1 Begyu-dɩrɛ 22
22
Wurubwarɛ wɔtabʋrʋlɛ Mikaya e terema ɛ tɛ Ahabi
1Bɩkyan bisiyee powu baanɩ fɔ, olila wʋ sara Aram ma Isareli boo getite. 2Mɔ gɩkyan-siyeefɛ gɩɩ geweremakʋn fɔ, Yuda wogyu Yehosafati ɛ san Isareli wogyu wakʋn. 3Gɛ Isareli wogyu ɛ dɔ̀ wɔ bɛndɩrɛbi alan, <<Ɩɩn nyɩ̀ alɛ Ramoti-Gileyadi ditele dì di tiiyo, mɔ tɩn taa mɛ ade ɩkɩ alɛ taà ma to di ti ye Aram wogyu wakʋn?>> 4Gɛ e lila Yehosafati alan, <<Aà fɩya ma nmɩ, taà ma kpà ma Ramoti-Gileyadi?>> Gɛ Yehosafati e tiri wuunyun ɛ tɛ Isareli wogyu alan, <<Ɛtɩ ma awɔ tì di gɛ ɛnɩ-kɩlɩn, mɩɩn bɛnɩ bè di gɛ aa bɛnɩ, gɛ maabengyi ì di gɛ aabengyi.>> 5Mɔ Yehosafati e biri ɛ dɔ̀ Isareli wogyu alan, <<Gyegeye lila Yahwe gelenbi pɛ.>> 6Okoro Isareli wogyu ɛ kʋla Wurubwarɛ bɛtabʋrʋlɛ fɔ powu gɛtɛ baà mɛ anlɛ bɛnɩ nkpɩn bʋnyɔɔ (400), gɛ e lila bɛ alan, <<N san n ma kpà ma Ramoti-Gileyadi ditele, abɛɛ n kara n san?>> Gɛ Be tiri wuunyun alan, <<San, yema Yahwe ɛɛ̀ ka dɩ ɛ sa awɔ egyu-dɩrɛ aa gʋlɔ.>>
7Mɔ Yehosafati e lila alan, <<Yahwe wɔtabʋrʋlɛ ɛkɩ ɛn mɩnɩ ma fɩya gɛtɛ taà lila wɔ?>> 8Gɛ Isareli wogyu e tiri wuunyun ɛ tɛ Yehosafati alan, <<Ɛkɩ ɛ̀ sa gɛtɛ taà talɩ ti lila wɔ Yahwe gelenbi, mɔ n tɛ kyʋn wɔ, yema ɛn tɛ dɔ̀ ade-kpara ka dama miin koro nya kpakpaakpa, mɔ ɔya-kamasɛ fɔ, ade-kpen yiiko-yiiko gɛ ɛɛ dɔ̀. Ɛwɔ n di Imila wobi Mikaya.>>
Yehosafati ɛ dɔ̀ alan, <<Wun di gɛtɛ egyu-dɩrɛ ɛ̀ɛ̀ dɔ̀ gɛlɛ.>> 9Okoro Isareli wogyu ɛ sa wɔsaranyan ɛkɩ alan, <<San ma ka Imila wobi Mikaya ba nfan nkenkele.>>
10Fɔ Isareli wogyu Ahabi, ma Yuda wogyu Yehosafati bɛ̀ sa baagyu-nyan bè si bugyu-bɩya bii koro ɔkʋn gɛtɛ bee tiba afabi Samariya ditele diitunu-yon fɔ. Fɔ bɛtabʋrʋlɛ fɔ powu bè si bɔɔ bʋnʋn bɛɛ tabʋrʋ. 11Gɛ Baanɩ ɛkɩ gɛtɛ bee kpèlè wɔ alɛ Sedekiya gɛ wote n di Kenaana fɔ, ɛ mɛ awɔrɔnyan yaakantan, gɛ ɛ dɔ̀ alan, <<Yahwe ɛɛ dɔ̀ alan, <Akantan nyayɩ gɛ aà ka a kpà ma Aram bete ma sere gɛtɛ aà muru bɛ.> >>
12Bɛtabʋrʋlɛ-do fɔ powu bɛɛ dɔ̀ gɛ ade-kɩlɩn alan, <<Ma kpà ma Ramoti-Gileyadi ditele, fɔ àà di dii koro, yema Yahwe ɛɛ̀ ka di ɛ sa egyu-dɩrɛ gʋlɔ.>>
13Ɛsalɛ gɛtɛ ɛ san ɛ ma kpèlè Mikaya fɔ ɛ dɔ̀ wɔ alan, <<Nya, bɛtabʋrʋlɛ-do fɔ powu bɛɛ dɔ̀ gɛ ade-kɩlɩn be wùlà gɛtɛ egyu-dɩrɛ eè di akpa fɔ yii koro. Okoro yɛ aanyun-gyebi yàà mɛ dɩkɩlɩn ma booyo, fɔ àà tabʋrʋ ade-kpara.>> 14Mɔ Mikaya ɛ dɔ̀ wɔ alan, <<Na nya Yahwe gɛtɛ ɛ̀ sa lɛ alɛ, nan bɔ n dɔ̀ wɔ gɛ ɛwʋ gɛtɛ Yahwe ɛɛ̀ dɔ̀ mɩ fɔ.>>
15Gɛtɛ e be gyu fɔ, egyu-dɩrɛ e lila wɔ alan, <<Mikaya, n ma kpà ma Ramoti-Gileyadi, abɛɛ n kara san?>> Gɛ e tiri wuunyun alan, < Ma kpà, aà di boo koro, yema Yahwe ɛ ka bɛ ɛ sa aa gʋlɔ.>> 16Gɛ egyu-dɩrɛ ɛ dɔ̀ wɔ alan, <<Disere dilen gɛ aa le mɩ nan yɛ wɔ̀ àà kan ntam tɛ mɩ alɛ an taa dɔ̀ ade-fon ɩkɩ, mɔ fɔ nʋnkwarɩ gɛ aa dɔ̀ mɩ Yahwe diyere daanɩ?>>
17Gɛ Mikaya e tiri wuunyun alan, <<Na we Isareli bete powu bɛ yasɩ idon yii koro, anlɛ bɛyɛran gɛtɛ bɛn ma ɛnyalɛ, gɛ Yahwe ɛ dɔ̀ alan, <Bɛnɩ nyabɛ bɛn ma ɛnyalɛ. Yɛ ɛkamasɛ ɛ̀ɛ̀ san wɔ dɩkpaara olila waanɩ.> >> 18Gɛ Isareli wogyu ɛ dɔ̀ Yehosafati alan, <<Mɩn dɔ̀ wɔ̀ alɛ, ɛn taa dɔ̀ ade-kpara ka dama miin koro, mɔ ade-kpen yiiko-yiiko?>> 19Mikaya e biri ɛ dɔ̀ alan, <<Nkele nʋn ade gɛtɛ Yahwe ɛɛ dɔ̀, <Na we Yahwe è si wo gigyu-bɩya gii koro, gɛ gatala gɩɩ dɩtɩnpan fɔ powu be silin wɔ dɩbɩyan ma ologyi. 20Gɛ Yahwe e lila alan, <<Ɛnyan nan ma gban Ahabi, ɛ̀ɛ̀ ma kpà ma Ramoti-Gileyadi bàà wolo wɔ dʋkɔ?>> Gɛ ɛkɩ ɛ dɔ̀ anlɛ, gɛ edo mɔ ɛ dɔ̀ lɛ. 21Gamama fɔ gifiye-kpen gɩkɩ gi ye gi be yela Yahwe bʋnʋn gɛ gɩ dɔ̀ alan, <Nmɩ nan ma gban wɔ.>
22Gɛ Yahwe e lila wɔ alan, <Osele-mɔmɔ gɛ aà ka?> Gɛ gifiye fɔ gi tiri wuunyun alan, <<Nan ye n san nan ma mɛ didebila dii gifiye wɔ bɛtabʋrʋlɛ fɔ powu boonyun waanɩ.>> Gɛ Yahwe ɛ dɔ̀ wɔ alan, <<Aà talɩ a gban wɔ, okoro san fɔ àà ma mɛ gɛlɛ.> 23Okoro Yahwe ɛ ka didebila dii gifiye ɛ sa aa bɛtabʋrʋlɛ nyabɛ powu boo-inyun yaanɩ. Yahwe ɛ wɛrɛ mɛ gɛtɛ eè muru wɔ̀.>>
24Gɛ Kenaana wobi Sedekiya ɛ bʋn ɛ ma gbɛrɛ Mikaya ɔtan gɛ e lila wɔ alan, <<Duwi mɔmɔ gɛ Yahwe gifiye gi ye maanɩ gɩ ma tabʋrʋ ma awɔ?>> 25Mikaya e tiri wuunyun alan, <<Duwi gɛtɛ aà serenti a ma bu dikwo dɩɩ gamɩ fɔ, gɛ aà we a nyɩnla.>>
26Gɛ Isareli wogyu ɛ dɔ̀ wɔ bɛndɩrɛbi fɔ baanɩ ɛkɩ alan, <<Ka Mikaya, fɔ àà birima wɔ ma tɛ Amon, gɛtɛ ɛɛ nya ditele dii koro fɔ, ma egyu-dɩrɛ wobi Yowasi. 27Fɔ yàà dɔ̀ bɛ alan, <<Egyu-dɩrɛ alan, <Ɩ ka wɔ ɩ ma tan dikwo, gɛ ɩ kara tɛ wɔ gɩnyankɩ ɩ fɩya ma boroboro, ma butu buuko, ma sere gɛtɛ nan biri n ba olila waanɩ.> >>
28Ɛwʋ gɛ Mikaya ɛ dɔ̀ alan, <<Gengyi à biri a ba olila waanɩ fɔ, ɛwʋ bɩrɛ Yahwe ɛn dama miin koro tabʋrʋ.>> Gɛ e biri ɛ dɔ̀ alan, <<Ɛyɩ powu, ɩ nʋn maanyun-gyebi ɩ sɩ!>>
Ahabi diku
29Okoro Isareli wogyu Ahabi, ma Yuda wogyu Yehosafati bɛ bʋn bɛ da Ramoti-Gileyadi. 30Gɛ Isareli wogyu ɛ dɔ̀ Yehosafati alan, <<Nmɩ nan foma koro, n gyu akpa fɔ yaanɩ, mɔ awɔ bɩrɛ, sa aagyu-nyan.>> Okoro Isareli wogyu e foma koro, gɛ e gyu akpa fɔ yaanɩ. 31Aram wogyu ɛ dɔ̀ wo tiiramisan ɛbɛ bɔɔ bɛndɩrɛ dikpilin ma fwo bʋnyɔɔ fɔ alan, <<Ebi oo, ɛndɩrɛ oo ɩ kara kpà ma ɛnɩ-kamasɛ, ɩ kpà gɛ ma Isareli wogyu woko.>> 32Gɛtɛ tiiramisan ɛbɛ bɔɔ bɛndɩrɛ fɔ be we Yehosafati fɔ, bɛ sa amɩnlɛ alɛ wù di Isareli wogyu. Okoro be fi bɛ̀ ma kpà ma ɛwɔ, mɔ gɛtɛ Yehosafati e tiri onyun fɔ, Yahwe e to wɔ, gɛ be kere wɔ bɛ ya. 33Tiiramisan ɛbɛ bɔɔ bɛndɩrɛbi fɔ be we gɛtɛ nka Isareli wogyu fɔ wɔlɛ, gɛ be kere wo geserenti berema bɛ ya. 34Mɔ ɛkɩ ɛ tà wɔ gɩsɩnta ɛ sa bɛnɩ fɔ baanɩ, gɛ gɩ ma sere Isareli wogyu gɛgba fɔ gɩɩ gɛkyagakʋn gɩɩ gba gɛtɛ wʋ̀ dɔ fɔ waanɩ. Gɛ egyu-dɩrɛ ɛ dɔ̀ wɔ tiiramisan wɔkanlɛ fɔ alan, <<Fi, fɔ àà ka mɩ ye akpa fɔ yaanɩ, yema na pira.>> 35Akpa fɔ ɩ mɛ ɔkɛma duwi fɔ powu daanɩ, gɛ egyu-dɩrɛ ɛ yɛ ɛ̀ kpasa tiiramisan fɔ waanɩ, gɛ wɔ bʋnʋn bʋ yɛ bù ten Aram bete fɔ ma ye ɔgyɔlɔ. Gɛ e ku ɔgyɔlɔ wʋtɔkɔ. 36Gɛtɛ ofila wʋʋ nʋ̀n butu fɔ, afala i yera bɩtà bʋʋ bɛtàlɛ fɔ baanɩ alan, <<Eteni-kamasɛ e biri ɛ san wo ditele daanɩ, ma wɔ gɛtʋnkwaa gaanɩ.>>
37Okoro egyu fɔ e ku, gɛ bɛ ka wɔ bɛ ba Samariya, gɛ be lò wɔ dʋkɔ. 38Gɛ bɛ ma fere wotiiramisan fɔ Samariya ditiribun daanɩ (ɔkʋn gɛtɛ fotoli bɛnanɩ bee ku fɔ), gɛ bɛkpɛɛ bɛ nʋnʋn wɔ nkalan, anlɛ gɛtɛ Yahwe wanyun-gyebi ɩ dɔ̀ fɔ. 39Ahabi wade powu gɛtɛ ɛ mɛ wo bugyu buu gedi gaanɩ, fɩya ma wo bugyu baanɩ baade-mɛlɛ powu, egyu-dɩrɛ dɩkpaara gɛtɛ e sere, ma gɛtɛ ɛ ka etola dɩnya ɛ walɩ daanɩ, ma atele gɛtɛ ɛ sa yɩ ɔkɛma fɔ, bɛ ŋwara yɩ bɛ sa Isareli begyu-dɩrɛ baade-dɩrɛ yaakpa fɔ yaanɩ. 40Ahabi e ku gɛ be lò wɔ wotu ɛbɛ boo gelòkʋn, gɛ wobi Ahasiya e di bugyu e sere wɔ gɩsɩrɩ.
Yuda wogyu Yehosafati
41Asa wobi Yehosafati e di bugyu Yuda, Isareli wogyu Ahabi gɩkyan-naafɛ gaanɩ. 42Yehosafati e di bɩkyan dikpilin ma fwo-ton, pɛ gɛ e di bugyu. Gɛ ɛ nya Yerusalem wo koro bɩkyan dikpilin ma ton. Wɔna diyere n di Asuba, Silihi wobi-nanɩbi fɔ. 43Yehosafati ɛ bɔ ɛ mɛ gɛ anlɛ wote. Ɛ mɛ ade gɛtɛ ɩ̀ tʋna Yahwe bʋnʋn. Mɔ en gbena asʋmakʋn fɔ, gɛ bɛnɩ fɔ bɛ̀ sangba bɛɛ tɛ gedi, gɛ bee kuma olifwi dʋkɔ. 44Gɛ olila wʋ̀ sara Yehosafati ma Isareli wogyu boo getite. 45Ade-kurumakyɛɛ gɛtɛ Yehosafati ɛ mɛ, ma ɛyɩ gɛtɛ ɛ mɛ wo bugyu buu gedi gaanɩ, ma wakpa gɛtɛ ɛ kpà powu, bɛ ŋwara yɩ bɛ sa Yuda begyu-dɩrɛ bɔɔ gɩkpa-dɩrɛ fɔ gaanɩ. 46Gɛ e tiri beteni ma bɛnanɩ gɛtɛ bɛɛ mɛ afotoli-de akpen-kwo yaanɩ gɛtɛ be kuruma wote Asa bugyu bʋʋ gama fɔ powu. 47Ɔya wʋtɔkɔ waanɩ fɔ, Edom gɩfɩɩ gɩn ma egyu-dɩrɛ, okoro egyu wɔmalɛ gɛ Yuda wogyu e tiri ɛ sɩ̀ gɛtɛ ɛ̀ɛ̀ nya gii koro.
48Fɔ Yehosafati ɛ mɛ gɩyɛ gɩɩ-ɩkʋlɩ gɛtɛ ì we anlɛ Tarisisi woyo fɔ, gɛtɛ yàà tɩ̀ san Ofiri, ɩ ma ka sɩka-sɩya, mɔ ɩn talɩ ɩ san, yema ɩ gbena Esiyon-Geberi ditele daanɩ. 49Ɔkʋna wʋtɔkɔ waanɩ fɔ Ahabi wobi Ahasiya ɛ dɔ̀ Yehosafati alan, <<Yɛ mɩɩn bɛnɩ bàà tɩ̀ sara ma bɛnɩ ɔkʋlɩ fɔ fwaanɩ bɛ san.>> Mɔ Yehosafati e terema.
50Yehosafati e ku gɛ be lò wɔ wotu ɛbɛ boo gelòkʋn Dafidi-Ditele daanɩ. Gɛ wobi Yehoram e di bugyu e sere wɔ gɩsɩrɩ.
Isareli wogyu Ahasia
51Yuda wogyu Yehosafati wɔ gɩkyan fwo-kwarankɩfɛ fɔ gaanɩ Ahabi wobi Ahasiya e di Isareli bugyu Samariya ditele daanɩ, gɛ ɛ nya Isareli wo koro bɩkyan bʋnyɔɔ. 52Ɛ mɛ ade-kpen Yahwe bʋnʋn, yema ɛ tɛrɛma wote ma wɔna, ma Nebati wobi Yerobwam gɛtɛ ɛ yɛ Isareli bete be gyu ade-kpen yaanɩ fɔ boo-isele. 53Ahasiya ɛ sʋma Baali, gɛ ɛ sa Yahwe, Isareli wo Wurubwarɛ owurufa, anlɛ gɛtɛ wote ɛ bɔ ɛ mɛ fɔ.
נבחרו כעת:
1 Begyu-dɩrɛ 22: ADE
הדגשה
שתפו
השווה
העתק
רוצים לשמור את ההדגשות שלכם בכל המכשירים שלכם? הירשמו או היכנסו
2025 Ghana Institute of Linguistics Literacy and Bible Translation