Génesis 3
3
Adanpa Eva ome Tachi Akꞌõrepa jaradakꞌa ooda–e pada
1Edén ne–uu kꞌãide taama bapachi. Mãgɨ́ ikꞌawaara baji apemaarã ne–animalaarã tausaaree beerã Tachi Akꞌõre Waibɨapa ooda kꞌãyaara.
Mapa ewari aba taamapa ma wẽramaa iidiji:
—¿Mãgara Tachi Akꞌõrepa jõpiamaa bɨkꞌã aji, nejõ pakꞌuru jõmaadepema?
2Ma wẽrapa pꞌanauji:
—Taipa jõdaipia bɨ pakꞌuru jõmaadepema. 3Mamĩda jõdaikꞌaraa bɨda aji, pakꞌuru na ne–uu kꞌãi esajĩakꞌa bainɨ̃ bɨdepema. Jãdepema jõruta pɨrã wa tꞌõbairuta pɨrã, Tachi Akꞌõrepa: “Piudayada” aji.
4Mãpai taamapa ma wẽramaa mãgaji:
—¡Piuda–epɨ! 5Tachi Akꞌõrepa pia kꞌawa bɨda aji, parãpa jã pakꞌurudepema jõruta pɨrã, kꞌĩsia kꞌawaa pꞌaneedaitꞌee mãikꞌaapa kꞌawadaitꞌee ne–inaa pia mãikꞌaapa ne–inaa kꞌachia. Mãgá Tachi Akꞌõrekꞌa pꞌaneedaitꞌeeda aji.
6Ma wẽrapa ma nejõ pia bɨ unukꞌãri, jõ kꞌiniadachi. Kꞌĩsiaji: “Jã jõpꞌeda, poro wẽsaa beeitꞌeeda aji, Tachi Akꞌõrekꞌa.” Mapa oro atanapꞌeda, jõtꞌaaji mãikꞌaapa chi ɨmɨkꞌĩramaa teeji. Mãpai chi ɨmɨkꞌĩrapa aukꞌa jõtꞌaaji. 7Aramata kꞌĩsia kꞌawaa pꞌaneejida mãikꞌaapa kꞌawajida ãchi ãkꞌadaa pꞌanɨ. Mãgá kꞌĩra nejasia kꞌawaadakꞌãri, pꞌaru higuera kꞌirudee oojida mãikꞌaapa jɨ̃ pꞌaneejida.
8Kꞌewara nãu pꞌuakꞌãri, Tachi Akꞌõre Waibɨa nipapachi Edén ne–uu kꞌãide. Ma ewate Adanpa chi wẽra ome Tachi Akꞌõre cheru ũridakꞌãri, pakꞌuru ãpɨte mirudachida.
9Mamĩda Tachi Akꞌõre Waibɨapa Adán tꞌɨ̃ji mãikꞌaapa iidiji:
—¿Sãma bɨma? aji.
10Irua pꞌanauji:
—Mɨa pɨ nama ni ũrikꞌãri, waaweedachida aji, ãkꞌadaa bada perã. Maperã mɨ mirudachida aji.
11Mãpai Tachi Akꞌõrepa iidiji:
—¿Kꞌaipa jarajima aji, pɨ ãkꞌadaa bɨ? ¿Pɨa jõjikꞌã aji, nejõ mɨa jõpiamaa badadepema?
12Irua pꞌanauji:
—Pɨa mɨmaa wẽra kꞌõpꞌãyokꞌa teedapa ma nejõ mɨmaa teejida aji. Mãpai mɨa jõtꞌaajida aji.
13Mãpai Tachi Akꞌõre Waibɨapa ma wẽramaa iidiji:
—¿Sãapꞌeda mãga oojima? aji.
Wẽrapa pꞌanauji:
—Taamapa mɨ kꞌũratꞌaajida aji. Maperã mɨa ma nejõ jõjida aji.
14Mãpai Tachi Akꞌõre Waibɨapa ma taamamaa mãgaji:
—Mãga ooda perã, mɨa pɨ kꞌachiade baaipiitꞌee. Pɨ maldicia baibairã, mɨa pɨmaa kꞌachiara ooitꞌee apemaarã ne–animalaarã kꞌãyaara. Idideepa pɨ eujãde bipa urtꞌĩu nipapariitꞌee yooro pꞌorade. 15Na eperã wẽradeepa uchiadaitꞌeerãpa pɨdeepa uchiadaitꞌeerã kꞌĩra unuamaa iru pꞌanadaitꞌee; përeerã paara aukꞌa. Mapa chikꞌĩra unuamaa pꞌanapataadaitꞌee. Na eperã wẽradeepa uchiaitꞌee abaapa pɨ poromãi teeitꞌee. Jõdee pɨa iru bɨɨrɨde kꞌaatꞌaaitꞌeeda aji.
16Mãpai Tachi Akꞌõrepa ma wẽramaa mãgaji:
—Pɨ warra tꞌokꞌãri, pꞌua ome tꞌoitꞌeeda aji. Ma awara pɨ ɨmɨkꞌĩrapa pɨ chokꞌaitꞌee, pɨa iru kꞌinia bairã. Pɨ iru jua ekꞌari bapariitꞌeeda aji.
17Mãpai ɨmɨkꞌĩramaa mãgaji:
—Pɨa wẽra pedee ijãaji mãikꞌaapa jõji ma nejõ mɨa jõnaadapáde ada. Maperã pɨ kꞌaurepa eujã kꞌachiade baaiitꞌeeda aji. Pɨchi chikꞌo kꞌoitꞌee audú mimiaitꞌee piurumaa. 18Eujãdeepa ne–ɨɨrɨ uchiaitꞌee mãikꞌaapa pɨa netꞌa tau mẽepema kꞌoitꞌee. 19Jɨara nɨ̃baitꞌee audú mimia nɨ̃bɨpa. Miaitꞌee chikꞌo kꞌoitꞌee. Pɨ yooro pꞌoradee ooda perã, piukꞌãri, waya yooro pꞌora paitꞌeeda aji.
20Adanpa chi wẽra tꞌɨ̃ bɨji Eva,#3.20 Hebreo pedeede Eva jara kꞌinia bɨ “chokꞌaipipari”. nawe paitꞌee pada perã. Eperãarã jõmaarã nawe adaitꞌee, jõmaweda irudeepa uchiadaitꞌee perã.
21Tachi Akꞌõre Waibɨapa ne–animal edee pꞌaru ooteeji jɨ̃ pꞌaneedamerã. 22Mãpai ichi tꞌãridepai mãgaji: “Ɨ̃rá eperãarã tachikꞌa pꞌanɨda aji. Kꞌawa pꞌanɨ ne–inaa pia mãikꞌaapa ne–inaa kꞌachia. Ɨ̃rá waa jõdaikꞌaraa bɨda aji, nejõ bɨɨrɨ eperãarã ichita chokꞌaipiparidepema.”
23Maperã Tachi Akꞌõre Waibɨapa ãchi uchiapiji Edén ne–uu kꞌãideepa ne–uunadamerã. Mãgá ma eperã yoorodee ooda yoorode ne–inaa jaupachi.
24Maapꞌeda Tachi Akꞌõrepa ɨtꞌaripemaarã pëiji jɨ̃adamerã Edén ne–uu kꞌãi oriente eere. Ichiaba mama bɨji espada tꞌɨpɨtaudee ooda urua pꞌɨrrabai nɨ̃bamerã Edén ikꞌaawa, apida tꞌĩunaadamerã ma nejõ bɨɨrɨ eperãarã ichita chokꞌaipiparimaa.
वर्तमान में चयनित:
Génesis 3: sjaB
हाइलाइट
शेयर
कॉपी
Want to have your highlights saved across all your devices? Sign up or sign in
©2005, 2010, 2015 Wycliffe Bible Translators, Inc. All rights reserved.