Lucas 21
21
Aso lachitaqtaxanaqte aso pa'ai mayi choxodaq
(Marcos 12.41-44)
1Qaq co'ollaq ñaq hueta'a aso n'onaxanaxaqui late'edai so Jesús, nachi imeteetac nam sallaxanecpi mayi ÿasaqtapiguiñi ana lachitaqtaxanaqte. 2Qaq nataq'en ÿauaachigui aso 'oonole pa'ai mayi choxodaq, asomayi ÿasaxayiñi soua lachitaqtaxanaqte lca'chole. 3Nachi so Jesús 'enapeco':
–Aÿim ÿoqta 'eesa de'eda shinapec da ada'ada pa'ai mayi choxodaq napacalec 'enauac nam laÿipi asom lachitaqtaxanaqte. 4Cha'ayi 'enauac namayipi chochi lli'iÿoqte anam ÿasaqtapiguiñi, qaq adamayi qalaxayi nai'ctaxa da choxodaq, qalaxayi imatteuo 'enauac asom hueto'ot mayi lhuenec lashiue.
So Jesús i'axata'a da qanlaxajñi aso n'onaxanaxaqui late'edai
(Mateo 24.1-2; Marcos 13.1-2)
5Qaq huo'o nam i'axattac aso n'onaxanaxaqui late'edai da ÿataqta qaica ca 'en'am da lli'oxoyic na coma' qataq 'enauac nam laÿi nachitaqtaxanaxatpi. Nachi so Jesús 'enapeco':
6–Huo'o qome ca na'a'q, qaq qanlaxajñi 'enauac ne'ena qaumijñiitac nagui, sa ishit qome da huo'o ca 'oonolec coma' n'onashiguem da huetalec ca lÿa coma'.
Na n'anecpi mayi i'axata'a ca loga'tna
(Mateo 24.3-28; Marcos 13.3-23)
7Huaña, nachi qainattac so Jesús, qoÿiita':
–'Am mayi 'auapaxaguenataxaatac, ¿chaq lagui qome, qaq ivita de'eda? ¿Chaq huá'ague qome ca 'eetec ca l'anaxat de'eda, qom ivita ca na'a'q da yi'oq?
8Nachi so Jesús 'enapeco':
–Maxatchaxa qome, qadvichiÿai'. Qataq sa ishit qome da huo'o ca chochi qami' ÿatenachi't. Cha'ayi qalota qome na anac da anactaigui da i'enaxat, nachi 'eeta': “Aÿim mayi nachaÿim nta'a nca'alaxaqui;” huo'otaq 'eeta': “Nagui mashi ivita yi naloqnec.” Qalaxayi sa ishit qome da qauca'achiigue. 9Qaq qom huo'o ca qau'aqaitapeguelec da nalaattega'tpi qataq cam i'ottapeguec ca nta'a, qalaq sa ishit qome da qayi'ii. Cha'ayi hua'auñi qome da anac 'enauac namayipi, qalaxayi saxanaxa qome da ivita ca loga'tna.
10Nachi so Jesús queta da da'aqtaxaatac, 'eeta':
–Ca qompi delogui' qome ca laÿi qompi, qataq ca nta'a maichi delogui' ca lÿa nta'a. 11Qataq huo'o qome ca nacholaxanaxa naua pa'aiguelo naua laÿil ana 'alhua qataq ca nqouaxa. Qataq huo'oi qome naua nalolaxaco naua 'ale'u. Qataq huo'oi qome naua lta'al n'anqa na piguem qataq huo'o ca qaila'a qaica ca 'en'am da lchic.
12Qaq qom saxanaxa da yi'oq 'enauac de'eda, nachi qami' qaÿaconeu'alo qome, qataq qami' qaicaata'pe. Ime, qaq qami' qaÿauegueu'alo ana laponaxaquipi na judiopi, da yaqto' qami' qanmi't. Ime, qaq qami' qaicoñi't, qataq qami' qaÿauegueu'alo na nta'alpi qataq nam ltauapi, souaxat da i'enaxat qauasoviilec. 13Qaq damayi nachi naigui qome da qami' ishit da aÿim qau'axachiitac. 14Qalaq qami' sa ishit qome da qauqataxañiitapigui' ca qadtaxaÿaxaqui qom qancotaÿaipec. 15Cha'ayi aÿim qome qami' sanema caua qad'aqtaqalli' qataq ca qadaÿajñiqui, da yaqto' sa ishit da huo'o ca qami' dataÿa'agueta da qami' ncotaÿapegueto. 16Qalaxayi qami' qoÿadeuo qome, ivida'a ca qadalamaxachi qadta'ai qami' ÿaadeuo, huo'otaq ca qadqaÿañiquipi, huo'otaq ca qadhuo'oi l'ecpi, huo'otaq ca chochi qanauochaxauaipi. Qataq qaÿalauat ca 'oonolec da qoñiita. 17Qataq 'enauac qome na shiÿaxauapi mayi huetalecna qami' nquiÿalo, souaxat aÿim. 18Qalaxayi sa ishit qome da huo'o ca 'oonolec laue ñi 'oonolec da qoñiita da daqat. 19Qaq cam sa ishit da huo'o ca ÿoqocha'a, qaq nachica ca nauec cam nca'alaxa mayi chochaq tateec.
20Qaq qom qauloiÿa'a na la ciudad Jerusalén da coleesop na allippi, nachi qami' qauaÿajñi da saqaÿaloq da qailaxachigui. 21Nachi nam netaña yi Judea ÿi'igueeshiguemec qome ana qasoxonaxapi, qaq nam netaña na la ciudad Jerusalén qalaq ca'ai qome namayi, qaq cam huetalec na n'onaxa qalaq sa ishit qome da ñi'iguelaxau'a na la ciudad. 22Cha'ayi que'eca na'a'q laloxoqui da qaÿauo'o ca nhuaxanaguec 'enauac na shiÿaxauapi, cha'ayi ipacchiguilo 'enauaque nam 'ena'pe nam ñiyigui'shi l'aqtaqa ñi Dios. 23Qaq ¡choxodaale qome aca 'alo mayi hualaxai qataq acam ña illipaxaatac ca llalec! Cha'ayi ÿataqta qalota qome da qui'ic ana 'alhua, qataq qaica ca 'en'am da lchic ca nhuaxanaguec 'enauac na shiÿaxauapi mayi huetalecna. 24Qaq huo'o qome na ileuaigui ca alaataq, qaq ca laÿipi qalaq noxonec, ime, qaq qaÿauegalo naua ÿotta'a't 'ale'u. Nachi nam chigaqauec shiÿaxauapi ÿataqta sa iyacnapec qome na la ciudad Jerusalén, chochi ivitta'a qome ca laloqo' mayi qoÿanem namayipi da maichi ÿoiqueetac.
Da 'eetec da lli'iguelaxasoxoc na shiÿaxaua llalec
(Mateo 24.29-35, 42-44; Marcos 13.24-37)
25Nachi huo'o qome na l'anaxatpi añi nala' qataq so ca'agoxoic qataq ana huaqajñipi. Qataq nam ÿotta'a't shiÿaxauapi mayi huetalec ana 'alhua ÿataqta sa ÿaÿaten ca 'eetec, qataq ÿataqta ñi'i, souaxat da lchic da l-lamaxa ana lapaxa aso auaxai. 26Nachi na shiÿaxauapi ÿataqta decopchitac qome, souaxat da tatapigui lauel cam nachaxan ana 'alhua, qaq ivida'a qome ana huaqajñipi mayi hueto'ot na piguem ÿataqta cholaxan. 27Huaña qome, nachi qaila'a na shiÿaxaua llalec nactaigui ca l'oc ÿataqta qaica ca 'en'am da l'añaxac qataq da lli'oxoyic. 28Qaq qom ivita da yi'oq 'enauac ne'ena, nachi ÿataqta qan'añaxachi qataq qanauaxaÿaxañitchiyigue'm naua qadqaigolli', cha'ayi mashi sa qaÿapeque ca laloqo' da qami' huesochiyiñi qanqoÿin.
29Nataq'en ÿauo'o so daloqnaxana, 'eeta':
–Qauloitagui qome aca higo lchiyic, huo'otaq aca lÿa qo'ipaq. 30Da ivita da qauloiÿa'a da ñaxateec ana laue, nachi qami' qauaÿajñi da mashi sa qaÿapiguii naua nta'pi. 31Qaq nachi 'eetec nataq'en qom qami' mashi qauloiÿa'a da yi'oq 'enauac ne'ena, nachi qauaÿajñi da mashi sa qaÿapeque da nvi' ca l'onataxanaxac ñi Dios da ilo'ogue 'enauacna.
32Qaq ÿataqta 'eesa de'eda sa'axat da hua'auñi qome da yi'oq 'enauac ne'ena, qom huo'otaq saxanaxa da ileu na shiÿaxauapi mayi huetaiguilo ne'enaua na'axa'te. 33Qaq na piguem qataq ana 'alhua qalaq huo'o qome ca loga't, qaq da i'aqtac qalaxayi sa ishit da huo'o ca loga't.
34Qalaxayi maxatchaxa, sa ishit qome da qadamchiguilo naua qadquiyaqchilli' souaxat ca qanamañi, qataq da qadomiilec na lataxa qataq nam laÿi nhuenecpi yi na'a'q, yaqto' que'eca na'a'q sa ishit da qami' ique'elaxa't, 35nachi qoñiita'am cam nqoiñiguishic. Qaq 'eda qome da 'eetec da nvidaxac qom qanvita 'enauac na huetalec ana 'alhua. 36Qaq qami' ÿataqta qanaÿamaxachiitai' qome qataq qoquiitot qome naua na'axa'te da qanqouagaxauñiitac, yaqto' ishit da qami' ÿi't, qom ivita da yi'oq 'enauac namaxa, qataq yaqto' ishit da qanachaachiu'a qom nvi' na shiÿaxaua llalec.
37Nachi so Jesús dapaxaguenataxaatac yi na'a'q hueta'a aso n'onaxanaxaqui late'edai, qaq yi pe qataq l'ochaqa' aso saqaÿoqotchiguemec 'alhua mayi nanqa' ana olivos. 38Nachi 'enauac na shiÿaxauapi 'ottau'acnaxa da nte'etom aso n'onaxanaxaqui late'edai, da yaqto' n'axaÿaxana somayi.
वर्तमान में चयनित:
Lucas 21: TBSNT
हाइलाइट
शेयर
कॉपी
Want to have your highlights saved across all your devices? Sign up or sign in
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.
