Éxodo 38
38
Bronce caje usi rori ichacuruhane
1Jerichanejeein jetaotechu, acasia caje usi rori ichaae Besalee. Jaratono aina ita caanejiane coina jetaote, coroata metoro le coarata le jeracuru. Jana rai nucuuno jetaote, le metoro le coarataje. 2Nii jenaa nauhane nainecojoain jetaote, jenaain jicho ichaae, nii roriicha que temuraain, bronce que carijiaain. 3Nitohaneein ichaain jetaote, nii rori corujeleeuru que, ajane curuuru, faracuru, eraurucuru, cosharacuru, usi nenajanu, naaojoainuri ichaae, satiin bronce caje. 4Chaaen jetaote, bronce caje, iniho asichonanajan ichaain, nii rori auha fautaeriin, nii rori cataaun ujoaain te. 5Nii bronce caje, iniho asichonanajan, niicha ichai lucuuro que nihane coina jetaote, jenaa nii lucuurone nainecojoain, jenaain jachuujianaain mucuera ichaae, cuhane cobairichane enohane coina. 6Nii baiha jetaote, acasia caje, nii rori cobairichananu ichaain, bronce que carijiaain, 7nii rori uuriniha nenacaauru mucueracuru cuhane, nii cobairichanacuru enoae, que mucuhin amanaa nainecuruhane coina. Nii altar jetaote jae tabara caje cajoon rijiijien cuhani teein.
Bronce caje, ojoaichu ichacuruhane
(Ex 30.18)
8Nii Cana Coaunera turunajaun, loanari bacuujuaniha nenacaauru, enecuru rai bronce caje nenaa espejo raain jetaote, nii bronce caje ojoaichu jae Besalee, nii jeelai bronce que temurateein.
Santoario airichai ichacuruhane
(Ex 27.9-19)
9Santoario airichai ichaain jetaote, enoto mitu nichaji coarajeein, cana raotono nichaji que, jenachoonca saoqui metorohin, lino aohin ichanohin teroracae, nii airichai bujuanuque Besalee. 10Coroata chooncaain temura, coroata chooncaain nujuan, naaonjoain jetaote, bronce caje ichanoinihane jana, rai mucuera aina jachuujianaain nenaa, naaojoain jetao, coata plataneein nenaa caje ichanohine. 11Enoto mitu nichaji coarajeein cana ajaabiji nichaji que jetaote, nii bronce caje coroata chooncaain temura, coroata chooncaain nujuanu, coroata chooncaain mucueracuru, coroata chooncaain coata plataneein nenaa caje ichanohin jachuujianai, naaojoain que jetao, nii jenachoonca saoqui metorohin, lino aohin ichanohin teroracae bujuanu que. 12Le chooncaain temura, le chooncaain nujuanu, naaonjoainu que teroracanojoineein jetaote ne, enoto mitu nichaji que, coroata choonca coroata metoro cataaun uujeein bujuanu. Nii nujuan mucuera aina, jachuujianaain nenaa jetaote, coata plataneein nenaa caje ichanohine. 13Jerichanejeein jetaote, enoto soo nichaji que, coroata choonca coroata metoro cataaun uujueein ne, rai bujuanu. 14Le jeraji enonaanaja bacuujua que jetaote ne, caaunsi metoroneein rai bujuanu, nichajai temura, nichatajaain nujuan, naaojoai que teroracanojoineein. 15Nii jauriaanejeein nenaa bacuujua jeraniha, que jauhequiin nenaa airichai bacuujua que jetaote, jerichanejeein caaunsi metoro neein teroracanojoine bujuanu, nichatajai temura aina, nichatajai nujua que. 16Satiin lino aohin ichanohin caje jetaote, nenaane nii santoario airichai bujua, tinonoritiin nenaa. 17Nii rai nujuan temuraneein nenaa jetaote, bronce caje ichanoinihane jana, nii nujuan mucueracuru aina jachuujianaain nenaa jetao, coata plataneein nenaa caje ichanohine. Nii bujua nujuaauru macohichuru jetaote, coata plataneein nenaa que carianojoine. Satiin nii airichai bujua nujuaneein nenacaauru jetaote, coata plataneein nenaa caje, jachuujianaain nenaa siri.
18Nii cajione beraurosiojoai, cajione lanaajiojoain, cajione lanajain, lino aohin caje ichanohin, naaojoain ichoaae teein jetaote, esinae rauhijiriin, caohachaain ruujuinohineein ichanohine, nii airichai bacuujua enonaanaja bujua. Jerichanejeein nii airichai bujua caanejeein jetaote, iscoon metoroneein rai care, coroata metoro le coaratajeein rai nucuunu, naaojoain nii bacuujua ichaae. 19Bronce caje jenaain ichanohi que temuraquiin jetaote, ne jenaain rai nujuan. Nii jana rai mucueracuru aina jachuujianaain nenaa jetaote, coata plataneein nenaa caje ichanoinihane jana, coata plataneein nenaa que carianojoine, nii nujua macohichuru. 20Satiin nii santoario aina, airichai tinonoritiin nenaa nujuaauru jetaote, bronce caje nejesinane.
Santoario ichacuruhane jaa coatacuru
21Saseredote Aaroon calaohi Itamar jetaote, Moisesa letononeein, nii tonoraain ichaaoruhane coina, Cana Coauneraacha teei, rauhi rucuhecuruhane jaa loanari tabernacolo ichacuruhane coina, niiteeuri coatacuru tijichaain coaraain, raauruha lebitacurune coaaraneein ne.
22Jodaa lauri, Ur ichoala, Uri calaohi Besalee jetaote, nii satiin ichaa Moisesane coina aitoha Cana Coaunerane jaa rijijieein jetao, nii icharaneein ne. 23Daan lauri, Ahisamac calaohi Aholiab jetaote, coroatajaneraneein ne, coata que amihanenaa inaeraneein, cajione ichana inaeraneein, cajione beraurosiojoai, cajione lanaajiojoain, cajione lanajain, lino caje ichanohin cajione caohacha, naaojoainuri ruujuinaa inaeraneein nenaane.
24Satiin nii santoario ichacuruhane coina, nelateneni jetaote, oro nejesina caje ichacure, Cana Coaunera que banijiaaineein nenaa oro caje. Anaaicha nii santoarione jerecuruhane rijijieein jetaote, itolereneein iscoonfasha caaunsi choonca saoqui quiro, nichatachoonca qramoneein ichacure.
25Anaaicha, nii santoario jerecuruhane rijijieein jetaote, cachaauru curuaa janijiin, curuaa laenacuruhane nainecojoain jetao, nichata oharaanca, nichata fasha, lechoonca iscoon quiro, saoqui fasha coroata choonca saoqui qramoneein coata plata raaure. 26Satiin coroata choonca jaanacai caje coaauneein, nii quiricha cuhane acaauru curuaa laenacuruhane jana jetaote, saota fasha, nichata oharaanca, saoqui fashae cachaauru. Nii le cacha cachaauru jetaote, anaaicha santoario jerecuruhane rijijieein, saoqui qramo cataaun uujueein, coata plata teeure. 27Chaaen jetaote ne, santoario temura ichaain, cajione bujuanu teroracaauruhane jaanu temura ichacuruhane coinane maajeein, nichata oharaanca, nichata fasha quironeein coata plataneein nenaa. Satiin, nii coata plataneein nenaa jetaote, lefashai nujuanu temura ichacuruhane jaaneein ne, le temuracuru cuhane, nichata fasha, nichata choonca quironeein niha, nii coata plataneein nenaane jaun. 28Satiin nii cachaauru caje, niicha rai plata caje jetaote, nii jachuujianaain nenaa aina, nujuan ichaain, macohi aina curuaecaain carijiae, Besalee.
29Coroata michoon, nichata fasha, nichata choonca saota quironeein jetaote ne, nii Cana Coaunera que banihateein, nii teeuri bronce. 30Nii bronce caje jetaote, Cana Coaunera aina, turuuruhane jaanu loanari bacuujua temura ichaain jetao, bronce caje rori, bronce caje iniho asichonanajan, satiin nii rori corujeleeuru maajeein ichacure. 31Nii santoario airichai tinonoritiin neeninu nujuan aina temuracurune maajeein ichacure, airichai bacuujua temurane maajeein.
© 2005, 2024, Wycliffe Bible Translators, Inc.