Juan 5
5
So Jesús nataden so sa da'añiigue mayi hueta'a aso 'etaxat laÿi' l'enaxat Betesda
1Qaq co'ollaq ime de'eda, nachi na judiopi qaltaq huo'o so na'a'q da yi'oxonnataxan, nachi so Jesús qaltaq ÿi'iguelaxau'a yi Jerusalén. 2Nachi se'eso la ciudad huo'o som lasom mayi qaÿamata'ac nasom ana qagueta. Qaq se'eso lasom nachi sa qaÿapeque asom laÿi' na 'etaxat mayi naua l'aqtaqa na hebreo l'ecpi ÿamata'ac Betesda. Asomayi ivi' cinco naua nqalaxaqui' naua laÿil. 3Qaq asomayi nachi hueta'asop na qalota dalolaxaicpi, huo'o na tagoxoic, qataq huo'o na ñi'iidauo naua lchil qataq na sa da'añiigue. Qaq namayipi chochi iuatta'a ca ndaxanataguec na l'ec 'etaxat asomayi. 4Cha'ayi huo'o' naxa yi na'a'q, qaq anac som lamaxashic piguem l'ec ñi Dios da naÿa asa'aso laÿi' na 'etaxat da idaxan na l'ec. Nachi cam l'auaxanec da tangui asomayi da huo'otaq ime da qaidaxan na l'ec, nachi camayi ishit da no'oita, nai'ctaxa ca 'eetec ca lalolaxa. 5Qaq huo'o so shiÿaxaua nachi hueta'asop asomayi. Somayi mashi ivi' naua treinta y ocho vi'iyi da lalolaxa. 6Qaq so Jesús co'ollaq ila'a somayi, nachi ÿaÿaten da mashi qaÿoqteguelo naua vi'iyi da nachi 'eeta'ac de'eda somayi. Nachi inat somayi, 'eeta':
–¿Peta'a 'anshitaique da 'am no'oita?
7Nachi som lolaxaic 'enapeco':
–'Am ÿataxala', qaica ca ishit da aÿim ÿasaxangui añi laÿi' na 'etaxat naxa da ivita da qaidaxan na 'etaxat. Cha'ayi naxa da ñishitaique da sangui añimayi, nachi mashi sogote da huo'o na hua'auñigui da tangui añimayi.
8Nachi so Jesús 'enapega somayi, 'eeta':
–Qoñishiguem qome, nachi 'aunana't na 'adacanec, nachi qojec.
9Huaña, nachi se'eso shiÿaxaua no'oita, inana't so lacanec, nachi queuoÿapigui'. Qaq cha'ayi se'eso na'a'q mataxaqui, 10nachi na judiopi 'eetega som shiÿaxaua mayi no'oita, 'eeta':
–Na na'a'q, namayi mataxaqui, qaq ÿoqo'oyi sa ishit da qaÿashin da 'am 'anallaguishiitac na 'adacanec.
11Nachi se'eso shiÿaxaua 'enapeco':
–Som aÿim nataden mayi aÿim 'enapega, 'eeta': “'Aunana't qome na 'adacanec, ime, nachi qojec.”
12Nachi qainattac somayi, qoÿiita':
–¿Négue't ca 'am 'enapega co'ollaxa da 'eeta': “'Aunana't qome na 'adacanec, nachi qojec?”
13Qalaxayi se'eso shiÿaxaua sa ÿauatton co'ollaxa cam nataden somayi, cha'ayi so Jesús saqaÿaloq da taigui se'eso qalota shiÿaxauapi mayi hueta'a yimayi. 14Qaq so Jesús co'ollaq ilalec somayi huaigui aso n'onaxanaxaqui, nachi 'enapego', 'eeta':
–Nagui mashi 'am no'oita, qalaxayi sa ishit qome da qaltaq huo'o 'anqa'en ca 'adasouaxashit, ten qom qaltaq ÿapagueec ca 'adalolaxa.
15Nachi se'eso shiÿaxaua jec da da'aqtaxanem na judiopi da nachiso so Jesús som nataden somayi co'ollaxa. 16Qaq ÿoqo'oyi na judiopi icaatac so Jesús da nshitaique da ÿalauat, souaxat somayi da datannataxangui so na'a'q mataxaqui. 17Qalaxayi so Jesús 'enapega somayipi, 'eeta':
–Ñi ita'a nachi 'eetai' naxa da do'onataxaatac, qaq ÿoqo'oyi aÿim nataq'en so'onataxan.
18Qaq ÿoqo'oyi na judiopi nquicteec da nshitaique da ÿalauat so Jesús, cha'ayi sa ishit da chaqdata da sa ÿalaxalec da lataxac yi na'a'q mataxaqui, cha'ayi nataq'en 'eetega da 'en'am ñi Dios co'ollaq 'eetega da ÿataqta lta'a ñimayi.
Da l'añaxac so llalec ñi Dios
19Nachi so Jesús 'enapega somayipi, 'eeta':
–Ÿataqta 'eesa de'eda qami' sa'axatema, da ne'ena llalec ñi Dios, namayi sa ishit da huo'o ca i'ot da huo'otaq maichi ndojlec, cha'ayi namayi i'ot cam ÿauaachigui da i'ot ñi lta'a. Qaq ÿoqo'oyi 'enauac nam i'otpi ñi lta'a, qaq nataq'en i'ot nam llalec. 20Cha'ayi ñim lta'a ÿataqta ÿauotec nam llalec, ÿoqo'oyi ÿachaxana 'enauac nam i'otpi, qataq ñaq queto'ot da ÿoqta lta'adaicpi qome na ÿachaxanapi namayi, nachi ÿataqta ishit qome da i'ot da qad'aalaqai. 21Cha'ayi de'eda 'eetec da ñi ita'a da ishit da qaltaq nca'alaxateec ca leuaxaic, nachi ÿanem da lca'alaxa, qaq nachi 'eetec nataq'en nam llalec da ishit da ÿanem da lca'alaxa cam tajlec da ÿanem. 22Qataq ñi ita'a, ñimayi sa ishit da huo'o ca ÿauo'o ca nhuaxanaguec, chaqdata da ÿanem na llalec 'enauac da l'añaxac da ÿauo'o ca nhuaxanaguec ca shiÿaxaua, 23yaqto' 'enauac na shiÿaxauapi ishit da ÿi'oxoden na llalec, 'eeta'am naq'en da 'eetec da ÿi'oxoden ñi lta'a. Qaq cam sa ishit da ÿi'oxoden na llalec, qaq camayi sa ishit nataq'en da ÿi'oxoden ñim lta'a mayi namaq namayi.
24Qaq ÿataqta 'eesa de'eda qami' sa'axatema, da ca n'axaÿaxana de'eda sa'axattac, qataq i'amaqten ñim aÿim namaq, nachi camayi huo'o da lca'alaxa chochaq tateec. Nachi sa ishit da qaÿauo'o qome ca nhuaxanaguec, cha'ayi mashi sogote da ca'ai da nleuaxa da inoxoneu'a da nca'alaxa. 25Qataq ÿataqta 'eesa de'eda qami' sa'axatema, da nagui mashi ivita yi laloqo', qaq nachina nagui na huetoigui da nam leuaxaicpi, da huo'otaq hua'axaÿa da lavilÿaxac na llalec ñi Dios, nachi cam ÿalaq nachi nca'aleec. 26Cha'ayi ñim lta'a huo'o da l'añaxac, da yaqto' maichi ÿan da nca'alaxa, nataq'en ÿanem na llalec da l'añaxac da ÿan da nca'alaxa. 27Qataq ÿanem da l'añaxac, da yaqto' ÿauo'o ca nhuaxanaguec ca shiÿaxaua, cha'ayi nachina nam shiÿaxaua llalec. 28Qaq sa ishit qome da qau'aalaic de'eda, cha'ayi huo'o qome ca laloqo' da 'enauac na leuaxaicpi, da hua'axaÿa da lavilÿaxac namayi, 29nachi chigoqchiguinguilo naua huachiqui da ñishiguem. Nachi nam i'ottac ca ÿaÿamaqchiguiñi qaltaq nca'aleec, da yaqto' huo'o da lca'alaxa; qaq nam i'ottac ca sa ÿaÿamaxañi, qalaq nca'aleec, da yaqto' qaÿauo'o ca nhuaxanaguec.
Dam ÿoqta yi'oq naq'en da l'añaxac so Jesús
30Aÿim sa ishit da maichi aÿim chigoqchigui da huo'otaq huo'o ca so'ot. Cha'ayi da huo'otaq so'ot ca lasouaxashit ca shiÿaxaua, qalaq aÿim selotelec ca ñi'aqtac, nachi sa ishit da depe'enaxan cam so'ot. Cha'ayi aÿim sa ishit da so'ot cam maichi shiitapeguec, cha'ayi chaqcata ca 'eetapeguec ñi ita'a mayi aÿim namaq, nachica so'ot. 31Cha'ayi da huo'otaq aÿim maichi ñi'axattapeguela't, nachi cam i'aqtaxanaxac sa ishit da ÿoqta 'eesa naq'en cam sa'axattac. 32Qalaxayi huo'o ñim lÿa mayi aÿim i'axattac, qaq aÿim saÿaten da ca 'enapec ñimayi, camayi ÿataqta 'eesa. 33Qami' huo'o co'ollaxa so qadamaxashiqui da nnataxana so Juan, qaq dam 'enapec somayi ÿataqta 'eesa. 34Qalaxayi aÿim sa ishit da chochi sootapeguelec ca l'aqtaxanaxac ca shiÿaxaua da huo'otaq aÿim i'axattac. Qaq shinapec de'eda, yaqto' qami' ishit da qadca'alliiuec. 35So Juan, somayi 'eeta'am aca ncoÿadaxanaxaqui mayi 'ettaigui. Nachi qami' co'ollaxa ÿataqta qantoñiitapeguec de'eda lcoÿadaxanaxac, qalaxayi sa qaÿauec da qantonaxaqui. 36Qalaxayi aÿim huo'o da ñi'aqtaguec mayi ÿataqta napacalec da l'aqtaxanaxac so Juan. Cha'ayi nam so'otpi, nachina na aÿim ÿamaxalecpi ñi ita'a. Qaq nachina na ÿoqta ichoxot da 'eesa da aÿim namaq ñimayi. 37Nataq'en ñi ita'a mayi aÿim namaq, ñimayi ÿataqta 'eesa naq'en de'eda ñi'aqtaguec. Qaq nai'ctaxa da qami' sa qauauañiÿapega da qau'aqaichigui ca lavilÿaxac ñimayi, qataq sa ishit da qauauattoñi ca lashiguiÿaxac. 38Qalaxayi de'eda l'aqtac ñimayi sa ishit da qami' taiguilo, cha'ayi qami' sa ishit da qau'amaqchiñi nam namaq ñimayi. 39Qami' mayi ÿataqta huo'o da qadhuogoqoi da qanapaxaguiñiitegalo naua nanettrañi l'aqtaqa ñi Dios, cha'ayi huo'o da qanaquitaxaqui da qami' taÿoto da nca'alaxa mayi chochaq tateec. Qamaq ne'enaua n'aqtaqa mayi nanettrañi, naamayi aÿim i'axatta'pe. 40Qalaxayi qami' sa ishit da aÿim qauanaiua'a, da yaqto' qami' taÿoto de'eda nca'alaxa.
41Aÿim sa ishit da saconguet da lli'oxonnataxanaxac na shiÿaxauapi da shiita. 42Qataq aÿim ÿataqta saÿateeta da qoñiita da sa ishit da qauauochiic ñi Dios. 43Aÿim ÿataqta sachigoqtot ñi ita'a, qalaxayi qami' sa ishit da aÿim qauacoñiiguet. Qaq da huo'otaq anac ca maichi nactaigui ca 'eetapeguec, qaq nachica cam qami' qauacoñiiguet. 44Qaq ¿táloxochiyictoxo' da qami' ishit da qau'amqajnataxañi, yi ñi 'oonolec da qoñiita maichi ÿaconguet ca lli'oxonnataxanaxac ca maichi 'en'am lÿa, qaq sa ishit da qanmichiÿaique ca ñi'oxoyic mayi chigoqo'ot ñi 'oonolec Dios? 45Qaq sa ishit qome da qaupi'itaxañiitega da nachaÿim mayi sa'aqtaxanem qome ñi ita'a da chaq negue't ca qadasouaxashichi, cha'ayi som Moisés mayi nachiso so i'axat ca qadsomaxaqui, som qami' qauachiito'ot da qanaquitaxaqui. 46Cha'ayíctaxa da qami' 'au'amaqchiñi cam 'enapec so Moisés, nachi nataq'énctaxa ishit da aÿim qau'amaqchiñi, cha'ayi so Moisés nachaÿim mayi aÿim ÿiyiñi co'ollaxa. 47Qalaxayi da qami' sa ishit da qau'amaqchiñi dam ÿiyiñi somayi co'ollaxa, qaq ¿huá'aguectoxo' da ishit da qau'amaqchiñi cam shinapec?
वर्तमान में चयनित:
Juan 5: TBSNT
हाइलाइट
शेयर
कॉपी
Want to have your highlights saved across all your devices? Sign up or sign in
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.
