Joawh 3
3
Amawka uhiyekemni wayvuka akiw
2Ko 5.14; 1Ped 1.22
1Pahavwi awayg farisew ayge. Giw Nikodemus. Ig pahavwi gaytakis hiyeg judeyenevwi giwewkistenkis.
2Pahay hawkri tiyegem ig tivik danuhpene git Kiyavwiye Jesus. Ig danuh atere, ig awna git:
— Kiyavwiye, usuh hiyakni ku Kiyavwiye Uhokri awahkispi adahan ukannuhten. Yuma pahavwinema awayg hiya akehka akebi ini annut ku pariye pis keh. Wake pis ka gikakma Kiyavwiye Uhokri, pis ka hiyakam nikehka.
3Igme Kiyavwiye Jesus kaytwa giwn:
— Ku pahavwi ka wayvuka nukunewa akiw, ig ka hiya igma kawih Uhokri gikumadukan. Ihanaba inakni nuwnuh. Henewatbaki in.
4Igme Nikodemus kaytwa giwn:
— Mmahpaki ig pahavwi wayvuka akiw, ig ku kiyavwip? Ig ka hiya igma diyuh gutunrikut ginag akiw adahan eg sarayhgi amadgat wayk akiw.
5Igme Kiyavwiye Jesus awna:
— Amawka ku madikte hiyeg gitipkis wayvuka giwntak Uhokri Gitip. Gitip kewa un dehetnikibe ku pariye keh igkis aymuhwa. Ku samah bakimni wayvuka amadga inin abetimpi giwnra hawata utip in wayvuka abetimpi ini un giwntak Kiyavwiye Uhokri. Ihanaba inakni nuwnuh. Henewatbaki in.
6Ku pariye wayvuka ariwntak amadgaya inin in amadgayawa inin. Inme utip in wayvuka akiw giwntak Uhokri Gitip.
7Ka muwaka wakaymni adahan ku samah nah awna pit adahan hiyeg gitipkis wayvuka nukunewa akiw.
8Nah akkite pit abektey akak ke maygbe. Mayg he mpiyevyenen. Hiyeg timapni heneme igkis ka hiyak ku kitak in humaw. Ine igkis kawnata hiyak ku kitwiye in mpiye. Hawata ig Uhokri Gitip keh hiyeg gitipkis wayvuka igkis ka hiyak ku samah.
9Ig Nikodemus timapni hene, ig awna:
— Mmah adawnhan inakni?
10Igme Kiyavwiye Jesus kaytwa giwn:
— Pis hiyeg izhaewyenevwi gikannuhtenkis amin Kiyavwiye Uhokri giwn. Mmah pis ka pukuha inakni nuwnuh?
11Usuh kinetihwa amin ku pariye usuh hiyak. Usuh ekkene ku pariye usuh hiyap. Ihanabay inakni nuwnuh. Henewatbaki in. Yisme judeyenevwi giwewkistenkis yis ka amevekere wownuh.
12Nah kuwis kinetihwa yit amin ku pariye mpiya ay amadga inin heneme yis ka iha nuwnuh. Ku nah kinetihwa amin ku pariye mpiya aynte inurik, yis kawnata iha nuwnhunek.
13Yumahte hiyeg wagehne inurikut adahan ig diyuh akkamnihni gitkis hiyeg amedgenevwi inin. Nahnewa akkamnihni gitkis hiyeg mmanawa Nah, ku pariye wageswe awayg amadgaya inin, nah ayta inuriktak, nah inurikyene.
Kamaxwenevwi givitit Jesus aymuhwanek gimun Uhokri
Jo 3.36, 6.40, 11.26, 20.31; 1Jo 5.11; Ap 1.18
14— Minikwak amekene Moís aynte amadga amatap. Ayge ig kehe pahavwi kaybune gahehpak akak kuwiwra. Ig mawihpin inut amin pahat ah, adahan gihiyegavu iveg atere kahadbe igkis makniw ariw ku samah igkis kagahptepka gavit kaybune. Nah, ku pariye wageswe awayg amadgaya inin, amawka ku nah hawata ikepkanek aynte inut amin pahat ah.
15Kahadbe ku pariye hiyeg kamaxwevye nuvitit igkis ka biyuk giw Kiyavwiye Uhokri, heneme igkis aymuhwa gimun Kiyavwiye Uhokri adahan avanenekwa.
Henewatbaki ig Kiyavwiye Jesus awna.
16Mmanawa Kiyavwiye Uhokri batek gikakkis madikte hiyeg mpinevevye. Inneki keh ig ike nernewa gikamkayh adahan ku pariye hiyeg kamaxwevye givitit, ig ka biyuk giw Kiyavwiye Uhokri, heneme ig aymuhwa gimun Kiyavwiye Uhokri adahan avanenekwa.
17Ig Kiyavwiye Uhokri awahkis gikamkayh atan kawki adahan gisayreptenkisma hiyeg, heneme adahan gamnihtenkis.
18Nikwe ku pariye hiyeg kamaxwenevwi givitit gikamkayh, igkis ka sarayhpiknema hanpa arimkanit biyukwiki. Igkisme ku pariye kane kamaxwa givitit gikamkayh, igkis kuwis ikaksaka adahanikwa biyukwiki mmanawa igkis ka kamaxwa givitit nernewa gikamkayh Kiyavwiye Uhokri.
Hiyeg ka muwaka givathawnikis akkaka gitkis
Mt 13.14; Jo 7.7; At 7.51; 2Tes 2.10
19Ig gikamkayh ayta uguhpiye hiyeg gihiyekemnikis adahan igkis hiyak givathawnikis. Heneme hiyeg ka muwaka ig uguh gihiyekemnikis. Igkis ka muwaka givathawnikis akkaka gitkis. Igkis pi muwakate gihiyekemnikis misakwa ke wotbe abet amisnavyebe mmanawa gikehnikis ka kabay. Ayge nikwe igkis ivukavepkanek hanpa arimkanit biyukwiki ku kiney amisnavye mitibetnene.
20Hiyeg taraksavye kawnata batek akak kabutniki amadgaya inin. Igkis ka peskere abetit kabutniki mmanawa igkis ka muwaka gitaraksankis hiyakan.
21Heneme ku pariye hiyeg kibeyne hiyeg ig ka marakwa givit. Ig pes abetit kabutniki adahan gikehni hiyakan mmanawa ignewa Kiyavwiye Uhokri keh ig humaw kibeyne hiyeg.
Joawh Batista inetitkekne gidahan Jesus
22Ariwnteke ini ig Kiyavwiye Jesus pese avititak Jerusalém. Gikannuhnivwi peswata gihapti. Igkis danuh atere judeyamnaw. Ayge igkis misekwe. Avim ini ig Kiyavwiye Jesus ig kaywaksene hiyeg gitkis gikannuhnivwi.
23Ig Joawh Batista ig hawata kaywene hiyeg aynte paytwempu Enoh, kennesa arimkat paytwempu Salih, awaku ka aynsima un ayge. Ayge hiyeg danuh git adahan ig gikaywetnikis.
24Avim ini ig kote kamaxkante adahan ig paraksepka arikut parakseket.
25Ku aysaw ig kaywene hiyeg ayge, igkis gikannuhnivwi kaba iniyekbet gikak pahavwi judeyene avatra kewviki.
26Pisenwa nikwe igkis danukwa kennesa git Joawh Batista. Igkis awna git:
— Kiyavwiye, ner ku pariye ay pikak amakohnokwa aynte pahabak warik Jordawh, ig hawata kaywene hiyeg. Ig ner ku kamin pis kinetihwa kibeyne inetit. Iveg kuri ku samah ig kaywene hiyeg ahakwat un hawata ke pisbe. Mmahki hene? Kuri madikte hiyeg ka ayta pimkat akiw. Igkis atak hanpa gimkat Kiyavwiye Jesus adahan igkis kaywasewnes git.
27Igme Joawh Batista kaytwa giwnkis:
— Ka sam. Ka hiya wisma keh ariknawnema ku ka ignema Kiyavwiye Uhokri iki wot ayta inuriktak.
28Yis kuwis hiyak ku samah nah kinetihwa gimin. Nah awna ku nah ka Cristoma. Nah ay he adahan ahegbetevyenen madikte gavit gaytni.
29Nah ay kewa pahavwi awaygbe ahegbetene inetit gidahan pahavwi ku pariye maripkewviye gukak pahavu tino. Nor tino ka kamax igi inetitkekne. Eg kamax igi ku pariye maripkewkerevye gukak. Ner inetitkekne ig he tabir timepne giwn ner maripkewkerevye gukak nor tino ku samah ig kinetihwene gukak. Ig timapni hene, ig batek ka aynsima. Nah hawata. Ku aysaw nah hiya hiyeg, timepne Kiyavwiye Jesus giwn, nah batek ka aynsima.
30Amawka Kiyavwiye Jesus ig navit minan. Nahme amawka warikapte giw.
31Ig ayta inuriktak. Inneki keh ig avitmin madikte hiyeg. Wixwiyme ariwntekne inin hawkri, wixwiy amadgayavu inin. Wixwiy he kinetihwa amin hiyakemniki amedgenen inin. Igme inuriktekne, ig avitmin madikte hiyeg.
32Ig kinetihwa amin ku pariye ig hiyap aynte inurik. Ig kinetihwa amin ku pariye ig timap ayge. Heneme ka kebnema hiyeg amava inakni giwn.
33Ignesme ku pariye amerevye inakni Kiyavwiye giwn, igkis hiyeke Kiyavwiye Uhokri ku ig igyewa.
34 Ig Kiyavwiye Jesus ig Kiyavwiye Uhokri gawahkisni uminwiy. Ig akki Kiyavwiye Uhokri giwn wotwiy akak madikte gikiytani giwntakwa Kiyavwiye Uhokri Gitip. Mmanawa ig Kiyavwiye Uhokri kivunsig akak Gitip yumanene awetu.
35Ig batekye gikak igi gikamkayh. Ig iki madikte kumadukaki git.
36Ku pariye kamaxwevye givitit ner gikamkayh, igi aymuhwa gimun Kiyavwiye Uhokri adahan avanenekwa. Heneme ku pariye ka kamaxwa givitit gikamkayh, igi ka aymuhwati gimun Kiyavwiye Uhokri. Ig patehwevye giwtrik. Ig ka ik adahan ig darihwak gikak.
Henewatbaki ig Joawh Batista awna.
वर्तमान में चयनित:
Joawh 3: pluPB
हाइलाइट
शेयर
कॉपी
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
