Lucas 16

Tuumpë nyi''ijxpät mëti'ipë ka'ap tsokyën ja wyintsën

1Näyjyëtu'un ja Jesús ya'atë tukmëmëtyäky ja y'ijxpëjkpëtëjk:

Jää ijty tu'uk ja ja'ay kumeenypë, myëët'ajtyp tu'uk ja tyuunpë mëti'ipë tyukkëwent'ajtypyën ja nyaax kyam ets ojts yajtuk'ëwaanë ko ja tyuunpë wiinktsow tyajtuny ja wit meeny. 2Ënät ja kumeenyjyä'äy ja tyuunpë twoowtsooy ets t'ënëmaay: ¿Tëy jëtu'un ijxtëm myajnikäjpxyënë? Tuk'ëwa'anëkës tii të xytyuny, jä'ä ko pën jëtu'un mijts ka'ap tjëkyepy m'ëktuunëty ma ëjtsën. 3Tääts ja tuunpë wyinmaay: ¿Tiijës ënät ntunëp koos yë nwintsën yë ntuunk xypyëjkëty? ka'apës tii mëk'ajtën nmëët'aty etsës nkamtunëty ets tsëtyuumpës koos ja ayajk ako'onën n'amëtowëty. 4Tääts wyinma'anypyäty tii tyunäämpyën ets ojts myäy tyäjy: Tëës nnijawë tiis ntunëpën ets wi'ixës ja ja'ay xykyupëktëty tyëkoty koos ja nwintsën ja ntuunk xypyëjkëty. 5Ënät nitu'ukjaty twoowtsooy ja ja'ay mëti'ipë ja wyintsën myënu'kxy'ajtëpën. Tääts t'ënëmaay ja mëwyiinpë ojts myinyën: ¿Jënu'un yë nwintsënës xymyënu'kxy'äty? 6Tääts y'ëtsooy: Mëko'px tu'ts yë olivë on. Tääts ja tuunpë y'ënäny: Tyaa ja nyinoky mëti'ipë mjaayën, pe'tym jaaytyëkats, wëxtyikxy majk tu'ts je'eyë pëjkta'ak. 7Ënät ja wiinkpë tyajtëëy: ¿E mijts, jënu'un xymyënu'kxy'äty? Tääts y'ëtsooy: Mëko'px xa'k ja tsajpmokway. Tääts t'ënëmaay: Tyaa ja nyinoky mëti'ipë mjaayën, pe'tym jaaytyëkats, majkta'px xa'k je'eyë pëjkta'ak. 8Tääts ja wintsën tnija'awëy ko ja tuunpë ka'apë oy myëtunyën, tëë oy tniwijy'äty wi'ix tii tunëtyën. Jëtu'un yë ja'ayëty y'ëtë'ëtstë nyiwijy'ajtëp ja kyë'ëmtuunkëty, ets ni'ik mëti'ipë akootstuuy yajpatëpën këtiinëm mëti'ipë tëë ja të'kxën jajën tpaatën.

9Jëtu'un miits nkajpxwijtë ko ja wit meeny mëti'ipë ka'ap myëtëyëtyën, jam xyajtuntëty ma ja ja'ayëtyën ets xypaatëty ja mëti'ipë m'oyjyawëtëpën; jä'ä ko ënäty ja mwit mmeeny kyëxtë mmëët'atëp pën m'oyjyawëtëpën.

10Pën oy yajtuunpy ja wit meeny wäänëpë, näjyëtu'un tyajtuna'any ja maypyë. Pën ka'ap tyajtuny oy ja wit meeny wäänëpë, nän ka'ap tyajtuna'any oy ja maypyë. 11Pën ka'ap miits oy xyajtuntë ja wit meeny ka'apë myëtëyëtyën, ¿wi'ix oy xy'ëkyajtuntëty ja mëti'ipë mëtëyën? 12Pën ka'ap miits ja ja'ay ja jyä'ä oy xyajtuunëtë, ¿wi'ix oy xyajtuna'antë mëti'ipë mjä'ä'ajtëpën?

13Ka'ap tjëkyepy tu'uk ja tuunpë tmëtunëty nimäjtsk ja wintsën; jä'ä ko wä'än jëtää tu'uk oy tmëtunëty ets tu'uk ka'ap oy tmëtunëty; ja mëti'ipë ka'ap oy tmëtunyën jä'ä y'ëxëëk'ixëp e ja mëti'ipë oy myëtuumpyën jä'ä y'oyjyawëp. Paaty näjyëtu'un ka'ap tjëkyepy yajmëtunëty ja Tios ets näjyëtu'un yajmëtuunpëty ja wit meeny.

14Ja fariseë ja'ayëty mëti'ipë ja meeny yi'iyë y'atsojktëpën. Tam ënäty tmëtowtë, paaty ja Jesús je'eyë nëxik tukxiktë. 15Ënät ja Jesús y'ënëmaayëtë:

Miits win'ë'ëmpëtëjkëty, wa'ats mnäyajnaxëtë ma ja ja'ayëtyën, e ja Tios nyija'ap ko y'ëxëëkëty ja mjot mwinma'anyëty; jä'ä ko mëti'ipë ja ja'ay myëjpëjktaktëpën, Tios y'ëxëëk'ijxyp yë'ë.

Ja ënä'ämën tëyajtën ets ja Tios ja kyutujkën

16Yë ënä'ämën tëyajtën ets käjpxynyajxpëtëjk jääpaat jyëjpkëxy ma ja Juan Yajnëëpäjtpë jyuuky'äjtyën. Ets tsyo'ontä'äky ja oy aaw oy ayuk mëti'ipë Tios kyutujkën'ajtypyën ets may ja ja'ay jam tyëkëja'antë.

17Ka'ap tsyipëty ets tsajp ets naaxwiinyëtë kyutëkoyëty, yë'ë ni'ik tsip wi'ix ja ënä'ämën tëyajtën yajpatunëty.

Ma Jesús nikäjpxyën ko ka'ap y'oyëty ko ja'ay tsyënaaywyä'kxy

Mt 19:1-12; Mr 10:1-12

18Ko pën ja tyo'oxytyëjk t'ëxmatsëty ets ja wiinkpë tpëkëty, pëjkën ukën ënäty kyawintsë'këp; ko pën tpëkëty ja to'oxytyëjk mëti'ipë ënäty të yaj'ëxmatsyën, pëjkën ukën ënäty ja wyintsë'kën yajtëkooyëp.

Ja Kumeenyjyä'äy ets ja ëyoopëja'ay Lázaro

19Jam ijty tu'uk ja kumeenyjyä'äy, xoxy pëky, oytyuny, aak winjemy nyäxyoxyë ets xëmë ka'ayën ukën mëj nipëjktaakë. 20Jamts ja ja'ay wiinkpë mëti'ipë xyëëwajtypyën Lázaro, ëyoopëja'ay ets pu'utspëjkëp, jam y'u'unyë winjëpom ma ja kumeenyjyä'äy ja tyëjkën. 21Yajxon tjakayä'äny ja tsajpkääky apu'uxk mëti'ipë ka'apën naaxkëjxy ma ja kumeenyjyä'äy ja kyääypyäjnën; jam ja uk nyiminyë ets ja pyu'uts yajniweey. 22Ënät ojts y'o'knë ja Lázaro ets yajnëjkxë ja Tios ja y'anklës jam tsajpjotm ma ja Abraham yajpaatyën; ok ja kumeenyjyä'äy näjyëtu'un y'o'ky, tääts nyaaxtëjkëy.

23Jap ënäty y'ëyoy ja kumeenyjyä'äy ma ja o'kpë nyipätën, tääts ojts y'ijxë'ëky ets t'ijxpaty ko jam tsajpjotm yajpaaty ja Abraham mëët ja Lázaro. 24Tääts jap mëk yujk'ënany: Tatë Abraham, pa'ëyoowkës. Tun mëyajtën, käx yë Lázaro, wä'än yë kyë'ëjëjp tyajxooky ets tmëminëty, wä'änës yë nyä'än tyajxooky. Mëkës yap jëënjoty n'ëyoy. 25Tääts ja Abraham y'ënëmaayë: U'unk, yë'ë mja'amyätsëp ko mijts akujk jotkujk të mjuuky'äty naaxwiiny; yë Lázaro, tëë y'ëyoy; e tyam, tëë tpaaty ja jotkujk'ajtën; mijts tyam mtuka'ajëp ets mëk m'ëyowëty. 26Ëpëky näjyëtu'un, tää tu'uk ja mëjjut mëti'ipë ëpëkyjyäty xyaj'ijtëmën. Pën yaa yajpatp ets jyanaxa'any ma miitsëtyën, ka'ap tjëkyepy. Näy ka'ap tjëkyepy ets yam myinëty ja ja'ay mëti'ipë yajpatëpën ma miitsëtyën.

27Ënät ja kumeenyjyä'äy y'ëtsooy: Tatë Abraham, pën jëtu'un, tun mëyajtën, käx yë Lázaro maas nteety yë tyëjkën. 28Jaaktamës ja nmëkä'äx ja nimëkoxk ets nëëmëty ko wä'än t'ëxmatstë ja ëxëëk winma'any këtiipë yaa näjyëtu'un myintëty ëyoopë ëyoowtaknjoty. 29Tääts ja Abraham y'ënäny: Tam tmëët'atë ja Moisés ja y'ënä'ämën ets mëti'ipë ja Tios kyäjpxynyajxpë ojts nikajpxtën, wä'än tmëtoowkukëtë wi'ix y'ënä'änyën. 30Ënät ja kumeenyjyä'äy y'ëtsooy: Tatë Abraham, jootwinpitëp yë'ëty, je'eyëp ko ënät ko tu'uk yë o'kpë jyuukpyëkëty ets nyinëjkxëtëty. 31Tääts ja Abraham y'ëtsooy: ¿Pën ka'ap tkupëktë mëti'ipë ja Moisés jyääyën ets wi'ix y'ëna'antën ja Tios ja kyäjpxynyajxpëtëjk, nän ka'ap tmëpëka'antë oy tu'uk ja o'kpë jyatimjyuukpyëjkpë.

वर्तमान में चयनित:

Lucas 16: QUETZMIXE

हाइलाइट

कॉपी