2 Begyu-dɩrɛ 9
9
Yehu e di bugyu Isareli
1Duwi dɩkɩ Yahwe wɔtabʋrʋlɛ Elisa e kpèlè ɛtabʋrʋlɛ ɛkɩ e ye Yahwe bɛtabʋrʋlɛ fɔ baanɩ gɛ ɛ dɔ̀ wɔ alan, <<Li aa gɛgba gɛtɩɩ, fɔ àà ka parantʋwa gɛtɛ bʋnɔ bʋ̀ sa waanɩ fɔ ton, fɔ àà san Ramoti Gileyadi. 2Gengyi àà ma gyu dʋkɔ fɔ, bugiti Yehosafati wobi-teni Yehu gɛtɛ è di Nimsi wɔnana fɔ. Kpèlè wɔ ye wɔwɔlɔn ɛbɛ baanɩ san dikwo daanɩ. 3Fɔ àà ka parantʋwa fɔ àà da bʋnɔ fɔ lù wo diyu dii koro fɔ àà dɔ̀ wɔ alan, <Yahwe ɛ dɔ̀ alan, Na sʋrʋ wɔ̀ bʋnɔ àà be di bugyu Isareli.> Fɔ àà tana dɩtana fɔ àà serenti ye dʋkɔ bilenten.
4Okoro ɛsaranyan fɔ, gɛtɛ è di Wurubwarɛ wɔtabʋrʋlɛ wɔsaranyan fɔ, ɛ san Ramoti Gileyadi. 5Gɛtɛ ɛ ma gyu fɔ, e we bɩtà bʋʋ bɛtàlɛ bɔɔ bɛndɩrɛ be tuma bè sɩ̀, gɛ ɛ dɔ̀ baanɩ ɛkɩ alan, <<Ǹ ba ɔtʋn tɛ wɔ̀, ɛndɩrɛ.>>Gɛ Yehu e lila wɔ alan, <<Taanɩ ɛ̀ mɔmɔ?>>Gɛ e tiri wuunyun alan,
<<Awɔ, ɛndɩrɛ.>>
6Gɛlɛ wuu koro, Yehu ɛ tɔ, gɛ ɛ da dɩkpaara. Ɛwʋ gɛ ɛtabʋrʋlɛ fɔ ɛ dà bʋnɔ fɔ e lù Yehu diyu dii koro gɛ ɛ dɔ̀ alan, <<Yahwe, Isareli wo Wurubuarɛ alan, <Na sere wɔ̀ bugyu na tɛ Wurubwarɛ bɛnɩ, Isareli bete. 7Wù di gɛtɛ àà muru aafonte Ahabi dɩkpaara. Gɛlɛ wuusele gɛ nan ka n tiira Yesebeli giten gɛtɛ e wolo mɩɩn bɛtabʋrʋlɛ ma Yahwe bɛsʋmalɛ powu fɔ. 8Wù di gɛtɛ Ahabi dɩkpaara powu dàà muru. Nan wolo Ahabi dɩkpaara diibi-teni-kamasɛ, bɛdɩ ma bengyebi powu n ye Isareli. 9Nan mɩna Ahabi dɩkpaara anlɛ gɛtɛ na mɩna Nebati wobi Yerobowam ma Ahiya wobi Baasa baa-kpaara fɔ. 10Gɛ bɛkpɛɛ nan kɔrɔ Yesebeli Yesereli gɛtʋnkwaa gii koro, gɛ ɛkɩ ɛn nan lò wɔ.> >> Ɛwʋ gɛ ɛ tana dɩtana fɔ, gɛ e serenti. 11Gɛtɛ Yehu e biri ɛ san wɔwɔlɔn ɛbɛ fɔ baakʋn fɔ, baanɩ ɛkɩ e lila wɔ alan, <<Ade ɩkɩ ɩ ba abɛɛ? Anʋn gɛ ɛbalanɩ nyawɔ ee len aakʋn?>>Yehu e tiri wuunyun alan, <<À nyɩ ete fɔ, ma wade dɔ̀lɛ.>>
12Gɛ bɛ dɔ̀ wɔ alan, <<Aa gban gɛ. Dɔ̀ tɩ ade gɛtɛ ɩ̀ sa waanɩ.>> Gɛ Yehu ɛ dɔ̀ alan, <<Ade gɛtɛ ɛ dɔ̀ mɩ n di alan, Yahwe alan, Na sere wɔ̀ bugyu Isareli.> >>
13Gɛ disere-kɩlɩn fɔ, Yehu wɔwɔlɔn ɛbɛ fɔ bɛ yɛraba baayan bɛ sɩ̀ wɔ bɩsɩrɩ bʋʋ gatɩn. Bɛ fʋ̀n dɩkantan gɛ bɛ gbɛrɛ afala bɛ dɔ̀ alan, <<Yehu è di egyu>>
Yehu e wolo Yoram ma Ahasiya
14Ɛwʋ gɛ Yehosafati wobi Yehu gɛtɛ è di Nimsi wɔnana fɔ, ɛ ka amɩnlɛ alɛ eè wolo Yoram. 15Mɔ fɔ, be pira Yoram akpa fɔ yaanɩ, gɛ e biri ɛ ba Yesereli ɛ̀ɛ̀ bɛ kya wo koro geyeba. Gɛlɛ wuu koro Yehu ɛ dɔ̀ alan, <<Gengyi gɛlɛ gɛ wʋʋ mɛ wɔ fɔ, kara tɛ osele ɛnɩ kɩlɩn ɛ̀ɛ̀ sarɩ ye dɩtele fɔ daanɩ ɛ̀ɛ̀ ma dɔ̀ ade fɔ Yesereli ditele.>> 16Ɛwʋ gɛ ɛ bʋn ɛ sara wo tiiramisan waanɩ gɛ ɛ da Yesereli, yema Yoram ɛ̀ sa dʋkɔ ee tuna, gɛ Yuda wogyu Ahasiya ɛ da dʋkɔ ɛ̀ɛ̀ ma nya wɔ. 17Ɛwʋ gɛ ɛdɩyɛlɛ gɛtɛ è yela Yesereli dikwo ma abo fɔ dii koro fɔ e we Yehu ma wɔ bɩtà bʋʋ bɛtàlɛ bɛɛ ba, gɛ e kpen alan, <<Na we bɩtà bʋʋ bɛtàlɛ bɛkɩ bɛɛ ba.>>
Gɛ Yoram ɛ fa alan, <<Sa dibengyi dɩɩsaralɛ ɛkɩ ɛ̀ɛ̀ ma lila bɛ alɛ bɛɛ ba olila waanɩ abɛɛ?>> 18Okoro dibengyi dɩɩsaralɛ fɔ ɛ ma tuma Yehu gɛ ɛ dɔ̀ wɔ alan,<<Egyu ee len ɛ̀ɛ̀ nyɩnla alɛ ɩɩ ba olila waanɩ?>>
Gɛ Yehu e tiri wuunyun alan, <<Ɛwʋ wun di aade. Tɛ mɩ osele.>>Ɛdɩyɛlɛ fɔ ɛ dɔ̀ egyu fɔ alan, <<Dibengyi dɩɩsaralɛ fɔ ɛ ma gyu baakʋn, mɔ ɛn taa ba.>> 19Okoro egyu ɛ sa dibengyi dɩɩsaralɛ-nyɔɔfɛ. Gɛtɛ ɛ ma gyu baakʋn fɔ, ɛ dɔ̀ bɛ alan, <<Egyu ee len ɛ̀ɛ̀ nyɩnla alɛ ɩɩ ba olila waanɩ?>> Gɛ Yehu e tiri wuunyun alan, <<Ɛwʋ wun di aade. Tɛ mɩ osele.>>
20Ɛdɩyɛlɛ fɔ ɛ nɩ dɔ̀ egyu fɔ alan, <<Dibengyi dɩɩsaralɛ fɔ ɛ ma gyu baakʋn, ɛwɔ mɔ ɛn taa ba. Ɛnɩ gɛtɛ è gyegeye bɔɔ bʋnʋn fɔ ɛɛ kya tiiramisan fɔ anlɛ ɛbalanɩ. Bɔɔ ka nya Nimisi wobi Yehu!>> 21Ɛwʋ gɛ Yoram ɛ dɔ̀ alan, <<Ɩ pɩna mɩɩn tiiramisan fɔ ɩ tɛ mɩ.>>Gɛtɛ bɛ pɩna tiiramisan fɔ be were fɔ, Isareli wogyu, ma Yuda wogyu Ahasiya bɛ ka ɛkamasɛ ma wo tiiramisan, bàà ma tuma Yehu. Be tuma wɔ gɛtʋnkwaa gɛtɛ gì di Yesereli-te Naboti woyo fɔ gaanɩ. 22Gɛtɛ Yoram e we Yehu fɔ e lila wɔ alan, <<Yehu, à ba olila waanɩ?>>
Gɛ Yehu e tiri wuunyun alan, <<Gɛtɛ aana Yesebeli bekpen ma wɔ gʋsɔ ɩ̀ sa ma ɛtɩ lɛ, lan gɛ olila waà talɩ wʋ sara? 23Yoram ɛ dɔ̀ Ahasiya alan, <<Bɛ gban tɩ>> gɛ e fi wo tiiramisan, gɛ e serenti. 24Ɛwʋ gɛ Yehu e tiri wɔ gyangarɩ, gɛ e tiira wʋ kin-kin e sere Yoram wagongyi yii getite. Gɛ gɩsɩnta fɔ gɩ ma sere woturu waanɩ, gɛ ɛ nʋ̀n ɛ kpasa wo tiiramisan fɔ. 25Gɛ Yehu ɛ dɔ̀ wɔndɩrɛbi Bidika alan, <<Ka wo gikpena fɔ fun fɩna Yesereli-te Naboti gɛtʋnkwaa nyagɩ gaanɩ. Kʋna gɛtɛ ɛtɩ ma awɔ tì si tiira-mɩ san waanɩ tɩ̀ tɛrɛma Yoram wote Ahabi, gɛ Yahwe ɛ dɔ̀ wade alɛ, 26<Walan na we gɛtɛ Ahabi e wolo Naboti ma wobi, gɛ na dɔ̀ na sɩ̀ gɛtɛ Nan yɛ wɔ̀ èè le wù gutoro gɛtʋnkwaa nyagɩ gaanɩ nfan.> Okoro ka wɔ fun fɩna gɛtʋnkwaa gɩtɔkɔ gaanɩ anlɛ gɛtɛ Yahwe ɛ dɔ̀ fɔ.>> 27Gɛtɛ egyu Ahasiya e we ade gɛtɛ i sere fɔ, e serenti ɛ san Bati-Hagan. Yehu ɛ ka afala e berema wɔ alan, <<I wolo ɛwɔ mɔ!>> Gɛ ɔkʋna gɛtɛ ɛ̀ sa wotiiramisan waanɩ ɛɛ fɔrɔ Guri gɛtɛ wʋ̀ gbɛma Iblim ditele fɔ, bɛ tà gɩtà be sere wɔ, mɔ ɛ talɩ e serenti ɛ ma gyu Megido ditele, gɛ e ku dʋkɔ. 28Gɛ wɔ bɛsaranyan be birima wo gikpena bɛ sa tiiramisan fɔ waanɩ bɛ san Yerusalem, gɛ be lò wɔ wote ɛbɛ bɔɔ gɩsàn gaanɩ Dafidi Ditele. 29Ahabi wobi Yoram gɩkyan fwo-dɩkɩfɛ gaanɩ fɔ, be sere Ahasiya bugyu Yuda.
Yesebeli di ku
30Ɛwʋ gɛ Yehu ɛ san Yesereli. Gɛtɛ Yesebeli ɛ nʋn alɛ Yehu e gyu Yesereli fɔ, ɛ kpa-kpa wɔ bʋnʋn, gɛ ɛ pɩna wo duyu kanpɛ, gɛ è yela ɛɛ nya osele waanɩ ma nfansɩrɩ. 31Gɛtɛ Yehu e gyu digyu-kpaara fɔ diitunu fɔ, Yesebeli e lila wɔ alan, <<Awɔ ewololɛ bɛnɩ, awɔ Simiri, à ba olila waanɩ?>> 32Yehu ɛ bʋma bʋnʋn ɛ nya wɔ nfansɩrɩ fɔ waanɩ, gɛ ɛ fa alan, <<Ɛnyan nan yela mɩɩn gama? Ɛnyan?>> Ɛwʋ gɛ bɛsaranyan bɛnyɔɔ abɛɛ besiyee gɛtɛ bɛɛ mɛ gʋtʋn digyu-kpaara fɔ bɛ nya wɔ ma nfansɩrɩ, 33gɛ Yehu ɛ dɔ̀ bɛ alan, <<I fun wɔ ɩ fɩna gɛtʋnkwaa!>> Gɛlɛ wuu koro be fun wɔ be ye ma nfansɩrɩ fɔ bɛ fɩna gɛtʋnkwaa, gɛ wɔnkalan wʋ fɩntɩn wu lù ɔpɔrɩ ma abengyi fɔ gɛtɛ i kyɩkya wo gikpena fɔ yii koro. 34Ɛwʋ gɛ Yehu e gyu digyu-kpaara fɔ daanɩ, gɛ e di gɛ ɛ nʋn. Gɛ ɛ dɔ̀ alan, <<Ɩ nya ɛna gɛtɛ bɛ fwala fɔ wo koro, fɔ yàà lò wɔ yema è di gɛ egyu wobi-nanɩ.>> 35Mɔ gɛtɛ bɛ san bàà ma lò wɔ fɔ, ben we gɩnyankɩ fɩya ma wo duyu dɩɩ dɩnankʋba, ma wɔ bɩsɩrɩ, ma walɔ. 36Gɛtɛ be biri bɛ ma dɔ̀ Yehu fɔ, ɛ dɔ̀ alan, <<Ade nyayɩ gɛ Yahwe ɛ dama wɔsaranyan Tisibe-te Eliya wo koro ɛ dɔ̀ alɛ, <Gɛtʋnkwaa gɛtɛ gɩ̀ dɔ Yesereli fɔ gii koro gɛ bɛkpɛɛ baà kɔrɔ Yesebeli gɩnan. 37Gɛ wanankʋba yaà yasɩ Yesereli gɛtʋnkwaa gii koro gɛtɛ ɛkɩ ɛn nan we ɛ nyɩnla alɛ Yesebeli wɔ lɛ.> >>
נבחרו כעת:
2 Begyu-dɩrɛ 9: ADE
הדגשה
שתפו
השווה
העתק
רוצים לשמור את ההדגשות שלכם בכל המכשירים שלכם? הירשמו או היכנסו
2025 Ghana Institute of Linguistics Literacy and Bible Translation