Matiyo 13
13
Ŋmatɩrɛ wʋrʋ dʋɔ diduu
Maakɩ 4:1-9; Luka 8:4-8
1Dɩmʋŋ wɩɩ gana Yesu lɩɩ waa dʋɔ ju ga cha lɩɩ nʋɔ. 2Jama baa ba logo ɩ na dʋɔ, wʋ jʋʋ cha bori naŋ yela bakpa baa kpiniŋ sɩmɩɛɩ lɩɩ gaa nʋɔ. 3Sɛ wʋ mʋ aduuna kalaa ba wɩɛ fɔɩ sɛ, <<N nyii! Faradɛ wʋrʋ n ju na wʋ a ga ŋmati adiya bie. 4Gʋ wʋ a ŋmati na, ŋarɛ sala gbɩɛ laraŋ sɛ jimbisi kɔŋ gaa tɔɔsɩ ŋɩ kpiniŋ di. 5Sɛ ŋarɛ sala bʋɛ dʋɔ diele gaa tɩɛra taŋ fɔɩ na. Bie ŋii tu bileŋ akala takɩɛ tɩɛra fɔɩ taŋ bʋɛ ŋii dʋɔ ɔ, 6dɩmʋŋ dʋɔ, wiita lɩɩ na ŋɩ ŋɩɛwʋ, akala takɩɛ ŋɩ tana lira a. 7Sɛ ŋarɛ dʋɔ sala sɔba tibi dʋɔ. Sɛ sɔba ŋii bɩɩ ŋɩrɛ adiya bie ŋii. 8Dɩmʋŋ sɛ ŋarɛ dʋɔ sala tibi bam dʋɔ, sɛ ŋɩ si bie. Ŋarɛ si gafie, ŋitoro yaa gbɩɛta nkuo na sala kii ŋii wʋ ŋmati na.>>
9Sɛ Yesu tawɩ sɛ, <<Wʋŋ wʋ wɩɛna dɩla na, wʋ n nyii.>>
Kpɩnɩdɩ dʋɔ sɛ Yesu tawɩ aduuna naŋ
Maakɩ 4:10-12; Luka 8:9-10
10Sɛ Yesu kpalɛnara baa kɔŋ wʋ jaŋ gaa tasɛ ɩ sɛ, <<Be n yɩɛ sɛ nyaa tawɩ nyaa fa bakpa baa aduuna naŋ?>>
11Sɛ wʋ lɩsɛ ba nʋɔ sɛ, <<Amɩɛ bɩrɛ, Ɩsʋɔ yela sɛ ɩ nyii wʋ juori asiri wɩɛ ŋii tie, ama baa bɩrɛ wʋ mʋ wɩsɛ ba. 12Wʋkʋma wʋŋ wʋ wɩɛna bʋrʋ garɛ na, Ɩsʋɔ aja mʋ ŋarɛ kpi wʋ dʋɔ na wʋ a yu fɔɩ. Ama wʋkʋma wʋŋ wʋ tana na, pii ŋii wʋ wɩɛna ŋɛ na, Ɩsʋɔ aja lɩɛ lɩɩ wʋ jaŋ.>> 13Ŋina dʋɔ sɛ maa tawɩ aduuna naŋ maa fa ba sɛ,
<<Baa kɩɛ, ama baa na a,
baa nyii, ama baa nyii i yaa baa nyii tie e.
14Ŋina yela sɛ Ɩsʋɔ ɔja Yisaya gbalɩŋwɩɛ ŋii kɔŋ tɩba sɛ,
Ɩ nyii, ama ɩɩ nyii tie ɩ.
Ɩ kɩɛ, ama ɩɩ na a.
15Akala takɩɛ bakpa bana agela wɩɛ doŋ,
ba tɔ ba dɩla,
sɛ ba fu ba asa.
Naa dɩmʋŋ na, nafʋɔ ba asa aja na,
baa nyii,
ba agela a nyii wɩɛ tie.
Na baa biliŋi lɩɩ ba dɩsʋbʋ naŋ kɔŋ ma jaŋ, na maa chɔ ba.>>#Yis 6:9-10.
16Kusee n nyina amɩɛ baa amɩɛ asa a na sɛ amɩɛ dɩla a nyii. 17Maa tawɩ sɛ n nyii na dieli sɛ Ɩsʋɔ bajana na bachirigisa galaga aja sɛ baa na ŋii ɩ na, ama ba n na a. Na baa nyii ŋii ɩ nyii na, ama ba n nyii i.
Yesu kalaa ŋmatɩrɛ diduu gaa tie
Maakɩ 4:13-20; Luka 8:11-15
18Sɛ Yesu tawɩ sɛ, <<N nyii bʋrʋ gaa ŋmatɩrɛ wʋŋ diduu gaa akala na. 19Adiya bie ŋii ŋɩ sala gbɩɛ laraŋ na n nyina bakpa baa ba nyii Ɩsʋɔ Juori gaa wɩɛ sɛ ba n nyii tie na, Sɩtanɩ a gaa lɩsɛ bie ŋii ba duu ba agela naŋ na. 20Bie ŋii ŋɩ sala bʋɛ tibi dʋɔ na n nyina bakpa baa ba nyii Ɩsʋɔ wɩɛ na, gabʋanaŋ sɛ baa mʋ asadi mʋ wɩɛ ŋii. 21Ama gʋ wɩɛ ŋii n pɩsɛ ba agela naŋ dʋɔ, baa dɩlɛ baa sɩŋ ba lɩɛdi naŋ taŋgɩlɛ ɛ. Sɛ awʋrʋfʋɔ yaa ga nyala kɔŋ ba dʋɔ lɩɩ Ɩsʋɔ wɩɛ dʋɔ na, sɛ baa yela ba lɩɛdi naŋ. 22Bie ŋii ŋɩ sala sɔba tibi dʋɔ na n nyina bakpa baa ba nyii Ɩsʋɔ wɩɛ, ama chawʋ naŋ wɩɛ bisi na aterembie dɩsɛchɩbɛ a gaa wɩɛ ŋii gbɩɛ, ŋɩ yela sɛ ŋii dɩlɛ ŋii si bie ɩ. 23Ama adiya bie ŋii ŋɩ sala tibi bam dʋɔ na n nyina bakpa baa ba nyii Ɩsʋɔ wɩɛ ŋii sɛ ba nyii ŋɩ tie. Ba si bie gafie, ŋarɛ dʋɔ ŋitoro, sɛ ŋarɛ dʋɔ gbɩɛta nkuo sala kii ŋii ba ŋmati na.>>
Kasɛ bie dʋɔ diduu
24Sɛ Yesu ti bɔrɛ jɔ ba diduu sɛ, <<Ɩsʋɔ Juori gaa kɩɛna bɛ takɩɛ gʋ baalɛ wʋrʋ ga ŋmati adiya bie abama wʋ fʋɔ naŋ. 25Gʋ wʋkʋma duo na, sɛ wʋ ɔdʋŋ gaa ŋmati kasɛ sʋbʋ bie gamɩsɛ ŋii naŋ, sɛ wʋ lam. 26Gʋ gamɩsɛ ŋii nɔgʋ ŋii lʋrʋ na, sɛ kasɛ sʋbʋ ŋii lɩɩ ifuli.>>
27Sɛ fʋɔtɛ wʋŋ tʋmɩra kɔŋ wʋ jaŋ gaa tasɛ ɩ sɛ, <<Kpaŋjuo, naa adiya bie abama sɛ nya ŋmati n fʋɔ naŋ? Le sɛ dɩmʋŋ kasɛ sʋbʋ ŋina lɩɩ?>>
28Sɛ wʋ lɩsɛ ɩ nʋɔ sɛ, <<Ma ɔdʋŋ n gaa yɩɛ dɩmʋŋ.>>
Sɛ wʋ tʋmɩra baa tasɛ ɩ sɛ, <<Nyaa ja sɛ dɩ ju ga kuli ŋɛ tʋsʋ?>>
29Sɛ wʋ lɩsɛ ba nʋɔ sɛ, <<Aye, ɩ kuli ŋɛ na, ɩ dɩlɛ kuli gamɩsɛ ŋii bʋga na ŋɛ. 30N yela na ŋii bʋla ŋii bɩɩ bʋga ga tala karɩŋ saŋa. Saŋa gana na, maa tawɩ karada baa sɛ ba n chɩŋkpɩɛ kui kasɛ sʋbʋ ŋii na baa pɔgʋ ŋɛ akpeŋ-akpeŋ na baa tʋ ŋɛ. Na baa kʋla gamɩsɛ ŋii ga dʋ ma dichonkon naŋ.>>
Kpeli daŋ bi dʋɔ diduu
Maakɩ 4:30-32; Luka 13:18-19
31Yesu ti jɔ ba diduu baŋbaŋ sɛ, <<Ɩsʋɔ Juori gaa kɩɛna bɛ takɩɛ kpeli daŋ bi gaa baalɛ wʋrʋ mʋ duu wʋ fʋɔnaŋ. 32Ga yɩɛ gapii adiya bie kpiniŋ naŋ bɩrɛ, ama ga bɩɩ na, gaa yɩɛ daŋ janɛ dasɛ bie ŋii baa duu na kpiniŋ naŋ, sɛ gaa gaa yɩɛ daŋ sɛ jimbisi a gaa yɩɛ gasɩsasɛ ga gayabɩsɛ naŋ.>>
Yiisi dʋɔ diduu
Luka 13:20-21
33Sɛ Yesu ti bɔrɛ jɔ diduu baŋbaŋ sɛ, <<Ɩsʋɔ Juori gaa kɩɛna bɛ takɩɛ yiisi gaa alʋ wʋrʋ mʋ pii bʋga bodobodo mʋlʋŋ ŋii ŋɩ bɔlɩɛɩ na naŋ. Sɛ dɩ yela sɛ ŋɩ yɩɛ gafʋʋ.>>
34Yesu tawɩ ŋina kpiniŋ fa jama baa aduuna naŋ bɛ, wʋ n tawɩ wɩɛ ŋarɛ fa ba sɛ wʋ n jɔ diduu u. 35Wʋ yɩɛ dɩmʋŋ bɛ na wɩɛ ŋii Ɩsʋɔ pala na ɔja Yisaya dʋɔ tawɩ si na a kɔŋ tɩba sɛ,
<<Maa tawɩ Aduuna naŋ.
Maa tawɩ asiri wɩɛ lɩɩ saŋa gaa ba lɔ dulunya.>>
Yesu kalaa kasɛ sʋbʋ dʋɔ diduu gaa tie
36Sɛ Yesu yela jama baa sɛ wʋ ju waa dʋɔ. Sɛ wʋ kpalɛnara baa kɔŋ wʋ jaŋ gaa tawɩ ɩ sɛ, <<Lɩsɛ kasɛ sʋbʋ dʋɔ diduu gaa tie kalaa daa.>>
37Sɛ wʋ lɩsɛ nʋɔ sɛ, <<Wʋŋ wʋ duu adiya bie abama ŋii na n nyina Wʋkpa Bu wʋŋ. 38Fʋɔ gaa n nyina dulunya, sɛ adiya bie abama ŋii n nyina Ɩsʋɔ juori gaa bakpa. Kasɛ sʋbʋ gaa n nyina Sɩtanɩ bakpa. 39Sɛ ɔdʋŋ wʋŋ wʋ ŋmati ŋɛ na n nyina Sɩtanɩ. Karɩŋ saŋa gaa n nyina dulunya dɩtamtɩŋ, sɛ karada baa n nyina Ɩsʋɔ gabʋɔsɛ.>>
40Sɛ Yesu ju dʋɔ tawɩ sɛ, <<Takɩɛ ganaŋkʋ baa kuli kasɛ sʋbʋ ga tʋ bʋala naŋ na, dɩmʋŋ sɛ aja yɩɛ dulunya dɩtamtɩŋ. 41Wʋkpa Bu wʋŋ aja kpiri wʋ gabʋɔsɛ na baa gaa lɩsɛ bʋrʋ gaa gaa yela sɛ wʋkpa a yɩɛ dɩsʋbʋ, na baa baa yɩɛ dɩsʋbʋ na lɩɩ wʋ juori gaa naŋ. 42Na baa lɔ ba dʋ awʋrʋfʋɔ diele bʋala naŋ, dɩmaŋ sɛ wiiniŋ na kela naŋ tawʋ wɩɛ. 43Na bachirigisa a ŋalagi dʋɔ takɩɛ wiita ba Juo Juori gaa naŋ. Wʋŋ wʋ wɩɛna dɩla na, wʋ n nyii.>>
Akpaŋta kpari gaa ga wɩsaɩ na dʋɔ diduu
44Sɛ Yesu ti bɔrɛ jɔ ba diduu sɛ, <<Ɩsʋɔ Juori gaa kɩɛna bɛ takɩɛ akpaŋta kpari gaa ba mʋ wɩsɛ fʋɔ garɛ naŋ. Sɛ baalɛ wʋrʋ ga na ga, sɛ wʋ ti mʋ wɩsɛ. Sɛ wʋ mʋ asadi ga yaa wʋ abʋrɩ kpiniŋ mʋ ga lɩɛ fʋɔ gaa.>>
45<<Ɩsʋɔ Juori gaa kɩɛna bɛ takɩɛ gʋ yawʋ diri a ja bʋɛ abama. 46Gʋ wʋ ga yu gakpari garɛ na, wʋ ga yaa wʋ abʋrɩ kpiniŋ mʋ ga lɩɛ ga.>>
Disawu dʋɔ diduu
47Sɛ Yesu ti bɔrɛ jɔ diduu sɛ, <<Ɩsʋɔ Juori gaa kɩɛna bɛ takɩɛ disawu gaa ba lɔ dʋ lɩɩ naŋ sɛ ba chaŋ aji ngoriŋ-ngoriŋ na bɛ. 48Gʋ ga suu na, sɛ aji chamɩra baa fɔŋɩ ga lɩɩ lɩɩ gaa nʋɔ. Sɛ ba cha tɔɔsɩ aji ba bama baa dʋ gachaŋa naŋ, sɛ ba lɔ baa ba taŋ dieli na tʋsʋ. 49Dɩmʋŋ sɛ aja yɩɛ dulunya dɩtamtɩŋ. Ɩsʋɔ gabʋɔsɛ aja kɔŋ gaa lɩsɛ basʋbʋɛ lɩɩ bachirigisa naŋ. 50Na baa lɔ ba dʋ awʋrʋfʋɔ diele bʋala naŋ, dɩmaŋ sɛ wiiniŋ na kela naŋ tawʋ wɩɛ.>>
51Sɛ Yesu tasɛ ba sɛ, <<Ɩ nyii aduuna ŋina kpiniŋ tie?>>Sɛ ba lɩsɛ nʋɔ sɛ, <<Ɛɛŋ.>>
52Sɛ Yesu tawɩ ba sɛ, <<Dɩmʋŋ dʋɔ, mbara wʋkalaasa kʋma wʋŋ wʋ gaa yɩɛ kpalɛnarɛ Ɩsʋɔ Juori gaa dʋɔ na, kɩɛna bɛ takɩɛ waatɛ wʋŋ wʋ lɩsɛ wʋ a akpaŋta kpari afɔlɩɛ na abɩnɩɛ lɩɩ wʋ akpaŋta dɩsɩɩtɩŋ na bɛ.>>
Nasaratitina pɩɛ Yesu
Maakɩ 6:1-6; Luka 4:16-30
53Gʋ Yesu jɔ ba aduuna ŋina taŋ na sɛ wʋ lɩɩ dɩmaŋ. 54Sɛ wʋ bɔrɛ ju wʋ tɩŋtɩŋ wʋ dɩɛnaŋ. Sɛ wʋ fara wʋ a kalaa bakpa Yudatina tʋm danɛ naŋ sɛ dɩ yɩɛ ba doba. Sɛ ba tasɛ sɛ, <<Le sɛ baalɛ wina yu dɩmʋŋ kpiŋjim sɛ wʋ a yɩɛ adaŋgana ŋina?>> 55Sɛ ba tasɛ sɛ, <<Naa kapinta wʋŋ bu mɩnaŋ? Naa wʋ naa n nyina Mariya wʋŋ wʋ nabie yɩɛ Jamesi, Yosefu, Simoŋ na Yudasi naa? 56Naa wʋ diesina kpiniŋ n wɩɛna daa jaŋ n naa?>> Le sɛ baalɛ wina yu abʋrɩ ŋina? 57Dɩmʋŋ dʋɔ ba pɩɛ ɩ. Sɛ Yesu tawɩ ba sɛ, <<Ɩsʋɔ ɔja wɩɛna jilima gapɩlɛkʋma amʋɔ wʋ tɩŋtɩŋ wʋ dɩɛ naŋ na wʋ waa dʋɔ nyiŋeŋ.>>
58Yesu n dɩlɛ yɩɛ adaŋgana fɔɩ dɩmaŋ ŋ, akalaa takɩɛ ba tana lɩɛdi i.
נבחרו כעת:
Matiyo 13: CLL
הדגשה
שתפו
השווה
העתק
רוצים לשמור את ההדגשות שלכם בכל המכשירים שלכם? הירשמו או היכנסו
2025 Ghana Institute of Linguistics Literacy amp Bible Translation