ADUNHEL 7
7
Istiphen po Lam Kithan
1Laparake bor-bangthe po anangyok pulo, “Labang alam hel asereng ma?” 2Aro Istiphen po pulo, “Ei korte-muso aro apo hel, nelam onenot. Ili sar-lar Abraham poyok Haran rongpe long kido ango, anang Mesopotamiya long kido amunsi, Arnam ajortang chiklango, 3aro anang yok pulo, ‘Nang bithang alongri long, nang hem-ret, don-rat tikangne, potsi alongri ne nang paklange, labang alongri yok damot.’ 4Laparake anang Saldiyan hel alongri tikangsi, Haran long do damo aro Haran along dolo. Anang papo kithi aphel, minon kangning labang alongri yok Arnam anangyok wano. 5Labang apor Abraham po aso kangwe, yongta Arnam anangyok kangning alongri aphan lungle pekpe yongot, layongta Arnam anangyok lungle aro anang monphel agijing yok kipi seme tango. 6Aro Arnam anangyok labadi pulo, ‘Anang agijing hel phoro phili anengkan yok bang alongri long dohlonge, aro lalong arleng hel analiyok aturu inghole, aro paduk hapme. 7Arnam labadi pulo, ‘Manta anali pot ajat arlo aturu chiplange, ne labang ason bisar oteye, aro la aphel anali wang olesi, labang athempo long neyok wang chirdome.’ 8Laparake anangyok sunnot ka-ote kanong ta pilo. Aro ladi si Aijak po plango, aro ni-narkep arni anangyok sunnot ingholo. Aro Aijak po Jakup po anangpa chiplango, aro Jakup po ke bang kere-hini asohel aphi-phulo. 9Phi-phu hel, Josep po yok amek kiso, anangyok Ijip alongri kapapon yok jor detno; manta Arnam anang alokjor do duno, 10aro ahuwit kiduk para anangyok pajoksi, aro Ijip arecho Pharau po mek sundangsi anangyok apharan pen agiyan pilo, rechopo anang yoksi Ijip alongri kapangdom aro anang ahempo kilangpon phu-phang pekngo. 11Latangsi Ijip aro Kanan alongri dung akithe akal pen aduk wango, aro ili sar-larhel kicho a-an wepholo. 12Manta Ijip alongri sok-sang do pusi Jakup po arjusi, ili sar-larhel yok ango wang tolchengo. 13Phongni kidam amun ke, Josep po abithang akorte hel pen chichinilo, aro Josep po ahembang pen Pharau po pachiklango. 14Laparake Josep po anang pa Jakuppo pen hemphlak-hemcher ahuwityok, lake kep thorok ne bangkere phongo arleng yok taram duno; 15Lasi Jakuppo Ijip yok damo. Anang bithang ta aro ili sarphi-sarphu helta lalongsi thilo, 16aro anali abang helyok Sekhem yok wan phakngo, Abraham po Sekhem long Hamor po asohel para nohok pine kinam, la thiripo longsi analiyok pepmo. 17“Manta Abraham poyok Arnam potsi seme-kitang, labang seme-kitang chok-pleng si wangne kido amun, Israyel hel Ijip alongri long pachan ongo, 18la-aphel, Josep poyok kachinine Ijip alongri prek ihut recho chosi, ili jatpo yok sotongasi iliyok pangdomo. 19Anang ili sar-larhel asohel kamariyok, osohel yok hem para mokol pabilo, tangsi anali thi ye, labadi kangho sanselo. 20Ladi aporsi Mosi po plango, aro anang Arnam ango kilangme aso kido. Piyok pu tene anang chiklo jon thomyok si, anang pa ahem kido hlong; 21aro mokol katikang dam amun, Pharau po asope anangyok al enpono, aro abithang aso badi pathe-pading pono. 22Lasi Mosi po Ijip abang ahuwit agiyan chirlilo, aro anang lam aro sal longta apharan dokengo. 23“La-aphel anang abo nengkan kep phili kichok amun, anang abithang akortehel ayok, lake Israyel asohel ayok kilang anang aneng wango. 24Lalong anang anali arleng ihut yok Ijip arleng ongnai aduk kipi theksi, anangyok kiral yok kidam, Ijip arlengpo yok marisi, aduk kicho arlengpo pen chilokdunsi, ka-ongnai ajar hulo. 25Anang aridengsi Arnam anang korte helyok pajokdun do, aro manta labang alam anali abhu hlongdo pusi anang kachiron; manta anali abhu hlonghle yongot. 26La-aphel arni, anali bang hini ahul wangsi, Mosi po anali ngo damsi, analiyok kapachilok anangsi pulo, ‘Ei arleng hel, nali korte hijan yongta, piyok te chipangho do?’ 27Manta ingho si abithang adung kido alok poyok kangho katiki, anang Mosi poyok pek kulsi pulo, ‘Hali phuthak inghote kapangdom aro bisar ka-ote phu-phang pachakngo? 28Nang atimi Ijip arlengyok kamari badi nang neyok ta kamari ye anengdo ma?’ 29Labang so alamthe arju hlongsi Mosi po Ijip para katsi Midiyan alongri dodamo. Lalongsi anangso penso bang-hini chibulo. 30Lalong kido nengkan kep-phili choksi, Sinai inglong kartul adung ingnam long, Arnam tharlon irong me-karne kido kijirtum thengpe asitem anangyok chiklango. 31Mosi po bangpo thek si, labang kachiklang amun bismat hlongsi, kilang ayok adung damo. 32La-amunsi Hemphu alamthe hlongo, ‘Ne nang sar-larhel Arnam, Abraham po, Aijak po, pen Jakup po Arnam.’ La-ako Mosi po kaphere si abang sohrimo, aro kilang yok aha wedungo. 33Laparake Hemphu anangyok pulo, “Nang keng para keng-op hel chiphlok, piyok pu tene nang karjap athempo, kangthir alungle. 34Ne Ijip long kido ne arleng hel aduk-ong, ne thekpeno; aro anali kasuru, ne arju hlongsi, analiyok kapajok yoksi ne wang suno; minon wangot, ne nangyok Ijip yok nangtol do.’ 35“Nangyok kapangdom pen bisarpo ‘ingho nang pangningo?’ pusi, anali Mosi poyok kachidengde, labang Mosi poyok Arnam thengpe kijirtum long anangyok kachiklang tharlonpo para kilangpon aro kapajok phu-phang pachaksi tolo. 36Anangsi Ijip long, aro Ki-er langpe aro ingnam aju long nengkan kep phili asombhik asal paklangsi, analiyok olesi wano. 37Aro ‘Arnam si nali korte hel asitem para ne mat ihut katurki arleng naliphan paplange pusi kipu Israyel aso helyok kithan, anangsi labang Mosi po.’ 38Inghosi Sinai Inglong kartul long anangyok lamthe kithan tharlon pen ili sar-lar helpen, arat dungsi ingnam aju long chingrumsi kido, aro iliyok kipi ajiuli alam kihlong, anangsi labang polo. 39“Ili sar-larhel anang arlo kachingdom yok chikengke si anangyok panung kulsi, anali angthin Ijip yok neng chirting phaksi, 40Harun po yok thano, ‘Hali ngo-ngo paklang ponyok haliphan agoya Arnam hali thep pinot; piyok pu tene la Mosi po haliyok Ijip alongri para olesi hali wano, labang Mosi po ke potsi chiplango, hali thekthe.’ 41Laparake anali chorong athok badi arjan otesi, labang arjan aphan buli wanpisi, anali abithang aripen ka-ote along nengrong chipadolo. 42Manta Arnam anali para mahang wesi, athak klolangso helyok kachirdom yok pekngo, turki hel alo long labang alam kiwi dowen do, ‘Ei Israyel abang, nengkan kep phili ingnam aju long, nephan okpe thatsi buli nekipi ma? 43Kalek; la-aholan Molok arnam kuntulu aro Riphan chiklolangso arnam potsi nali-ri pen ka-ote arjanpo yoksi kachirdom ayok ki-en ponwor, labang helyoksi kirung ponwor; aro ne naliyok Babilon apar nalipon krenge.’ 44“Potsi angton thek hlongo, labang angton badi kuntulu kemo, labang alam inghosi Mosi poyok pulo, anang kithan ateng la hakhi kipi kuntulu ili sar-lar hel pen ingnam aju kido. 45Monphel awe ili sar-lar hel aro Josuwa po kuntulu chipar phangsi, Bang-ajat helyok Arnam ili sar-lar adung para ujharo, labang ajat helyok kangning alongri pahlongpon amun, arideng kuntulu en ponsi, Dabhit po kido arniyok chi-en pono, 46La-aphel Dabhit po Arnam ango jinso pahlongo, Jakup po Arnam aphan hem ihum pakem tolyok chingdukngo. 47Manta Solomon po si Arnam ahem ihum kem pilo. 48“Yongta Kithechot Arnam ke munusi ari pen kikem ahem long dode; labang alam turki po labadi pudo, 49‘Arnam ke pudo, ethakpe ne inghol, aro pirthepe ne kengpak kibi athem. Ne phan pot badi ahem keme? Ne kisang athem daklong te do? 50Ne bithang ari pen ahuwit lamehel ka-ote kalek ma?’ 51Istiphen po pu-hisi damo, “Ei nali konbak angthin karthat, nali angthin aro ano sunnot ka-otete abang, nali arnita Jiuli-Kangthir yok teng klak si dolong do, nali sar-larhel jibadi, nalita ladi Jiuli-Kangthir yok arniten sedo. 52Nali sar-larhel turki hel abangten yok ta duk pipe yong ma? Dhorom ihut wange pune ingho turki dapsi kithan, analiyok marilo, aro minon nali anangyoksi hutur arideng champilo aro marilo; 53nalisi kanong hel, Arnam tharlon hel para kipi kanong pusi chideng yongta, aro yongta nali labang hel nali mainotne yongot.”
Istiphen Poyok Arlong Kiwar
54Konam anali Istiphen po alam arjusi anali anang kang-phrolo, aro anangyok akang anat aso chingkre lo. 55Manta anang Jiuli-Kangthir plengsi athak ayok lang etsi, Arnam jortang, aro Arnam ancho-ari agak Jisu arjapsi kido thekngo. 56Anang pulo, “Langot, athak aduwar kachingpu aro Arleng Aso yok Arnam ancho-ari aga arjapsi kido thek hlong do.” 57Manta anali asi pathesi hang solsi ano chidipsi anangyok otdamo. 58Aro rongpe para mokol pa-ole ponsi, anangyok arlong waro; aro hakhi kido abang anali pe hel Sol pune kipu riso arlengpo yok palango. 59Anali Istiphen poyok arlong warne kido amun, anang pingkitsi pulo, “O Hemphu Jisu, nejiuli enot.” 60Laparake anang tarhuksi aro suru-wongsi pulo, “O Hemphu, labang apap anali menpen wiyek.” Labangso thansi anang thilo.
वर्तमान में चयनित:
ADUNHEL 7: AMRI-BSI
हाइलाइट
शेयर
कॉपी
Want to have your highlights saved across all your devices? Sign up or sign in
AMRI KARBI N.T. - AKIMI ANGTON N.T.
Copyright © 2014 by The Bible Society of India
Used by permission. All rights reserved worldwide.