Luuk 14

1Vuusum Daaŋa dinyi ate Yeezu yaa cheŋ Farisiima wanyi yeri ayen wa dɛ ŋandiinta. Nuruwa jam ka kpagi. Dila danni Farisiima ale Sinsaŋŋa sagrɔma yaa kasim jam a nya Yeezu ase wa le nye wari ya. 2Nuru wanyi a yaa boro ate wa nisima ale wa naŋsa a jam fuusi nna yegayega a yaa za Yeezu niŋ 3ate Yeezu yaa bek Sinsak sagrɔma ale Farisiima ayen, <<Sinsaŋŋa a siak ate nuru a tebi yɔgnyieŋsa Vuusum Danni yaa ŋa kan siagi?>> 4Alege ba an tulisi wari ya. Yeezu yaa tebi nuruwa ate wa kuli. 5Yeezu yaa bek ba ayen, <<Ase ni wanyi a nin ta nidoabili yaase naab ate ba wanyi a lo vili po Vuusum Danni, ni kan yeeri nidoabinni yaase naamu Vuusum Danni dila dekdega a ta a nyini?>> 6Alege ba an jam baga a tulisi wa beŋŋa de mɛ.

7Ba ale jam a kali ayen ba dɛ la, Yeezu yaa nya ale nichamma ba gela a lueri jigi maŋsaŋa a kali. Yeezu ale nya dila la, wa yaa biisi magsi wamagsini ayen, 8<<Nuru a dan wi fu ayen fi jam maa dɛ tigi ŋandiinta, kan kali jigi maŋŋa. Dii nyiŋla, ku baga a nye kama ate nuru waai ale ŋman chim nuru kpioŋ a gaam fi la a jam ayen wa maa dɛ tigini ŋandiintaŋa. 9Nuru waai ale wi fu ayen fi jam a maa dɛ tigini ŋandiintaŋa la, ale jam ŋaaŋnyiŋ a weeni fu ayen fi yiri abe fi ge ate nuru waai ale ŋman gaam fu la a kali. Dila abe ta ka chivie a jam fi jigi, wa ale weeni fu ate fi siŋ tɛŋ la nyiŋ. 10Alege, fi dan cheŋ, ga kali juijui ale kan magsi fi kali la, ate waai ale wi fu la yaa jam fi jigi a weeni fu ayen, <M doa, yiti jueli jam kali jigi maŋka de.> Nna le ta zula a jam fi jigi ate waai meena nya. 11Nuru waai ale pai wadek a chim nuru kpioŋ la, ba le zaab wa, alege nuru waai ale a zaab wadek la, ale chim ka nuru kpioŋ.>>

12Yeezu yaa weeni nuru waai ale wi wa ayen wa jam ate ba dɛ la ayen, <<Fi dan nye kantueŋ yaase yok ŋandiinta kan wi fi doaba yaase fi suata yaase fi mabisa yaase fi kalimɔtidɔ yaase jigsirɔba, bala meena waai a dan nye ŋandiinta tigi, ase dila la ba pilim a wi fi mɛ kama. Dila abe dan nye, ku a sak ase fi nya fi ale nye diila tutuna kama. 13Fi dan ta ŋandiinta tigi, wi ŋanjaksa ale gbattaŋa ale gbansa ale yeeba#14:13 Teerika 14:28-29 14ate fi nya niaka, dii nyiŋla, bala waai an baga nye wari a tuni fu. Ka Naawen ale wa tuni fu dai dii danni ate wayɔrisima nyam le yiti kum po la.>>

15Nidoama wanyi ale jam maa kala a dɛ ŋandiintaŋa la a yaa wom dii ate Yeezu a weeni la a yaa weeni wa ayen, <<Niauŋ ale waai ale wa dɛ ŋandiintaŋa Wen naamu po la.>>

16Alege wa yaa weeni wa ayen, <<Nuru ale jam nye tigi kpien a wi nuruba yega. 17Ba ale ga dik ŋandiintaŋa a nueri la, wa yaa tom wa tomteerɔwa ayen wa nyiem a weeni baai meena ate wa wi la ayen ba jam ale jaab meena a gomsi magsi kama. 18Alege ba meena wanyi wanyi a yaa tulisi ayen ba kan nya suik a jam. Waai ate tomteerɔwa a dɛ niŋ ga weeni la, yaa weeni ayen, <M da ka tɛŋ ate ku a fɛ ayen m ga nya ka. Mi a saalim, mi an baga a jam.> 19Wanyi mɛ a jam weeni ayen, <M da ka m lalik kpaansa bunu ate mi a cheŋ ayen m ga pai si kpa nya. Mi a saalim, mi an baga a jam.> 20Wa choa mɛ a jam weeni ayen, <M faari ka nipok, dila nyiŋ mi an baga a jam.> 21Dila tomteerɔwa yaa ŋman jam weeni wa kpagni kude. Kpagni yaa weeni wa tomteerɔwa ale suipuurum ayen, <Cheŋ suiduataŋa po nwuli tɛŋ kpieŋka a ta ŋanjaksaŋa ale gbattaŋa ale yeema ale gbansaŋa a jam.> 22Tomteerɔwa yaa weeni ayen, <M nyɔnɔ, fi ale weeni m nye diila mi nye kama alege dɔkku an diem sueri ya.> 23Ate kpagni yaa weeni tomteerɔwa ayen, <Cheŋ tɛŋka suiduataŋa po a weeni abe fi fɛ nuruba ate ba jam ate m yenni a sueri. 24Mi ale a weeni ni ayen baai meena ate m liŋ wi la, ba wanyi mɛ la nɔi a kan tiri mi ŋandiintaŋa de.> >>

25Nuru boari yaa jam va Yeezu a cheŋ ate wa cheem a weeni ba ayen, 26<<Nuru waai dan jam mi jigi ale an kisa wadek ko ale ma ale pok ale bisa ale suata ale toaba ale wadek nyuvunni, wa kan baga a chim mi ŋaaŋviirɔ. 27Waai a dan kan gomsi wadek a magsi ninammoa, kula nyɔnɔwa an baga chim mi ŋaaŋviirɔ. 28Ase ni wanyi a dan a poli yie woŋ sɛka, wa a kan kali tɛŋ a poli wa ale wa pai jabuui ale jabuui a sɛ yenni a nueri la? 29Kan daa di, wa dan nyubi nyubini alege wa an baga a sɛ nueri ya waai meena ale nya wa ale nye diila a la wa kama 30a weeni ayen, <Ni nya nuruwa de ale piilim wa yeri sɛka alege an baga a sɛ nueri ya.> 31Naab abe dan nyini peelim ale nuruba tusa pi (10,000) ayen wa kpaliŋ chaab ale naab wa choa waai ale ta nuruba tusa pisiye (20,000) la, ku a fɛ kama ate wa kali tɛŋ a poli zimm nya ase wa ta pagrim yegayega a baga tu chaab ale naab nwala ya. 32Wa be dan nya ale wa an baga, wa a tom ka nuruba ate ba dɛ niŋ a ga tu naab nwala suiku po a saalim wa ate ba nye magsi chaab alege ate naawa dek a diem bo suiku po niŋniŋ a cheena. 33Dila nyiŋla mi a weeni ni kama ayen ni wanyi mɛ la an baga chim mi ŋaaŋviirɔ, ka wa nin yeeri wa nisa jaabuuri meena ate wa ta la po.

34<<Yesa masa kama, alege si masimu a dan kan boro fi an ŋman baga nye ate si a masa. 35Si ŋman ka kiri a te tɛŋka yaase tampoi ya, ba yuk si a basi kama. Waai abe le ta turi a wom la, abe wom.>>

वर्तमान में चयनित:

Luuk 14: BWU

हाइलाइट

कॉपी