LU:KKC 23
23
Jisumc Pilatkc Kcra:do:pc Boma:nam
(Met 27.1-2,11-14; Mark 15.1-5; Jo:n 18.28-38)
1Odo ajon appv:dc dagrobamkang, odokkc Bvm Pilatkc kcra:do:pc gva:boto. 2Odokkc Bvm bulu imur murncko cmna lurrobbomkang, scmpc lula: lula, “Ngolu sc tani:scm ngoluk amongkc ope:scm aima:pc ibodopc pa:to, odokkc Kaesarmc murkong bima:dopc lulvgdag ngolum, odokkc ludag Bv avdci Kristo migombv.”
3Odo Pilatbv Bvm tawuto, “Nowvi Jiwukvdv:dok migomdc?” Odo Bv bvm lubito, “Nowcina cdcmpc ludagnc.”
4Odokkc Pilatbv dormo ager gernckvdv:dok bottarya:nc kvdv:dcm luto, “Ngo sc tani:scm oko imurkosin idopc pa:mang.”
5Cmpige:la bulu airu:pc scmpc lula lomkang, “Bv tani:kvdv:dcm luwurlvgdag, Judiang appv:do luyirgo:la, Galildokkc so amo:so:pci.”
Jisumc Herodkolo:pc Mclvgnam
6Pilatbv cdvlo cdcm tattoji, bv tani:dc Galildokkcnci olokkcma:yc tawuto. 7Odokkc Bv Herodkc amo:du:tc:dokkc cmna bv kinna:yam, bv Bvm Herodkolo:pc mclvgto, odo ayirdo avdci Jerusalemdo dungai. 8Cdvlo Herodbv Jisumc ka:begtoji, bv airu:pc mc:pokang, kapila:nc bv cdvlailokkcbong Bvm ka:lv:la dungai, kapila:nc Bvk agomcm bv tadla dungai, odokkc bv Bvk gernam kanggodko ka:pc cmna mc:la dungai. 9Cdcmpila bv Bvm tawunam agomko asudkopc tawuto; ckvdaggom Bv okkomsin lulatsutomang. 10Dormo ager gernckvdv:dok bottarya:nc kvdv:dc odokkc agom adgabnc kvdv:dc kcra:do dagla dungai, Bvm kvnggv:pc aimang cmna lubila. 11Odokkc Herodbv bvk mimag monc kvdv:dokki Bvm aima:n cmna luto odokkc ipusire:la ito; odokkc Bvm kvnggv:pc kangkanpc gcnam bomnamcm moru:-moba:lvgdopc lulvgge:la, Pilatkolo:pc mclatlvgtoku. 12Odokkc, Herodbv:la Pilatbv anyidc ajonkumsupc odo longcpakdokkc ikang, kapila:nc odo longcdok po:pcdo buluk akondc akondokki mirupc imvnsula dungai.
Jisumc Mokedopc Lulvgnam
(Met 27.15-26; Mark 15.6-15; Jo:n 18.39—19.16)
13Pilatbv odo dormo ager gernckvdv:dok bottarya:nc kvdv:dcm lckopc gokkumsuto odokkc tani: kvdv:dok migom donckvdv:dcm, 14odokkc bulum lubito, “Nolu sc tani:scm ngokkolo:pc sc:ko tani:kvdv:dcm aima:pc imurko ila gvbonckoncmpc gva:botak; odokkc noluk kangkolo luka:la kangge:la, ka:tok noluk lugc:lvgnam atv imurkosin Bvkkolo pa:tomang; 15Herodbv:sinci pa:tomang; kapila:nc bv ngolukkolo:pc Bvm mclatlvgtakku ka:toka, Bv sipcnam lcgangc oko imurkosin imang; 16Ngo cdcmpila Bvm dcmge:la mclennvgycku.” 17Cdcmpidodcm porobdo bv buluk lcga:pc tani:ako mclennvgbikupcnammai.
18Cmpige:la bulu appv:dc lckko:pc jc:sangkang, “Sc tani: scm la:paktok, odokkc ngolum Barabba:mc” mclennvgteikuka 19tani: ako sc:ko nogordok migom agom tadma:pc imur inam lcgangc, odokkc tani:ko mokega:lok makana:lo tumtungaji.
20Pilatbv lckoda bulum luto, Jisumc mclennvgkupc cmna; 21Cmpige:la bulu jc:robbomkang, “Kuruslo moketok, kuruslo Bvm moketok!”
22Lcwumkoda bv bulum luto, “Kapila, oko imurcm Bv iton? Ngo Bvm sipcnam oko imurcmsin Bvkkolo pa:tomang; ngo Bvm cmpidag dcmge:la mclennvgycku.”
23Cmpige:la bulu kvnggv:pc lomkangai, bottapc jc:batla Bvm Kuruslo moketoka cmna lula jcngkang. Odokkc buluk jc:namkvdv:dc jcnggumbomkang. 24Cmpige:la Pilatbv lunamko luto jc buluk manamdcm bipcnammcbong. 25Bv migom ager imurge:la:la tani: mokela:yam makana:lo lvgnam tani:dcm mclennvgtoku odokkc, sc:komc bulu makaji; cmpige:la Jisumc buluk makamdcmpc bulukkolo tolvgto.
Jisumc Kurusdo Pvtkenam
(Met 27.32-44; Mark 15.21-32; Jo:n 19.17-27)
26Odokkc bulu Bvm gvcrbomna gvnamc, bulu Sireneolok Simom cmnamko sogabto, sc:kobv do:lu:dokkc gvdungaji, odokkc bvk tayc:do kurusdcm jonggc:lvgto, Jisukc lcdulo cdcm jo:bomna gvdopc.
27Odokkc odopc bottcru:nc tani:kcrcngko Bvk lcdulo yadmvnna gvkang, odokkc nc:ng tani:kvdv:dc sc:kobulu kaban banna Bvk lcgangc v:tombangki:la kabka:ji. 28Cmpige:la Jisubv bulum nge:latsuge:la luto, “Jerusalemdok omckvdvnga, ngok lcgangc kabyoka, cmpige:la noluk avkc lcgangc odokkc noluk ommang kvdv:dok lcgangc kaptoka. 29Kapila:nc ka:toka, longckvdv:dc pvnga:yc cdvlo bulu luycji, ‘Ommangcm oma:nc kvdv:dc gernc-pu:nc, odokkc cdc cdvlosin ommang oma:nc kvdv:dc, odokkc cdc cdvlosin anyuk sunma:nc kvdv:dc!’ 30Odo bulu adi:kvdv:dcm lurobbomyc, ‘Ngoluk tayc:lo orumbomteika;’ odokkc adji:nc adi:kvdv:dcm luyc, ‘Ngolum pukombomtei.’ 31Kapila:nc cdvlo vsvngkvdv:dc le:ycnc bulu cdcm imvlo, cdc sandodcm bulu okkom iycn?”
32Anyikoda, migom ager sc:kobulu imur inna:ji, Bvk lcdulo mokekapc gvboto. 33Odokkc Mittuk Tublong cmko mo:di:do:pc cdvlo bulu gvpv:toji, odo bulu Bvm Kuruslo pvtketo, odokkc imur inckvdv:dcm, ako lagbvgpc odokkc ako lakkepc. 34Odo Jisubv luto, “Abba, bulum mc:yinsutoka; kapila:nc okkom idu:song bulu kinmang.” Odokkc bulu Bvk gcnam attarkvdv:dcm orpansupc cmna ko:riycm crto. 35Odokkc dagla du:nc tani:kvdv:dc, ka:la dungai. Cmpige:la migom donckvdv:dc Bvm yvrka:la luto, scmpc lula, “Bv ammem moturto; cmpige:la Bvm avycm motursumotok, Bv Ru:ncpvnckc Kristobv:mvlo, Bv balennamdc:mvlo!”
36Mimagmonc kvdv:dc:gom Bvm luyoluka:to, gvangge:la Bvm siroka:ngcm bige:la, odokkc scmpc lula, 37“No Jiwudi:kvdv:dok Migomcmvlo, no avyc motursukvtoka!”
38Bvk tayc:to abvgkosin pvdlvgtungai, “sc:na Jiwudi:kvdv:dok Migomdc.” 39Imur incdok akonc sc:kom ragjonna lc:tungaji Bvm tawuto, “Novng Kristobv:ma:lang? No avyc motursutoka odokkc ngolumsin!”
40Cmpige:la akondc bvm morvdla scmpc lula luto, “Ru:ncpvncmc no pcsoma:nci, nom lckko:pc mokemotu:la? 41Odokkc ngolum aropakpci mokeru:pcnampc kcba: banggapto; kapila:nc ngoluk inam lcgangc ngolu pa:pcnamdcm pa:dung; cmpige:la sc tani:sc okkomsin imurmang.” 42Odokkc bv luto, “Jisua, ngom no cdvlo migom dokodo gva:yckuji mc:pa:langka.”
43Odokkc Bv bvm luto, “Aroru:pc, ngo nom lubidung, sillung no ngok lcdulo taycng amo:to du:mvnyckupc.”
Jisukc Sinam
(Met 27.45-56; Mark 15.33-41; Jo:n 19.28-30)
44Odo ayir akkcng dagabong, odokkc mo:pv among appv:dc konang ayirdo:pc, do:nyc ka:lenma:la; 45odokkc kumko okumdok sorkomnam gasordc tagnyikopc bedkekang. 46Odo Jisubv, bottcru:pc jc:la kabla luto, “Ba:bow nok alaglo ngok yallom tolvgdung!” Odokkc Bv cdcm luge:la Bv ngatcrsuto. 47Cdcmpidodcm mimag monc lvngkolok gvgurboncdc kapc ika:ji cdcm kangge:la, bv Ru:ncpvncmc aipai bito, odokkc luto, “Aropakpc sc tani:sc imurkama:nckkai!”
48Odokkc cdcm ka:nc yadkumsunc tani: appv:dc, kapc ika:ji bulu kangge:la, okumpc buluk angkcngkvdv:dcm kvgsukvgsula gvpakkangku. 49Odokkc bvk kangkin-tadyin appv:dc odokkc Galildokkc Bvk lcdulo gvmvnnc nc:ngkvdv:dc mo:tcngo:pc dagla du:to odokkc appv:dcm ka:to.
Jisumc Agolo Lc:nam
(Met 27.57-61; Mark 15.42-47; Jo:n 19.38-42)
50Cdcmpidodcm Josep cmnam tani:ko Jiwudi:kvdv:dok nogor Arimotia:dokkc dunggai. Bv kcba:lok tani:kai, odokkc ainc dormokanc tani:kai, 51sc:kobv buluk mc:namclang agerkvdv:do tolvgmanggai, odokkc bv Ru:ncpvnckc migom doko mo:pvdcm toya:la dungai. 52Cdc tani:dc: Pilatkodo:pc gva:to odokkc Jisukc sima:dcm koto. 53Odokkc bv cdcm la:yige:la cdcm gasorki yetto, odokkc Bvm vlvngcm pvtkora:nam agokolo lc:to, okolo sc:kosin cdvlosin lcngkvmangai. 54Cdc Mosvsunanc longgai, odokkc yodla ager germa:pc du:nanc longcdc a:dungaboi.
55Bvk lcdudo Galildokkc gvmvnnc nc:ngkvdv:dc gvmvnto, odokkc agodcm ka:to, odokkc kapc Bvk sima:dcm lc:toji, 56Odokkc bulu gvlattoku, odokkc yonnam tulangcm mosv:to.
Lulvg lukamdcmpc bulu yodla ager germa:pc du:do longcdo du:tedla du:to.
वर्तमान में चयनित:
LU:KKC 23: MISIBSI
हाइलाइट
शेयर
कॉपी
Want to have your highlights saved across all your devices? Sign up or sign in
Mising New Testament - ANU LUGOD
Copyright © 2001 by The Bible Society of India
Used by permission. All rights reserved worldwide.
