के साप-जोटेत घरीक गी साप एकाःदेयाले। 5#लेवी 20:10; नियम 22:22–24नियम रे मूसा ता आले के हुकूम एम एकावाःलेयाय चि नुंकन एराकु के चपात गोच कुपे। नुवां बबेत रे आम चिलिकाः गाम कनाम?” 6ईसु के परीछा कथिर नुंकन गानाम गामवादेयाकु, जेकर एते उनकु ईसु रे दोस लगाव कथिर जहन खोनोस नाम्माकु, ईसु कुयडूः केते अंगुर एते ओते रे ओओल हेलावेनाय। 7जोब उनकु ईसु एते कुलिइ केन गियाकु रिगी ईसु ता बोहोः रिम केते उनकु के मेताःकुवय, “अपे रे एते जे बेकासुरापे, इनकुगी पहिल दिड़ी एते एरा तके चपात एयकाकु।” 8अरो ईसु कुयडूः केते ओते रे ओओल हेलावेनाय। 9नुवां अयुम केते मरंग एते लेयकेते हुडिञ तक, सुबिन मिमीः होर, मिमीः होर केते ओन्डो एते ओचोः एनाकु अरो ईसु एकला गी तहिएनाय, अरो एरा तहों ताला रिगी तिंगु गी तहिएनाय। 10तोब ईसु ता बोहोः रिम केते मेताःदेयाय, “ए कुरी होपोन! उनकु करते तोराकुवा? चिलि मिहोर हों आम के दंड काकु एमाःमा?” 11एरा ता जबाब एमाःदेयय, “हुजूर! मिहोर हों बङा” नियां रे ईसु ता एरा तके मेताःदेयाय, “इञ हों आम के दंड काइञ एमामा। सिनुःमी, नेबरीक एते अरो ओलोम पाप इया।”]#8:11 जोहन 7ः53–81-11 पद आधा पोथी रे बनुःआं,
ईसु दुनिया रिई मसकल
12 #
मती 5:14; जोह 9:5 ईसु ता मेताःकुवय, “इञ दुनिया रिई मसकल हेकेञ। जे इञ तयोम सेन्नाय उनी लुबाः रे काय भटकाव बेरा नोःओय। उनी जीवन रआ मसकल नमाय।” 13#जोह 5:31फरीसिकु ता मेताःदेयाकु, “आम अपन खुद रआ बबेत रे गोवाही एम कनाम। आम रआ गोवाही रे सचाय बनुःआं।” 14ईसु ता जबाब एमाकुवाय, “इञ अपन बबेत रे गोवाही एम कनिञ। रेहों गी इञ रआ गोवाही रे सचाय हेनाःआं, चिलिमेनचि इञ सारीइ कनिञ चि इञ कारे एते हेच एकानिञ अरो कारे सिनुःकानिञ। मुदा अपे कपे सरिञ काना चि इञ कारे एते हेच एकानिञ अरो कारे सिनुःकानिञ।” 15अपे मनवा रआ मोताबिक एते नेयाय कनापे, इञ जहय रआ काइञ नेयाय काना। 16अरो जदि नेयाय हों नेयायिञ दो इञ रआ फयसाला सचा गिया, चिलिमेनचि नुवां बबेत रे इञ एकला काइञ नेयाय काना। मुदा इञ रिई आपुञ हों इञ लोः कराव कनाय। 17#नियम 19:15अपे रआ नियम रेहों ओल एकाना चि बार होर रआ गोवाही रे सच हेनाःआं। 18इञ अपन बबेत रे गोवाही एम कनिञ। अरो आपुञ जे इञ के कुल एकाःदेञाय, उनी हों इञ रआ बबेत रे गोवाही एम कनाय, 19नियां रे उनकु ता ईसु के मेताःदेयाकु, “करेःआय आम रिई आपुम?” ईसु जबाब एमाकुवाय, “अपे न दो इञ के सरिञ कनापे अरो ना इञ रिई आपुञ के। जदि अपे इञ के सरिञापे, दो इञ रिई आपुञ केहों सारी केयापे होनांङ।” 20ईसु नुवां गानाम मरंग बिनती ओड़ाः रे सिख एम वते दान भंडर ठिनुः मेताःकुवय, अरो जहय ता ईसु के काकु सापलेदेया, चिलिमेनचि उनी रआ समेय का हेच केना।
जे ठिनुः इञ सिनुःकानिञ ओन्डो अपे कपे सेन दड़िवाःआ
21ईसु ता होर के अरो मेताःकुवय, “इञ सिनुःकानिञ। अपे इञ के दंड़ाञापे, मुदा अपे अपन पाप रिगी गोजुःआपे, इञ जे ठिनुः सिनुःकानिञ, अपे ओन्डो कपे हेच दड़िवाःआ।” 22नियां रे जहुदी नेताकु ता मेताःदेयाकु, “चिलि उनी अपन-अपन तिगी गोजुःआय, चिलिमेनचि उनी गाम कनाय, चि जे ठिनुः इञ सिनुःकानिञ, ओन्डो अपे कपे हेच दड़िवाःआ।” 23ईसु ता उनकु के मेताःकुवय, “अपे लतार रेन हेकेपे, इञ चेतान रिई हेकेञ। अपे नुवां दुनिया रेन हेकेपे, इञ नुवां दुनिया रिई बङ हेकेञ। 24इनाते इञ अपे के मेताःपिञ चि अपे पाप रआ चलते गोजुःआपे, जदि अपे कपे बिसवास काना चि इञ इनिगी हेकेञ, दो अपे पाप रआ चलते गोजुःआपे।” 25तोब उनकु ईसु के कुलिएदेयाकु, “आम ओकोय हेकेम?” ईसु ता जबाब एमाकुवाय, “इञ इनिगी हेकेञ जे एटेच एते गाम अगु एकाःइञ। 26अपे के गागाम अरो अपे रआ नेयाय कराव रआ इञ ठिनुः बेचोट गानाम हेनाःआं। मुदा इञ दुनिया के इनागी उदुः वकु कनिञ, जे इञ उनी एते ओनाव एकाःदिञ, जे इञ के कुल एकाःदेञाय, चिलिमेनचि उनी सचा हेनाया।” 27उनकु नुवां काकु सोमझावकेना चि अबु एते, सोवारागदूत रिई आपु रआ बबेत रे गाम कनाय। 28इनाते ईसु ता मेताःकुवय, “जोब अपे मनवा रिई होपोन हेरेल के उसुल रे रकाप इयापे दो सरिकेयापे चि इञ इनिगी हेकेञ, अरो अपन एते जहन्नाः काइञ कराव काना, मुदा जे लेका इञ रिई आपुञ इञ के सिखाव एकाःदेञाय, इनका गी नुवां गाम कनिञ। 29अरो इञ के कुकूल वनीः इञ लोः हेनाया, उनी इञ के एकला काय बगी एकाःदेञाय, चिलिमेनचि इञ सोबदिन इनागी कामिइ कनिञ, जेकर एते परमेसर खुस वोः कनाय।” 30ईसु रआ नुवां गानाम ओनाव केते, बेचोट होर उनी रे बिसवास एताकु।
सचाय अपे के आजाद पेयाय
31तोब ईसु ता उनकु जहुदिकु के जे उनी रे बिसवास लाःआकु, मेताःकुवय, “जदि अपे इञ रआ बचन रे बाय तहीः रेदोपे, सरिगी इञ रेन चेला ठहराव वोःओपे। 32अपे सचाय ता सारी केयापे अरो सचाय अपे के छोड़ाव केपेयाय।” 33#मती 3:9; लूका 3:8उनकु ता जबाब एमाःदेयाकु, “आले दो अबराहम रेन बोंस हेकेले, आले केहयो जहय रेन गुलाम काले तही एकाना, आम नुवां चिलिकाः गाम कनाम, अपे आजाद वोःओपे?” 34ईसु ता उनकु के मेताःकुवय, इञ अपे के सच मेतापे कनिञ, “जे पाप कनाय उनी पाप रिई बन्धुवा हेकेय। 35अरो बन्धुवा सोबदिन ओड़ाः रे काय तहीः कनाय, होपोन हेरेल सोबदिन तहीः कनाय। 36इनाते जदि होपोन हेरेल अपे के आजाद पेयय, दो अपे सचमुच आजाद वोःओपे। 37इञ सारीइ कनिञ चि अपे अबराहम रेन बोंस हेकेपे। रेहों गी अपे इञ के गोगोच रआ ताक रे तहीः कनापे, चिलिमेनचि इञ रआ बचन अपे रआ हिरदय रे ठांव काय नाम दड़िवाताय। 38इञ अपन आपुञ ठिनुः जे नेल एकाःइञ, इनागी गाम कनिञ अरो अपे ता अपन आपुञ ठिनुः जे ओनाव एकाःआपे, इनागी कराव चित तहीः कनापे।” 39उनकु ता जबाब एमाःदेयाकु, “अबराहम आले रिई अपुले हेकेय।” नियां रे ईसु ता उनकु के मेताःकुवय, “जदि अपे अबराहम बोंस रेन हेकेपे, रेदो अबराहम जे लेका कराव एकाःआय इनका गी अपे हों कराव कनापे। 40निमीः दो इञ के अपे गोगोच रआ ताक रे तहीः कनापे, इञ जे सचाय बचन अपे के उदुः एकावाःपिञ। जो परमेसर एते ओनाव लाःइञ, इनागी उदुः इतिञ। अबराहम दो नुंका काय कराव लाःआय। 41अपे दो अपन आपु रआ लेका चइल-चलन कनापे।” उनकु ता ईसु के मेताःदेयाकु, “आले साप-जोटेत एते जनम काले अगु एकाःआ। आले रिई मिहोर गी आपु हेनाया अरो उनी परमेसर हेकेय।” 42ईसु ता जहुदिकु के मेताःकुवय, “जदि परमेसर अपे रिई आपुपे तहिलेन रेदोय, अपे, इञ के दुलार इञापे होनङ, चिलिमेनचि इञ परमेसर एते हेच एकाःइञ अरो इञ नोन्डो हेनाञा। इञ अपन हिछा एते काइञ हेच एकाना, इञ के परमेसर गी कुल एकाःदेञाय। 43अपे इञ रआ गानाम चिलिमेन कपे सोमझाःकाना? चिलिमेनचि इञ रआ सिख ओनाव कपे दड़िवाःआ। 44अपे अपन आपु सयतान रिई बोंस हेकेपे अरो अपन आपु रआ हिछा पुराव चहाः कनापे। उनी दो एटेच एते गी हतयारा तहिकेनाय। उनी केहयो गी सचाय रे असतिर काय तहिकेनय, चिलिमेनचि सयतान रे जहन सतया बनुःआं, जोब उनी एकेन-मेकेन गाम कनाय, दो अपन सोवाभव रआ मोताबिक गाम कनाय, चिलिमेनचि सयतान एकेन हेकेय अरो एकेन-मेकेन रिई आपु हेकेय। 45इञ सचाय गाम कनिञ, इनाते अपे इञ रे कपे बिसवास काना। 46अपे रे एते इञ रे ओकोय ता पाप रआ दोस लगाव दड़िवाःआपे? जदि इञ सचाय गाम कनिञ, दो अपे इञ रे चिलिमेन कपे बिसवास काना? 47जे परमेसर रिई हेकेय, उनी परमेसर रआ गानाम ओनाव कनाय। अपे इनाते कपे बिसवास काना चि अपे परमेसर रेन बङ कनपे।”
ईसु अरो अबराहम
48जहुदिकु ता ईसु के मेताःदेयाकु, “आले सच गाम कनाले चि आम समरिया रिई#8:48 आम समरिया रिई जहुदिकु समरिया रेन एते आदामोति दोहोय केना। हेकेम, अरो आम के मुवां रावा झुड़काव एकाःमाय।” 49ईसु ता जबाब एमाकुवाय, “इञ के मुवां रावा काय झुड़काव एकाःदेञाय। इञ अपन आपु के मनमरजाद एय कनिञ, अपे दो इञ के कपे मनमरजाद एञ काना। 50इञ अपन मइन काइञ चहाःकाना। मुदा मिहोर हेनाया जे चहाः कनाय अरो उनी नेयाय कनाय। 51इञ अपे के सच गाम वपेकानिञ, जदि जहय इञ रआ बचन रे सेसेन्नाय, रेदो उनी केहयो काय गोजुःआय।” 52जहुदिकु ता मेताःदेयाकु, “निमीः दो आले के पक्का बिसवास होय्येना चि आम के मुवां रावा झुड़काव एकाःमाय, अबराहम अरो परमेसर सोझ एते नधनी वन गोच एनाकु, मुदा आम गामवाले कनाम, जदि जहय इञ रआ बचन रे सेसेन्नाकु दो उनकु केहयो काकु गोजुःआ। 53चिलि आम आले रिई आपु अबराहम एते हों महान हेनामा? उनी गोच्चेनाय अरो परमेसर सोझ एते नधनी वन हों गोच एनाकु। आम अपन के चिलिकाः सोमझाः कनाम?” 54ईसु ता जबाब एमाकुवाय, “जदि इञ अपन एते मइन कराव वोःओञ दो, इञ रआ मइन जहन्नाः बङ कानाः, मुदा इञ रआ मइन कराव वनीः इञ रिई आपुञ हेकेय, जेके अपे गाम कनापे चि उनी आले रिई परमेसर हेकेय। 55अरो अपे ता उनी के कपे सरिइ काना। इञ उनी के सारीइ कनिञ, जदि इञ गाम्मीञ चि इञ उनी के काइञ सारीइकाना रेदो इञ अपे लेका एकेन-मेकेन बाय कोओञ होनांङ। मुदा इञ उनी के सारीइ कनिञ अरो उनी रआ बचन रे सेसेन कनिञ। 56अपे रिई आपु अबराहम इञ रआ हिजुः हिलोः नेनेल रआ आसरा रे बेचोट आनाद तहिकेनाय, अरो उनी ता नेल्लेताय अरो खुस एनाय।” 57जहुदिकु ता ईसु के मेताःदेयाकु, “निमीः तक आम रआ उमेर पचास बरीस हों का होय एकाना, दो आम अबराहम के चिलका ते नेल एकाःदेयाम” 58ईसु उनकु के मेताःकुवय, “इञ अपे के सच गाम वपेकानिञ, अबराहम रआ जनम अगु एते पहिल एते गी इञ हेनाञा।” 59नियां रे होर ता ईसु के गोगोच कथिर दिड़ी सापएताकु, मुदा उनी हपे-हपे तिगी मरंग बिनती ओड़ाः एते उडुङ एनाय।
נבחרו כעת:
जोहन 8: BIY
הדגשה
העתק
השווה
שתפו
רוצים לשמור את ההדגשות שלכם בכל המכשירים שלכם? הירשמו או היכנסו
© 2023 NLCI CC BY-NC-ND 4.0