KAHTAMYENGHAN 2
2
1 #
Woi 20.11. Hüke wang hei kahtoknyu hüyange iman ükhong üshei shoyangki. 2#Heb 4.4,10.Hüyange nyit shepupa nyih me Kahwange Iye lingpu toisho; hüyange nyit shepupa nyih me Kahwange Iye linge ngaipu üshei jingne nyoi. 3Hüyange Kahwange nyih nyit shepupa te moiman tam; hüyange tüopa-a üjao nyih mei ja ne itte ang, hangjingne tüopa me Iye toi üshei ngaine tamme linge sho, hüyange Iye toloimei.
Ükongwangpu Üne-o Hüopu
4Hüyange hükih-e wangphanga linge ngai. Aope Youngwanpa Kahwange wangphang linge ngaiya peih, 5kahtoknyu me peei hei pee yenang, hüyange phümha weangyong ülick manngai; hangjingne Youngwanpa Kahwange kahtoknyu me üne-o wai mankei tam, hüyange kahtok hamlak jingne kahta ja nehoi yenang; 6hüpoi kahtok üphang mepu lümpem ngaiye kahtok-a team ne tam.
7 #
1 Kor 15.45-47. Tüophei me Youngwanpa Kahwange kahtok-e kahta yaowe ngai, hüyange I nateang me üyin lüo yowe tam, hüyange kahta-a üyin nyuha ja ne meng.
8Tüophei me Youngwanpa Kahwange heong ye me pesha ja, Eden me ling; hüyange tüome Iye yoiye linge ngaipu kahta tüoh. 9#Ütah 2.7; 22.2,14,19.Hüyange Youngwanpa Kahwange shemei yaomapu pee ülam lili jongne tam hüyange ülick ümei ngaine tam. Pesha hotan me üyin phapu pee-o nyim ne tam, hüyange ümengpa hei ümei shingpu pee-o Iye nyim ne tam.
10Yengyin ja pesha team-e yünlak jingne Eden mepu ngai; hüyange tüopa mepu tamme yengyin peli ne meng. 11Üwangpa min Pishon; hatüopawe hon ngohpu Havilah kahtok khongkümpu te neikonne yün nang; 12hüyange tüopa kahtok mepuwa meipu hon; hüyange tüome üpe meipu dellium hüyange onyx toinyu long ngohnang. 13Ni shepupa yengyin min Gihon; hatüowe Cush kahtok khongküm pute neikonne yünnang. 14Hüyange lüm shepupa yengyin minna Tigris, Assyria heong ye me yünnang. Hüyange peli shepupa yengyin-a Euphrates.
15Youngwanpa Kahwange kahta-a woiye peiye Iye Eden pesha hamlak hüyange yomlak jingne tüoh. 16Hüyange Youngwanpa Kahwange kahta te ngao phawe i, “Pesha pee lili mepu nange hüke hahpu oklak; 17hüpoi ümeng ümei shingpu pee mepu nange tah hah; hangjingne nange aope nyih tüopa mepu hahlakei nang lilak.”
18Tüophei me Youngwanpa Kahwange i, “Kahta I shaha ngohlak yemei; Ite jamponglak jingne I phei shupu ja linglakei.” 19Hüyange Youngwanpa Kahwange kahtok mepu kümp oun ütam yahyange phao yinmok üshei hüyange wang awha üshei linge ngaiyange Iye hanghe min me nyiklakei she kahta tangte woiye pei; hüyange kahtawe üyin yinmok te hanghe nyik, hatüo iman min ne meng. 20Hüyange kahtawe nokme tampu yinmok üshei te, hüyange wang awha üshei te, hüyange phao yinmok üshei te min pha; hüpoi kahtapa jingne Ite teijamlak wange ngoipu ja nehoi yetüo.
21Tüophei me Youngwanpa Kahwange lipukih-e shilakpa kahta me ngaine tam,
hüyange I shiye mah;
hüyange shiye ngohwante I mepu hempa waan ja yahyange tüopa meeme mei phei büangne tam.
22Hüyange hempa leakwaan,
hanghepa Youngwanpa Kahwange kahta mepu yah,
tüopawe Iye sheko ja yaowe ngai,
hüyange yha kahta tangte woipei.
23Hüwante kahtawe i,
“Üküm ne hatüowa ü-waan mepu waan,
hüyange ü-mei mepu mei;
Yhate sheko she nyiklak hangjingne yha kahta mepu yah ngai.”
24 #
Mt 19.5; Mk 10.7; 1 Kor 6.16; Eph 5.31. Tüojing ne kahtawe yoi nyu hei pa tüohyange yoi shekonyu phei ja ne mengnang; hüyange imni mei ja nehei menglak.
25Hüyange kahta hei I sheko moini pümkeng me ngoh, hüyangpoi teiwüopu yenangpe ngoh.
נבחרו כעת:
KAHTAMYENGHAN 2: KONYBSI
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.