Lizsij dih Gaihcij 3
3
Doenj coih
1Yehhozvaz Cangqdiq cauh hih sojmiz doenghduz, suenq duz ngwz ceiq ganvad. Duz ngwz cam boux vunzbaz mwnq naeuz: “Cangqdiq cingqcaen naeuz faenhsou, mbouj hawj faenhsou gw ndaw suen neix sojmiz hih mak haz?”
2Boux vunzbaz mwnq han naeuz: “Ndaw suen neix hih mak maz, raeuz cungj ndaej gw; 3caenhgag ndaek go youq cungqgyan suen mwnq hih gij mak de, Cangqdiq gimqcij mbouj hawj raeuz gw. Mbouj danhcij naeuz mbouj hawj gw, daiqlienz mo cungj mbouj hawj mo. Hauhnaeuz raeuz mbouj dingq nex, raeuz gaengjdingq ngaiz rai.”
4Hoeng, duz ngwz mwnq engq han de naeuz: “Faenhsou gaengjdingq mbouj ngaiz rai law! 5Cangqdiq mbouj hawj faenhsou gw dwg aenvih de rox, hauhnaeuz faenhsou gw gij mak go faex mwnq nex, faenhsou couh ndaej singqsag goqdaeuj, ndaej luj de yienghmwnq rox faenbied ndei caeuq yak lo.”
6Yiengq, boux vunzbaz mwnq caemh raen gij mak gwnz go faex mwnq cix ndeiyawj, caemhcix lujnaeuz ndei gw raixcaix nwih, youhcaiq ndaej hawj vunz rox faenbied ndei caeuq yak he. De couh gig hozgyaez, couh mbaet roengzma gw. De caemh mbaet hawj goeng de gw; goeng de caemh gw lo. (Mwhde goeng de caemh youq henz de.) 7Song boux de gw le, couh majcangq singqsag hwnjdaeuj; singqsag hwnjdaeuj le, laixlawz cij rox naeuz bonjfaenh yienzlaiz dwg loxgenz loxgangh he. Gajlaeng gyoengqde couh aeu mbaw faex hung, couh dwg mbaw go uzvahgoj, aeu ma neb hwj dangj bonjfaenh.
8Daengz yiengqhaemh miz rumz haemq liengz; gyoengqde dingqri Yehhozvaz Cangqdiq youq ndaw suen byaij, yiengq gyoengqde couh ndoj haeuj doengh go faex bae. 9Hoeng, Yehhozvaz Cangqdiq engq heuh boux vunz mwnq, naeuz: “Mwngz youq mwnqlaw lah?”
10Yiengq boux vunz mwnq han naeuz: “Gou dingqri sing mwngz youq ndaw suen byaij le, couh ndoj hwnjdaeuj lo, aenvih gou dwg loxgenz loxgangh he; gou lau.”
11Gajlaeng Yehhozvaz Cangqdiq naeuz: “Byawz naeuz mwngz ni mwngz loxgenz loxgangh lah? Dwg mbouj dwg mwngz gw gij mak gou gimqcij mbouj hawj mwngz gw he?”
12Boux vunz mwnq caiq han naeuz: “Mwngz aeu hawj gou guxdoih hih boux vunzbaz mwnq, de aeu gij mak gwnz go faex mwnq hawj gou gw; gou couh gw lo.”
13Yehhozvaz Cangqdiq dingq le, couh cam boux vunzbaz mwnq naeuz: “Mwngz vihmaz ij yienghneix guh nej?”
Yiengq boux vunzbaz mwnq doi naeuz: “Dwg duz ngwz yaeuh hawj gou gw lah.”
14Gajlaeng, Yehhozvaz Cangqdiq doiq duz ngwz naeuz: “Mwngz ij vih gienh saeh neix hwj ngaiz souh daengz mang, simqciq ngaiz mang ij beij sojmiz hih doenghduz ngaiz mang he lai. Daj seizneix hwnj, mwngz ij aeu dungx ma vuenz, baenxseiq cungj dwg nem doem nem naez. 15Gou ij hawj mwngz caeuq vunzbaz miz caeuz; doengh daih gajlaeng mwngz caeuq doengh daih gajlaeng de doxhaemzcaeuz. Doengh daih gajlaeng de hih boux he ij haih ndaek raeuj mwngz, mwngz caemh ij haih gij giujdin boux de.”
16Yehhozvaz Cangqdiq caemh doiq boux vunzbaz mwnq naeuz: “Gou ij hawj mwngz mwh daiqndang he cix dwgrengz cix hojyouq; daengz mwh seng he, caemh ij in'in hojyouq hojyouq ij rai bae cij ndaej. Gannaeuz yienghneix lah, hoeng, mwngz vanzlij ciuqyiengh sij mbouj ndaej goeng mwngz; goeng mwngz caemh ijsiengj guenjciq mwngz.”#3:16 Cixnaeuz: Mwngz ijsiengj guenjciq goeng mwngz, hoeng goeng mwngz caemh ijsiengj guenjciq mwngz.
17Yehhozvaz Cangqdiq caemh vanzlij doiq boux vunz mwnq, couh dwg boux heuh Yaqdangh mwnq, naeuz: “Mwngz gingqyienz dingq gij vah mehyah mwngz, caeg gw gij mak gou gimqcij mbouj hawj mwngz gw he! Yiengq, gij dieg ij vih mwngz hwj ngaiz souh daengz mang, mwngz caemh ij baenxseiq vunz cungj ij guh hong dwgrengz hwj cij ndaej daj ndaw reih sou haeujma hih gij gw. 18Lajdoem caemh ij hwnj miz oenoen cahcah, nywjnywj nyaengqnyaengq. Mwngz caemh ij ngaiz daj cungj dieg neix aeu doenghgij gw he. 19Mwngz ij guh hong hwj hanh riuz hanh roenx cij ndaej miz gw imq, itcig daengz rai roengz doem bae, aenvih mwngz dwg aeu doem ma cauh he, ij gvi hawj ndaw doem boiz.”
20Gajlaeng Yaqdangh an coh hawj mehyah de heuh Yaqvah (‘Yaqvah’ dwg ‘miz mingh’ dih iqswh), aenvih Yaqvah dwg daxmeh gij vunz lajmbwn. 21Yehhozvaz Cangqdiq aeu naeng nyaen ma guh buh hawj Yaqdangh caeuq mehyah de daenj.
Boenq Yaqdangh caeuq Yaqvah ok aen suen Ihdenq
22Gajlaeng, Yehhozvaz Cangqdiq ndaw hoz de gag naeuz: “Boux vunz neix gaenq luj raeuz ndaej rox faenbied ndei caeuq yak he hih lo. Gou mbouj hawj de caiq caeg mbaet aeu gij mak gwnz go faex hawj vunz mbouj rox rai hih mwnq ma gw lo; hauhnaeuz de caeg gw nex, de couh yungjyenj lix roengzbae nej.” 23Sojhij Yehhozvaz Cangqdiq couh boenq song boux de ok suen Ihdenq bae. Yienzlaiz Cangqdiq dwg aeu doem ma baenj cauh guh Yaqdangh he, yiengq de couh hawj de bae geng dieg dajndaem, daj ndaw doem ndaej gij gw. 24Yehhozvaz Cangqdiq boenq boux vunz mwnq deuz le, couh baij geij boux cenmonz bajsouj he daj gwnzmbwn roengz daeuj, souj youq suen Ihdenq hih mbiengj baixdoeng, caemhcaiq coengq fag giemq he youq mwnq. Fag giemq neix ndaej cienq seiq fueng bat baih, caemhcaiq ndaej ok feiz he. Cangqdiq yienghneix guh couh dwg hen mbouj hawj vunz bae daengz go mak hawj vunz gw le mbouj rox rai mwnq.
वर्तमान में चयनित:
Lizsij dih Gaihcij 3: YBNT
हाइलाइट
शेयर
कॉपी
Want to have your highlights saved across all your devices? Sign up or sign in
© New Bridge Publishing Company Limited