Tongo nda ti aye 11
11
Kota da so ayo akpo le ti nduzu
1 Azo ti ndö ti sese kue ayeke tene gi yanga ti kodro oko; atënë ti yanga ti ala kue ague gi oko. 2Me na hongo ti azo ni na mbage ti To, ala wara mbeni sese ti lando na kodro ti Shinear si ala duti daa. 3Ala tene na popo ti ala, atene: “E londo, e gboto abiriki, e zö ni.” Ala mu abiriki ni tongana atêne ti da, ala mu gudron tongana potopoto. 4Na pekoni, ala tene na popo ti ala, atene: “E londo, e leke mbeni gbata; e leke mbeni kota da so li ni ayo, akpo le ti nduzu. Tongaso si iri ti e awu si e kangbi na ndö ti sese kue pepe.”
5KOTA GBIA azu ti baa gbata ni na da so ayo na nduzu, so amolenge ti Adam ayeke leke ni so. 6Lo tene: “Mo baa awe? Ala kue ayeke gi mara oko; ala kue ayeke tene gi yanga ti kodro oko. Kozo kua ti ala so ala yeke sara ni so laa? Ye so ala leke na be ti ala ti sarango ni so, fadeso mbeni ye ti kangango lege na ni ayeke daa pepe! 7Tongaso e zu, e buba ya ti yanga ti kodro ti ala si mbeni zo akiri ama tënë so mba ti lo atene na lo pepe!” 8Gi na ndo so laa KOTA GBIA akangbi ya ti ala na ndö ti sese kue si ala zia lege ti sarango gbata ni. 9Ndani laa a di iri ti ndo ni so Babel, ngbanga ti so na ndo so laa KOTA GBIA abuba ya ti yanga ti kodro so azo ti sese kue ayeke tene. Na ndo so nga laa KOTA GBIA akangbi ya ti ala na ndö ti sese kue.
Ahale ti Sem ngbii asi na Abram
10Tënë ti sewa ti Sem ayeke tongaso: Sem ayeke na ngu ngbangbo oko si lo du Arpaksad; ngu use na peko ti ngu so asuku amu ndo kue si lo du lo. 11Na peko ti dungo Arpaksad, Sem aduti na gigi ngu ngbangbo oku. Lo du amolenge-koli na amolenge-wali.
12Arpaksad ayeke na ngu baleota na oku si lo du Shela. 13Na peko ti dungo Shela, Arpaksad aduti na gigi ngu ngbangbo osio na ota. Lo du amolenge-koli na amolenge-wali.
14Shela ayeke na ngu baleota si lo du Eber. 15Na peko ti dungo Eber, Shela aduti na gigi ngu ngbangbo osio na ota. Lo du amolenge-koli na amolenge-wali.
16Eber ayeke na ngu baleota na osio si lo du Peleg. 17Na peko ti dungo Peleg, Eber aduti na gigi ngu ngbangbo osio na baleota. Lo du amolenge-koli na amolenge-wali.
18Peleg ayeke na ngu baleota si lo du Reu. 19Na peko ti dungo Reu, Peleg aduti na gigi ngu ngbangbo use na gumbaya. Lo du amolenge-koli na amolenge-wali.
20Reu ayeke na ngu baleota na use si lo du Serug. 21Na peko ti dungo Serug, Reu aduti na gigi ngu ngbangbo use na mbarambara. Lo du amolenge-koli na amolenge-wali.
22Serug ayeke na ngu baleota si lo du Nahor. 23Na peko ti dungo Nahor, Serug aduti na gigi ngu ngbangbo use. Lo du amolenge-koli na amolenge-wali.
24Nahor ayeke na ngu baleuse na gumbaya si lo du Tera. 25Na peko ti dungo Tera, Nahor aduti na gigi ngu ngbangbo oko na baleoko na gumbaya. Lo du amolenge-koli na amolenge-wali.
26Tera ayeke na ngu balembarambara si lo du Abram, Nahor na Haran.
27Tënë ti sewa ti Tera ayeke tongaso: Tera adu Abram, Nahor na Haran. Haran adu Lot. 28Haran akui kozo ti babâ ti lo Tera, na ndembe so ala ngba na gbata ti Ur, na sese ti Babilonii. Ur ayeke kodro so a du lo daa. 29Abram na Nahor amu awali. Iri ti wali ti Abram ayeke Sarai; iri ti wali ti Nahor ayeke Milka, molenge ti Haran ti wali. Haran ayeke nga babâ ti Iska. 30Sarai ayeke na molenge pepe, ngbanga ti so lo yeke wali ti dungo ni pepe.
31Tera amu molenge ti lo Abram, na ata ti lo Lot, molenge ti Haran, na kogara ti lo Sarai, wali ti molenge ti lo Abram si lo na ala alondo na sese ti Babilonii, na gbata ti Ur ti gue na kodro ti Kanaan. Ala gue, asi na gbata ti Haran si ala sara kodro kâ. 32Tera aduti na gigi ngu ngbangbo use na oku si lo kui na gbata ti Haran.
वर्तमान में चयनित:
Tongo nda ti aye 11: MNF2010
हाइलाइट
शेयर
कॉपी
Want to have your highlights saved across all your devices? Sign up or sign in
© La Société Biblique de Centrafrique 2010