MATA 28
28
MATA 28
1Yɔ holum-ɔ̧t talɔ, yɔ lɛl gɔ gi gaa a dimaas ɔ̧t bi̧i̧l du, Mariyama Magdalaya bɔ hi Mariyama zaa bɔ hi rek Yeesu loorɔ bɔ seeko.
2Yaala Bɛtwalsɛr za siz bɛtha zaa kibl loorbet bɔ bɛrko ɗɔɔt hage. Hɛbt nam gɔ ha̧a̧ltɔnɔ. 3Bɛt-walsɛr bɔ muulɔ gaa an bɛlya̧bsɛ, gbandilɔ wɔ hi buu an bɛlɓatiri. 4Yɔ loor-ookya wɔ hi gbɛn anbɔ hoobha̧a̧hi ha̧a̧l-tɔnɔ, hi bee hi kɔm di an wɔrko. 5Hɔnɛ Bɛtwalsɛr bɔ raa
nɛɛd wɔ a bɔ hoob gi ha̧a̧nɛ, be mɛɛ a nɛ ɓɛɛk Yeesu yɔ hi doog a dɔ̧ɔ̧r ha giya. 6Taa hɛdi, rɛmla ɗund anyɔ da raasinɛ, zaan nɛ see lɛl yɔ da kus nɛ gɛrɛ, 7nɛ wɛɛ nɛ rek nɔɔko nɛ raas walɛsɛrɛ ɔ̧ɔ̧ wɔ a Yeesu rɛmla ɗund wɔrkɛ teesdu, wɛɛ gisin dork a Galile, nɛ rek nɛ gbɛnig hɔ. Hinyɔ gi nɛ an be dɔgsinɛ gii ma bɔ.
8Nɛɛd wɔ hi ɔɔ loorlɛl bɔ nɔɔktɔnɔ hi rek hi hoobo hi hat gbɔɔltɔnɔ, hi nɔɔ hi ren ramsɔ an hi fɔks walɛsɛrɛ ɔ̧ɔ̧. 9Yaala Yeesu zaa dagtin hi nɛɛd wɔ raahi
a seko!
Nɛɛd wɔ hi sɔɔz gi dɔŋdi hi zaglɔ hi wa̧a̧ dɔɔɔ hi ɗɔbsige. 10Yeesu wɛɛ raahi
a bɔ hoob gi ha̧a̧nɛ, rekin nɛ raas yɛ̧ɛ̧ be hiya hi rek a Galile hi gbɛnib hɔ.
11Yɔ nɛɛd wɔ hi reko, laaya wɔ zaadɛya̧ hi ook nɛ loor bɔ hi rek a waal gbɔɔl du, hi fɔks Bɛtmaakwookya gbɔlɛ wɔ hinyɔ daa sɛw. 12Bɛtmaakwookya gbɔlɛ wɔ be, hi mɔks hi Yahuduya ɗɛntɛ wɔ hi wɔya̧a̧ hi loo tus gbɔɔltɔnɔ hi gaa laaya wɔ, 13hi sɔmbihi
a nɛ dɔgɔ a yɔ nɛ gi yoko, Yeesu walɛsɛrɛ ɔ̧ɔ̧ wɔ hii zaa yɛms du hi loo wɔrkɔ bɔ luurɛ. 14Hɛbtzulya bɔ gi lagɔ, wi mɛɛ dɔglyɔ gɔ wi ɗɛɛnige an wi tuusin ya̧a̧rhant du.
15Laaya wɔ hi loo tus bɔ hi woo an hinyɔ hi raahi nɛ be. Dɔgl bɔrɔ ɛmb gɔ a Yahuduya wɔ hi teesdu tuur ɔ̧tigi zulɛ.
16Yeesu walɛsɛrɛ ɔ̧ɔ̧ wɔ koobl daa gbun hi rek a Galile, a ga̧a̧t yɔ da raa nɛ a hí dagtin lɛlɔge. 17Yɔ hi tuur hi gbɛn Yeesu hi zagl di hi ɗɔbsige. Zaadɛ hi tees du hi faak hi kpoos du a gii gɛ, doo za dɔɔmyɔ. 18Yeesu sɔɔzɔ dɔksihi
a Bɛt gaab tɛŋk sɛw a bɛtha hi hɛbtdi. 19Yɔ anbɔ, rekin nɛ wɛɛn dood dɔ̧ɔ̧t waal du sɛw walɛsɛrɛ benɛ. Hotinnɛhi Bɛtmɛmɛ hi Baa nuŋgɔ, hi waaɔ hi Bɛt Mɔkilɔ. 20Goksinɛhi hinyɔ be dɔgsin sɛw hi fɔb dɔglɔ. Yɛrɛ mɛɛn a be gi hi nɛɛ ɔ̧t nuŋg sɛw gi tuur a waalda̧a̧ki. Anbɔ.
Doyayo New Testament © Bible Society of Cameroon, 1991.