Matiyo 19
19
Yesu kalaa sarɛ yela dʋɔ wɩɛ
Maakɩ 10:1-12
1Gʋ Yesu tawɩ wɩɛ ŋina taŋ na, wʋ lɩɩ Galaliya tibi dʋɔ tɩɛsɛ Yodaŋ buo ju Yudiya tibi dʋɔ Yodaŋ gatɩɛsa. 2Jama baa kpaŋ ɩ, sɛ wʋ chɔ ba lʋmɩɛ dɩmaŋ.
3Sɛ Farasitina barɛ kɔŋ wʋ jaŋ gaa yɩɛ lɔ tɩba, dɩmʋŋ dʋɔ ba tasɛ ɩ sɛ, <<Daa mbara fa gbɩɛ sɛ baalɛ a dɩlɛ sɩŋ wɩɛ kʋma dʋɔ yela wʋ alʋ?>>
4Sɛ Yesu lɩsɛ ba nʋɔ sɛ, <<Ɩŋ karaŋ Ɩsʋɔ Wɩɛ naŋ, lɩɩ dulunya dɩfaratɩŋ sɛ Ɩsʋɔ lɔ ba baalɛ na alʋ,>>#Jene 1:27. 5sɛ Ɩsʋɔ tawɩ sɛ, <<Ŋina dʋɔ, baalɛ aja yela wʋjuo na wʋnaa na wʋ na wʋ alʋ baa ga cha bʋga, na baa bala baa yɩɛ wʋsɛ tanɛ gadʋŋdʋlʋŋ. 6Dɩmʋŋ dʋɔ ba ba ti yɩɛ bakpa bala a, ama wʋdʋŋdʋlʋŋ. Ŋina dʋɔ, ŋii Ɩsʋɔ bʋga na, wʋrʋ n baa kpara tɩba.>>
7Sɛ Farasitina baa tasɛ ɩ sɛ, <<Be dʋɔ sɛ Mosesi dʋ sɛ baalɛ n sabɩɛ tanɛ fa wʋ alʋ na gaa kalaa gʋ wʋ yela ɩ sarɛ pɔɩ na wʋ a yela ɩ?>>
8Yesu lɩsɛ ba nʋɔ sɛ, <<Amɩɛ agela doŋ dʋɔ sɛ Mosesi fa amɩɛ gbɩɛ sɛ n yela amɩɛ ala. Ama lɩɩ dulunya dɩfaratɩŋ na, ŋɩ ba yɩɛ dɩmʋŋ ŋ. 9Maa tawɩ amɩɛ sɛ baalɛ kʋma wʋŋ wʋ yela wʋ alʋ sɛ ŋɩ ba yɩɛ baalɛ wʋrʋgbɩɛ lɩɩ, sɛ wʋ saa alʋ fɔlɛ na yɩɛ alʋ wʋrʋgbɩɛ lɩɩ.>>
10Sɛ wʋ kpalɛnara baa tawɩ ɩ sɛ, <<Sɛ dɩmʋŋ sɛ kɩɛna baalɛ na wʋ alʋ tɩtɩba bɩrɛ, wʋkpa n saa na ŋɩ bɔ.>>
11Sɛ Yesu lɩsɛ ba nʋɔ sɛ, <<Naa wʋkʋma aaŋ dɩlɛ lɩɛ dɩmʋŋ wɩɛ ŋina dʋ ʋ, amʋɔ baa Ɩsʋɔ yela sɛ ba nyii ŋɩ tie na nyiŋeŋ. 12Baala barɛ wɩɛ baa dɩlɛ saa a, akala takɩɛ dɩmʋŋ sɛ ba lʋrʋ ba. Sɛ barɛ dʋɔ bakpa n yɩɛ ba dɩmʋŋ, barɛ dʋɔ Ɩsʋɔ Juori gaa dʋɔ sɛ baa ja baa saa a. Wʋŋ wʋ a dɩlɛ lɩɛ dɩmʋŋ wɩɛ ŋina na, wʋ n lɩɛ dʋ.>>
Yesu yɩɛ bachaasɛ bisi kusee
Luka 18:15-17
13Bakpa barɛ mʋ bachaasɛ bisi kɔna Yesu sɛ wʋ n mʋ wʋ pam jaga ba dʋɔ na wʋ a jɔ dɩga fa ba. Ama wʋ kpalɛnara baa gɩŋ ba.
14Sɛ Yesu tawɩ ba sɛ, <<N yela na bachaasɛ bisi a kɔŋ ma jaŋ, ama n baa gaa ba gbɩɛ. Akala takɩɛ Ɩsʋɔ Juori gaa yɩɛ baa ba kɩɛna dɩmʋŋ na teri bɛ.>> 15Gʋ Yesu mʋ wʋ pam jaga-jaga bachaasɛ bisi baa dʋɔ garɛ-garɛ taŋ na, wʋ lɩɩ dɩmaŋ laŋ.
Yeleŋbu akpaŋtatɛ wʋrʋ wɩɛ
Maakɩ 10:17-31; Luka 18:18-30
16Sɛ baalɛ wʋrʋ kɔŋ Yesu jaŋ gaa tasɛ ɩ sɛ, <<Wʋkalaasa, bʋrʋ bam gamʋɔ sɛ ŋɩ tiri gʋ ma n yɩɛ na maa yu nkpa ŋii ŋɩ taŋ gɩtɛ?>>
17Sɛ Yesu lɩsɛ ɩ nʋɔ sɛ, <<Be n yɩɛ sɛ nyaa tasɛ maŋ dɩbam wɩɛ? Wʋdʋŋdʋlʋŋ n nyina wʋbam. Nyaa ja nyaa yu nkpa ŋii ŋɩ taŋ gɩtɛ na, kpaŋ mbara ŋii dʋɔ.>>
18Sɛ baalɛ wʋŋ tasɛ ɩ sɛ, <<<Mbara amʋɔ? Sɛ Yesu lɩsɛ ɩ nʋɔ sɛ n baa tagapʋ, n baa yɩɛ baalɛ wʋrʋgbɩɛ lɩɩ yaa alʋ wʋrʋgbɩɛ lɩɩ, n baa ŋmɩɛlɛ, n baa di akarɩɛ seriya, 19bu njuo na nnaa#Ɛsa 20:12-16; Ditiro 5:16-20. na nyaa ja n dʋɔ takɩɛ n wʋsɛ.>#Lɛf 19:18.>>
20Sɛ yeleŋbu wʋŋ tawɩ Yesu sɛ, <<Ma kpaŋ mbara ŋina kpiniŋ dʋɔ. Be n ka sɛ ma n yɩɛ?>>
21Sɛ Yesu lɩsɛ ɩ nʋɔ sɛ, <<Nyaa ja sɛ nyaa yɩɛ kʋrʋkʋrʋ na, ju ga yaa nya akpaŋta na nyaa mʋ aterembie ŋii ga fa ayɔŋtina, na nyaa yu akpaŋta Ɩsʋɔ adugbe. Na nyaa gaa kpaŋ maŋ.>>
22Ama yeleŋbu wʋŋ nyii wɩɛ ŋina na, dɩ n yɩɛ ɩ jʋŋ ŋ sɛ wʋ lam, akala takɩɛ wʋ wɩɛna akpaŋta fɔɩ.
23Sɛ Yesu tawɩ wʋ kpalɛnara baa sɛ, <<Maa tawɩ sɛ n nyii na dieli sɛ aja yɩɛ doŋ fa akpaŋtatɛ na wʋ a jʋʋ Ɩsʋɔ Juori gaa naŋ. 24Ma ti maa tawɩ amɩɛ sɛ aja fʋ fa nyɔma na wʋ a mʋna dɩkparɛ bʋɔ naŋ, ama aja yɩɛ wiliŋ fa akpaŋtatɛ na wʋ a jʋʋ Ɩsʋɔ Juori gaa naŋ.>>
25Gʋ Yesu kpalɛnara baa nyii wɩɛ ŋina na, dɩ yɩɛ ba doba ga laŋ. Sɛ ba tasɛ ɩ sɛ, <<Dɩmʋŋ bɩrɛ Mmʋɔ sɛ baa mɔlɔgɩ?>>
26Sɛ Yesu kɩɛ ba sɛ wʋ tawɩ sɛ, <<Wʋkpa jaŋ bɩrɛ, ŋina baa dɩlɛ yɩɛ ɛ, ama Ɩsʋɔ bɩrɛ, wʋ a dɩlɛ yɩɛ bʋrʋkʋma.>>
27Sɛ Petero tasɛ Yesu sɛ, <<Kɩɛ! Dɩ yela bʋrʋkʋma gaa kpaŋ nyaŋ.>> Be sɛ dɩɩ yu?
28Sɛ Yesu tawɩ ba sɛ, <<Maa tawɩ sɛ n nyii na dieli sɛ dulunya gafɔlɛ gaa gaa kɔŋ gʋ Wʋkpa Bu wʋŋ aja wʋ a cha wʋ jilima Juorigbeli gaa dʋɔ na, amɩɛ baa ɩ kpaŋ maŋ na gba aja cha juorigbeliŋ gifi ala ŋii dʋɔ di Isirali buonɔsɛ gifi ala ŋii dʋɔ. 29Wʋkʋma wʋŋ wʋ a yela waasɛ yaa nabie yaa diesina yaa juo yaa naa, yaa bie yaa fʋɔsɛ ma dʋɔ na, aja yu ŋɛ gbɩɛta gafie dʋɔ fɔɩ na wʋ a ti yu nkpa ŋii ŋɩ taŋ gɩtɛ. 30Ama fɔɩ baa ba yɩɛ asanaŋtina na aja yɩɛ wʋrʋgbɩɛtina na fɔɩ baa ba yɩɛ wʋrʋgbɩɛtina na a yɩɛ asanaŋtina.>>
נבחרו כעת:
Matiyo 19: CLL
הדגשה
שתפו
השווה
העתק
רוצים לשמור את ההדגשות שלכם בכל המכשירים שלכם? הירשמו או היכנסו
2025 Ghana Institute of Linguistics Literacy amp Bible Translation