Joawh 8
8
Jesus isahkisase pahavu tino ku pariye powkemnihwe adahan eg ka taraksa akiw
1Ig Kiyavwiye Jesus pisenwe gikannuhakni arikutak leglis, ig wagehe avitit ini waxri imuhgivitnene kewye Olivegvit. Ig danuh atere, ig misekwe ayge.
2Hewke hawkanawa ig diyuhe atere arikut leglis akiw. Ayge ig bat paytbuhku, ig kannuhne hiyeg.
3Ayteke neras kannuhekevutnevwi amin amekene Moís gikumadukan ignes danuh atere payak gikakkis neras farizewkis. Igkis waxwe git pahavu tino ku pariye powkemnihwe. Igkis tabirasevgu givetunat Kiyavwiye Jesus ayge giwtrikneswa hiyeg.
4Ayteke igkis awna git:
— Kiyavwiye, nor tino kamaxwika nikwenewa ku samah eg powkemnihwano gikak pahavwi.
5Amekene Moís gikumadukan awna adahan wixwiy padaktevgu akak tip adahan umehpig avatra ini guvowkemni. Pisme, mmah piwn adahan ku samah wixwiy keh gukak?
6Igkis awna inakni adahan gihikekten Kiyavwiye Jesus, marihwa igkis hiyap ba ig taraksa amekene Moís gikumadukan. Igkis muwaka uti gitaraksan adahan igkis gikamyehpitni. Igme Kiyavwiye Jesus timapni hene, ig mabukwe. Ig kavusa anniri waygborit akak giwak.
7Igkisme kavusa ayaptevgi akiw. Ayge nikwe ig kannikase gitew, ig awna gitkis:
— Ku pariye yaytak yumanene gitaraksan, hiyawa igkit padakgu.
8Ayteke ig mabukwe akiw, ig kavusa anniri waygborit akiw.
9Igkis timapni inakni giwn hene, igkis kayah gitaraksankis. Ayge nikwe igkis tivik pahavwimpi. Neras ku pariye kiyaptenene igkiskit tivik. Ayteke nawenyevwime tivik butte. He igkis ikise Kiyavwiye Jesus ig pahavo gukak egu tino ayge gikakkis neras timepnevwi giwn.
10Ayteke ig kannikase gitew, ig hiyap egu tino gudukwenewa ayge givetun. Ig awna gut:
— Kiyavuno, kineyki neras pikamyehpitnivwi? Mmah yuma pahavwinema pivedketni?
11Egme kaytwa giwn:
— Yuma, Kiyavwiye.
Igme awna gut:
— Nah hawata, nah kawnata padakpita. Hiyawa pis tivik diyuhe pivinwat. Heneme ka ba taraksa akiw.
Jesus uguhekevutne uhiyekemniwiy
Jo 1.4, 3.19, 12.34; Ro 13.12; Ef 5.8; 1Tes 5.5; 1Jo 1.5, 2.9
12Ayteke ig awna gitkis neras hiyeg akiw. Giwn:
— Nah kewa paha abukribe gidahankis madikte hiyeg amadgayavu inin. Ku pahavwi wew nukakuh, nah uguh gihiyekemni kahadbe in ka misakwa ke wotbe abet amisnavyebe akiw. Ayge nikwe ik adahan ig hiyak ku pariye hiyakemniki inyewatnene. Nikwe ig aymuhwa gimun Uhokri adahan avanenekwa.
13Igkis farizewkis timapni hene ku samah ig awna inakni, igkis awna git:
— Pisnewa ekkewne pimin. Nikwe piwn he waditnevyenen.
14Igme kaytwa giwnkis:
— Nuwnuh ka he waditnevyenenma. Hiyawa nah ekkewne numinuh heneme nuwnuh ka waditnevyenenma. Mmanawa nah hiyak ku pariyene nah. Nah hiyak ku kitwiye nah.
15Yis yivewkan nuhipetni ba nah kibeynewatma, bawa yiswa yikehbetan akak yidahanwa yihiyekemni amadgaya inin. Nahme ku avim inin nah ka hiyap hiyeg ba ignes kibeynevwiwatma.
16Henneme wake nah gihivetnikisbe adahan ba ignes kibeynevwiwatma, nah hiyavgikiskam wadit. Mmanawa nah ka ikebdihenigkis akakma nuhiyekemninenwatma, heneme nah payak gikak Niguh nawahkisten usuh gihivetnikis baki ignes kibeynevwiwatma.
17Minikwak amekene Moís tamak amadga gikumadukan adahan ku piyana wawneve ku giwnkis tuguh hehpekuye, nikwe ik adahan wixwiy iha inakni giwnkis.
18Ay piyana gikebikis nawneve adahan ekkene ku pariyene nah, nah gikak Niguh nawahkisten, usuhnewa ay. Nikwe ihpanabay wownuh!
19Igkisme ayavgi:
— Kineyva pig?
Igme Kiyavwiye Jesus kaytwa giwnkis:
— Yis ka hiyakun ku pariyene nah. Yis kawnata hiyakgi ku pariyene Niguh. Wake yis hiyakbe ku pariyene nah, yis hiyaknikam ku pariyene Niguh.
20Inakni ig Kiyavwiye Jesus awna ku aysaw ig kannuhekne aynte ariku leglis, kennesa ahumwa karukri akekri. Heneme yumahte hiyeg gikamaxten mmanawa gihawkanavrik kote danuhte.
Ku kitwiye nah, yis ka hiya yisma danuh atere
21Ayteke ig Kiyavwiye Jesus awna gitkis akiw. Giwn:
— Kennesa nutepkemnimet. Avim ini yis ivegvanek heneme waditnevyenenek. Avit yis utivun, yis miyarapnek akak madikte yitaraksan. Ku kitwiye nah, yis ka hiya yisma danuh aterenek.
22Igkis judeyenevwi giwewkistenkis timapni hene, igkis awna:
— Mmahki ig awna inakni? Ba ig me umehwevyemet?
23Igme awna gitkis:
— Yis amedgenene inin. Nahme inuriktekne. Yis yihiyekemni amadgaya inin. Nahme nuhiyekemni ka henema.
24Inneki keh nah awna ku yis miyarapnek akak madikte yitaraksan. Mmanawa ku yis ka kamaxwa nuvitit, yis miyarapnek akak madikte yitaraksan.
25Igkisme awna git:
— Pariyenekap?
Igme kaytwa giwnkis:
— Mmah Ka ba yis hiyapkni ku samah nah akkaw yit pitatye?
26Aysawnemenek nah akkamnih yit yitaraksanek. Nah kadahan ka aynsima iwit adahan nah ekkene yit yitaraksan. Kurime nah ka awna nuwnteknewatma. Ku samah nah ay amadga inin, nah awna ininewa iwit ku pariye nawahkisten giwn nutuh. Ignewa awna iwit ku pariye inyewatnene iwit.
27Igkisme ka pukuha ku ig awna inakni gimin gig Uhokri.
28Ig Kiyavwiye Jesus hiyapni hene, ig awna gitkis:
— Ku aysaw yis ikevunek inut aminat ah ayge nikwe yis hiyaknek ku pariyene nah ku pariye wageswe awayg amadgaya inin. Avim ini yis hiyaknek ku nah ka keh ariknawnema nuwnteknewatma, heneme nah kinetihwa yit ku kamin Niguh kannuhun.
29Ig nawahkisten ig ay nukakuh. Ig Niguh ka ikisun nah pahavonema mmanawa nah avanenekwa kehnenekwa gibetki.
30Ig Kiyavwiye Jesus awna inakni hene, ka aynsima hiyeg ihevye giwn.
Jesus keh wixwiy isahptaw
31Ayteke ig awna gitkis neras ihpenevwi giwn:
— Ku yis ihpenene nuwnuh, nikwe yis inyewa nuhiyegavu.
32Ayge nikwe yis hiyaknek ku pariye hiyakemniki inyewatnene. Amun ini yis isahptawnek.
33Igkisme kaytwa giwn:
— Mmahki pis awna inakni ku usuh isahptawnek? Usuh ka ibuktima. Usuh amekene Abraawh gihiwhivwi.
34Igme kaytwa giwnkis:
— Ku pahavwi taraksevye, nikwe ig kewa ibuktibe. Pahavwi ibukti ka hiyap igma pes ariw gannivwi gidahan gikivara. Ku pariye hiyeg taraksevye kawnata hiya igma miniw ariw gikehni mbayka. Ihanabay inakni nuwnuh. Henewatbaki in.
35Ku pariye hiyeg ibukti, ig ka misakwa givineku gikivara adahan avanenekwatma. Ku aysaw gikivara muwaka, ig piyukwig. Heneme ig ka piyukti gikamkayh hene. Ku pariye ikamkayhti, igi ik adahan ig misakwa givineku gig adahan avanenekwa.
36Nah Uhokri gikamkayh. Ku aysaw nah keh yis isahptaw ariw ini bukitka, ayge nikwe hiyawa yis miniw ariw madikte yikehni mbayka. Avim ini yis inyewa isahptaw. Nikwe yis ik adahan yis humaw Uhokri gikamkayuvwi adahan yis aymuhwa gimun adahan avanenekwa.
Ku pariye hiyeg ka kighaw git Uhokri ignes gigkis wavitye gikivarakis
37— Yiwnavriknawa yis awna ku yis amekene Abraawh gihiwhivwi heneme gihiyekemni yuma ay yivit. Yis aharitnene nuwmepten mmanawa nuwnuh ka kawetri ay abet yihiyekemni.
38Nah ekkene yit ku pariye nah kuwis hiyap aynte gimun Niguh. Yisme nawenyewa yig giw nudahan. Yis ihpene giwn ner yig.
39Igkisme kaytwa giwn:
— Ignewa amekene Abraawh ku pariye wiguh.
Igme kaytwa giwnkis:
— Wake yis inyewa giwntakbe amekene Abraawh, nikwekam yis giwetniwatakam.
40Henneme gihiyekemni yuma ay yivit. Nah ekkene yit inyewatnene iwit, iwit ku pariye igwa Uhokri gakkan nutuh. Heneme yis aharitnene nuwmepten. Amekene Abraawh ka kehkam akebi inin.
41Yis giwetniwata yig nawenyewa.
Igkisme kaytwa giwn:
— Usuh yuma nawenyewatma wiguh. Usuh ka battagma. Ignewa Kiyavwiye Uhokri igyewa wiguh.
42Igme awna gitkis:
— Kawa. Ig ka ignema yig. Wake yig Uhokribe, yis batekkam nukakuh. Mmanawa nah pes giwntak Uhokri, nah humaw giwntak Uhokri. Ka nuwnteknewatma nah ayta atan. Ignewa Uhokri awahkisun atan.
43Mmahki yis ka pukuha nuwnuh? Nah akkite yit ku samah. Awaku yis ka amevekere nuwnuh.
44Mmanawa yig ig wavitye gikivarakis. Yis yibetki keh ner yig gibetki. Ku samah akavuska hawkri ig umehekevutne, ig kavetunsa hiyakemniki ku pariye inyewatnene. Mmanawa yuma aynesnima iwit inyewatnene ay abet gihiyekemni. Ig awna wasaymkanen mmanawa innewa wasaymaka ay abet gihiyekemni. Ig kinisekevutne. Ig wasaymaka ahawkri.
45Inneki keh yis ka ihpa nuwnuh mmanawa nah awna yit iwit ku pariye inyewatnene.
46Yuma pahavwinema yaytak hiyavun nah taraksa. Avanenekwa nah awna yit iwit ku pariye inyewatnene. Mmahki nikwe yis ka ihpa nuwnuh?
47 Ka sam. Ku pariye Uhokriyan igi timap Uhokri giwn. Yisme ka Uhokriyanvuma. Inneki keh yis ka timepkere giwn.
48Igkisme judeyenevwi giwewkistenkis awna git:
— Pis taraksevye ke neras hiyeg samariyenevwibe. Pis wavitye ay pivit. Hene pis kuri.
49Igme kaytwa giwnkis:
— Yuma wavitye ay nuvituh. Nah kiyatha Niguh. Yisme miyathan.
50Nah ka ayta adahanma kiyathasewne gitkis hiyeg amedgenevwi inin. Heneme pahavwi ay ku pariye muwaka nah kakiytani. Ig gisayreptenkisnek neras ku pariye kane kiyathan.
51Ku pahavwi ihevye nuwnuh, igi ka miyatiynek. Ig aymuhwa gimun Uhokri adahan avanenekwa. Ihanabay inakni nuwnuh. Henewatbaki in.
52Igkis timapni hene, igkis awna git:
— Wownavriknewa. Kuri usuh hiyak kabayntiwa ku wavitye ay pivit. Ig amekene Abraawh miyap. Madikte Uhokri gawnevevu miyarap. Pisme awna: “Ku pahavwi ihevye nuwnuh, igi ka miyati.” Mmahkap pis awna inakni hene?
53Mmah pis gavitmin wiguh amekene Abraawh ku pariye ayiva miyap? Mmah pis gavitminkis Uhokri gawnevevu ku pariye miyaravye? Pariyenekap?
54Igme kaytwa giwnkis:
— Wake nahwa kiyathasawbe he nuwnteknenwatbe, nikwekam nuwnuh he waditnevyenenkam. Heneme ignewa Niguh kiyathasan, ig ner ku pariye yis kanum yiwohkiga.
55Heneme yis ka hiyakgi. Nahme nah hiyakgi. Wake nah awnabe: “Nah ka hiyakgi”, nikwekam nah wasaymewvikam ke yisbe. Heneme nah inyewa hiyakgi. Nah ihpene giwn.
56Ig uhawkriwiy amekene Abraawh ig minikwak ig hiyakni ku nah danuhnek amadgat hawkri. Inneki keh ig bateke. Ig hiyakni, ig bateke gimin.
57Igkis timapni hene, igkis awna git:
— Pis kote kiyavwite. Pis ka hiyapti amekene Abraawh. Mmah ahiyaka pit inakni?
58Igme kaytwa giwnkis:
— Avit ig amekene Abraawh humaw, nah ayiva ay kuwis. Ihanabay inakni nuwnuh. Henewatbaki nah ay.
59Igkis timap inakni hene, igkis awna:
— Ig Jesus makukse amekene Abraawh. Uyay katiwnise ini gitaraksan git. Uyay umehpig.
Igkis kidise tip adahan givedkepten. Igme miniwkehevgikis. Ig pese arikutak Uhokri Givin.
वर्तमान में चयनित:
Joawh 8: pluPB
हाइलाइट
शेयर
कॉपी
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
